https://www.facebook.com/140394979167410/

Dabbaal Show Fuula Hubannoo Seeraa, Hararghe, Deder (2026)

21/05/2026

Konkolaachisaan Taarifa Murtaa’een Ol Kanfalchiise Seera Kamiin Gaafatama; Namni Boba’aa Seeraan Ala Jaarikaaniin Otuu Geejjibsiisu/Gurguru Argame Hoo Itti gaafatamummaa Akkamii Qaba?
==============================================================================================
Labsii lkk 813/2015 kwt, 22(12&14), 25(2) fi 43(3); Murtii Dha Ijb MMWF glm Lkk 168067 (Jld 24)fi; Labsii lkk 1363/2017 kwt 25 waliin kan xiinxalame.
================================================================
1. Kaayyoo fi daangaa raawwi labsii lameenii
Labsiin Lkk 813/2015 kaayyoowwan ijoo baheef keessaa hawaasa daldalee bulu hoj-maata haqa dhabeesaa fi farra dorgommii gabayaa bilisaa irraa eeguu fi shamattoota meeshaa fi tajaajilaa odeeffannoo gabayaa fi mi’aa dogongoraa irraa tiksuu, sababa babal’atuu daldalaan walqabatee sochoowwan meeshaalee fi tajaajiloota fayyaa fi nageenya shamattootaa miidhuu danda’an toohachuu fi sirna gabayaa shammaatonni meeshaaalee fi tajaajiloota gatii madalaawaa kanfalaniin walgitu akka argatan dandeessisu diriirsuu akka ta’e seensa labsichaa keessatti fi kwt 3 jalatti ibsamee jira.
Meeshaalee fi tajaajiloota bu’uraa jechuunis meeshaa fi tajaajila fedhii guyyaa guyyaa shammaatotaaf barbaachisaani fi hanqini isaa gabayaa keessatti yoo uumame/mudate gochaa daldala sirrii hintaane ykn haqa dhabeessaaf karaa banu ykn saaxilu akka ta’e labsicha kwt 2(3) jalatti tumamee jira. Akkasumas shammataa jechuun nama uumamaa hojii oomishaaf ykn gurgurtaaf otuu hintaane fedhii dhuunfaa ykn Maatii mana keessaa guutuuf jecha meeshaalee ykn tajaajiloota bitatu akka ta’e labsicha kwt 2(4) jalatti kan tumame yoo ta’us kunis shammatan daldalaa fi namoota qaama seerummaa meeshaa fi tajaajila faayidaa oomishaaf ykn gurgurtaaf gabayaa irraa bitan kan hinilaallanne akka ta’e agarsiisa.
Bu’ura kanaan labsiin Lkk 813/2015 akka waliigalaatti dorgommii daldala haqa qabeessa, naamusaa fi seera gabayaa biilisaan qajeelfamu mirkaneessuu ta’us kallattii fi addatti immoo shamattoota fedhii guyyaa guyyaa mana keessaa ykn jireenya idilee dhuunfaa isaanii ykn maatii isaanii guuttachuuf meeshaalee fi tajaajiloota bu’uraa gabayaa irraa bitatan eeguuf kan kan labsame ta’uun isaa ifaan hubatama .
Akkasumas daangaa raawwii labsichaa ilaalchisee hojii daldalaa fi meeshaalee ykn tajaajiloota daldalaa daangaa biyya Itoophiyaa keessatti gaggeeffamu kamuu irratti raawwatiinsa kan qabu ta’uu fi garuu hojiilee toohannoo fi tarkaanfilee bulchiinsaa bu’ura Seerota biroon tumaman kan hambisu akka hintaanes labsichi kwt 4 jalatti ibsamee jira.
Gama biraan labsiin boba’aa lkk 1363/2017 immoo boba'aan amala isaatiin qabeenya faayidaa diinagdummaa fi hawaasummaa ol’aanaa qabu waan ta’eef haalli kuusaa, dhiyeessii, raabsaa, eegumsii nageenya, qulqullinaa fi gatii isaanii akkaataa sadarkaa Idil-adunyaa eeggateen fi fayyaa namaa fi beeyladootaa akkasumas nageenya qabeenyaa fi naannoo irratti miidhaa hingeessineen akka gaggeeffamu mirkaneessuu kan kaayyeffate akka ta’e seensa irratti ibsamee jira. Akkasumas fichisiisaa (importer) irraa kaasee hanga fayyadamaa isaa dhumaa bira gahutti bifa teknolojii ammayyaan deeggarameeni fi haala ifa , si’ataa, amansiisaa, haqa qabeessaa fi dhaqqabamaa ta’een sirna dhiyeessii, raabsaa fi gurgurtaa qinixxaaboo diriirsuun gochaalee seeraan alaa gabayaa keessatti sirna raabsaa fi gurgurtaa boba’aa irratti raawwataman too'achuu haala dandeessisu uumuunis kaayyoo ijoo labsichaatidha.
Kana malees, dhaabbilee fi ogeeyyii hojii daldala boba’aa irratti bobba'an sadarkaa ga’uumsa muxannoon Idil-adunyaa gaafatu irra jiraachuu isaanii mirkaneessuun sirna dhiyeessii, raabsaa fi gurgurtaa boba’aa nageenyummaa isaa eeggatee fi seera qabeessa ta’e lafa qabsiisuunis kaayyoo labsichaa akka ta’e ibsamee jira,
