Ethiopian Broadcasting Corporation

11/08/2026

የአፍሪካ ድምፆች የሚገናኙባት ደማቋ ከተማ
*************

አዲስ አበባ የሀገራችን ዋና ከተማ ከመሆን ባለፈ በአፍሪካ የዲፕሎማሲ መድረክ ላይ ልዩ ስፍራ የያዘች ከተማ ናት።

አዲስ አበባ የአፍሪካ ሕብረት ዋና መሥሪያ ቤትን ጨምሮ የበርካታ ዓለም አቀፍና አህጉራዊ ተቋማት መቀመጫ በመሆኗ፣ ከአህጉሪቱ የሚመጡ መሪዎች፣ ዲፕሎማቶችና ባለሙያዎች የሚሰበሰቡባትና በጋራ ጉዳዮች ላይ የሚመክሩበት ዋነኛ መድረክ ለመሆን በቅታለች።

ይህ የመዲናዋ የዲፕሎማሲ ማዕከልነት በአንድ ጀምበር የተገነባ ሳይሆን፤ የኢትዮጵያ ረጅም የዲፕሎማሲ ታሪክ፣ በፓን-አፍሪካኒዝም እንቅስቃሴና በአህጉሪቱ ነፃነት ላይ የነበራት የጎላ ሚና እንዲሁም የአፍሪካ ሕብረት መቀመጫ መሆኗ ተደምሮ የተገኘ ታሪካዊ ውጤት ነው።

አፍሪካ በቋንቋ፣ በባህልና በፖለቲካዊ አወቃቀር የተለያየች ብትሆንም፤ አዲስ አበባ የተለያዩ ድምፆች የሚገናኙባት፣ የጋራ አቋም የሚያዙበት እንዲሁም የሰላምና የልማት ውይይቶች የሚደረጉበት አህጉራዊ መድረክ ሆና በማገልገል ላይ ትገኛለች።

በተጨማሪም የአፍሪካ ጉዳዮች ከዓለም አቀፍ አጋሮች ጋር የሚነሱበትና የትብብር አቅጣጫዎች የሚቀየሱበት ዋነኛ የምክክር ማዕከል ሆናለች።

የዲፕሎማሲ ማዕከልነት ከፖለቲካዊ ጠቀሜታ ባሻገር ኢኮኖሚያዊና ማኅበራዊ ዕድሎችንም የሚፈጥር ሲሆን በየጊዜው የሚካሄዱ አህጉራዊና ዓለም አቀፍ ጉባኤዎች የሆቴል፣ የቱሪዝም፣ የመጓጓዣ፣ የኮንፈረንስና የአገልግሎት ዘርፎችን ያነቃቃሉ።

ከዚህ ባሻገር ለወጣቶች በዓለም አቀፍ ተቋማት፣ በምርምር፣ በሚዲያ፣ በትርጉምና በተለያዩ የሙያ ዘርፎች ተጨማሪ የተሳትፎና የሥራ ዕድሎችን ይፈጥራል፡፡

አዲስ አበባም ይህን ተፈላጊነቷንና ቦታዋን በሚመጥን መልኩ ተቋማዊ አቅሟን በማጠናከር፣ ዘመናዊ መሠረተ-ልማቶችን በማስፋፋትና ዓለም አቀፍ ጉባኤዎችን የማስተናገድ ብቃቷን በማሳደግ የአፍሪካና የዓለም የዲፕሎማሲ መገናኛ ድልድይነቷን ይበልጥ እያጠናከረች ትገኛለች።

በኢንትሀድ አብራር

11/08/2026

የኃያላኑ ትብብር በኢትዮጵያ የኑክሌር ፕሮግራም

11/08/2026

"ሙስና አደገኛ ነቀርሳ እና ጥፋት ነው። በርግጠኝነት የምነግራችሁ ግን ተቋማዊ ሙስና ፈጽሞ የለም።!"

ጠቅላይ ሚኒስትር ዐቢይ አሕመድ (ዶ/ር)

11/08/2026

የጠብመንጃ ዘመን ማብቂያ፤ ሀሳብ የንግስናን ዘውድ የጫነበት ታሪካዊ መድረክ
**********************

በኢትዮጵያ ዘላቂ ሰላምን ለማስፈን፣ የተበጣጠሱ የማህበራዊ ትስስሮችን ለመጠገንና ሀገራዊ መግባባትን ለማጠናከር እየተካሄደ የሚገኘው ሀገራዊ ምክክር ሀገርን በፅኑ መሰረት ላይ ለማቆም ወደር የሌለው የጥበብ መንገድ መሆኑን እያረጋገጠ ይገኛል።

