02/07/2025
Hogganaa Majlisaa Eenyuun Haa Filannu?
🔴🔴🔴🔴🔴🔴🔴🔴🔴🔴
Ustaaz Ahmaddiin Jabaliin
💢💢💢💢💢💢
Muslimni Itiyoophiyaa filannoo dhaabbata isa hoogganu Mana Maree Dhimmoota Islaamummaa Itoophiyaatiin qaama naaf ta'a jedhu bilisummaan filachuun mirgasaa mariif hin dhihaanne ta'uun beekamaadha.
Gama kanaan qaamni inni filatu maal akka isaaf godhan barbaada? Kan isaan filus kaayyoo maaliitiifi? Kan inni filachuuf yaade hoo waan inni kaayyeffatu sana milkeessuufii danda'uu? Kan jedhu sinaan ilaaluufi adda baasuun murteessadha.
Sababni isaas Majlisnis haa ta'u hoggantootni isaa hawaasa bakka bu'uufi tajaajila inni dhaabbaticha irraa barbaadu bifa barbaachisuun kennuu waan ta'eef. Kanaafuu filattoonni qaama naaf ta'a jedhan yeroo filatan yookaan filatamtoonni filamuuf yaadan gaafa bakkichaaf of kaadhiman waa'ee maalummaa dhaabbatichaa, fedhii hawaasa muslimaa, gahee isaan irraa eegamu akkasumas gahumsaafi dandeettii ofii isaanii yaada keessa galchuun isaan irraa eegama.
Barruu kanaan maalummaafi gahee mana maree dhimmoota Islaamummaa Itoophiyaa hubannoo gahaa kanneen hin qabneef hubannoo uumuufi kanneen hubannoosaa qaban ammoo yaadachiisuun barbaada. Kunis kaayyoo, mul'ata, ergamaa, galmaafi gochoota majlisa ibsuudhaan taha. Dubbisa gaarii.
Mul'ata Dhimma Islaamummaa Itoophiyaa (Majlisa)
💥💥💥💥💥💥💥💥💥💥💥💥💥
Biyyattii keessatti qajeelfamoota Islaamaa bu'uureffachuun kan hundaa'e, misooma, haqaafii tokkummaaf kutannoo kan qabu naga qabeessa, muslima Itiyoophiyaa hunda galeessaafi amantaasaan badhaadhe uumamee arguu.
Ergama Majlisaa
🏀🏀🏀🏀🏀
Hawaasni muslimaa biyyattii keessatti argamu barsiisa islaamummaa babal'isuun, mirgoota amantaa eegsisuun, fayyadamummaa hawaasaa jabeessuun, guddina amantaa, diinagdeefi hawaasummaa biyyattiif gahee hoggantummaa bahuu.
Galma Majlisaa
🔮🔮🔮🔮🔮
1. Bilisummaa fi walqixxummaa amantaa eegsisuun, jireenya naga qabeessaafi tasgabbaa’aa dhiibbaafi loogii irraa bilisa ta'e akka hawaasni Musliimaa jiraatu mirkaneessuu
2. Barumsaa fi duudhaalee Islaamaa guutuu Itoophiyaa keessatti babal’isuu.
3. Tokkummaa fi tumsa jidduu Muslimoota cimsuu.
4. Fayyadamummaa hawaasummaafi diinagdee muslimoota Itiyoophiyaa dagaagsuu.
5 Fedhii hawaasa Muslimaa ga'umsaafi haala bu’a qabeessa ta’een furuuf akka dandeessisu dandeettii dhaabbataa bifa itti fufiinsa qabuun ijaaruu
Kaayyoowwan Majlisaa
🌺🌺🌺🌺🌺🌺
1. Kabajamuu Mirga Muslimootaaf Dhaabbachuu
🍅🍅🍅🍅🍅🍅🍅🍅🍅🍅🍅🍅
Gaaffii hawaasaa amantaafi hawaasummaa furuuf dhaabbilee mootummaa fi miti mootummaa waliin ta’uun hojjechuu.
2. Barnootaa fi Hubannoo
📀📀📀📀📀📀📀📀
Qaqqabamummaa barnootaa islaamaa fooyyessuuf manneen barnootaafi wiirtuuwwan Islaamaa hundeessuu, kan jiran cimsuu fi deeggaruu.
3. Tokkummaa fi Tumsa Cimsuu
🎁🎁🎁🎁🎁🎁🎁🎁🎁🎁
Walitti dhufeenya Muslimoota gidduu jiru cimsuuf qophiifi marii hawaasaa gaggeessuu
4. .Dhaabbilee Hojii Tola Ooltummaa Qindeessuu
📶📶📶📶📶📶📶📶📶📶📶📶📶📶📶 Muslimoota rakkatanii fi rakkinaaf saaxilamoo ta’an gargaaruuf kaka'umsa qopheessuu.