Walumaagalatti kaayyoowwan labsichaa kanneen irraa hubachuun akka danda'amutti hojiin dhiyeessii fi raabsa akkasumas gurgurtaa boba’aa amala isaatiin eegumsaa fi sadarkaa ga'uumsa addaa kan barbaadu waan ta’eef meeshaalee biroo irraa addatti seera addaa ofdanda’een akka too'atamuu fi bulu seera baastuun yaadee labsicha kan baase akka ta’edha.
Daangaa raawwii isaa ilaalchiseeis hojiiwwan boba’aa barbaaduu fi misoomsuu fi akkasumas tajaajila ittisa biyyaa irraan kan hafe labsiin lkk 1363/2017 hojii sirna boba’aa fichisiisuu kaasee , kuusuu fi raabsuu hanga gurgurtaa qinixxaabootti daangaa biyya Itiyoophiyaa keessatti raawwatamuu fi qaamolee hojicha keessatti hirmaatan hunda irratti kan raawwatu akka ta’e kwt 3(1) jalatti ibsamee jira. Kunis dhimmi boba’aa fichisiisuu eegalee hanga gurgurtaa qinixxaaboo fayyadamaa dhumaa bira dhaqqabutti jiru ykn raawwatamuu kamiiyuu Labsii kanaan kan hammatamu akka ta’e kan agarsiisu waan ta’eef Labsiin lkk, 813/2015 dhimma boba’aa ilaallatu irratti raawwatiinsa hinqabu. Kanaaf , gochaaleen boba’aa ilaalchisee konkolaattotaa fi konkolaachistoota dabalatee nama kamiinuu raawwataman Labsii lkk 1363/2017 jalatti kan ilaalaman ta’a.
Hojirra oolmaa labsiilee lamaan kanaan walqabatee gaaffileen ijoon qabatamaan rakkoo ta’anii fi ogeessonni hedduun yeroo hedduu irra deddeebiin kaasaa jiran:
A) konkolaataan gatii geejjibaa taarifa murtaa’een olitti kanfalchiise labsii lkk 813/2015 jalatti yakkaan gaafatamuu nidanda’a moo miti?
B)Konkolaataan seeraan ala boba’aa jaarikaaniin konkolaataa fe’uumsa ummataan otuu geejjibsiisu qabame Labsii fi tumaa seeraa isa kamiin gaafatama, kan jedhan isaan barreeffama kanaan ilaaluuf filatamanidha.
2. Tajaajila geejjibaan walqabatee konkolaataan taarifa mootummaan murtaa’een olitti kanfalchisee seera kamiin gaafatama?
Gaaffii isa jalqabaa ilaalchisee konkolaataan hojii daldala geejjiba deddeebisaa ummataa irratti eeyyama baafate boba’e tokko gurgurtaa tajaajila geejjibaa irratti kan hirmaate yoo ta’uu fayyadamtoonni tajaajilichaatis faayidaa ykn fedhii dhuunfaa guyya guyyaaf tajaajila geejjibaa kan fayyadaman waan ta’eef labsii lkk 813 jalatti akka gurgurtaa tajaajilaatti ilaalamuu danda’a jechuun labsicha kwt 2(3) caqasuun ogeeyyiin gala man nijiru. Asirratti tajaajilli geejjibbaa hiika meeshaalee ykn tajaajila bu’uraa jireenya guyyaa guyyaaf barbaachisuu fi hanqini yoo mudate gochaalee seeraa alaaf hawaasa saaxilu jedhamee labsicha kwt 2(3) jalatti ibsame kan guutu akka ta’ee fi konkolaataan ykn konkolaachisaan gatii taarifa murtaa’een ol dabalee fe’e ykn sababa taarifaan ala imalaan kanfaluu dideef tajaajila kennuu dhoowwate/ dide labsii Lkk 813/2015 kwt 22 -25 fi 43(3) jalatti yakkaan gaafatamuun adabamuu akka danda’u ogeessonni falmanii fi hojjetan akka jiran qabatamni jiru niagarsiisa..
Haata’u malee jalqabarratti akkaataa Labsii Lkk 813/2015tti tajaajjilli geejjibaa gosa meeshaalee fi tajaajila bu’uraa fedhii guyyaa guyyaa shammattootaaf barbaachisuu fi hanqini yoo uumame gabayaa keessatti gochaa seeraan alaa akka raawwatamu saaxilu jedhamee labsichi kwt 2(3) jalatti hiikni itti kenname keessatti kan hammatamu moo miti kan jedhu ilaalchisee gosa meeshaalee fi tajaajilaa hiikkoo labsichaa kanaan hammatamuu qaban karaa ministeera Daldalaa adda bahuun garii isaa waliin tarreeffamuun karaa mana Maree ministeerotaa dambiin ykb beeksisa ibsamuun kan murtaa’u akka ta’e labsicha kwt 25(1) fi 26 jalatti kan tumame irraa nihubatama. Akkaataa kanaan meeshaan ykn tajaajilli tokko gosa meeshaa ykn tajaajila labsichaan hammatamee ta’uu fi dhiisuun isaa dambii ykn beeksisa gosa