ይህ ታሪካዊ መድረክ ልዩነቶች በሚሰፉበት ጊዜ፣ አለመግባባቶች ወደ ግጭት በሚያመሩበትና የሀገር ህልውና አደጋ ላይ በሚወድቅበት ወቅት ዜጎች በጠረጴዛ ዙሪያ ተቀምጠው የልባቸውን የሚነጋገሩበት ያለፈውን ቁስል የሚያክሙበትና የወደፊቱን የጋራ ራእይ የሚስሉበት ብቸኛ እውነተኛ አማራጭ ነው።

በታሪክ አጋጣሚ የኢትዮጵያ የስልጣን ሽግግሮችና የፖለቲካ ማህበረሰብ ግንባታ ሂደቶች በአብዛኛው በኃይልና "አሸናፊው ሁሉንም ይወስዳል" በሚል የዜሮ ድምር መርህ ላይ የተመሠረቱ በመሆናቸው ለዘመናት የታፈኑ ቅሬታዎች ለውጭ ጣልቃ ገብነትና ለሀገር ደህንነት ስጋት ክፍተት ፈጥረው መቆየታቸው ይታወቃል።

ነገር ግን አሁን እየተካሄደ ያለው ሀገራዊ ምክክር ጉባኤ ይህንን የጠብመንጃና የኃይል እሳቤ በሀሳብ የበላይነት በመተካት አዲስ ማህበራዊ ውል የሚፈፀምበትን ታሪካዊ አጋጣሚ ፈጥሯል።

ይህ በውስጥ ፖለቲካ የሚመጣ መረጋጋት ደግሞ ሀገሪቱ በጂኦ ፖለቲካዊ መድረኮች በውሃ ድርድሮችና በቀይ ባሕር ቀጠና የምታደርገውን የብሔራዊ ጥቅም ማስከበር እንቅስቃሴ በቀጥታ የሚያጠናክር ከመሆኑም በላይ የዜጎችን ደህንነትና የኢኮኖሚ ብልፅግና የሚያረጋግጥ ነው።

ታላቁ የሰላም ታጋይ ኔልሰን ማንዴላ "ከጠላትህ ጋር ሰላም መፍጠር ከፈለግህ ከጠላትህ ጋር አብረህ መሥራትና መወያየት አለብህ" እንዳሉት፤ እውነተኛ ምክክር የሚጠይቀው ፍርሃትን አሸንፎ ሐሳብን በፅኑ ከሚቃወም ወገን ጋር በድፍረት መነጋገርን መርህ ያደረገ ነው።

"ከመመካከር ይገኛል መከበር" እና "ድር ቢያብር አንበሳ ያስር" የሚሉት ጥልቀት ያላቸው የሀገራችን ብሂሎች እንደሚያስተምሩት በምክክር አንድ የሆነ ህዝብ ከፊቱ የተጋረጠበትን ማንኛውንም አይነት ፈተና በድል ማለፍ ይችላል።

የፖለቲካ ነፃነት የመጨረሻው ግብ ሳይሆን የመንገዱ መጀመሪያ በመሆኑ ሀሳብን በነፃነት የመግለፅ ምህዳር መከፈቱ የተለያዩ የፖለቲካ ሀይሎች ያለምንም ስጋት በጠረጴዛ ዙሪያ እንዲቀመጡ መንገድ ጠርጓል።

ይሁን እንጂ በውይይት ያልተደገፈ የፖለቲካ ነፃነት ወደ ስርዓት አልበኝነት ሊያመራ ስለሚችል ይህንን ነፃነት ወደ አዎንታዊ ሀገራዊ ሀይል የሚቀይረው አሁን እየተካሄደ ያለው እውነተኛና አካታች ውይይት ነው።

ይህ በግልፅነት በታጋሽነትና በሌላው ሀሳብ አዳማጭነት ላይ የተመሠረተ ምክክር በግለሰቦችና በቡድኖች መካከል ያሉ የመስማማትና የመለያየት ነጥቦችን በግልፅ በማውጣት ለህጎች፣ ለፖሊሲዎችና ለህገ መንግሥታዊ ማሻሻያዎች ፅኑ መሠረት ይጥላል።

የህግ የበላይነት የሚረጋግጠው ህጎች የሁሉም ዜጎች የጋራ ስምምነት ውጤት ሲሆኑ ብቻ በመሆኑ ሂደቱ ፍትሐዊና ዴሞክራሲያዊት ኢትዮጵያን ለመገንባት ዋስትና ነው።

በብሌን ደምበሎ

11/08/2026

ኢትዮጵያ ወደ ኑክሌር ኃይል

11/08/2026

"እጁ ንጹሕ የሆነን ሰው ማንም ባለሀብትም ሆነ ቡድን ሊገዛው አይችልም። ሙሰኛን ግን በሻይ፣ በውኃ፣ በላፕቶፕ ወይም በመሬት ታገኘዋለህ።"

ጠቅላይ ሚኒስትር ዐቢይ አሕመድ( ዶ/ር)

11/08/2026

የኢትዮጵያ መድህን

11/08/2026

ቆሞ ቀሩ ሕወሓት ማን ነው?

