Addis Standard Afaan Oromoo

15/10/2025

Raayilaa Amooloo Odiingaa du’an

Finfinnee, Onkoloolessa 15, 2025: Muummeen Ministiraa Keeniyaa duraanii Raayilaa Amooloo Odiingaa du’aan boqochuun gabaafamee jira. Raayilaan yaalaaf gara Hindii deemanii akka turan kan himame yoo ta’u, dhibee isaan mudateen battala du’uu isaanii miidiyaaleen Keeniyaa gabaasanii jiran.

Miidiyaan AFP, Raayilaan yaala fayyaatiif Dhaabbata Yaala Fayyaa Ayurveedik jedhamu kan Hindi keessatti argamutti utuu imalanii lubbuun isaanii darbuu poolisii biyyattii waabeffachuun gabaaseera.

Roobii Onkoloolessa 15, 2025 ganna 80tti lubbuun isaanii kan darbe Raayilaa Amooloo Odiingaa, umrii ga’eessummaa isaanii sochii siyaasaa Keeniyaa keessatti kan dabarsan yoo ta’an, isa keessaa ganna saddeeti mana hidhaatti nama darbamee turedha.

Amajjii 07, 1945 kan dhalatan Raayilaan, sochii siyaasa keessatti taasisaniif keessumaa bara Daani’eel Araap Mooyi Keeniaya bulchan hidhaa, biyya baqaa keessatti nama dabarseedha.

Odeessa guutuuf dubbisaa

Finfinnee, Onkoloolessa 15, 2025: Muummeen Ministiraa Keeniyaa duraanii Raayilaa Amooloo Odiingaa du’aan boqochuun gabaafamee jira. Raayilaan yaalaaf gara Hindii deemanii akka turan kan himame yoo ta’u, dhibee isaan mudateen battala du’uu isaanii miidiyaaleen Keeniyaa gabaasanii jiran. Miidiya...

15/10/2025

“Falmiin Hidha Haaromsaa karaa siyaasaa osoo hin taane karaa teeknikaatiin furmaata argachuu qaba,” - Gorsaa Olaanaa Ameerikaa Dhimma Afrikaa

Finfinnee, Onkoloolessa 15, 2025: Gorsaan olaanaa Ministeera Dhimma Alaa Ameerikaa dhimma Afrikaa fi Baha Giddu Galeessaa kan ta’an Masaad Buuloos waldhabdeen hidha haaromsa guddicha Itiyoophiyaa “dhiibbaa siyaasaa osoo hin taane karaa teeknikaatiin furmaata argachuu qaba” jedhan.

Buuloos af-gaaffii TV Al-Arabiya waliin taasisaniin, Waashingitan biyyoota sadeen, Itoophiyaa, Sudaanifi Masirii gidduutti furmaata nagaafi qaama maraan fudhatama qabu kennuuf kutannoo qabdu irra deebi’anii mirkaneessaniiru.

''Dhimmichi dhimma teeknikaa waan ta'eef, karaa teeknikaatiin furmaata argachuu qaba,'' kan jedhan gorsaan olaanaa kun; “Furmaata qaama hunda biratti fudhatama qabu, keessumattuu dhimma teeknikaa irratti hojjachaa jirra” Jedhan.

''Kun Itoophiyaa, Masiriifi Sudaaniif dhimma jiraachufi jiraachuu dhabuuti,'' kan jedhan Buuloos, ''Pirojektiin humna bishaanii guddichi eebbifamuun dhugoomeera. Murtoon gara fuulduraa kamiyyuu dhugaa kana tilmaama keessa galchuu qaba,'' jechuun akeekkachiisan.

Itti dabaluunis, biyyi isaanii tumsa karaa nagaa Kaayiroofi Finfinnee gidduutti taasifamu deeggaruu itti fufti jechuun, biyyoonni lamaan kun biyyoota “walitti hidhamiinsa seena qabeessa qabaniifi walitti bu’uu hin qabne Dha” jechuun ibsaniiru.

