25/08/2026
Murteessaa Hajii β Sagalee Aartii, Seenaa Qabsoo fi Jaalala Saba Oromoo
Seenaa nama tokkoo barreessuun maqaa isaa qofa kaasu miti; imala isaa, wareegama isaa, abdii isaa fi waan inni dhalootaaf dhaale yaadachuudha. Sanuu nama sabaaf jiraate Sabni beekee beeksisuu qaba
Artistii Oromoo Murteessaa Hajii seenaa isaa keessatti nama aartii qofaatiin beekamu miti. Inni nama yeroo rakkoon saba isaa mudate keessatti callisee bira hin dabarre, yeroo hedduu lubbuu fi jireenya isaa balaaf saaxilee qooda isaa bahaa ture keessaa isa tokko. ammallee nama Oromoo rakkate waan danda'uun deeggaree rakkoo nama isaa waliin qooddata, Kanaaf, maqaan Murteessaa Hajii yeroo ka'u, sirba isaa qofa osoo hin taane, seenaa qabsoo, imala baqattummaa, aartii fi jaalala saba isaa waliin yaadatama.
Yeroo Fincilli Diddaa Gabrummaa Oromiyaa keessatti finiinaa turetti, keessumaa Naannoo Godina Arsii Lixaa, Murteessaan sochii qabsoo keessatti hirmaannaa cimaa taasisaa ture. Yeroo sana dargaggoonni Oromoo hedduun mirga, eenyummaa fi bilisummaa saba isaanii irratti yaaddoo fi wareegama guddaa keessa turan. Murteessaanis akkuma ilmaan Oromoo hedduu, sodaa fi rakkoo dura dhaabbachuun qooda isaa bahaa ture.
Garuu seenaa qabsoo keessatti yeroo tokko tokko nama tokkoof daandiin itti fufuuf filannoo hin kennu. Haalli yeroo sanaa hammaachuun, Murteessaan biyya isaa dhiisee karaa gammoojjii Suudaan keessa imala hadhaaβaa godhuuf dirqame. Gammoojjiin bakka namaaf salphaa miti; dheebuu, beela, sodaa fi shakkii waliin imalamuudha. Haa ta'u malee, imalli sun abdii isaa hin ajjeefne. Biyya isaa irraa fagaatullee, eenyummaa isaa fi jaalala saba isaa gara bakka inni itti baqatee ga'etti fudhatee deeme.
Karaa dheeraa fi rakkisaa sana booda gara Masrii ga'e. Jireenyi baqataa immoo boqonnaa salphaa hin turre. Nama biyya isaa, maatii isaa, hiriyoota isaa fi naannoo itti dhalate irraa fagaatee jiraachuun rakkoo mataa isaa qaba. Ta'us, Murteessaan rakkoo sana keessatti of ijaaruu fi aartii isaa itti fufsiisuu danda'e.
Aartiin Isaa Sagalee Isaa Qofa Miti
Murteessaa Hajii artistii ta'uun isaa beekamaa dha. Garuu aartiin isaa jireenya isaa irraa adda hin baane. Sirboota isaa keessatti jaalala, eenyummaa, aadaa, abdii, gadda, hawwii fi miira Oromoo calaqqisiisuuf yaalaa dhufe.
Artistiin yeroo tokko tokko waan namni dubbachuu hin dandeenye sirbaan dubbata. Waan namni garaa isaa keessatti dhoksee qabu sagalee godhee uummata biraan ga'a. Murteessaanis karaa aartii isaatiin sagalee isaa saba isaatiif kenne.
Kanaaf sirbi isaa bashannana qofa miti. Namni sirba isaa dhaggeeffatu yeroo tokko gammachuu argata; yeroo biraa seenaa isaa yaadata; yeroo biraa immoo eenyummaa fi kaayyoo isaa irratti akka yaadu taasifama.
Arsii Lixaa Irraa Hanga Kanadaa
Imalli Murteessaa Hajii Arsii Lixaa irraa kaasee, gammoojjii Suudaan keessa darbee, Masrii ga'ee, har'a Kanadaa keessatti jiraachuu bira ga'e, seenaa jireenyaa nama tokkoo qofa fakkaachuu danda'a. Garuu yoo gadi fageenyaan ilaalle, imalli kun seenaa dhaloota Oromoo keessaa kutaa tokko nuuf hima.
Namni biyya isaa irraa fagaatu hundi seenaa qaba. Namni tokko waan argateef baqachuu danda'a; kan biraa immoo waan dhabee baqachuu danda'a. Murteessaa Hajii garuu imala isaa keessatti rakkoo irraa gara abdii, sodaa irraa gara jabaachuu, fageenya irraa gara aartii fi hawaasaatti ce'ee dhufe.
