30/12/2025
"Bishaan mataa gahe miila hin hanqatu"...
Dhaloota keenya ilmaan Booranaaf bareentuu halagaan ilaalcha dabaa fi ammeenya dhokataa kan halagaa malee firri hin beeknen masakame dhaloota gidduutti tolchuun akka dhalootumman keenya adda cituuf halkanii fi guyyaa nurratti dalagamaa ture. Daba kanaan Oromoon aaduu takkan korma qalatee qorii takkarraa nyaachuu lagatee ,soddooma walii lagatee hanga Oromummaa walii waakkachuurra ga'eera.Haa ta'u malee ''iji baddus bakki ijaa hin badu' akkuma jedhamu, Har'a guyyaan waan hunda bira nu dabarsee, dhaloonni dammaqee diinummaa kalee san cabsuun miira dhalootummaa fi gochaa kalee rawwatametti gaabbun dhibdeen kun akka falamu taasiseera. Galanni maanguddoota keenyaa fi Galma Warra Abbaa Oromootif haa ta'u,ilmaan aaduu takkan korma qalatanii waliin nyaachun, walirraa fuudhanii walitti heerumsiisun fi walumaagalatti fayyaaf nageenyi kaleessa Oromoo gidduu ture sun bu'uurarraa akka deebi'uuf fayyinni Oromoo gosa Jiillee fi warra Arsii gidduutti taasifamee jira. Dhaloonni fi maanguddoonni keenya dubbii tana hawaasa kana gidduudhaa fixuuf aarsaa garaagaraa kaffalaa turtan galatoomaa! Oromoo lubbuun jiruufis kan lubbuun hin jirree birattis kuni gammachuudha!