meeshaa fi tajaajilaa fi gatii/taarifa ministeerri daldalaa baasu keessatti yoo hammatame qofa waan ta’ee dambicha ykn beeksisa akkasii yoo jiraate ilaaluun dirqama ta’e. Haala kanaan tajaajilli geejjibaa gosa meeshaalee fi tajaajilaa labsichaan hammatame ta’uu isaa dambii ykn beeksisa ministeera daldalaa rogummaa qabu caqasuun yoo hinagarsiifamin tumaa labsichaa kwt 2(3), 22(12&14), 25(2) fi 43 qofa ilaaluun konkolaataan ykn konkolaachisaan taarifaan ala fe’e ykn sababa taarifaan olitti kanfaluu didaniif tajaajila kennuu Labsii Lkk 813 jalatti yakkaan gaafatame jechuun bu’ura seeraa kan qabu ta’ee hinmul’atu.
Kanumaan walqabatee dhimma taarifaan ala kanfalchiisuu ykn tajaajila kennuu diduu kallattiin kan ilaallatu ta’uu yoo baateeyyuu meeshaan ykn tajaajilli tokko Labsii Lkk 813/2015 jalatti hammatama moo miti kan jedhu murteessuuf dambii ykn beeksisa miniteera daldalaan bahu keessatti tarreeffamuu akka qabu kan agarsiisu hiikkoo Dhaddacha IJibbataa MMWF glm Lkk 168067 (Jld 24) akka agarsiiftuutti fudhachuun nidanda’ama. Kanaaf walumaagalatti gochaan tajaajila geejjibaan walqabatee taarifaan ala gatii dabaluu, sababa taarifaan ala kanfalamuu didameef tajaajila kennuu diduu ykn darbaa fe’uu fi kan kkf akkaataa dambii tiraafiikaa rogummaa qabuun kan gaafachiisu ta’uun alatti Labsii Lkk 813/2015 jalatti yakkaan kan himachiisuu miti.
3, Konkolaachisaan/namni boba’aa jaarikaanaan konkolaataa ummataatti fe’ee qabame seeraa fi tumaa kamiin gaafatama, kan jedhu qabxii ijoo lammafaa ilaalchiseetis Labsii boba’aa Lkk 1363/2017 jalatti kwt 25 jalatti ibsamee jira. Labsicha kwtni 25(1-11) jalatti akka tumametti gosa gochaalee badii yakkaan gaafachiisan gurguddoo 11 ta’an adda bahanii adabbii hordofsiisan waliin tumamanii jiru. Sana keessaa boba’aa jaarikaanitti konkolaataa ummataan geejjibsiisuu ilaalchisee gochaalee gurguddoo lama labsicha kwt 25(5) jalatti tumamanii keessatti ilaalamuu kan danda’udha.
Haaluma kanaan inni tokko ragaa eeyyamaa (calibration certificate ) otuu hinqabaatin gochaa boba’aa irratti raawwatamu yoo ta’u innis nama kamiiyyuu certificate boba’aa daldaluu otuu hinqabaatin geejjibsiise ykn gurgure ilaallata ( Ragaa akkasii qabaachuu fi dirqama walqabatu labsicha kwt 8 jalatti bal’inaan ibsamee jira). Kana jechuun ragaa eeyyama “calibration certificate” jedhamu qabaachuun dirqamadha. Ragaa kana otuu hinqabaatin hojii daldala boba’aa irratti bobba’uun , geejjibsiisuu dabalatee gurguruun dhoorkaadha . Kanaaf ragaa kana otuu hinqabaatin boba’aa kuusuun, geejjibsiisuun ykn gurguruun gochaa yakkaan adabsiisuudha.
Inni lammaffaa immoo gosa meeshaa bob’aan itti qabatamuu qabuu fi hanga qabachuu qabuu waliin kan walqabatu yoo ta’u eeyyama calibration kan qabu yoo ta’eeyyuu standanrdiiwwan/sadarkaalee fi ulaagaalee meeshaalee boba’aan ittiin gurguramuu fi hanga boba’aa meeshaaleen sun akka qabatan eeyyamame waliindhahuun jijjiiruu, xiqqeessuu ykn hanga eeyyamameen olitti ykn gaditti akka qabatan gochuun hanga boba’aa ykn gatii isaa waliindhahuun gurguruun yakkadha (sadarkaalee, standardiiwwanii fi gosti meeshaalee eeyyamamanii labsicha kwt 6 fi 7 jalatti ibsamee jira).
Kunis fkn bootteen ykn tankarri tokko boba’aa hangam akka qabachuu qabu , paampiin isaa hangam akka raabsuu danda’uu fi qabu , gatii hangam akkamitti lakkaa’uu akka qabuu fi kkf sadarkaan qajeelfamaan ta’eefii jira waan ta’eef isa kana cabsuun geejjibsiisuu ykn gurguruun badii yakkaan gaafachiisudha. Akkaataa kanaan hanga eeyyame jedhame honqabaannetti ykn eeyyamame qabaatus gosa meeshaa amala boba’aaf addatti qajeelfamaan taa’ee fi eeyysmameen alatti jaarikaanas ta’ee meeshaa kan biraa kamiiyyuu boba’aa geejjibsiisuun tumaa labsichaa olitti caqafame jalatti yakkaan adabsiisa.
Jemal K Keweti

