28/07/2025
Rabbi ha sharfo, oo ha karameeyo, oo ha asturo haweenkeena Soomaalida ah meel kasta oo ay joogaan, hablahu waa jawharad iyo luul qiimaheeda aan wax gooya jirin, hablaheena Soomaalida ahi waxay kaga duwan yahiin dunida kale dumarkooda gaarinimada, hawlkarnimada, garashada iyo kaska aan cid ku gaadha jirin.
Caalamul Islaam soo arkay ka bilaw Pakistan, Morocco, Masar, Persian ilaa South East Asia, weli ma arag gabadh guri dhan cunto karistoodii, nadafadoodii iyo hawshoodii ku tiirsantahay, waxaad ku arkaysa magaaloiyinka Soomaalida gabadh yar oo da’deedu tahay 15 ilaa 25 jir, oo toban wiil la dhalatay, oo intay 4 -ta subaxnimo kacdo quraacdoodii, dharkay xidhan lahaayeen u diyaarisa, markay wada ambabixisana, haddana dhar maydh iyo qadadoodii karintii u fadhiisanaysa, habeenkiina casho u diyaarinaysa, meeshay seexanayeena nadiifinaysa oo goglaysa, wallaahi gabadh Soomaali ah ayuunba laga hela.
Waar hooy ninka nin Soomaali ahaw jawharadda dunida cid inala wadaagta, oo nimcada inala qabta ma jirto eh aynu ilaashano.
Oo Sidaynu u ilaalina
Qalbigooda aynu dhawro, aqoontooda diiniga ah aynu kobcino, aynu ka farxino, oo markaad guriga timaado ugu yaraan mar madaxa ka dhunkato, mar aad dhar qurux badan usoo iibiso, mar aad lacag kaga farxiso, mar aad cadar u keento, hablaha aynu ilaashano inay baahi guriga uga baxaan, oo baahi looga faa’iidaysto.
Maxaa Inoogu wacan qoys burburka
Qoys burburka dadkeena ku dhacay waxaa masuul ka ah Aabo Soomaali ah, Allah wuxuu quraanka ku yidhi “Ragga haweenkooda ka masuul ah” macnaheedu maaha inaad xoog iyo cay uga masuul tahaye, masuuliyadu waa naxariista, waa kasbashada quluubtooda, waa u hagar-baxa bar-baarintooda.
Waar Aabaha Soomaaliga ah ee gabadh yar dhalayaw, hablahaaha diinta ku kori, si ay fidmada uga koraan, xooga saar inaan inanta yar ee Allah kugu nimceeyay aanay gurigooda baahi uga bixin, nin habeenkii oo dhan qaylaya maalintii hurda, saw caarkaagii iyo hugaagii oo ah gabadha yari dibadda u bixi mayso, waar hablaha ilaaliya, oo dhawra, oo u naxariista.
Fusuqan, iyo hablaheenan cawradoodii dibadda keenay waxaan aaminsanahay waxa keenay qoys burburka Aabahu ka masuul yahay, qoys aan Aabo lahayn, oo Aabo uun la isk**a sheegto eh, Aabo u hagar baxa ubadkiisu ma dhacdeen inaynu aragno hablaheenii oo cawradooda dibadda keenaya
Rabbi ha sharfo hablaheena
Xigasho: Mohamed Diridhaba
