Mohammed Getahun Abate

02/12/2025

May Allah bless you with strength, guidance, and continued success, my dears.

29/11/2025

30/10/2025

‎ለማር ምርት ጥራት ይጠነቀቃሉ ?
‎
ባሕር ዳር: ጥቅምት 20/2018 ዓ.ም (አሚኮ) ‎በአማራ ክልል የንብ ሃብት ጸጋ አለ። ማር በሁሉም የክልሉ አካባቢዎችም ይመረታል፡፡

ማር ባለው ተፈጥሯዊ የምግብነት እና መድኃኒትነት ይዘት በስፋት ጥቅም ላይ ይውላል፡፡ ይሁንና ብዙ ጊዜ ከማር ምርቶች ላይ የጥራት ችግር ይስተዋላል፡፡
‎
የጥቅምት ወር ማር የሚቆረጥበት ወይም የማር ምርት በስፋት የሚሰበሰብበት ወቅት ነው፡፡ ጥራት ያለው የማር ምርት ለማግኘት ደግሞ ጥንቃቄ ያስፈልጋል።
‎
‎አቶ መልካሙ ይግረመው በባሕር ዳር ከተማ አሥተዳደር ማር በማምረት ሥራ ላይ ተሠማርተው እየሠሩ ይገኛሉ፡፡ 400 የሚደርሱ የንብ ቀፎ እንዳላቸውም ነግረውናል፡፡ የሚያመርቱትን ማር ጥራት ጠብቀው ለተጠቃሚዎች እንደሚያቀርቡም ገልጸዋል፡፡
‎
‎ማር በሚቆርጡበት ጊዜ የሚጠቀሙባቸውን ዕቃዎች ንጹሕ እና ከምንም ንክኪ ነጻ መኾናቸውን አንስተዋል። ከኩበት ጭስ ይልቅ የጤፍ ገለባ ጭስ እንደሚጠቀሙም ተናግረዋል፡፡

ይህም የማሩ ጣዕም እንዳይቀይር ያደርጋል ብለዋል፡፡ ማሩም ከተቆረጠ በኋላ በማጣራት ሠሙን በመለየት ለየብቻ ለገበያ እንደሚያቀርቡ ነው የገለጹት፡፡
‎
‎የተጣራውን ማር ንጽሕናውን በጠበቀ እና ለማር ማስቀመጫ የሚኾኑ የፕላስቲክ ዕቃዎችን ተጠቅመው ለተጠቃሚ እንደሚያቀርቡ ነው የገለጹት፡፡
‎
‎ሌሎች ማር አምራቾችም ማር በሚቆርጡበት ጊዜ ንጽሕናውን በመጠበቅ እና ማሩን በማጣራት ጥራት ያለው ምርት ለተጠቃሚ ማቅረብ ይቻላል ነው ያሉት፡፡
‎
‎በአማራ ክልል እንስሳት እና ዓሣ ሃብት ልማት ቢሮ የንብ እና ሐር ልማት ከፍተኛ ባለሙያ ሙሐመድ ጌታሁን የማር ምርት ጥራት ለማስጠበቅ በሚቆረጥበት ጊዜ ተገቢው ጥንቃቄ መደረግ አለበት ይላሉ፡፡
‎
‎ማር ለመቁረጥ የመጀመሪያው ነገር የሚቆረጠው የማር እንጀራ ከ75 በመቶ በላይ በሰም መታሸግ አለበት ይላሉ፡፡ በሰም ሳይታሸግ አይኑ እንደተከፈተ ከኾነ ማር ሳይኾን ያልበሰለ የአበባ ወለላ ነው ብለዋል።