Gorsaan kun daawwannaa dhiheenya kana Itoophiyaa fi Masiriitti taasisaniin dhimmi Hidha Haaromsaa xiyyeeffannoo guddaa akka ta’e kan dubbatan yoo ta’u, mariin Ameerikaa fi Masirii gidduutti taasifamaa jiru itti fufee akka jiru hubachiisaniiru.

Buuloos dhimmi Hidha Haaromsa Guddicha Ityoophiyaa Pirezidaanti Doonaald Tiraampiif “baay’ee barbaachisaa fi dhimma istiraateejii” ta'uu ibsuun, yeroo jalqabaaf gara aangoo pirezidaantummaatti dhufanitti dhimmichaaf furmaata argachuuf ciminaan hojjechaa turuu isaanii yaadachiise.

Itti dabaluunis marii fi irdubbannoo dabalataa hawwiidhaan eeggachaa akka jiran himaniiru.
Pireezidaantiin Ameerikaa Doonaald Traamp preezdaantii Masirii Abdil Fattaah Al-Siisii ​​fi Ministira Muummee Itoophiyaa Abiy Ahmad (PhD) gidduu jaarsummaf seenuuf fedhii qabaachuu fi dhiisuu isaanii gaafii Masaad Buuloos gaafatamaniif deebii yoo kennan, “Yoo waaqayyo yoo ta’e, waliin ni argina, Galma sanaaf hojjechaa jirra” jedhan.

Dilbata darbe pirezidaantiin Masirii Abdil-Fattaah Al-Siisiin qophii ‘Cairo Water Week’ 8ffaa irratti “yeroo Itoophiyaan itti gaafatamummaa malee dhimma Abbayyaarratti murteessitu Masiriin harka marattee hin ilaaltu, dantaa bishaanii Masrii eeguuf tarkaanfii barbaachisaa hunda ni fudhatti” jechuun isaanii ni yaadatama.

Masiriin Hidha Haaromsaa Guddicha Itoophiyaa(GERD) waliin walqabatee “ilaalcha bara gita bittaa” tumsa biyyoota qarqara laga Naayil dadhabsiisu tarkaanfachiisuun “haasaa dubbii barbaachaa” taasisaa jirti jechuun Ministeerri Bishaaniifi Inarjii Itoophiyaa ibsa borumtii isaa baaseen deebii kenneefii ture.

Deebichaanis, Itoophiyaan “mirga Naayil fayyadamuu qabdu dhiibbaa yookan sodaa keessa galuun hindhiistu” jechuun, “ [Masiriin] tumsa dhiistee imaammanni Itoophiyaa gad xiqqeessuu qabdu jalaa fashalaa’eeraa” jedhan.

14/10/2025

Xiinxala: Walii galtee Itoophiyaa fi Somaaliilaandi – waadaa waloo hin raawwatamne fi daawwannaa Piraazidaanti Abdillaahii

Finfinnee, Onkoloolessa 14, 2025: Pireezidaantiin Somaaliilaandi Abdirrahimaan Mohaammed Abdullaahi daawwannaaf harra Finfinnee seenanii jiran. Kunis erga filamanii daawwannaa isaan Itoophiyaatti taasisan isa jalqabaati. Televizyiniin Somaaliilaandi daawwannaan kun affeerraa Finfinneerraa kallattiin dhiyaate ta’uu ibseera.

Daawwannaa kana keessattis Preezidaanti Abdillaahiin Muummee Ministiraa waliin dhimmoota walittitti dhufeenya waloo, tumsa naannoo fi hariiroo Itoophiyaa fi Somaaliilaandi cimsuurratti marii gaggeessu jedhameetu eegama.

Daawwannaan Pireezidanti Abdillaahii wayita dhimmi walii galtee Itoophiyaa fi Somaaliilaandi Amajjii 2024 taasifame ijoo dubbii ta’uurraa xiqqoo duubatti jedhetti kan taasifamedha. Walii galteen Amajjii 2024 Itoophiyaa fi Somaaliilandi jidduutti taasifames alas Itoophiyaan akka ulaa galaanaa argattu, bakka isaammoo Itoophiyaan Somaaliilaandi akka biyyaatti fudhatama akka kennituuf kan ibsu ture.

