10/09/2024
ብፁዕ አቡነ ቀሌምንጦስ በመንበረ ፓትርያርክ ጠቅላይ ጽሕፈት ቤት የሰንበት ትምህርት ቤቶች ማደራጃ መምሪያና የሰሜን ሸዋ ሀገረ ስብከት ሊቀ ጳጳስ የዘመን መለወጫን በዓል አስመልክተው የእንኳን አደረሳችሁ መልእክት አስተላለፉ።
የብፁዕነታቸውን ሙሉ መልእክት እነሆ!!!
***** ***** ***** ***** *****
በስመ አብ ወወልድ ወመንፈስ ቅዱስ አሐዱ አምላክ አሜን!!!
"ምድር ሠናይት እንተ ዘልፈ ይሔውጻ እግዚአብሔር አምላክከ ፤ ወአዕይንቲሁ ለእግዚአብሔር አምላክከ ላዕሌሃ እምርእሰ ዓመት እስከ ማኅለቅተ ዓመት "
"አምላክህ እግዚአብሔር የሚጎበኛት አገር ናት ፤ ከዓመቱ መጀመሪያ እስከ ዓመቱ መጨረሻ ድረስ የእግዚአብሔር ዓይን ሁልጊዜ በርሷ ላይ ነው"ዘዳ ፲፩ ÷ ፲፪
የተወደዳችሁ እና የተከበራችሁ በቅድስት ሀገራችን ኢትዮጵያ በመላው ዓለምም የምትገኙ ኢትዮጵያውያን እና ትውልደ ኢትዮጵያዊያን በሙሉ የዘመናት ባለቤት እግዚአብሔር 2016 ዓ.ም ዘመነ ዮሐንስን በሰላም እና በጤና አስፈጽሞ እንኳን ለ2017 ዓም ዘመነ ማቴዎስ በሰላም እና በጤና አደረሰን! አደረሳችሁ!!!
የዘመናት ባለቤት እግዚአብሔር ዘመንን በዘመን እየለወጠ ዓለም ከተፈጠረ ዘመን ከተቆጠረ 5500 ዓመተ ኲነኔ 2017 ዓመተ ምሕረት በአጠቃላይ 7517 ዘመን ይሆናል ።
እስራኤል ዘሥጋ በግብፅ ባርነት በነበሩበት ዘመን ተወልዶ በፈርኦን ቤት የፈርኦን ልጅ መባልን በእምነት እንቢ በማለት ያደገው ክቡደ መዝራዕት ሙሴ ከ4 መቶ 30 የግብፅ ባርነት ዘመን በኋላ እስራኤላውያንን ነጻ ለማውጣት በግብፅ እና በግብፃውያን ላይ ዘጠኝ ድንቅ ድንቅ ተአምራትን አሥረኛ ሞተ በኲርን አሥራ አደኛ ስጥመትን ፈጽሞ በርሱ መሪነት በመልአኩ ተራዳኢነት በእግዚአብሔር አሻጋሪነት ቀይ ባሕር ተከፍሎላቸው በደረቅ አልፈው ከሞት ወደሕይወት ከባርነት ወደነጻነት ከውርደት ወደ ክብር ተሸጋግረዋል ።
በመሆኑም የእግዚአብሔር ሰው ሙሴ በጸናች የእግዚአብሔር እጅ እስራኤል ዘሥጋን ከግብፅ የባርነት ሕይወት ነጻ አውጥቶ ሊወርሷት ወደአለችው የአባቶቻቸው ርስት የተስፋይቱ ምድር ከነአን ለመግባት በሞአብ ሜዳ ላይ በጉዞ ለነበሩት ለእስራል አዲሱ ትውልድ የምትወርሷት የበረከት ምድር ከነዓን ዝናብ እንደማይዘንብባት እንደ ግብፅ ምድር አይደለችም።
የቃል ኪዳን ምድር ከነዓን የዘሩባትን የምታበቅል የተከሉባትን የምታጸድቅ እግዚአብሔር የሚጎበኛት የእግዚአብሔር ዓይን በረድኤት የማይለያት መሆኑን በመግለጽ በውስጧ በሰላም ለመኖር የባርነት ቀንበራቸውን ሰብሮ መና ከሰማይ አውርዶ እየመገበ ውኃ ከዓለት ላይ አፍልቆ እያጠጣ ያሻገራቸውን የእግዚአብሔርን ሕግ እና ሥርዓት ጠብቀው እንዲኖሩ በአጽንኦት ሲመክራቸው እናስተውላለን።
የተወደዳችሁና የተከበራችሁ የመንፈስ ቅዱስ ልጆቻችን አባቶቻችን በአጥንታቸው እና በደማቸው አጽንተው ያስረከቡን ቅድስት ሀገራችን ኢትዮጵያ ስሟ በመጽሐፍ ቅዱስ ተደጋግሞ የተወሳ ልክ እንደተስፋይቱ ምድር ከነዓን 3 መቶ 65 ቀናት ስመ እግዚአብሔር የሚጠራባት ሥርዓተ አምልኮ የሚፈጸምባት እግዚአብሔር ከዓመቱ መጀመሪያ እስከ ዓመቱ መጨረሻ በምሕረት ሀገረ እግዚአብሔር በምሕረት ዓይኑ የሚመለከታት ፣ መዝበ ታሪክ ዓይኑ የሚመለከታት ሀገረ እግዚአብሔር ፣ መዝገበ ታሪክ ፣ የቅርስ ማዕከል እና የሰው ዘር መገኛ መሆኗን እናስታወሳለን።