ቢቆረጥም ገና ወደ ማር ያልተቀየረ ስለሚኾን ጥራት አይኖረውም፤ ለሌላ የመብላላት ሂደት ስለሚጋለጥ ይበላሻል ነው ያሉት፡፡ በሰም ካልታሸገ ጊዜው ገና በመኾኑ ተጨማሪ ጊዜ መስጠት ያስፈልጋል ብለዋል፡፡
‎
‎የደረሰ ማር በሚቆረጥበት ጊዜ የሚጠቀሙባቸው ዕቃዎች ንጹሕ እና ደረቅ መኾን እንዳለባቸውም ገልጸዋል፡፡ ማር ፈጽሞ ከእርጥበት ወይም ውኃ ጋር ሊገናኝ አይገባም ነው ያሉት፡፡

ማር የሚቆረጥበት እና የሚቀመጥበት እቃም ለምግብ ማስቀመጫነት የተፈቀደ መኾን አለበት ነው ያሉት፡፡ በቀለም ወይም ሌሎች የኬሚካል ማስቀመጫ የነበሩ ዕቃዎችን መጠቀም እንደሌለባቸውም ጠቁመዋል፡፡
‎
‎ማር ከሚቆርጠው ሰው የግል ንጽሕና ጀምሮ ቢላዋ እና ሌሎች ዕቃዎችንም በንጽሕና ይዞ መጠቀም ያስፈልጋል ብለዋል፡፡ በሚቆርጡበት ጊዜ ከኩበት ጭስ ይልቅ ጥሩ መዓዛ ያላቸውን፣ ቀለል ያለ ጭስ እንደ ወይራ፣ የበቆሎ አገዳ እና ጭድ መጠቀም ይመከራል ብለዋል፡፡
‎
‎ማር ከተቆረጠ በኋላ የማር መጭመቂያ ወይም ማጣሪያ በመጠቀም ንጽሕናውን መጠቀም ያስፈልጋል ነው ያሉት፡፡ ማጣራት ማለት ማሩን ከሰሙ መለየት ማለት ነው፡፡ የተጣራውን ማር ለምግብ ማሸጊያ በተፈቀዱ የፕላስቲክ ወይም የብርጭቆ ዕቃዎች በመጠቀም ለተጠቃሚ ማቅረብ ያስፈልጋል ብለዋል፡፡
‎
‎ማር ካልተጣራ ሰሙም ማሩም ተደበላልቆ ነው የሚሸጠው ያሉት ባለሙያው ከተጣራ ግን ማሩ እና ሰሙ ለተፈለጉበት ዓላማ ይውላሉ ነው ያሉት፡፡
‎
‎ማር እርጥበት እና ሽታን የሚስብ በመኾኑ ለብክለት ይዳርጋል፤ ስለዚህ ሲቀመጥ በንጹሕ እና መጥፎ ሽታ በሌለበት ደረቅ ቦታ መኾን አለበት ይላሉ፡፡ ማር እርጥበት እና የንጽሕና ጉድለት ሲኖረው ሽታው ይቀይራል፣ ጣዕሙም ይበላሻል፤ ሰዎችን በረጅም ጊዜ ሂደት ለተለያዩ በሽታዎች ያጋልጣል ነው ያሉት፡፡

በተለይም አርሶ አደሮች ማርን በማዳበሪያ ማስቀመጥ የተለመደ ነው፤ ነገር ግን ይህ ፈጽሞ መደረግ የለበትም ብለዋል፡፡
‎
‎በክልሉ ያለውን የማር ምርት አሰባሰብ ሂደት ለማሻሻል ሙያዊ ድጋፍ በባለሙያዎች እንደሚደረግ አንስተዋል፡፡ ነገር ግን አሁንም ያልተሻሻሉ ጉዳዮች እንዳሉ ገልጸዋል፡፡ ማር ማጣራት ባለፉት አምስት ዓመታት እየተሻሻለ ቢኾንም አሁንም ሥራን የሚጠይቅ ነው ብለዋል፡፡
‎
‎ማር አምራቾች ጥራት ያለው ምርት ለተጠቃሚ ለማቅረብ ተገቢውን ጥንቃቄ ማድረግ እና ትክክለኛውን የአቆራረጥ ዘዴ መከተል እንዳለባቸውም አስገንዝበዋል፡፡
‎
‎ዘጋቢ፡- ፍሬሕይወት አዘዘው

