19/10/2022
Godina Shawaa Bahaa aanaa Fantaalleetti waraanni mootummaa qabata sakattaa WBOtiin bobbaafame jiraattota 3 yoo ajjeesu manneen jiraattotaa hedduu ibiddaan gubuu jiraattonni himan.
Gama biraatin aanaa Fantaallee fi Boosatitti weerarri lafaa humnoota naannoo Amaaraatiin taasifamaa jiru hammaatee jiraachuun ibsameera.
Godina Shawaa Bahaa aanaa Fantaalletti humni waraana mootummaa maqaa sakatta’iinsa WBOtiin bobbaafame jiraattota nagayaa ajjeesuun himameera.
Goolinsi kun torban kana bifa hamaan kan itti fufe yoo ta’u hanga ammaatti lubbuun nama 3 darbuu jiraattonni naannichaa himan.
Namoonni ajjeefaman kunneen tokko miseensa tuuta gadaa Meelbaa kan ta’an nama Boruu Roobaa Lakkuu jedhaman yoo ta’u, Aanaa Fantaallee ganda Tuuroo Baddannootaa lafa Bommisaa jedhamutti waraana mootummaatin ajjeefamuu jiraattotatu hime.
Ajjeechaan kunis kan raawwatame ilbata darbe tahuu jiraattotarraa dhageenye.
Namoonni ajjeefaman lama ammaaf maqaan isaanii baramuu baatus aanaa Fantaallee ganda Gidaaraatti ajjeefaman.
Waraanni mootummaa dhibbootaan lakkaa’amu Aanicha keessa qubsiifamuun hawaasa nagayaa goolaa jira kan jedhan jiraattonni waytii ammaa gandoota akka Haroo Qarsaa, Dheebitii, Ilaalaa-Qararrii, Xuxxuutii, Haroo-Huubaa fi kanneen biroo keessaa horsiisee bultoonni hawaasa Karrayyuu baqatanii jiraachuu dubbatu.
Gandoota kana keessatti ilmi dhiiraa horii bobbaafatee galfachuu hin dandeenye kan jedhan jiraattonni, Loonii fi Re’ee dubartootaa fi daa’imman eegaa akka jiran dubbatu.
Waraanni mootummaa bobbaafame kun Raayyaa Ittisa Biyyaa fi humnoota poolisii addaa Oromiyaa tahuu ibsuun jiraattonni, hawaasarraa humnaan hidhannoo hiikaa jiraachuus addeessaniiru.
Qabata sakatta’iinsa WBOtiin waraanni mootummaa bobbaafame jalqaba jiraattota gandoota Haroo Qarsaa fi Dheebitii buqqisuu kan himan jiraattonni waytii ammaa gandoota akka Tuuroo-Baddannootaa, Gidaaraa, Dirra-Sadeen fi Faatee-Leediitti babal’achuun jiraattota dararaa jiraachuu jiraattonni himaniiru.
Maddi OMN