Raawwiin garuu walii galteen kun akkasumaan kan lafatti hafedha. Lafa irratti walii galtee kana booda raawwate kan irratti hin mullanne yoo tahu, kanaanis haalli fudhatama walii galtee kanaa sirnaan kan hin qindoomne, ulaa galaanaa argachuun wal qabatees waanti duraa duubni raawwii dhugoomes hin mullanne. Addis Standard gabaasa hordoffii dhimma kana irratti taasisaa tureen, walii galteen kun mallatummaan isaa mallatoo diiploomasiif male mura cehumsa dhugoomsuuf yaadame akka tahe galmeessee jira.

Raawwiin waliigaltee kanaa maaf achumatti dhaabate?
Odeessa guutuu xiinxala kanaa asiin dubbisaa

Finfinnee, Onkoloolessa 14, 2025: Pireezidaantiin Somaaliilaandi Abdirrahimaan Mohaammed Abdullaahi daawwannaaf harra Finfinnee seenanii jiran. Kunis erga filamanii daawwannaa isaan Itoophiyaatti taasisan isa jalqabaati. Televizyiniin Somaaliilaandi daawwannaan kun affeerraa Finfinneerraa kallattiin...

14/10/2025

Laggasaa Tulluu, (PHD) Jibuutiitti Ambaasaaddara Itoophiyaa ta’uun muudaman

Finfinnee, Onkoloolessa 14, 2025: Laggasaa Tulluu, Ministeerri Tajaajila Koomunikeeshinii Mootummaa duraanii Jibuutiitti Ambaasaaddara Itoophiyaa ta’uun muudaman. Ministeerri Dhimma Alaa Itoophiyaa harra ibsa baaseen, Laggasaa Tulluu muudama isaanii kana fudhachuun Pirezidantii Mana Murtii Federaalaa duratti sirna kakuu raawwatanii jiran.

Sirna kakuu kana irratti Pireezidaantiin Itoophiyaa Taayyee Atsqasillaasee Ambaasaaddara haarawa ta’uun kan muudaman Laggasaa Tulluu walitti dhufeenya biyyoota lameenii ittuu gabbisuuf akka hojjatan gaafatanii jiran.

Sirna kakuu kana irratti Ministirri Dhimma Alaa Itoophiyaa Geediyoon Xiimootiwoos akksumas Deetaan Ministiraa Ministeera Dhimma Alaa Obbo Biraanuu Tsaggaayee irratti argamanii jiran.

14/10/2025

Gamaaggama raawwii hojii Naannoo Oromiyaa har'a eegale; hojii dhabdummaa, hanqinni bulchiinsa gaarii ijoo dubbiiti jedhame

Finfinnee, Onkololeessa 14, 2025: Gamaggamaa raawwii hojii Paartiifi Mootummaa Naannoo Oromiyaa kurmaana 1ffaa bara 2018 magaalaa Adaamatti geggeffamuu eegaleen, malaammaltummaa ittisuun, hoji-dhabdummaa xiqqeessuu, hiyyummaa xiqqeessuu fi rakkoolee bulchiinsa gaarii furuun waltajjichaaan xiyyeeffannoo argachuu akka qaban Obbo Shimallis Abdiisaa dubbataniiru.

Gamaaggama raawwii hojii Paartiifi Mootummaa Naannoo Oromiyaa guyyaa sadiif tururratti Pirezidaantiin Mootummaa Naannoo Oromiyaa Obbo Shimallis Abdiisaa haasaa baniinsaa taasisaniin, hojiiwwan misoomaa naannichatti hojjetaman fedhiifi dandeettii misoomaa jiru waliin yoo ilaalamu ammas hedduutu hafa jedhaniiru.

Hoggansi isaanii qormaatilee garagaraa keessa darbuun gaaffii uummataa deebisuuf milkaa'inoota argamaniin osoo hin qabamne egeree dhalootaaf yaaduun cichoomina, kaka'umsaafi xiiqii ol'aanaan hojjechuu akka qabu hubachiisan.