የአሚኮ ዲጂታል ሚዲያ ቤተሰብ ይሁኑ!
👇👇👇
https://linktr.ee/AmharaMediaCorporation

ለኅብረተሰብ ለውጥ እንተጋለን!
‎

02/10/2025

中国长沙市

01/10/2025

updates from Google, February 2020 in

27/07/2025

24/07/2025

Children's graduation ceremony, July 2025@Al Safari Academy, Bahir Dar.
to my beloved kid, . 🎉🎉🎉🎉

24/07/2025

ማርን በባሕላዊ መንገድ እስከ መቼ?

ባሕር ዳር፡ ሐምሌ 17/2017 ዓ.ም (አሚኮ) ወጣት ግርማይ ታዴ በዋግ ኸምራ ብሔረሰብ አሥተዳደር ጋዝጊብላ ወረዳ ነዋሪ ሲኾን ከ2013 ዓ.ም ጀምሮ በንብ ማነብ ሥራ ላይ ተሰማርቶ እየሠራ ይገኛል፡፡

ወጣት ግርማይ ከዚህ በፊት ከረጅ ድርጅቶች ባገኘው የዘመናዊ ቀፎ የተሻለ ምርት ማግኘቱን ነው የገለጸው፡፡

ምርቱን ንጹህ ከማድረግና ለረጅም ጊዜ ለማቆየት በሚቆረጥበት እና በሚቀመጥበት ጊዜ ጥንቃቄ እንደሚደረግ አንስቷል፡፡ ማር በሚቆረጥበት ጊዜ ከኩበት ጭስ ይልቅ የወይራ ጭስ በመጠቀም በምርቱ ላይ ተጽዕኖ እንዳይኖር እንደሚያደርግ ነው የገለጸው፡፡

ለንቦች ተስማሚ የኾኑ ዕጽዋትን፣ ቅመማ ቅመሞችን በመትከል እና በሌሎች ተባዮች ንቦች ጉዳት እንዳይደርስባቸው በባሕላዊ መንገድ የመንከባከብ ሥራ እንደሚሠሩም ተናግሯል፡፡

እነዚህን ሥራዎች በመሥራታቸውም በ2017 በጀት ዓመት ሦስት ጊዜ በመቁረጥ ከ15 ዘመናዊ እና ከ10 ባሕላዊ የንብ ቀፎዎች 220ኪሎ ግራም የማር ምርት ማግኘታቸውን ገልጸዋል፡፡

የማር ምርት ሥራ በሰፊውና ትኩረት ተሰጥቶ ከተሠራበት አዋጭና ገበያ ላይ ተፈላጊ መኾኑንም ጠቁመዋል፡፡

የዋግ ኸምራ ብሔረሰብ አሥተዳደር የእንስሳት እና ዓሳ ሃብት ልማት ጽሕፈት ቤት ኀላፊ ሲሳይ አያሌው ዞኑ ከፍተኛ የንብ ሃብት ያለበት ሲኾን ከ100ሺህ በላይ የንብ መንጋ እንደሚገኝም ገልጸዋል፡፡

ከዚህ ውስጥ በዘመናዊ ቀፎ የሚጠቀመው ከ10 በመቶ አይበልጥም ነው ያሉት፡፡ ሌላው ገና ከባሕላዊ ቀፎ ያልተላቀቀ መኾኑንም ተናግረዋል፡፡

በ2017 በጀት ዓመት በዞኑ 1ሺህ 235ቶን የማር ምርት ተመርቷል፤ ይህም አብዛኛው ከባሕላዊ ቀፎ የተገኘ ምርት መኾኑን አንስተዋል፡፡