https://t.me/speaklawinabsentia

19/05/2026

Dhaalaa Iyyannoo ykn himannaa bifa kamiin dhiyaatetu himannaa dhaaltummaati ykn himannaa qoodinsa qabeenya dhaalaati jedhu adda baafachuuf himannaa dhiyaate haalaan qorachuu kan qabu Mana Murtiidha. Himanni dhaaltummaas ulaagaan isaa maal akka ta’e seera dhaalaa keessatti ball’inaan ibsamanii jiran

↪️Dhimmoota kana addaan baasuu danda’uun keenya darbinsi yeroo dhimmichaaf rogummaa qabu kami kan jedhu murteessuu akka dandeenyuuf nugargaara. Kutaa kana jalatti ulaagaa himannaa dhaaltummaa fi himannaa qoodinsa qabeenya dhaalaa tooftaa ittiin addaan baafnu akka armaan gadiitti ilaalla.

✍️Dhimma kana lamaan addaan baasuun darbinsi yeroo dhimmicha irratti raawwii qabu isa kami kan jedhu murteessuuf kan gargaaru ta’a.

✍️Garee wal falmu keessaa tokko dhaaltuu ta’uu isaa yeroo seerichaan taa’e keessatti kan mirkaneeffate yoo ta’e kaan immoo haaraa gaaffii qulqulleessaa kan gaafatu yoo ta’e himannaa dhaaltummaa malee himannaa qoodinsa qabeenyaa kan ta’u miti.

✍️ Sababiin asitti ka’uu malu immoo gareen falmu tokko haaraa akka qabeenyaan qulqullaa’u gaafataa jira waan ta’eef kun dhimma SHH kwt 996 kaasee hanga 999 jiru keessa darbuu waan gaafatuuf himannaa dhaaltummaatiin fudhatama.

✍️Gama biraatiin gareen wal falmu yeroo seerichaan taa’e keessatti dhaaltuu ta’uun isaanii fi gaheen isaanii qulqullaa’ee beekame tokko falmiin isaan gidduutti taasifamu himannaa qoodinsa qabeenya dhaalaa malee himannaa dhaaltummaa kan ta’u miti.Sababiin isaa immoo gareen wal falmu ragaa dhaaltummaa yeroo seerichaan taa’e keessatti fudhataniiru yoo ta’e sirni qulqulleessa qabeenya dhaalaa raawwatameera yaada jedhu irraa
ka’eeti.

✍️ Bu’uura ulaagaa himannaa dhaaltummaa SHH kwt 999 tiin dhaaltuu ta’uun isaa akka beekamee gaheen isaa ykn qabeenyaan dhaalaa akka deebi’uuf namni gaafatu himannaa dhaaltummaati malee qoodinsa qabeenyaa hin ta’u.

✍️Himannaan qoodinsa qabeenyaa dhaalaa gareen wal falmu bitaa mirgaan dhaaltuu ta’uun isaanii yeroo seerichaan taa’e keessatti beekamanii jiru garuummoo qabeenya dhaalaa osoo hin qooddatiin namoota turaniif ta’a jechuudha. Qabatamaan gahee qabeenya dhaalaa dhaaltuu dhugaatiin qabatame akka deebi’uuf dhaaltuu dhugaa birootiin dhihaatu; qoodinsa qabeenyaa bu’uureffachuun addaan baateen ni jira. Ulaagaa himannaa himannaan dhaaltummaa fi himannaa qoodinsa qabeenya dhaalaa ittiin adda bahan murtii DhIMMWF tiin kennaman kana dubbisaa.

👉SHH kwt 999 fi hiikkoowwan seeraa dhaddacha Ijibbaataa Federaalaatiin yeroo adda addaa kennaman FKN Dh.IJ.MMWF lakk galmee 20295 lakk galm. 44237 fi lakk galmee 15974 irratti kenname ilaalaa ta’uu fi himata dhaaltummaa ta’uu ilaalchise, keessattuu bu’aa kwt.1001 fi 1002 jalatti ibsamaniin wajjiin.

👉DhIMMWFtiin jildii 10 ffaa galmee lakkoofsa 44237
👉MMWF Dh/Ij lakk galmee 38533

17/05/2026

Qooddiin Qabeenya Dhaalaa Erga Raawwatamee Booda Qabeenyi Dagatamee Ture Yoo Argame, Qabeenyi Haarayaan Argame Kun Dabalataan Ni Qoodamamoo Hin Qoodamu? Gochi Akkasii Himannaawwan Sababa Himannaa Tokkorraa Maddan Qoqqoodanii Dhiyeessuu (Splitting of a Claim) Jedhamuu Ni Danda'aa?

