14/05/2026
Si'a 10 ol toorcherii godhaman!
Piroofeesar Maartaa Kumsaa (Kuwee). Haadha manaa obbo Leencoo Lataa.
Gaazexeessituu, ogeessa siyaasaa (politician) fi falmituu mirga namoomaa kan ta’an Piroofeesar Maartaa Kumsaa jedhamu.
Bara 1946 keessa magaalaa Dambi Doollootti dhalatani. Warra Miisiyoonaa irraa kan dhalatan yeroo ta'u, maqaa “Maartaa” jedhu maqaa narsii isaaniin deessiste irraa argatani. Maqaa “Kuwee” jedhu ammoo dubartii seenaa Oromoo keessatti goota taate tokko irraa fudhatani.
Barnoota sadarkaa 2ffaa akka xumuraniin Yunivarsiitii Qadaamaawi Haayilesillaasee Finfinneetti argamu seenani.
Yeroo sanatti fedhiin isaanii Engineering brachuu kan ture yeroo ta'uu, akkuma isaan Yuuniversitii seenaniin mormiin sirna mootummaa Haayilesillaasee Finfinnee keessatti dhowee waan tureef mormii sanatti makamani.
Mootummaan Haayilesillaasee kan kufu yoo ta'e, lafti abbaa lafaatiif ni deebi'a, bittaa warra lixaa jalaa baanee 'socialism' dhaan bulla, akkasumas lafti manneetii amantaatiin qabamee jiru gadidhiifamee abbaa lafaaf deebi'a abdii jedhuun kan qabsaa'an yeroo ta'uu, mootummaan Haayilesillaasee kufee, dargiin dhufus gaaffiinsaanii deebii dhabuu hordofee qabsoosaanii itti fufani.
Yeroo sana ogummaa gaazexeessummaatiin Lutheran World Federation kan Finfinnee keessatti argamu irraa leenji'ani.
Gidduu kanaanis obbo Leencoo Lataa waliin gaa’ela dhaabbatani. Obbo Leencoon yeroo sana chemical engineering eebbifamanii turani.
Bara 1968 keessa mucaa isaanii jalqabaa argatan; Huriyaa jechuunis moggaasani. 'Huriyaa' jechuun afaan Arabiffaan 'Bilisummaa' jechuudha.
Yeroo kanadha kan Koloneel Mangistuun 'Red Tererrist' (Shororkeessa Diimaa akka jechuuti) labse.
Wayita sana Huuriyaatti aansanii Roobalee da'anii turani. Mucaa 3ffaa ammoo ulfa turani. Gidduu kanaan Obbo Leencoo dhufanii manaa qabanii hidhani. Ji'a 6 keessatti yeroo afur hidhaniiru. Kunis fincila diddaa fi ABO waliin walqabatee ture. Utumasaan mana hidhaa jiraniis mucaasaanii isa 3ffaa godhatani.
Obbo Leencoon mana hidhaa galfamanii eessa akka jiran utuu hin beekamin waggaa tokko guute. Bara 1973 keessa piroofeesar Maartaas qabanii hidhani.
Yeroo sana umuriin isaanii waggaa digdamoota gara jalqabaa yeroo ta'u mana hidhaa sana keessatti yeroo kudhanii ol toorcharii akka godhan dubbatu. Kunis ammoo atis fincila diddaa kana keessatti hirmaatteetta jedhamaniituu dha. Haala kanaan waggoota sagal mana hidhaa keessatti abarsani.
Beela bara 1970 gara dhumaa biyya kana keessa ture ogummaa gaazexeessummaa qabaniin addunyaatti kan beeksisan, manuma hidhaa keessa taa'anii afaan Farnsaayi fi afaan Tigiree barachuu danda'anii turani.
Akkasumas bayooloojii, herrega fi ji’oograafii namoota mana hidhaa keessa turanii fi ijoollota warra mana hidhaa eeganii barsiisaa akka turan dubbataniiru. Namni sammuu cimaa qabu mana hidhaa keessa jira jechuunis dubbatu.
Mana hidhaa keessa osoo jiranii dhaabbileen mirga namoomaa akka Amnesty International dhiibbaa godhaniin yaalaaf gara hospitaalaa akka geeffaman hayyamameef.
Yeroo mana hidhaa keessa jiran ijoollota isaanii waliin wal arguu waan hin dandeenyeef Hospitaalatti carraa kanatti fayyadamuudhaan warra eegdotaaf matta'aa kennanii daqiiqaa 15f ijoollota isaanii waliin walarguu akka dandaa'an dubbataniiru.
Mana hidhaa keessatti dhaabbanni PEN jedhamu poostaa ergeefii ture. Ergaan irratti barreeffame tures: “We know about you. You are not alone.” (Nuti waayeekee beeknaa, ati qofaakee miti) kan jedhu ture. Kunis abdii itti horee akka ture dubbatani.
Barreessaa beekamaan biyya Kaanaadaa Timothy Findley, jedhamu kan isaan “abbaa koo Kaanaadaa” jedhanii waaman, ergaa “Hope against despair” jedhu poostaadhaan yeroo hedduu deddeebi'ee ergaafii ture.
Phaagumee 5/1981mana hidhaatti ijoolleensaanii ilaaluuf waan dhufaniif, rifeensa mataasaanii miicachaa turani. Guyyaansaa sambata guddaa ture. Gidduu kanaan sagalee guddistuudhaan maqaansaanii waamame.
Waamichi kun ajjeechaadhaafis ta'uu mala ta'a; hata'u malee bilisaan mana hidhaa irraa akka gadi lakkifaman itti himame. Gadi ba'anii ijoolleesaanii argatan. Gara manaattis waliin qajeelani. Obbo Leemcoon garuu duukaa hin turre.
Ijoollee isaanii sadeen fudhatanii bara 1983 gara biyya Kaanaadaatti baqatani.
Waggaa tokko erga turaniin booda barnoota isaanii itti fufuun bara 1988 Yunivarsiitii York irraa digirii jalqabaa hojii hawaasummaa (Social Work)dhaan fudhatani.
Waggaadhuma sana keessa Human Rights Watch irraa badhaasa mirga namoomaa argachuu dandaa'aniiru.
Waggaa tokko booda Yunivarsiitii Torontoo irraa maastarsii fudhatani.
Bara 1995 Yunivarsiitii Wilfrid Laurier keessatti barsiistuu ta'anii hojjechaa osoo jiranii doktoreetii isaanii Yunivarsiitii Torontootti xumurani.
Piroofeesar Maartaa Kumsaa (Kuwee) biyya Kaanaadaa keessatti yunivarsiitiiwwan adda addaa keessatti barsiisaa turaniiru.
Madda: Ancient History of Oromoo