በዚህ በጀት ዓመት የማር ምርት ላይ ከፍተኛ ተጽዕኖ ያሳደሩ ችግሮችንም ጠቅሰዋል፡፡ ከሰብል ልማት ጋር ተያይዞ ሕገ-ወጥ የጸረ-ተባይ ኬሚካል ርጭት ለንቦች ርባታ አስቸጋሪ እና ንቦችን በከፍተኛ ኹኔታ እየጎዳ ያለ መኾኑን ነው የተናገሩት፡፡

ይህም ርጭቱ የሚካሄደው በአበባ ወቅት በመኾኑ ንቦች ለቀሰም በሚወጡበት ጊዜ ጉዳት የሚያደርስ እንደኾነ ነው የገለጹት፡፡

ሌላው ችግር የግብዓት ችግር ሲኾን የተሻሻለ ቀፎ አቅርቦት ችግር አለ ብለዋል፡፡ ወጣቶችን በተፋሰስ በማር ምርት ላይ በማሰማራት ከፍተኛ የሥራ ዕድል ለመፍጠር የሚያስችል አቅም ቢኖርም ቀፎ ለማቅረብ ከፍተኛ በጀት የሚጠይቅ በመኾኑ እየተሠራበት እንዳልኾነ ነው ኀላፊው የተናገሩት፡፡

ከአንድ ዘመናዊ ቀፎ እስከ 35 ኪሎ ግራም የሚመረት በመኾኑ በዘመናዊ ቀፎ ቢሠራ አዋጭ መኾኑንም ገልጸዋል፡፡ ችግሮችን ለመፍታት ከግብርና ጋር በጋራ ለመሥራት ጥረት እየተደረገ ነው ብለዋል፡፡

ማር ማምረት በዋግ ኸምራ ብሔረሰብ አሥተዳደር የተለመደ እና በአብዛኛው አርሶ አደር ቤት የሚሠራ ሥራ መኾኑንም ተናግረዋል፡፡

የማር ምርት ከማምረት ገበያ እስከ ሚቀርብበት ንጽህናውን እንዲጠብቅ ለማድረግ ማር ሲቆረጥ የኩበት ጭስ እንዳይጠቀሙ፣ ኬሚካል በአግባቡ እንዲጠቀሙ እና የተፈቀዱ የማር ማስቀመጫ እቃዎችን እንዲጠቀሙ የማስገንዘብ ሥራ እየተሠራ ነው ብለዋል።

በዚህም መሻሻል አለ ከባሕላዊ ማስቀመጫ ወደ ፕላስቲክ እየተቀየረ ነው፤ ነገር ግን በሚፈለገው ደረጃ ባለመኾኑ ወደፊት በሰፊው መሥራት እንደሚያስፈልግ ነው የገለጹት፡፡

እንደ ብሔረሰብ አሥተዳደር ያለው ችግር የግብዓት እና የቴክኖሎጅ አቅርቦት በመኾኑ የተሻሻለ ቴክኖሎጅ የሚያቀርቡ ፕሮጀክቶች ባለመኖራቸው ዞኑ ያለውን ጸጋ አልተጠቀመበትም ነው ያሉት፡፡

በአማራ ክልል የእንስሳት እና ዓሳ ሃብት ልማት ጽሕፈት ቤት የንብ እና ሃር ልማት ባለሙያ ሙሃመድ ጌታሁን የማር ምርቱን ለማሳደግ በርካታ ሥራዎች እንደሚከናወኑ ነው የተናገሩት፡፡

እንደ ክልል 80 በመቶ የሚኾነው የማር ምርት የሚገኘው ከባሕላዊ ቀፎ በመኾኑ ወደ ዘመናዊ ቀፎ የማዛወር ሥራ እየተሠራ ነው፡፡ ከአንድ የባሕላዊ ቀፎ እስከ 10 ኪሎ ግራም እና ከዘመናዊ ቀፎ ደግሞ እስከ 35 ኪሎ ግራም የማር ምርት የሚገኝ በመኾኑ ሽግግሩ ትኩረት ተሰጥቶት የሚከናወን ተግባር እንደኾነ ገልጸዋል፡፡

