17/04/2024
Allaattiiwwan jiran keessaa Harraagessatu muka irra taa’ee utuu boo’uu cophni imimmaan isaa harka Luba muka sana jala taa’aa turee irra bu’e jedhama. Yeroo kana lubni kun maali harraagessa nana Maal taate? Jedhanii gaafatani.Innis “ani allaattiiwwan hunda keessaa habaaramaadha, utuun hin uumamne ta’ee wayya ture, mee bifakoo ilaali akkam akka ani fokkisu” jedhe boo’ichaan.
Lubni kun akkas ittiin jedhe “hin boo’iin waan Ati barbaaddetti si jijjiiruu nan danda’a, Maal ta’uu feeta jennaan “ Daakiyyee ta’uun barbaada” jedhe.Egaa utuu ani daakiyyee si hin taasisiin deemiitii jireenya daakiyyee qoradhuu kottu ittiin jedhe lubni. Harraagessis galaana qaxxaamuree daakiyyee bira ga'e. ''Baay’ee bareedda'' akka aannanii addaatta, uumamni akka kee gammadee jiraatu waan jiru natti hin fakkaatu” jedhee haasaa jalqabe.
Daakiyyeen deebistee “lakki yaa obboleessakoo ani gammadduu miti jireenyakootti, halluu baay’ee babbareedaatu jira ani garuu halluu hin qabu, adiin halluu maaliiti? Ici” jettee imimmaan lakkuu lakkuu buuste.
Itti aansitees dakiyyeen akkas jette “allaattiiwwan keessaa parrotiin baay’ee gammadaadha, halluu bareedaa qaba mee isa gaafadhu” jennaan harraagessi gara parrot 🦜 deemee “ oo kan akkakee bareedu addunyaa irra hin jiru, allaattiiwwan jiran hunda irra Situ bareeda, kanaaf ati gammadduudha” jedhee haasaa eegale. Isheen immoo deebistee “lakki ani jireenyakootti gammadduu miti, halkanii guyyaan sababa halluukoofan adamsama, yoo na qabatan immoo sanduuqa keessa kaa’anii akka faayaatti natti fayyadamu, baay’een rakkadha” jettee waakkii eegalte. “Mee immoo 🦚 ( peacock) bira deemi isheen ana irra bareedduudha “ jennaan ammas harraagessikee ka’ee 🦚 (peacock) barbaaduu deeme.
Utuma jooruu namootni baay’een itti marsanii bareedina ishii yeroo dinqisiifatan argee itti maqanaan namoonni isa hari’an. Erga daawwattoonni irraa siqanii suuta jedhee itti siqee“ Ati allaattiiwwan hunda irra Iyyu baay’ee bareedduudha, anaan gurrachinakoof na jibbu, siin garuu qarshii kaffalanii si ilaalu, jireenyakeettis gammadduu fakkaatta “ jedhee haasaa eegale. Isheenis deebistee “eyyee anis akkan baay’ee bareedu beeka, garuu sababa bareedinakoof jedhanii na gidirsu, mana isaanii keessatti akka faayaatti nu gargaara jedhanii baalleekoo ciraa oolu, baay’ee na dhukkubsanii natti taphachaa oolu “ jettee boo’ichaan itti himte.
Harraagessis baay’ee dinqisiifate, “erga ati jireenyakeetti hin gammannee, allaattiiwwan keessaa eenyutu jireenya isaatti gammadaree” jedhe. Isheenis deebistee allaattiiwwan hunda jireenya isaanii qoradheera. Hunda keessaa kan namoonni hin adamsine, fi kan hin gaadamne si qofaadha. Nuun garuu sababa halluu gogaa keenyaaf qabanii sanduuqa keessa nu oolchu, madda galii isaanii nu godhachuuf jedhanii bilisummaa keenya mulqu, yeroo darbe taa’ee si ilaaleen utuun harraagessa ta’ee iddoon barbaade gaheen bashannana mitii jedheen jireenya bilisummaa Ati qabdu kana hawwe” jettee naasiste.
Harraagessis yeroo jalqabaaf harraagessa ta’uu isaatti gammadee balali’ee Luba sana bira deemee “ani allaattii Kamuu ta’uu hin fedhu, harraagessa ta’eedhuman bilisummaakoo wajjin jiraadha” jedhe jedhama.
Jireenya kee keessatti namootaan of madaaltee, jireenyakee jibbita ta’a.
Waan qabdu hin beektu waan ta’eef akka hiyyeessaatti of lakkoofta ta’a.Anis atis Kana keessaa baanee
-waan dhabne lakkaa’uu utuu hin taane waan qabnuuf galateeffachuu jalqabuu qabna.
-kan sii gad qabus, kan sii ol qabus jira. Jireenyakee kan namootaa waliin madaalta taanaan yoomuu hin gammaddu.
Namni waan qabutti quufu fi galateeffatu yoo jiraate inni addunyaa kana irraa nama gammadaa dha.