Sadarkaa biyyaa irraa hanga nama dhuunfaatti "badhaadhina" fiduuf aadaa qusannaa uummataa cimsuu, humna waloo fi dhuunfaa siriitti fayyadamuu, kenna tajaajilaa ariifataafi hojiiwwan biroon irratti hojjetamuu akka qabanis kaasaniiru.

Dabaluunis, hojiiwwan bara darbe hojjetaman sirriitti akka qoratamaniifi geggeessitoonni sirriitti akka ofi ilaaluu qaban hubachiisaniiru.
Gaaffilee misoomaa fi kanneen biroo lammilee irraa dhiyaatan akka naannootti deebisuuf hojjetamaa jiru kan jedhan Pirezidaantichi, ta'us malaammaltummaa ittisuun, hoji-dhabdummaa xiqqeessuu, hiyyummaa xiqqeessuu fi rakkoolee bulchiinsa gaarii furuun waltajjichaaan xiyyeeffannoo argachuu akka qaban akeekaniiru.

Dabalataanis danqaawwan kanneen akka hannaa, networkii, hojii dhabdummaa, qaala’iinsa gatiifi injifannoo xixiqqaatti of dagachuun hagam to’achaa akka jirru gamaaggama kanaan qoratamuun adda bahuu qabu jechuu miidiyaaleen mootummaa gabaasan.

14/10/2025

Madagaaskaaritti Mormii cimee itti fufuu hordofee Pirezidaantiin biyyatti sodaa nageenyaaf jecha dhokatan

Finfinnee, Onkololeessa 14,2025: Mormii guutuu biyyattii dhuma baatii darbee irraa eegale itti fufaa jiruun prezidaantiin Maadagaaskaar Andirii Raajooyilinaa sodaa lubbuu isaatiif jecha bakka nageenya amansiisaa qabutti dhokachuu himan.

Raajoyiliinaan wiixata darbe hokkora biyyatti keessatti dhalateen gara bakka nageenya qabutti akka imale dilbaata dheengadda fuula Feesbuukii isaa irratti mirkaneessaniiru. Ga’eessi umrii 51 kun eessa akka jiru ibsuu baatullee, Raajolinaan dilbaata waaree booda haasaa televijiinii biyyatti kennuuf yaadame ture sababa “humnoonni hidhatani miidiyaa mootummaa to’achuuf doorsisaniif harkifachuu” waajjirri isaa fuula feesbuukii irratti ifoomsan.

Wiixata kaleessaa prezidaantiin Faransaay Imaanu’eel Maakroon yaa’ii Masriitti taa’ame irraatti yeroo haasa’aa taasisan haala Maadagaaskaar irratti yaaddoo qaban ibsanillee, Raajooyiliinaan gara biyya Faransaayii baqachuufi dhiisuu irratti yaada kennuu irraa of qusataniiru. Dabalanis ''Har'aaf homaa isiniif mirkaneessuu hin barbaadu'' jedhe. Garuu dhimma kanaafi “Yaaddoo guddaa qabachuu keenya qofan ibsuu barbaada.” jedhaniiru. Dhaabbanni Mootummoota Gamtoomanii walitti bu’iinsa mormitootaa fi humnoota nageenyaa gidduutti uumameen yoo xiqqaate Madagaaskaar keessatti namoonni 22 ajjeefamuu ibse.

Maddi Ajaja Waraanaa tokko dhaabbata oduu Rooyitarsiif akka balbaloomsetti. Raajooyiliinaan dilbata darbe xiyyaara waraana Faransaay kan Kaasaa jedhamtuun Madagaaskaar irraa ka’uun, erga helikooptarri kuni gara buufata xiyyaaraa Saante Maar’ie qubateen booda Pirezidaantichi biyyatti gadi dhiisanii bahuu isaanii balinaan gabaasaan. Yeroof dhokatee bakki inni jiru ka hin beekamnee Raajooyiliinaan, tarkaanfii akkana kun “gocha seeraan alaa fi humnaan aangoo mootummaa qabachuuf yaalii taasifamee” jechuun balaaleffatteera.