በ2017 በጀት ዓመትም 45ሺህ 264 የሽግግር ቀፎዎችን መሥራት ተችሏል ነው ያሉት፡፡ ከዚህ በተጨማሪ ጥራት ያለው ምርት ወደ ገበያ እንዲቀርብ በባለሙያዎች ድጋፍ እና ክትትል ይደረጋል ብለዋል፡፡

አቀማመጡም በባሕላዊ በእንስራ እና በጆንያ ማስቀመጥ እየቀረ ለምግብ ማስቀመጫ በሚመረቱ የፕላስቲክ ምርቶች የማስቀመጥ ባሕል እየዳበረ መምጣቱን ጠቁመዋል፡፡

በተጨማሪ የማር ምርትን በማጣራት እና በማሸግ የአካባቢውን መለያ በመጠቀም ለማዕከላዊ ገበያም እየተላከ መኾኑን አንስተዋል፡፡

ምርታማነቱን ለመጨመር ዘመናዊ ቀፎን መጠቀም ቁልፍ ጉዳይ ቢኾንም አርሶ አደሮች ከመንግሥት መጠበቅ እንጅ ገዝቶ መጠቀምን ባሕል አላደረገውም ብለዋል፡፡ ይህንንም ለማሻሻል የግንዛቤ ማስጨበጥ ሥራዎች በሰፊው እየተሠሩ መኾኑንም ገልጸዋል፡፡

በክልሉ በአጠቃላይ በ2017 በጀት ዓመት 29 ሺህ 698 ቶን የማር ምርት መገኘቱንም ባለሙያው ገልጸዋል፡፡

ዘጋቢ፡- ፍሬሕይወት አዘዘው

የአሚኮ ዲጂታል ሚዲያ ቤተሰብ ይሁኑ!

https://linktr.ee/AmharaMediaCorporation
ለኅብረተሰብ ለውጥ እንተጋለን

21/04/2025

በአማራ ክልል ከ25 ሺህ ቶን በላይ የማር ምርት ተገኝቷል።

ባሕር ዳር:ሚያዝያ 13/2017 ዓ.ም (አሚኮ) በምሥራቅ ጎጃም ዞን የአዋበል ወረዳ ነዋሪ አርሶ አደር ገድፍ ይታይህ በያዝነው በጀት ዓመት ከ10 የሽግግር ዘመናዊ ቀፎ ከ110 ኪሎ ግራም በላይ የማር ምርት ማግኘታቸውን ተናግረዋል።

የንብ ማነብ ሥራቸውን ከግብርና ሥራቸው ጎን ለጎን በመሥራታቸው ተጨማሪ ገቢ ማግኘት እንደቻሉ እና ኑሯቸውንም መለወጥ እንደቻሉ አርሶ አደሩ ለአሚኮ ገልጸዋል።

በዞኑ ከ2 ነጥብ 2 ሚሊዮን ኪሎ ግራም በላይ የማር ምርት ለገበያ መቅረቡንም የዞኑ የእንሰሳት እና ዓሳ ሃብት ልማት ተጠሪ ጽሕፈት ቤት አስታውቋል።

የጽሕፈት ቤቱ የንብ ሃብት ባለሙያ ስማቸው ደምሴ እንዳሉት ባለፉት ዓመታት በአረንጓዴ አሻራ መርሐ ግብር እየለማ ያለው ደን ንብ በማነብ የማር ምርታማነትን ለማሳደግ ምቹ ሁኔታ ፈጥሯል።