^^^^√√√√^^^^^^√√√√√^^^^^^^√√√√√√√

Dhaddachi Ijibbaataa MMWF hiikkoo seeraa dhaddacha gaafa 25/01/2011 ooleen Lakk.Ga.153231 irratti (kan hin maxxanfamne) kennee ture keessatti:

👉Dhaddachi Ijibbaataa MMWO wayita jalqaba akkaataa sdfs kwt 343(1)tiin qajeelfamaan gadi deebisutti sdfs kwt 216n walqabatee gaaffiin ka'e kan hin turre ta'uu;

👉Himatamaan tokko himannaa isa irratti dhiyaate ilaalchisee tarreeffamaafi ifatti mormuun haaluu akka qabu sdfs kwt 83 jalatti tumamuu;

👉Sadarkaa oliyyannottis falmiin jalatti hin kaaneefi haarayaa ta'e ka'uu akka hin qabne sdfs kwt 329(1) jalatti tumamuu;

👉Akkasumas, bu'uura sdfs kwt 182(2)tiin Manni Murtii Sadarkaa Jalqabaatiin dhimma tokko ilaalu, dhimma gareewwan falmii tarreeffamaan ykn ifatti hin kaasne irratti murtii kennuun kan hin danda'amne ta'uu isaa tumuu;

👌Gama birootiin, qooddiin qabeenya dhaalaa erga raawwatamee booda qabeenyonni haarayaan qabeenya dhaalaa san keessatti hammataman kan argaman yoo ta'e, sirna haarayaan qooddii raawwachuun akka danda'amu tumaalee Seera Hariiroo Hawaasaa kwt 1103fi 1104 irraa hubachuun kan danda'amu ta'uu ibsuudhaan fooyyessee murteesseera.

credit for B.

17/05/2026

Namni Meeshaa Hanqina Qabu Bitate Tokko Hanqini Akka Sirraa’uuf Himannaa Isaa Yeroo Hangamii Keessatti Dhiyeeffachuu Qaba?
================================================
Dh Ijbt MMWF glm Lkk 197008 (Jld 27) fi Seera Hariiroo Hawaasaa kwt 2297, 2298(1)
============================
Bitataan meeshaan bitate hanqina kan qabu yoo ta’e hanqinicha guyyaa gurgurataa beeksisee kaasee waggaa tokko keessatti hanqini akka sirraa’uuf himannaa isaa yoo dhiyeessuu hafe darbiinsa yeroon kan daangeffamu akka ta’e SHH kwt 2298(1) jalatti tumamee jira. Kunis meeshichi hanqina kan qabu ta’uu guyyaa gurgurataaf beeksise irraa kaasee yeroo waggaa tokkoo keessatti himachuu akka qabuu fi yeroon kun yoo darbe himannaan isaa turtii yeroon kufaa ta’uu akka danda’u kan agarsiisudha.
Haata’u malee gurgurataan meeshaan hanqina akka qabu yeroo gurgurutti ykn simachiisutti otuu beeku akka hanqina qabu dhoksuudhaan ykn kan hanqina hinqabne fakkeessuun bitatatti gurguruun ykn simachiisuun isaa ykn eeguma bitataan meeshichi hanqina qabaachuu beeksise boodas gochaa waliin dhahuu raawwachuun akka bitataan daangaa yeroo jedhame keessatti fala seeraa hnbarbaadanne kan godhe ta’uun yoo mirkanaa’e guyyaa hanqinicha gurgurataaf beeksisee kaasee waggaa tokko boodas hanqini akka sirraa’uuf himannaa dhiyeeffachuu akka danda’u seerichi kwt 2297 jalatti haala addaan ni eeyyama.
Bu’ura kanaan gochaan gurgurataan raawwate yakka waan ta’uuf gurgurataan gochaa yakkaa ofii isaa raawwateen fayyadamuun darbiinsa yeroo akka mormiitti kaasee ittigaafatamummaa jalaa akka hinbaane dhoorkuuf seerichi kan yaade akka ta’e Dhaddachi Ijibbaataa xiinxala isaa keessatti ibsee jira.
Kana jechuun garuu sababa gurgurataan gochaa yakkaa raawwateef himannaan bitataan hanqini meeshichaa akka sirraa’uuf dhiyeeffatu gonkumaa darbiinsa yeroon hindaangeffamu jechuu akka hintaane Dhaddachi Ijibbaataa kaasuun yaadachiisee jira.
Yeroo akkasii gochaan yakkaa gurgurataan hanqinicha dhoksuun ykn kan hinjirre fakkeessuun ykn waliindhahuun raaraawwate darbiinsa yeroo silaa guyyaa bitataan hanqini jiraachuu beeksise irraa lakka’aamu adda kutuudhaan guyyaa gochaan yakkaa raawwatame irraa kaasee akka haaraatti akka ilaalamuu fi waggaa tokko keessatti himannaan dhiyaachuu akka qabutti Dhaddachi Ijibbaataa hiikkoo kan kenne yoo ta’u dhimma dhiyaateef ilaalchisee garuu gochaan gurgurataan raawwate jedhame gochaa yakkaa akkaataa seericha kwt 2297tiin daangaa yeroo adda kutu akka hintaane ibsee jira.
Dhimmicha keessatti bitataan akka firii falmii gochaa yakkaa gurgurataatti kan kaase bitataan meeshichi hanqina qabaachuu eega itti beeksise booda gurgurataan hanqinicha amanee garuu har’a boru siif sirreessa jechuun akka bitataan yeroon hin himanne taasisuu isaatidha. Haata’u malee ija tumaa seerichaatiin gochaa yakkaa darbiinsa yeroo adda kutu kan jedhamu qulqullina meeshichaan kan walqabatu (meeshichi hanqina kan qabu ta’uu , kanas gurgurataan kan beeku ta’uu, akka bitataan hinbeekne ta’i jedhee kan dhokse ykn dogongorse ykn waliindhahe ta’uu) malee hanqinicha amanee sirreessuuf sababa dhiyeessu miti jechuun dhaddachichi xiinxalee jira.
Akkaataa kanaan gurgurataan hanqina meeshichaa har’a bor siif sirreessa jechaa lafa irra harkisuun tursiisuun isaa dirqama wabummaa seeraan ykn waliigalteen qabu bahuu dhabuu isaa kan agarsiisu malee gochaa yakkaa darbiinsa yeroo waggaa tokko adda kutuu miti jedheera. Haala kanaan bitataan gurgurataan hanqina meeshichaa akka sirreessuuf eega beeksise booda dafee sirreessuufii hafee har’a boru jechaa lafarra akka harkisaa jiru eega hubatee bitataan guyyaa hanqinicha beeksisee kaasee akkaataa SHH kwt 2298(1)tiin waggaa tokko keessatti himannaa dhiyeeffachuu otuu qabu sababii gahaa fi rogummaa qabuun maletti kan hafe waan ta’eef himannaan isaa darbiinsa yeroo waggaa tokkoon daangeffameera jechuun murtiin Manneen Murtii jalaa himannicha kufaa gochuun Kennan dogongora bu’uraa ijoo seeraa kan qabuu miti jechuun Dhaddachi Ijibbaataa murteessee jira.
for Jemal Kumbi