Har'a biyya Kanadaa keessa jiraatus, Oromummaa isaa fi aartii isaa irraa hin fagaanne. Hawaasa Oromoo waliin walitti dhufeenya qabaachuun, aartii isaa itti fufsiisuun fi sagalee isaa dhalootaaf kennuun, imala isaa akka hin dhaabbanne taasiseera.
Oromoon Artistoota Isaa Beekuu Qaba
Seenaa Murteessaa Hajii irraa barumsi guddaan tokko jira: Oromoon artistoota isaa beekuu qaba.
Artistoonni Oromoo hedduun yeroo rakkoon turetti sirba qofa hin sirbine; jireenya isaanii, yeroo isaanii, dandeettii isaanii fi yeroo tokko tokko lubbuu isaanii illee saba isaaniif kennaniiru. Isaan keessaa warri yeroo rakkinaa uummata bira dhaabbatan, warri aartii isaanii ittiin eenyummaa dhalootaa tikfatan, warri sagalee uummataa ta'an, seenaa keessatti kabajaa fi yaadannoo argachuu qabu.
Dhaloonni har'aa namoota akkanaa beekuu qaba. Maqaa isaanii qofa osoo hin taane, waan isaan keessa darban, waan isaan saba isaaniif godhan, sirboota isaanii fi ergaa isaan dhalootaaf dabarsan beekuu qaba. Yoo nuti seenaa artistoota keenya hin barreessine, hin dubbifne, hin dhaggeeffanne, dhaloonni borii eenyu akka isaan ta'an eessaa beeka?
Kanaaf, Murteessaa Hajii akka artistii tokkootti dhaggeeffachuun qofti gahaa miti. Seenaa isaa beekuun, hojii isaa kabajuun, aartii isaa dhalootaaf dabarsuun barbaachisaadha.
βSagaleen Koo Saba Kootiif Haa Ta'uβ
Murteessaa Hajii keessatti wanti nama hawwatu keessaa tokko, aartii fi jireenya isaa wal irraa hin cinne ta'uu isaati. Inni bakka inni jiru hundatti, karaa danda'ameen, sagalee isaa fayyadamuun saba isaa yaadachuu fi saba isaatiif dubbachuu barbaada.
Kanaaf, seenaa isaa yeroo dubbisnu, nama biyya isaa irraa fagaatee Kanadaa keessa jiru qofa hin arginu. Nama Arsii Lixaa irraa ka'e, qabsoo keessa qooda fudhate, karaa gammoojjii rakkisaa keessa darbe, Masrii keessa jiraate, har'as aartii fi hawaasa Oromoo waliin jiraatu argina.
Seenaa akkanaa barreessuun nama tokko ol kaasuu qofa miti; seenaa dhalootaa yaadachuudha.
Murteessaa Hajii, ati artistii qofa miti. Ati nama imala dheeraa keessa darbeedha. Ati nama rakkoo keessa darbuun abdii hin gatin dha. Ati nama aartii isaatiin sagalee uummataa ta'eedha. Ati nama saba isaa yaadatee, saba isaatiif waan qabu kennuuf yaaleedha.
Oromoon artistoota isaa kan yeroo rakkinaa saba isaanii bira dhaabbatan, kan aartii isaanii sabaaf kennan, kan yeroo fi dandeettii isaanii sabaaf oolan, akkasumas kan lubbuu isaanii illee saba isaaniif kennan, dhalootaaf beeksisuu fi seenaa isaanii dhaloota irraa dhalootatti dabarsuu qaba.
Sababni isaas, seenaa nama tokkoo yoo yaadanne, hojii isaa qofa hin yaadannu; gumaacha isaa, wareegama isaa fi ergaa inni dhalootaaf dhaale yaadanna.
Har'a maqaan Murteessaa Hajii sirba isaa keessatti dhagahama; bor immoo seenaa isaa keessatti haa dhagahamu.
Waadaa Fuulduraa
Seenaa Artistii Murteessaa Hajii kana caalaatti qorannee, ragaa fi odeeffannoo dabalataa walitti qabuun, fuulduratti seenaa isaa bal'inaan fi sirriitti isiniif dhiheessuuf gamanumaan waadaa isiniif galla.
Seenaa namoota saba isaaniif qooda olaanaa qaban beekuun, dhalootaaf dabarsuun dirqama keenya. Kanaaf, seenaa artistoota Oromoo fi namoota hojii isaanii keessatti saba isaanii tajaajilan qorannee, barreessinee fi dhalootaaf akka dhaalamu gochuuf ni carraaqna.
Waan dubbistaniif baay'ee galatoomaa. πβ€οΈ
Seenaa keenya haa beeknu;
seenaa keenya haa tikfannu;
dhalootaaf haa dabarsinu.
