30/11/2025
Tsiyoon Maariyaam
Maqaa Abbaa kan Ilmaa kan Afuura Qulqulluu Waaqa Tokkoon.Ameen!
Baga Kabaja Ayyaana Maariyaamii Tsiyoonin isin gahe.
Sadaasa 21 Taabonni Tsiyoon guyyaa Xaa’ota (waaq-harkee) namaan tolfame Daagoon jedhamu caccabsitee, Filisxeemota salphiftee dha. Ijoolleen Luba Eelii lamaan, Afniinii fi Finhaasii jedhaman, sababa cubbuu sadi raawwataniin, Taabotni Tsiyoon booji’amtee turte. Tokko, ibsaa yeroo hunda ifu kan Museen teessise akka hin ifne iddoodhaa kaasuun, lammaffaa, aarsaa dhiyaachaa ture jalqaba osoo Waaqayyoof hin dhiyaatiin ofii isaaniif nyaachaa turuun isaanii, sadaffaa, dubartoota gara mana qulqullummaa dhufan waliin ciisuun, waan sagaagalaniif, cubbuu gurguddaa kana waan raawwataniif, Waaqayyoon dheekkamee Israa’eloonni akka moo’ataman, ijoolleen kunis akka du’an, Taabotni Tsiyoonis akka booji’amtu sababa ta’e.(1Sam 5:4). Yeroo kana, Filisxeemonni Taabota booji’an kana mana Xaa’ota isaanii keesaa Daagon jala yemmuu kaa’an, ganama yemmuu deebi’an garuu, Daagon Taboticha jalatti kufee caccabee argan. Ajaa’iba kanaaf kan kana fakkaatan hedduu taabotichi waan raawwateef, Filisxeemonni harka-fuudha/balcha waliin Taaboticha deebisaniiru. Kanaaf, guyyaan kuni ni yaadatama.
Taabotni ajaa’iba akkanaa hojjette kuni, gara biyya keenyaa iddoo Aksum kan dhufte, Sadaasa 21 waan ta’eef, guyyaan kuni yeroo sana irraa eegalee kabajamee ni oola. Bara Yoodiit Guditis, baqannaa waggoota 40 booda haroo Danbal/Ziwaay irra erga turte booda, deebitee kan galte guyyuma kana akka ta’es, ni himama. Kanaaf, Ayyaanni kuni yeroo hunduma Sadaasa 21 haala addaatiin ni kabajama.
Galanni Waaqayyoof haa ta’u.
Waaqayyoo kadhannaa qulqulleettii haadha keenya Dubroo Maariyaamiin nutti haa araaramu. Sugni ishees nu waliin haa ta’u!
Page keenya follow fi share taasisaa!