17/05/2026

Hin Taaneen Geggeessuun Yakka Malaammaltummaa Ta’uu Isaa Beektuu?
Hojii haala mijataa hin taaneen geggeessuu jechuun, karaa ifa ta'een qajeelfama hojii hordofuu dhiisuu, odeeffannoo dhoksuu fi uummataaf ifa/banaa gochuu dhiisuu dha. Yoo adeemsi fi hojimaatni hojii ifa hin taane ammoo itti-gaafatamummaan ni bada; kun ammoo akka malaammaltummaan karaa dhoksaatiin raawwatamuuf haala mijataa uuma.
Yoo hoogganaan ykn ogeessi hojii mootummaa raawwatu tokko, adeemsa/hojimaata hojii karaa si'ataa fi qulqulluu ta’een hojjatamuu qabu tokko wolxaxaa fi nuffisiisaa godhe, tajaajilamaan dhimmi isaa akka raawwatamuuf dirqamaan "matta'aa" akka kennu ykn "karaa qaxxaamuraa" akka barbaadatu dhiibbaa irratti uuma.
Hojiin mootummaa karaa sirrii fi si’aayina qabuun yoo hin geggeeffamne, yeroo fi maallaqni karaa hin malleen qisaasama. Qisaasamni maallaqaa fi yeroo hin malle kun ammoo qaawwa faayidaa dhuunfaatiif oolu bana. Fakkeenyaaf, caancala dhiyeessii hir’isuun ykn adeemsa hojii hin barbaachisne walitti tuulanii tajaajilamaa nuffisiisuun, hojichaa fi namootni akka yakka malaammaltummaatiif saaxilaman godha.
Hojjataan mootummaa tokko hojii tajaajilamaadhaaf dhiyeessuu malu haala mijataa hin taaneen geggeessuun isaa itti-gaafatamummaa uummataan isatti kenname fayyadamee tajaajila lafa irra harkisuun ykn walxaxaa taasisuun isaa hir’ina naamusaa qofa osoo hin taane, dhimma itti gaafatamummaa seeraa yakka malaammaltummaatiin gaafatamuu hordofsiisu.
Yoo adeemsi hojii mijataa hin taane, tajaajilli barbaachisaan lammiiwwan biyyatti bira yeroon hin dhaqqabu. Kun ammoo ammoo wol amantaa lammiilee fi mootummaa gidduu jiru miidha. Hojii sirnaan geggeessuu dhabuun hanqina hojii uuma, qaawwi kun ammoo walitti hidhamiinsi malaammaltummaa akka babal’atu godha.
Dhimma kana ilaalchisee Labsii Yakkoota Malaammaltummaa Tumuuf Bahe Labsiin Lak. 881/2007 haala armaan gadiitiin karaa ifa ta'een kaayeera.
"Hojjataan mootummaa ykn jaarmiyaalee uummataa kamuu, faayidaa hin malle argachuuf ykn argamsiisuuf yaadee, aangoo ykn itti-gaafatamummaa qabutti fayyadamee hojii hojjatuun wal-qabatee, hariiroo hojii kamittuu fayyadamee faayidaa gosa kamiinuu kan fudhate, gatii qaama dhimmi ilaallatuun murtaa’een oliin waliigaltee dhiyeessii meeshaa, waliigaltee addaan kutinsaa ykn waliigaltee hojii kamiinuu kan waliigale yoo ta’e; aangoo hojii isaatiin wal-qabatee manneen hojii mootummaa, dhaabbata misooma mootummaa ykn jaarmiyaalee uummataa adaraadhaan itti kenname miidhuuf mala kamittuu fayyadamee gochicha kan raawwate yoo ta’e, yakka malaammaltummaatiin gaafatama" jedhee tuma.
Kanaafuu, hojii mootummaa mijataa fi si’ataa gochuu dhiisuun haqni akka dabu, malaammaltummaa fi hojimaatni badaan akka babal’atuuf haala kan mijeessu waan ta'eef, hogganaa fi hojjataan mootummaa hundinuu dirqama adeemsa hojii ifa, ariifataa fi uummataaf mijataa gochuu qaba. Tajaajilamaanis ofii isaatii naamusa gaariidhaan fakkeenya ta'uu bira darbee, namoota malaammaltummaa raawwatan saaxiluudhaan itti-gaafatamummaa isaa bahuu qaba.