Yaada isaa kana booda sa’aatii muraasa keessatti, kutaan waraanaa CAPSAT eeliti, kan fonqolcha mootummaa bara 2009 gaggeesseen Raajooyiliinaa gara aangootti fiduuf gahee olaanaa taphate waraana biyyattii to’achuu isaa ibseera. Kanaan duras hirmaattonni hiriira mormii “dhukaasa itti dhukkaafamuus” bittinaa’uu diduun gabafamaa turera.

Hirmaattonni hiriira mormii dargaggoota baayyee qaban kan maqaan ''Gen Z Mada'' jedhamu kennameef, kunneen dhaabsisuuf pirezidantichi baayyee yaalaa turanilleen hirirri humna isaaniiti olii ta’uun pireezdaantichi milkii malee bakka ammaafi hin beekamnetti dhokachuuf dirqamsiiseera.

Dhokachun dura garuu garee Mootummaasaanii hunda diiguun rakkoo walfakaataan lamuu akka hin uumamne waadaa seenullee, dargaggoonni tarkaanfiisaanii kanatti amanuu dhabuun, hiriirri cimee itti fufeera.

Kanaanis Dargaggoonni hanga pirezidantichi aangoo gadhiisanitti manatti hin deebinu jechuun dhaaddannoo dhaggeesisaa turaniru. Pirezidanti Raajoyiliinaan erga Roobii darbeetii bakka inni jiru hanga ammaa hin beekamnee, waajjirri isaanii fonqolchi mootummaa yaalamaa jiraachuu ibseera.

14/10/2025

Masiriin “Ilaalcha bara gita bittaa” tarkaanfaachiisaa jirti jechuun Itoophiyaan himatte

Finfinnee, Onkololeessa 14, 2025: Masiriin Hidha Haaromsaa Guddicha Itoophiyaa(GERD) waliin walqabatee “ilaalcha bara gita bittaa” tumsa biyyoota qarqara laga Naayil dadhabsiisu tarkaanfachiisuun “haasaa dubbii barbaachaa” taasisaa jirti jechuun Ministeerri Bishaaniifi Inarjii Itoophiyaa ibsa baaseen himate.

Dilbata darbe pirezidaantiin Masirii Abdil-Fattaah Al-Siisiin qophii ‘Cairo Water Week’ 8ffaa irratti “yeroo Itoophiyaan itti gaafatamummaa malee dhimma Abbayyaarratti murteessitu Masiriin harka marattee hin ilaaltu” jechuu hordofee Ministeerri Bishaaniifi Inarjii Itoophiyaa ibsa deebii Wiixata kaleessaa baaseera.

Deebichaanis, Itoophiyaan “mirga Naayil fayyadamuu qabdu dhiibbaa yookan sodaa keessa galuun hindhiistu” jechuun, “ [Masiriin] tumsa dhiistee imaammanni Itoophiyaa gad xiqqeessuu qabdu jalaa fashalaa’eeraa” jedhan.

Masiriin “tumsa daangarraa seera idil-addunyaarratti hundaa’e” irra deddeebiin danqaa jirti jechuun himachuun, dhimma Hidha Abbayyaa irratti mariin biyyoota sadii yeroo taasifamu Masiriin “amala badaa” agarsiisti jedhan. Waliigaltee Bu’uuraa Waloo (CFA), “waliigaltee isa tokkicha biyyoota Naayil hunda giddugaleeffatee qoqqoodinsa bishaanii haqa qabeessa ofirraa qabu,” kuffisuu ishees kaase.

Odeessa guutuuf dubbisaa

Finfinnee, Onkololeessa 14, 2025: Masiriin Hidha Haaromsaa Guddicha Itoophiyaa(GERD) waliin walqabatee “ilaalcha bara gita bittaa” tumsa biyyoota qarqara laga Naayil dadhabsiisu tarkaanfachiisuun “haasaa dubbii barbaachaa” taasisaa jirti jechuun Ministeerri Bishaaniifi Inarjii Itoophiyaa ibs...