#ህወሓት

ዓለም በአርቲፊሻል ኢንተለጀንስ (AI) እና በዲጂታል ትራንስፎርሜሽን ወደፊት እየተረመደች ባለችበት በዚህ ...

11/08/2026

የኢትዮጵያውያን የቆራጥነት አሻራ
*************

ኢትዮጵያ ወደኋላ ያሰራትን በድርቅና በአየር ንብረት መዛባት የተጫነባትን የችግር ማቅ አውልቃ ጥላ በምትኩ የተስፋና የለመለመ መሬት መገለጫ የሆነውን አረንጓዴ ካባ ለብሳ ለነገዋ ብሩህ ተስፋ ሰንቃለች።

ኢትዮጵያውያን በልዩነት ሳይሆን በአንድነት በዛሬ ላይ ብቻ ሳይሆን በነገው የጋራ ማዕድ ለመቋደስ በቆራጥነት የተሰባሰቡበትን ታሪካዊ አሻራ አሳርፈዋል።

ከቀናት በፊት ያሳለፍነው ሰኞ ሐምሌ 27 ቀን 2018 ዓ.ም እንደተለመደው የሳምንቱ የመጀመሪያ ቀን ብቻ አልነበረም። በሚሊዮኖች የሚቆጠሩ ዜጎችን ከጫፍ እስከ ጫፍ ያስተባበረ፣ የኢትዮጵያን የአረንጓዴ አሻራ ተግባር በአዲስ ታሪክ ለመፃፍ ያስቻለ ድንቅ ክስተት እንጂ።

ኢትዮጵያውያን በአንድ ጀምበር 805.3 ሚሊዮን ችግኞችን በመትከል ያሳዩት ትብብር ለነገው ትውልድ ንጹሕ አየር፣ የተረጋጋ የአየር ንብረትና የተረጋገጠ የምግብ ዋስትና ምንጭ ነው።

ይህ ንቅናቄ በዉጤት ያሸበረቀ እንዲሆን ያስቻለው ዜጎች በእድሜ፣ በጾታ፣ በብሄር፣ በሃይማኖት ወይም በፖለቲካ አመለካከት ሳይለያዩ በአንድነት እጅ ለእጅ ተያይዘው በታላቅ ሀገራዊ ስሜት የተሳተፉበት ተወዳጅና ተናፋቂ መድረክ ስለ ሆነ ነው።

መርኃ ግብሩ ከገጠር እስከ ከተማ፣ ከህጻናት እስከ አዛውንት ድረስ ሁሉም ዜጋ እኩል አሻራውን ያሳረፈበት በመሆኑ፣ ሀገራዊ አንድነታችንን እና ህብረታችንን በተግባር ያጠናከረ የጋራ ኩራታችንም መሆን ችሏል።

በዚህ ቁርጠኝነት የሚተከሉት በቢሊዮኖች የሚቆጠሩ ችግኞች ትናንት የተራቆቱ ተራራዎች አረንጓዴ በማልበስ፣ ምርትና ምርታማነት በመጨመር፣የደን ሽፋናችን በከፍተኛ ሁኔታ በማሳደግ ለሀገራችን ሁለንተናዊ እድገት መሰረት መጣል ጀምረዋል።

“ተስፋን እንትከል” በሚል መሪ ቃል የተከናወነው ይህ ታላቅ ዘመቻ፣ ልክ እንደ ሕዳሴው ግድብ ሁሉ፣ የኢትዮጵያ የታላቅ ታሪክና የሉዓላዊነት አሻራ ሆኗል።

የአባቶቻችንን የነፃነት አሻራ በዓለም ፊት እንዳቆመን ሁሉ፣ የአረንጓዴ አሻራን ለልጅ ልጆቻችን በክብር እናስረክባለን የሚል ዓላማ አንግቧል።

ይህ ከማለዳ የወፎች ጫጫታ እስከ ጀምበር እልባት የተዘረጋ የተግባር ቀን ብቻ ሳይሆን የአንድ ትውልድ ቆራጥነትን፣ የአንድነት ኃይልንና ለሚመጣው ትውልድ የሚተላለፍ የተስፋ መልዕክትን የሚያሳይ ታሪካዊ አሻራ ነው።

በልዩ እሸቱ

11/08/2026

ጠቅላይ ሚኒስትሩ የታጣቂዎችን ስትራቴጂ እንዴት አከሸፉ?

#ኢትዮመልሕቅ