Dhaloota Safuun Ijaaruun; Kenna Tajaajilaa Hojimaataan!

Madda: Fuula Facebook Federal Ethics and Anti-Corruption Commission

12/05/2026

𝐃𝐇𝐈MM𝐎𝐎𝐓𝐀 𝐇𝐀𝐑𝐈𝐈𝐑𝐎𝐎 𝐇𝐀𝐖𝐀𝐀𝐒𝐀𝐀
𝐃𝐀𝐑𝐁𝐈𝐈𝐍𝐒𝐀 𝐘𝐄𝐑𝐎𝐎 𝗤𝗔B𝗔𝗡𝐈𝐈 F𝐈 𝐇𝐈N
𝗤𝗔B𝗡𝐄

☞ Mirgi yookaan dantaan dhimma hariiroo hawaasaatiin wal qabaate namni tokko qabu karaalee itti hafaa ta'u ykn daangeeffamu keessaa tokko darbiinsa yerootiini.

☞Hubannoof akka tolu dhimmoota hariiroo hawaasaa darbiinsa yerootiin daanga'uu fi hin daangoofne muraasa akka itti aanutti dhiyeessineerra:

1️⃣. 𝑺𝒆𝒆𝒓𝒂 𝑫𝒉𝒂𝒂𝒍𝒂𝒂 𝑰𝒍𝒂𝒂𝒍𝒄𝒉𝒊𝒔𝒆𝒆

Dhimmoonni dhaalaa darbiinsa yerootiin hin daangoofne:
➠Qabeenya dhaalchisaan imaanaadhaan nama bira tursiise dhaaltonni deebisiisuuf himanni dhihaatu darbiinsa yerootiin hin daangeeffamu(qabeenya akkanaa irratti himanni yeroo kamittiyyuu dhihaachuu danda'a). 10ffaa lakkoofsa galmee 48048 ta'e irratti "qabeenya dhaalchisaan imaanaadhaan nama bira akka turu taasise yookiin qabeenya imaanaadhaan akka Bulchu yookiin eegu taasifame,qabeenya akkanaa dhaaltonni deebisiisuuf himatni dhihaatu darbiinsa yerootiin hin daangeeffamu"jechuun seera hariiroo hawaasaa keewwattoota 2781(1)(2),2779,fi 2989(1) waliin wal qabsiisuun murtii dirqisiisaa kennee ture.
➠Himata qabeenya dhaalaa dhaaltonnii fi gaheen isaanii beekamee fedhiin osoo hin qoodin kaa'an darbiinsa yerootiin hin daangeeffamu,seera hariiroo hawaasaa keewwata 1060 fi 1061. 10ffaa lakkoofsa galmee 38533 ta'een "qabeenya dhaalaa dhaaltonni beekamee gahee/qooda dhaaltotaa osoo addaan hin qooddatin ture darbiinsa yerootiin hin daanga'u"jechuun seera hariiroo hawaasaa keewwata 1060,1062 fi 996 waliin wal qabsiisuun murtii dirqisiisaa laatee ture.