14/10/2025

Minister Muummee Abiy Ahimad Alii (PHD) Komishinara Komishinii Inarjii Niwukilaraa Itoophiyaa haaraa muudan

Finfinnee, Onkololeessa 14, 2025: Muummeen Ministera Abiy Ahimad (PHD) Saandokaan Dabbabee Komishinara haaraa Komishinii Inarjii Niwukilaraa Itiyoophiyaa taasisuun muudaniiru.

Akka ibsi Waajjira Ministira Muummee irraa argamee mulisutti muudamni kun har’a onkololeessa 14 irraa eegalee hojiirra kan oolu yoo ta’uu, Manni Maree Ministirootaa yaa’ii idilee 49ffaaa gaggeesseen dambii haaraa Komishinii Humna Niwukilaraa Itoophiyaa hundeessuun erga raggaasisee booda muudama taasifamedha.

Komishiniin haaraa hundeeffame kun akkaataa qajeelfama idil-addunyaatiin Ityoophiyaan teeknooloojii niwukilaraa karaa nagaan akka itti fayyadamtu qajeelchuuf kan oolu ta'uu, Manni Marichaa ifoomsera. Aangoon isaa dameewwan ijoo kanneen akka humna elektirikii maddisiisuu, misooma industirii, wabii nyaataa, eegumsa fayyaafi qorannoowwan kalaqa saayinsii keessatti hojiirra oolmaa saayinsii niwukilaraa to’achuu kan dabalatudhas jedhameera.

14/10/2025

Manni Maree Ministirootaa Itoophiyaa Komishinii Anniisaa Nukilaaraa dabalatee dambiilee haaraa sadi raggaasise

Finfinnee, Onkololeessa 14, 2025: Manni Maree Ministirootaa walgahii idilee 49ffaa Wiixata kaleessaa gaggeesseen dambiiwwan sadii Komishinii Anniisaa Nukilaaraa, teeknooloojii bishaanii fi bulchiinsa deebii balaa waliin walqabatan raggaasiseera.

Manni marichaa dambii hundeeffama Komishinii Anniisaa Nukilaraa Itoophiyaa kan raggaasise yoo ta’u, komishishiniin kun teknoloojii niwukilaaraa dameewwan akka ibsaa, industirii, wabii nyaataa, fayyaafi qorannoodhaf karaa nagaan akka itti fayyadaman kan qindeessu fi kan to’atu ta’uu ibsameera.

Itti aansuunis, manni marichaa dambii kaffaltii tajaajilaa Inistiitiyuutiin Teeknooloojii Bishaanii Itoophiyaa kennuuf kaffalamu murteessuuf bahe irratti mari’ateera. Dambiin kaffaltii tajaajilaa qophaa’ee ummataaf dhiyaatee inistiitiyuutichi baasii isaa hunda uwwisuufi galii keessoo isaa guddisuuf gatii madaalawaadhaan qorannoo, jijjiirama teeknooloojii, leenjii qabatamaa, gorsaa fi tajaajila laabraatoorii addaa gatii madaalawaadhaan kennuu akka danda’uuf raggaasiseera.

Dabalataanis, Manni Marichaa Sekreetariyaatii Fandii Deebii Sodaa Balaa Itoophiyaa hundeessuun madda galii isaa murteessuuf dambii bahe raggaasisuu miidiyaaleen mootummaa gabaasan.

Dambiiwwan sadan isaaniiyyuu erga Nagaarit Gaazexaa irratti maxxanfamanii booda hojiirra akka oolan ibsame.

Itoophiyaa fi Raashiyaan gabbisa humna Nuukleeraa ijaaruuf walii mallatteessanii turuun isaanii ni yaadatama. Walii galteen kun Muummeen Ministiraa Abiy Ahimad daawwannaa isaan Mooskoo, Raashiyaatti taasisan hordofee kan taasifame ta’uus ifoomee ture.