ይሁን እንጂ ከቅርብ ዓመታት ወዲህ በተለየ ሁኔታ ከውስጥና ከውጪ እየደረሰ ባለው ፈርጀብዙ የተፈጥሮ እና የሰው ሠራሽ ችግር ምክንያት በአራቱም ማዕዘን በጦርነት ድምፅ እየተናጠች የፈተናና የመከራ ማዕበል እያንገላታት ትገኛለች።
በዚሁ ችግር ምክንያት የተነሳ በርካታ ወገኖቻችን መተኪያ የሌላት ውድ ሕይወታቸውን እያጡ ሲሆን ለዘመናት የደከሙበት ሀብት ንብረታቸው እየጠፋ ይገኛል።
ከቤት ቀያቸው ተፈናቅለው ለቀን ሀሩር ለሌሊት ቁር ተጋልጠዋል ፤ ሕፃናት ከትምህርት ገበታ ተለይተው የለጋነት እድሜያቸውን በከንቱ እያሳለፉት ይገኛሉ ፤ በአጠቃላይ በሀገራችን እየሆነ ያለውን ነገር ስንመለከት ችግሩ አሳሳቢ ደረጃ ላይ መድረሱን እንገነዘባለን።
በመሆኑም ከዘመነ ዮሐንስ ወደዘመነ ማቴዎስ ስንሸጋገር እስራኤል ዘሥጋ ከግብፅ ወደከነዓን ሲሻገሩ የግብፅን ትብት በግብፅ ቀብረው ከሞት ወደሕይወት ከባርነት ወደነጻነት እንደተሻገሩ እኛም እስራኤል ዘነፍስ ያረጀውን ሰውነት ገፍተን አዲሱን ሰውነት በመልበስ አሮጌውን የኃጢኣት ርሾ አስወግደን አዲስን የጽድቅ ርሾ ገንዘብ በማድረግ ጥላቻን አውልቀን ፍቅርን በመልበስ መለያየትን ተጸይፈን አንድነትን በመጎናጸፍ የክርስቶስ መልክ መገለጫ የሆነውን የሰውን ልጅ በሰውነቱ ብቻ በማክበር በአዲስ ልብ በአዲስ አስተሳሰብ በአዲስ መንፈስ ልንሻገር የሚገባ መሆኑን በአጽንኦት ማሳሰብ እንፈልጋለን ።
ዘመነ ክረምት አልፎ አዲሱ ዓመት ሲገባ መስከረም ሲጠባ የወንዝ ውኃዎች ይጠራሉ አበባዎች ይፈካሉ የእኛም ሕይወት በንስሓ ውኃ ሊጠራ በበጎ ነገር ሁሉ ሊፈካ በአዲሱ ዓመት አዲስ ማንነት ሊኖረን ያስፈልጋል።
በመጨረሻም የዘመን መለወጥ ለሰው ልጅ ሕይወት ትርጉሙ ከፍ ያለ በመሆኑ በሕይወታችን ተለውጠን ስለ ሀገራችን እና ስለሕዝባችን በሰላም ወጥቶ በሰላም መግባት በመጸለይ የሰላም ሰው ሆነን ለሰላም የልባችንን በር በመክፈት እጃችንን ለፍቅርና ለአንድነት በመዘርጋት በማረሚያ ቤት ፣ በሆስፒታል እና በተለያየ ችግር ውስጥ ያሉ ወገኖቻችንን በመጠየቅ ፣ ያለንን ለሌላቸው ወገኖቻችን በማካፈል በይቅርታ ልብ መጪውን አዲሱን ዓመት እንድንቀበለው በማለት መልእክታችንን እናስተላልፋለን ።
መጪው አዲሱ ዘመን ዘመነ ማቴዎስ ሞት እና ጦርነት የሚቆምበት የጥይት ጩኸት የማንሰማበት የሀገራችን ችግር የሚፈታበት የሰላም የፍቅር እና የበረከት ዘመን እንዲሆንልን መልካም ምኞታችንን በመጸለይ ጭምር እንገልጽላችኋለን ።
ቅዱስ እግዚአብሔር ሀገራችን ኢትዮጵያን እና ሕዝቦቿን ይባርክ!!!
አባ ቀሌምንጦስ
በኢ/ኦ/ተ/ቤ/በመ/ፓ/ጠ/ቤ/ክ የሰንበት ት/ቤቶች ማደራጃ መምሪያ እና የሰሜን ሸዋ ሀገረ ስብከት ሊቀ ጳጳስ!!!
ጳጒሜን ፭ ቀን ፲፫ ወር ፳፻ ፲፮ ዓም
ሺዋ ደብረ ብርሃን ኢትዮጵያ!!!
