22/04/2026
መግለፂ ቕዋም ኣመራርሓ ወረዳ፣ ከተማን ዞባን ከምኡ እውን ላዕለዎት ኣመራርሓ ህዝባዊ ወያነ ሓርነት ትግራይ /ህወሓት/
========================================
ካብቶም ህዝቢ ትግራይ ዝተቓለሰሎም ዕላማታት ሓደ ምርግጋፅ መሰል ዓርሰ ምሕደርኡ እዩ። ነዞም ዕላማታት ንምዕዋት ድማ መላምል ደቁ ክቡር መስዋእቲ ከፊሎም እዮም። በዚ ዝተኸፈለ መስዋእትን መቑሰልትን ድማ ህዝቢ ትግራይ ጥራሕ ዘይኮነስ ካልኦት ህዝብታት ኢትዮጵያ እውን ተጠቀምቲ ዝገብር ብሕገመንግስታዊ ቃልኪዳን ዝተኣሰረ ስርዓት ዓርሰ ምሕደራ ተረጋጊፁ እዩ። ብመሰረት እዚ እውን ንዝሓለፉ ዓመታት በቢእዋኑ ዝተተለመ መረፃታት ብምክያድ ህዝቢ ብቐጥታ ተወከልቱ ዝመርፀሉ ስርዓት ኣግሂዱ እዩ። ብፍላይ ድማ ቅድሚ ሓሙሸተ ዓመት ኣብ ኢትዮጵያ ፅግዕተኛ ሓይሊ ስልጣን ምቁፅፃሩ ስዒቡ ነቲ ህዝቢ ትግራይ ክባር ዋጋ ዝኸፈለሉ ሕገመንግስታዊ ስርዓትን መሰል ዓርሰ ምሕደርኡን ክምንጥል እንትንቀሳቐስ ዋጋ ዝኸፈልኩሉ መሰል ኣይምንጠልን፣ ወከልተይ ከይመርፅ ዝኽልክል ኩነታት የለን ኢሉ ኣስታት 2 ነጥቢ 8 ሚልዮን ህዝቢ ዝተሳተፈሉ ዕውት መረፃ ብምክያድ ብመሰል ዓርሰ ምሕደርኡ ፍፁም ከምዘይደራደር ዳግም ኣረጋጊፁ እዩ።
ስርዓት ብልፅግና ነቲ ኣቐዲሙ ዝኣወጆ ጀኖሳይድ ናብ ወታደራዊ ወራር ምስ ኣሰጋገሮ ድማ ህዝቢ ትግራይ ኣብ ፅላል መሪሕ ውድቡ ህወሓት ዝምራሕ መንግስቲ ትግራይ ከቲቱ ብፅንዓት መኪቱ እዩ። ሳላ ዝተወደበ ቃልሱን ፅንዓቱን ድማ ጀኖሳይዳዊ ኵናት ከብቅዕ ኩሎም ኣፈላላያት ብዘተን ድርድርን ክፍትሑ ዕላማ ዝገበረ ስምምዕ ፕሪቶርያ ክፍረም ኣኽኢሉ እዩ። ስርዓት ብልፅግና ነቲ ህዝቢ ትግራይ ዓርሰ ምሕደርኡ ንምርግጋፅ ዘካየዶ መረፃ ከም ሕማቕ መርኣያ ወሲድዎ ስለዝነበረን ናይ ውሽጥና ሽርሒ ተሓዊስዎን ምእንተ ሰላም ክበሃል ሕጋዊ ቤትምኽርና ተወንዚፉ ክፀንሕን ህዝቢ ትግራይ ብግዝያዊ ምምሕዳር ክመሓደርን ተጌሩ እዩ። እዚ ድማ ህዝቢ ትግራይን መሪሕ ውድቡ ህዝባዊ ወያነ ሓርነት ትግራይን ንሰላም ዘለዎም ቅሩብነት ዘረጋገፀ እዩ።
ስምምዕ ፕሪቶርያ ዋላ እኳ ንመኸተና ዝጎድኡ ነጥብታት ዘካተተ እንተኾነ ህዝቢ ትግራይን መሪሕ ውድቡ ህወሓትን ንሰላም ካብ ዘለዎም መትከላዊ እምነት ብምብጋስ ዋጋ እናኸፈሉ እውን እንተኾነ ንተፈፃምነት እቲ ስምምዕ ዘይተሓለለ ፃዕሪ ክገብሩ ፀኒሖም እዮም። በዚ እውን እቶም ብወገን ትግራይ ክፍፀሙ ዝተቐመጡ ግቡኣት ብምፍፃም ገሊኦም እውን ቅድሚ ዝተቐመጠሎም እዋን ብምቅልጣፍ ንተፈፃምነት እቲ ስምምዕ ዘለዎም ተበግሶ ብተግባር ኣረጋጊፆም እዮም። ስርዓት ብልፅግና ድማ ብኣንፃሩ እቲ ስምምዕ ከም መቐፀሊ ነቲ ዝኣወጆ ጀኖሳይድ እናተጠቐመሉ እዩ ፀኒሑ።