5. Misooma Dhaabbataa
🆙🆙🆙🆙🆙
Hojiirra oolmaa ijaarsa dandeettiifi teeknooloojiitiin hojmaata, gahumsaafi si'oomina mana marichaa fooyyessuu
Istiraateejiilee Majlisaa
🌲🌲🌲🌲🌲🌲🌲
1. Wiixineefi tarsiimoowwan hirmaannaa hawaasa Musliimaa dhimmoota amantii, hawaasummaa, dinagdee fi biyyaalessaa irratti guddisan qopheessuun sosochii gochuu
2. Muslimoonni sagantaa barnoota amantii fi kan duuniyaa irratti bal’inaan akka hirmaatan gochuu
3. Caasaa Majlisaa fi dhaabbilee Islaamaa biroo cimsuun roga hunda galeessaan gaaffiilee hawaasa muslimaa deebisuu fi fedhii isaanii guutuu akka danda’an ga'umsa isaan dandeessisu irratti akka argaman jabeessuu
4. Hawaasni muslimaa jireenya fooyya'aa hiyyummaa, rakkina, duubatti hafummaafi doofummaa irraa faga'ate akka jiraachuu danda'u dandeettiifi sadarkaa diinagdee Muslimotaa dagaagsuu.
5. Seeronni, imaammanniifi hojmaataaleen Muslimoota biyyattiitti gufuu ta'aa jiran, dhiibbaa irratti uumaniifi rakkoo hudhaa itti ta'aa jiran akka jijjiraman hojjachuu.
Hojiiwwan Majlisaa
🍀🍀🍀🍀🍀🍀
1. Itiyoophiyaa keessatti dhimmoota amantaa sadarkaan jiran bifa barbaachisuun hoogganuu.
2. Faayidaa fi mirga Muslimoota Itiyoophiyaa kabachiisuuf haala kaayyeffateen Muslimoota biyya keessaa fi sadarkaa idil-addunyaa bakka bu’uu
3. Sochii amantaa idilee haala barbaachisaa ta’een bulchuu.
4. Mirgootaa fi faayidaalee Muslimoota eegsisuu.
5. Rakkoolee hawaasummaa hawaasa Muslimaa akka furaniif sochiilee tola ooltummaafi tajaajila hawaasummaa qindeessuufi haala barbaachisaa ta'een hojiirra oolchuu.
6. Hambaalee fi seenaan Islaamaa Itiyoophiyaa keessa jiran akka eegamanii fi akka beekaman gochuu.
7. Karaa hunda galeessaan hojiiwwan ijaarsaafi ga'umsa dandeettii hawaasaa fi dhaabbilee Muslimaa raawwachuu.
8. Hojiiwwan tokkummaa, waloomaafi qindoomina hawaasa muslimaa jabeessuu danda’an raawwachuu.
9. Guutuu biyyattiitti guddina hawaasummaa Muslimotaa haala qindaa'ina qabuun hojiirra oolchuu.
10. Haala mirgaa fi faayidaalee hawaasa muslimaa dabarsee hin kennineen dhimmoota biyyaa fi ummataa irratti mootummaa waliin hojjachuu
Dhumarratti!
🌹🌹🌹🌹🌹
Armaan olitti kanneen eeraman dhaabbata hawaasa muslimaa hoogganu kan ta'e Majlisni gama bulchiinsaatiin gahee isarraa eegamu ibsuuf kan yaalameedha. Tokkoon tokkoon dubbistotaa Majlisnis haa ta'u qaamni Majlisicha hoogganu tajaajila akkamii akka kennaniif akka barbaadu yaadaa ofiisaa akka qabu nan tilmaama.
Barreeffama kana bu’uura godhachuun dhimmicha irratti mari’ataa qophaa'uun akkasumas kana irraa ka'uun hoggantoota akkamii Majlisaaf filachuu qabna? Kan jedhu irratti mariyataa qophaa'uun barbaachisaadha.
Keessumaayyuu kanneen dhimmi majlisaa isin yaachisuufi dhimma majlisaaf gatii kaffaltan majlisa dakaa hanga gubbaatti sadarkaan jiruuf namni malu akka filamuuf hojjadhaa.
Akkasumas warri aangoo majlisaa irra jirtanis ta'ee kanneen gara majlisa hoogganuutti dhufuuf fedhii qabdan kallatii kanaan of madaaluun, dhimmichi amaanaafi kan Rabbiin birattis itti gaafatamummaa qabu ta’uu hubattanii dhaabbata caalaatti fooyya’aa ta'e ijaaruuf gahee seena qabeessa gama keessanii akka bahattanin gaafadha.
Kanumaanis Majlisa Federaalaa irraa Pireezidaantii yeroo ammaa Sheyik Hajjii Ibraahim Tuhfaa irraa eegalee hooggantoonniifi qaamoleen majlisaa hanga caaseffama Aanaatti jirtan, miseensonni Boordii Hojii Raawwachiiftuu Filannoo Majlisaa, akkasumas qaamoleen filamuuf balbala majlisaa naanna'aa jirtaniifi mana manatti tattaaffii taasisaa jirtan hundi, akkasumas filattoonni muslimaa kanneen waraqaa filannoo hin fudhannes ta’ee kan fudhattan marti jaarmiyaan muslimoota Itiyoophiyaa hoogganu gahee olitti eeramaniifi kan ati yaaddus bahachuu kan danda'u, tajaajila barbaachisaa fedhii hawaasa muslimaa jiddugaleeffate kennuu kan danda'u, hoggantoota dhaabbata cimaa biyyaafi uummata boonsu akka ta'u milkeessuu gargaaran filachuuf itti gaafatamummaan seena qabeessi gurmuu keessan irratti kufeera. Kanaafuu itti gaafatamummaa keessan bahadhaa!
Barreeffamni koo waa'ee majlisaa itti fufeera. Yoo Rabbi jedhe bifuma walfakkaatuun barruu koo itti aanu kan gahee fi hojii Mana Maree Ulamaa'ii irratti xiyyeeffatuun hanga walitti deebinutti nagaatti!