Walii galteen kun Rootoom fi Dhaabbanni Humna Elektirikaa Itoophiyaa Itoophiyaa keessatti gabbisa humna nuukleeraa akka ijaaraniif tarkaanfii raawwii kan akeeku ta’uun himameera.

Itoophiyaatti gabbisni humna nuklaaraas faayidaa anniisa maddisiisuuf qofaa akka oolfamus akeekameera.

14/10/2025

Barattoonni yuunivarsiitii filatanitti barachuu akka jalqaban; yuunivarsiitiiwwan barattootaan hin filatamnes tajaajila biroof kan oolu ta’uun ibsame

Finfinnee, Onkololeessa 14,2025: Waggoota itti aananiif barattoonni yuunivarsiitii filatanitti barachuu akka jalqaban Ministirri Barnootaa Birhaanuu Naggaa (PHD) beeksisan. “Yuunivarsiitiiwwan barattootaan hin filatamne tajaajila biroof kan oolan ta’uu” ministirichi ibsaniiru.

Walgahii Ministera Barnootaa fi yuunivarsiitiiwwan mootummaa torbee darbe Jimaata fulbaana 30, 2018 irratti haasaa kan taasisan Ministirri Barnootaa Birhaanuu Naggaa, (PHD) waggootan dhufan keessatti ramaddii barattoota yunivarsiitii akka dhaabatu ibsan.

Barattoonni yuunivarsiitii filataniitti barachuu akka jalqaban ibsuun “Mootummaan yuunivarsiitiiwwan barattoonni hin filannee tajaajila biroof kan oolchuu ta’uu eeran. Itti dabaluunis Yuunivarsiitiiwwan barattootaan hin filatamneef baajata doolaara biliyoonaan lakkaa’amu kennuunis sirrii akka hin taane hubachisuun “sirnii akkasi kanaan booda hin jiraatus” jedhaniiru.

Odeessa guutuuf dubbisaa
https://addisstandard.com/Afaanoromoo/?p=7191

14/10/2025

AMG Holdiingi warshaa fedhii omisha daawwitii biyyattii dhibbeentaa sagaltama guutuu danda’a jedhame ijaaruuf akka jiru ibse

Finfinnee, Onkoloolessa 14, 2025: Warshaan daawwitii fedhii omisha daaawwitii biyyattiin feetu dhibbeentaa sagaltama guutuu danda’u ijaaruuf akka jedhu Dhaabbanni AMG Holdiingi beeksise.
Warshaan dhaabbachuuf jedhu kun guyyaatti omisha daawwitii toonii dhibba jahaa ol omishuu akka danda’u kan ibsame yoo tahu, baasiin isaatis sharafa yerootiin gara qarshii biiliyoona 14.5 ta’uu gaazexaan Riipoortar Itoophiyaa gabaaseera.

Obbo Solomoon Geexuu, Daarektarri Itti Aanaa Induustirii Dhaabbata AMG Holdiingi, warshaan bakka lamatti dhaabatu kun yoo xumuramu omishawwan daawwitii gosa lama Filoot Gilaas kan ijaarsa gamoorratti faayidaaf oolu fi daawitii qabiyyeef oolu, (Container glass) dhangala’aa akka lallaafaa, nyaataa, dhugaatii, qorichaa fi kan miidhaginaaf oolan kan omishu ta’uus dabalanii ibsaniiru.

Maashinoota warshaa kanaaf oolan dhiyeeessuuf dhaabbata Chaayinaa MOU jedhamu waliin walii galteerra gahuu kan ibsan Obbo Solomoon, ijaarsi warshichaa akka jalqabeen hojiitti kan seenamu ta’uu fi warshaan bakka lamatti hiramee dhaabatu kunis namoota 2500 oliif carraa hojii akka uumu ibsaniiru.

Fedhiin omisha daawwitii Itoophiyaa amma omisha gabaa alaarraa seenuun guutamaa jiraachuu kan eeran Daaraktarri Itti Aanaa Industirii dhaabbata AMG, warshaan daawwitii kun ashawaa adda ta’e dabalatee galtee omishaa dhibbeentaa sagaltama asuma biyya keessaa kan argatudha jechuun ibsan.

