24/07/2025
invastara biyya alaa lammaffaa ta’uu ishee himame
Turkiin invastimantii Doolaara biiliyoona 2.5 invast gochuun aanuun Invastimantii biyya alaa Itoophiyaa invast godhan keessa sadarkaa lammaffaa irra jiraachuu ishee ibsameera.
Komishinarri Komishinii Invastimantii Itoophiyaa Zallaqaa Tamaasgen akka jedhanitti, dhaabbileen Turkii 260 ol Itoophiyaa keessa jiraachuu eeruun,dhaabbileen kuneene namoota hedduuf carraa hojii uuma jiru jedhan.
Chaayinaan ammallee Itoophiyaa keessatti invastara invastimantii alaa kallatti (FDI)n adda duree kan taate yoo ta’u, kanaan alattis Itoophiyaa keessatti pirojektoonni Chaayinaan durfamu 4,510 akka jiran ji’oota muraasa dura gabaafamuun isaa ni yaadatama.
Turkiin Itoophiyaa dabalatee guutuu dhiibbaa waraanaa fi diinagdee ishee babal’isaa kan jirtu yoo ta’u, akka ragaan bara 2023 ba’etti invastimantiin dhaabbileen Turkii Afrikaa keessa jiran Doolaara biiliyoona 10 ol ta’uu ibsameera.
Kana malees, dhaabbileen kunneen dhuma bara 2023tti pirojektoota kuma 1 fi dhibba 8 ol ta’an baasii doolaara biiliyoona 85.4tti tilmaamaman xumuraniiru.
Hariiroon daldalaa Turkiin Afrikaa waliin qabdu gadi aanaa kan ture yoo ta’u, kunis bara 2003tti daldalli biyyoota lamaan gidduu jiru doolaara biiliyoona 5.4 qofa ture.
Bara 2023tti hammi daldalaa doolaara biiliyoona 41 kan gahe yoo ta’u, bara 2030tti gara doolaara biiliyoona 50tti ol guddisuuf karoorfameera.
Itti dabaluunis, hariiroo dippilomaasii Itoophiyaa fi Turkii yeroo dheeraaf tureen alatti, tumsi biyyoota lamaanii daldala, teeknooloojii, fayyaa, barnootaa fi aadaa kan hammatu ta’uu ibsaniiru.
Itoophiyaatti Gorsaan Daldalaa Turkii Xaahaa Alpiireeen gama isaaniitiin, Itoophiyaan wiirtuu daldalaa naannoo ta’uuf dandeettii akka qabduu fi Turkiin “michuu tarsiimoo Baha Afrikaa” ta’uu ibsaniiru.
Dabaluudhaaniis Qulqullina, gatii madaalawaa fi amanamummaa oomishaalee Turkii cimsanii ibsuun, invastaroota Itoophiyaa dhiyeessitoota Turkii waliin akka tumsan gaafataniiru.
Hundeessaa fi Pireezidaantiin Fooramii Uutkuu Beengiisuu barbaachisummaan diinagdee Itoophiyaan guddachaa dhufuu hubachiisuun, Fooramii 13ffaa baatii Hagayyaa keessa Istaanbulitti gaggeeffamu irratti Itoophiyaan keessummaa kabajaa akka taatu beeksisaniiru.