በዚ እውን ጀኖሳይዳዊ ኩናት ጠጠው ከብልን ሞትን ስቓይን ህዝብና ከብቅዕን ትፅቢት ዝተገበረሉ ስምምዕ ምቁራፅ ተፃብኦ፤ ንህዝብና መልክዕ ሞት ካብ ምቕያር ዝሓለፈ ትርጉም ከምፅእ ኣይከኣለን። ስርዓት ብልፅግና ብመሰረት እቲ ስምምዕ ሕገመንግስታዊ ሉእላዊ መሬት ትግራይ ወሪሮም ንዝሓዙ ዕጡቓት ከውፅእ ኣይከኣለን። እኳ ድኣስ ብዕጥቅን ስልጠናን ብምጥንኻር ኣብ ትሕቲ እዞም ዕጡቓት ዝነብር ህዝብና ኣብ ገዛእ መረበቱ ብሰንኪ መንነቱ ክቕተል፣ ክሳቐን ክባረርን ይገብር ኣሎ። ብሓይሊ ዝተመዛበለን ዝተሰደደን ህዝብና ናብ መረበቱ ክምለስ ስለዘይከኣለ ብጥሜት፣ ሕማም፣ ቁርን ፀሓይን ይሃልቕ ኣሎ። ኣብ ኣባይቲ ብሓይሊ ዝተባረረ ህዝብና ሓደሽቲ ሰፈርቲ ብምስፋር ዲሞግራፊ ናይ ምቕያር ስራሕ ክስራሕ ፀኒሑን ኣሎን። ምኽልካል ኣፍልጦ ውድብና ህወሓት እውን እቲ ስምምዕ መሰረት ከይህልዎ ብምግባር ነቲ ስምምዕ ብግልፂ ኣፍሪስዎ እዩ።
ስርዓት ብልፅግና ንትዕግስትን ምሕፅንታን ህዝቢ ትግራይን መሪሕ ውድቡ ህወሓትን ከም ድኽመት ቆፂሩ ነዚ ስምምዕ ካብ ዘይፍፃም ሓሊፉ እውን ብግልፂ እናጠሓሶ እዩ ፀኒሑ። ዕጡቓት ብምውዳብን ብምስልጣንን፣ ሓድነት ህዝቢ ትግራይ ንምዝራግ በቢእዋኑ ናይ ፅልኢን ምክፍፋልን ኣጀንዳታት ብምንዛሕን ዕሱባት ብምውፋርን ክሰርሕ ፀኒሑ። ካብዚ ሓሊፉ እውን ነቶም ዝወደቦም ዕጡቓት ኣምርሑ ኣብ ልዕሊ ትግራይ ቶኽሲ ከፈቱ እዩ። ብድሮንን ከቢድ ብረትን ኣብ ሰለማዊ ህዝብና ጉድኣት ኣብፂሑ። ወሃብን ካላእን ኮይኑ ክውስን ሕገመንግስታዊ ሉእላዊ መሬት ትግራይ ዝቖራርስ ውሳነ ኣሕሊፉ። ኣለኒ ዝብሎ ወታደራዊ ዓቕሚ ናብ ትግራይ ብምኽታት ንኻሊእ ዙር ደማዊ ኩናት ካብ ምህንዳድ ብተወሳኺ ኣብ ትግራይ ዕፅዋን ክባን ኣዊጁ፣ ንመሃያ ሰራሕተኛ ሓዊሱ በጀት ትግራይ ከልኪሉ፣ዝተጀመሩ ኣገልግሎታት ኣቋሪፁ፣ ኣብ መወዳእታ እውን ካብ ድንጋገ እቲ ስምምዕ ወፃኢ ብዘይኣፍልጦን ተሳትፎን ተፈራራሚ ስምምዕ ፕሪቶርያ ዝኾነ ውድብና ህወሓት ፃኒሒት እዋን ግዝያዊ ምምሕዳር ትግራይ ከምዘናውሖ ገሊፁ እዩ። ስርዓት ብልፅግና ነቲ ኣብ ቅድሚ ኣደራደርቲ ሃገራትን ማሕበረሰብ ዓለምን ዝፈረሞ ስምምዕ እውን ምስ ውልቀ ሰባት ዝፈረሞ ምዃኑ ብምግላፅ እቲ ስምምዕ ብግልፂ ኣፍሪስዎ እዩ።
ህዝቢ ትግራይን መሪሕ ውድቡ ህወሓትን ግን፤ ዋላ እኳ ስርዓት ብልፅግና ንሰምምዕ ፕሪቶያ ብግልፂ እንተፍረሶ ምእንተ ሰላም ክብሉ እቲ ስምምዕ ክትግበርን ማሕበረሰብ ዓለም ካብ ምፍራስ ከድሕኖን ንነዊሕ እዋን ክምሕፀኑ ፀኒሖም እዮም። ሕዚ ግን ልዕሊ እዚ ምፅማም ከም ህዝቢ ህልውናኻ ኣብ ሓደጋ ምእታው ስለዝኾነን ስርዓት ብልፅግና ነቲ ስምምዕ ብግልፂ ስለዘፍረሶን ብግዝያዊ ምምሕዳር ምቕፃል ትርጉም ናብ ዘይብሉ ብርኪ ስለዝወረደ፤ ተወንዚፉ ዝፀንሐ ቤት ምኽሪ መንግስቲ ትግራይ ናብ ስሩዕ ስርሑ ምምላስ እዋናውን ታሪኻውን ጠለብ ህዝብና እዩ።