በዚህም በያዝነው በጀት ዓመት ከ2 ነጥብ 8 ሚሊዮን ኪሎ ግራም በላይ ማር ለማምረት ታቅዶ እስካሁን ከ2 ነጥብ 2 ሚሊዮን ኪሎ ግራም በላይ ማምረት ተችሏል።

የአማራ ክልል የእንስሳት እና አሳ ሃብት ልማት ጽሕፈት ቤት በ2017 በጀት ዓመት 31 ሺህ 531 ቶን ማር ለማምረት አቅዶ ወደ ሥራ ገብቷል።

ክልሉ ባለፉት ዘጠኝ ወራት ውስጥም 25 ሺህ 857 ቶን ማር ማምረት መቻሉ ነው የተገለጸው። ይህም ከዓመታዊ ዕቅዱ 82 በመቶ የሚኾነውን ይሸፍናል።

የጽሕፈት ቤቱ የንብ እና ሀር ልማት ባለሙያ ሙሐመድ ጌታሁን እንደገለጹት የተገኘው የማር ምርት ካለፈው ዓመት ተመሳሳይ ወቅት ጋር ሲነጻጸር ከግማሽ ሚሊዮን ኪሎ ግራም በላይ ብልጫ አሳይቷል።

ባለፈው ዓመት በዚሁ ወቅት የተገኘው የማር ምርት 22 ሺህ ቶን እንደነበርም ባለሙያው አስታውሰዋል።

የማር ምርት በዓመት ሁለት ጊዜ እንደሚመረት የገለጹት ባለሙያው ሁለተኛው የምርት ሥብሠባ ሲጠናቀቅ በዓመት ከታቀደው በላይ ምርት ይሠበሠባል የሚል ተስፋ እንዳላቸው ተናግረዋል።

ይህ የተሻለ ውጤት የተገኘው 35 ሺህ 179 ባሕላዊ ቀፎዎችን ወደ ዘመናዊ ቀፎዎች በመቀየሩ፣ በሽግግር ቀፎ 29 ሺህ 171 ኅብረ ንቦችን የማዛወር ሥራ በመሠራቱ እና በፊት ከነበረው የኅብረ ንብ ብዛት 155 ሺህ የሚኾን በከፈላ የተገኘ አዲስ ኅብረ ንብ ቁጥር በመጨመሩ እንደኾነ ተገልጿል።

ከዚህ በተጨማሪ የወቅቱ የዝናብ ስርጭት ምቹ መኾን፣ የደኖች መስፋፋት እና በመስኖ ልማቱ ንቦች የሚቀስሟቸው የአበባ ዛፎች በስፋት መኖር ለምርቱ ማደግ ትልቅ አስተዋጽኦ እንዳበረከተም ባለሙያው ተናግረዋል።

ጽሕፈት ቤቱ ለንብ አናቢዎች ሙያዊ ምክረ ሃሳብ በመስጠት፣ አንጻራዊ ሰላም ባለባቸው አካባቢዎች በመገኘት ድጋፍ በማድረግ፣ በተለያዩ መድረኮች እና ፕሮጀክቶች ሥልጠናዎችን በመስጠት እና ጥራቱን የጠበቀ ዘመናዊ ቀፎ ገዝተው እንዲጠቀሙ የማመቻቸት ሥራ በመሥራት የበኩሉን አስተዋጽኦ ማድረጉንም አብራርተዋል።

በቀጣይ ሦስት ወራት ውስጥም ዕቅዱን ሙሉ በሙሉ ለማሳካት ለአምራች አርሶ አደሮች ሙያዊ እገዛ እየተደረገ መኾኑንም ጨምረው ገልጸዋል።

የአሚኮ ዲጂታል ሚዲያ ቤተሰብ ይሁኑ!

https://linktr.ee/AmharaMediaCorporation

ለኅብረተሰብ ለውጥ እንተጋለን

15/04/2025

Celebrating my 11th year on Facebook. Thank you all my friends for your continues friendship.🙏🤗🎉