Waxabajjii bara 2017, Muummeen Ministiraa Abiy Ahimad Alii, marii miseensota Mana Maree Bakka Bu’oota Ummataa waliin taasisan irratti, biyyattin warshaa daawwitii guddicha naannoo Aqaaqiitti dhaabaa akka jirtu ibsuun isaanii ni yaadatama jechuun Riipoortar Itoophiyaa gabaaseera.

Warshaa kana kan ijaara jedhame dhaabbanni AMG Holdiingi, dhaabbata Industirii kan biyya keessaa bara 2010 dhaabbate yoo tahu, omisha sibiilaa, midhaan zayitaa, ijaarsa manaa, al ergii bunaa, omisha qorqorroo fi galteewwan ijaarsaa irratti kan bobba’ee jiru ta’uun isaas himameera.

14/10/2025

Pirezidaantiin Masirii badhaas Naayil Koolaar Tiraampi badhaasuuf akka jiru himame, Tiraampis Hidha Haaromsaa ilaalchisee akeekkachiisa haaraa kenneera

Finfinnee, Onkoloolessa 14, 2025: Pirezidaantiin Masirii Abdil-Fattaah Al-Siisiin ga’ee Doonaldi Tiraampi lola Gaazaa dhaabuu keessatti taphateef badhaasa akka biyya Masiritti kabaja olaanaa qabu Naayil Koolaar (Nile collar) kennuufiif ta’uu miidiyaaleen biyyichaa gabaasan.

Kana cinatti, Al-Siisiin Hidha Haaromsa Guddicha Itoophiyaa (GERD) ilaalchisee ergaa viidiyoon dabarseen, Masiriin “nagaa bishaanii ishee eegsifachuuf tarkaanfii barbaarchisu hunda ni fudhatti” jedhan.

Kana kan dubbatan ‘Cairo Water Week’ 8ffaa irratti yoo ta’u, “yeroo Itoophiyaan itti gaafatamummaa malee dhimma Abbayyaarratti murteessitu Masiriin harka marattee hin ilaaltu” jedhe.

Pirezidaantiin Ameerikaa Doonaldi Tiraampi irra deddeebiin ijaarsaa Hidha Abbayyaa harka caalu maallaqa Ameerikaan hojjatame jechuun isaa ni yaadatama. Hidhi Haaromsaa Guddichi Itoophiyaa garuu dhugaan kan ijaarame maallaqa Ameerikaan osoo hintaane guutummaatti leecalloo biyya keessaafi arjooma lammiilee Itoophiyaatini. Nagaa bishaanii Masirii irras balaan geessisu hinjiraatu.

Akka gabaasni ‘The New Arab’ Adoolessa 20, bara 2025 ba’e agarsiisutti, bulchiinsi Doonaaldi Tiraampi dhimma Hidha Abbayyaa gidduu seenun furuuf yaada Masiriif dhiyeessanii turan. Kana gochuuf immoo Masiriin karoora Israa’el lammiilee Paalastaayin miliyoonotaan lakkaa’aman gara naannawaa daangaa Gaazaafi Masirii,Raafa, geessuf qabdu akka deeggartu gaafatamtee turte.

Akka gabaasichaatti, Masiriin yaada “ummata Gaazaa yoo gara Raafatti akka geessinu eeyyamte dhimma Abbayyaa gidduu seenun furmaata dhumaa ni laanna” jedhu kana kuffisuu, Ambaasaaddarri sadarkaa olaanaan Masirii miidiyaa Al-Arabii Al-Jadiiditti dubbate jechuun The New Arab wabeeffatee gabaase.

Badhaasni Naayil Koolaar kan kennamuuf namoota Masiriifi Namoomaaf shoora adda taphatanidha. Namoonni idil addunyaa kanaan dura fudhatan Impeerara Itoophiyaa Hayilasillassee, Mootii Joordan Husseen, Mootittii Elizaabeet II, fi Pirezidaantii Ameerikaa duraanii Jiimii Kaarteri.

Suura/ Rooyitarsi