ብመንፅር እዚ ድማ ንሕና ኣብዚ ′ህዝባዊ መንግስትና ንመኸተና′ ብዝብል መሪሕ ሓሳብ ዝተሳለጠ መድረኽ ዝተሳተፍና ኣመራርሓ ወረዳ፣ ከተማን ዞባን ከምኡ እውን ላዕለዎት ኣመራርሓ ህወሓት፤ ማእኸላይ ኮሚቴ ውድብና ንምምላስ ቤትምኽሪ መንግስቲ ትግራይ ኣመልኪቱ ንዘሕለፎ ውሳነ ብዕምቆትን ሰፍሓትን ዘቲና እዚ ዝስዕብ ቅዋም ወሲድና ኣለና።
1.ማእኸላይ ኮሚቴ ውድብና ህወሓት ዝተወንዘፈ ቤትምኽሪ መንግስቲ ትግራይ ናብ ስሩዕ ሰርሑ ንኽምለስ ዘሕለፎ ውሳነ ህዝቢ ትግራይ ከም ህዝቢ ኣንፀላልይዎ ንዘሎ ሓደጋ ህልውና ዝተረደአን ህዝብና መቃለሲ ማእኸል ክህልዎ ዝገብርን ውሳነ ስለዝኾነ ንተግባራውነቱ ግቡእና ክንፍፅም ኢና።
2.ማእኸላይ ኮሚቴ ወድብና ህወሓት ዋላ እኳ እቲ ሓላፍነት ናይ ቤት ምኽሪ መንግስቲ ትግራይ እንተኾነ ኣብ ኣጣይሻ ፈፃሚ ኣካል መንግስቲ ትግራይ ንኹሎም ዓቕምታት መኸተ ዝሓቖፈ ከኾን ከምዝግባእ ዘቐመጦ ኣንፈት ንህልው ኩነታት መኸተና ዘገናዘበን ዓቕምታትና ወዲብና ንዝመፀና ብድሆታት ክንምክት ዘኽእል ውሳነ ስለዝኾነን ንተግባራውነቱ እጃምና ክንዋፃእ ኢና።
3.ንዕውቱነት ስርሓቲ እዚ ኣብ ፈታኒ እዋን ህዝቢ ትግራይ ንምምራሕ ሓላፍነት ዝሽከም ዘሎ ቤትምኽሪ መንግስቲ ትግራይ ካባና ትፅቢት ዝግበር ኩሉ ክንፍፅም ቃል ንኣቱ።
4.ማእኸላይ ኮሚቴ ውድብና ህወሓት ምስ ስርዓት ብልፅግና ዘለዉ ኣፈላላያት ብዘተን ድርድርን ክፍትሑ ከምዘለዎም ዘሕለፎ ውሳነ ንመትከላዊ እምነት ህዝብናን ውድብናን ዝኾነ ሰላም ሕዚ እውን ዕድል ዝህብ ስለዝኾነ ካባና ትፅቢት ዝግበር ኩሉ ክንፍፅም ቃል ንኣቱ።
5.መላእ ኣብ ውሽጥን ወፃእን እትርከብ ህዝብና እቲ ንዓመታት ዝተቓለሰካሉን ክቡር መስዋእቲ ዝኸፈለካሉን መሰል ዓርሰ ውሳነኻ ንምርግጋፅ ኣብ ዝግበር ቃልሲ ሎሚ እውን ከምወትሩ ወሳናይ ተራኻ ከምትዋፃእ ንተኣማመን። ንሕና ኣመራርሓ ውድብካ ህወሓት ድማ መሪሕ እጃምና ከም ንዋፃእ ክነረጋግፀልካ ንፈቱ።
6.ንብሄራዊ ህልውናን ረብሓን ህዝቢ ትግራይ እትቃለሱ ፖለቲካዊ ውድባት ትግራይን ደገፍቲ ቃልስናን ኣብ ንምርግጋፅ መሰል ዓረሰ ውሳነ ህዝቢ ትግራይ ኣብ ንገብሮ ቃልሲ ኣብ ጎንና ኮይንኩም ድጋፍኩም ክትገልፁ ፃውዒትና ነቕርብ።
ህዝባዊ መንግስትና ንመኸተ!
መኸተ ንብሄራዊ ህልውና!
ዘለኣለማዊ ክብርን መጎስን ንስውኣትና!
ኣመራርሓ ወረዳ፣ ከተማን ዞበን ከምኡ እውን ላዕለዎት ኣመራርሓ ህዝባዊ ወያነ ሓርነት ትግራይ
14 ሚያዝያ 2018 ዓ/ም
መቐለ