Keessa Darbiinsi Yeroo Akaakuu Adda Addaatu jiru.Isaanis:

🅰️. himata dhaaltummaa:-

Gaaffiin yookiin falmiin tokko himannaa dhaaltummaati jechuudhaaf bu'uurri seeraa shh keewwattoota 998,999,fi 1001 dha.
"Himata dhaaltummaa"jechuun dhaaltuun tokko dhaaltuu dhugaa ta'uun isaa beekamee qabeenyi dhaalaa akka deebi'uuf;waraqaan ragaa duraan kenname akka deebi'u ykn haqamuuf;nama waraqaa ragaa gatii qabu osoo hin qabaatin qabeenya dhaalaa hundumaa ykn hanga tokko harka galfate irratti dhiheeffatuudha jechuudha.
dhaaltummaa himataan mirga isaa fi qabeenyi dhaalaa himatamaan qabamuu yeroo beekee irraa kaasee waggaa sadi(3) keessatti yoo hin dhihaatin(mormiin yoo ka'e) darbiinsa yerootiin daangeeffama,shh keewwata 1000(1); Ijibbaataa Federaalaa Jildii 11ffaa Lakkoofsa Galmee 52407,Jildii 6ffaa Lakk.Galmee 20295 fi 26422.
dhaaltummaa gaafa dhaalchisaan du'e yookiin himataan mirga isaatiin fayyadamuu guyyaa danda'erraa kaasee waggaa 15 booda darbiinsa yerootiin ni daangeeffama,shh keewwata 1000(2).
Ijibbaataa Federaalaa Jildii 11ffaa Lakk.Galmee 57114 ta'e irratti "dhaaltuun umuriin isaa waggaa 18 hin guunneef darbiinsi yeroo lakkaa'amuu Kan eegalu,guyyaa dhaaltuun umriin isaa waggaa 18 guute irraa eegalee akka ta'e" hiikoo kennee ture.
Federaalaa Jildii 20ffaa Lakk.Galmee 120841 ta'een "dhaaltuun umuriin isaa gaa'elaaf hin geenye tokko guyyaa umriin isaa gaa'ilaaf gahe irraa eegalee hanga waggaa 15 keessatti mirga dhaaltummaa gaafachuu ni danda'a" jechuun hiikoo seeraa dirqisiisaa laatee ture.
Ijibbaataa Federaalaa Jildii 11ffaa Lakk.Galmee 47201 ta'e irratti"dhaaltuun nama dhaaltuu hin taane irratti qabeenya akka gadi naaf lakkisu"jechuun falmiin dhihaatu darbiinsi yeroo gaafa waraqaa ragaa dhaaltummaa fudhate osoo hin taane,gaafa qabeenyaan nama biraatiin qabame irraa eegalee akka ta'e murteessee ture.
Lakk.Galmee 186129 ta'een "darbiinsi yeroo lakkaa'amuu kan eegalu yeroo waraqaa ragaa dhaaltummaa fudhatamee kaasee osoo hin taane,guyyaa qabeenyi dhaalaa nama dhaalaa hin taaneen qabame irraa eegalee jiru yeroo waggaa 3 keessatti qofa akka ta'e"Bitootessa bara 2013 hiikoo seeraa dirqisiisaa kennee ture.
✔Himata dhaaltummaa ilaalchisee falmii dhaaltota jidduutti gaggeeffamuuf darbiinsi yeroo raawwatiinsa qabu waggaa sadii(3) dha.
✔Falmii qabeenya dhaalaa ilaalchisee falmiin dhaalaa fi dhaalaa hin taane(garee 3ffaa) jidduu ka'uuf raawwatiinsa kan qabu darbiinsa yeroo waggaa 10 dha,Kanas Ijibaataa Jildii 6ffaa Lakk.Galmee 38152 fi shh keewwata 1845 irraa hubachuun ni danda'ama. 6ffaa Lakk.Galmee 25664 ilaaluu dandeessu.

🅱️. qoodinsa qabeenya dhaalaa:-

Qoodinsi qabeenyaa kan ka'u bakka dhaaltonni baay'ee ta'anittiidha.Hanga addaan hin qoodaminitti qabeenyi dhaalaa qabeenya waliinii dhaaltotaa ta'ee tura.Dhaaltummaan yoo qulqullaa'e,achiin booda qoodinsi qabeenya dhaalaa yoomiyyuu gaafachuun ni danda'ama.
Ijibbaataa Federaalaa Jildii 10ffaa Lakk.Galmee 44237 ta'een "gareen waliin falmu dursee waraqaa ragaa dhaaltummaa fudhatanii jennaan,himannaa dhaalaa osoo hin taane,gaaffii qoodinsa qabeenyaa waan ta'uuf shh keewwata 1062 tiin yeroo kamiyyuu gaafachuun ni danda'ama" jechuun murteessee ture.
Federaalaa Lakkoofsa Galmee 38533 ta'een himata qabeenya dhaalaa dhaaltonnii fi qabeenyi gaheen isaanii beekamee waliigalteen/fedhiin osoo hin qooddatin kan kaa'an yoo ta'e,yeroo kamittuu gaaffii dhihaachuu waan danda'uuf,darbiinsa yerootiin hin daangeeffamu jechuun murteessee ture,shh keewwata 1060 fi 1061.

. mormii qoodinsa qabeenyaa dhaalaa:-

Waliigalteen qoodiinsaa bakka dhaaltuun tokko hin jirretti godhame tokko Mana Murtiitiin yoo mirkanaa'uu baate gaaffiin isa hin jirreen diigamuu danda'a,shh keewwata 1080.Gaaffiin kun guyyaa qoodinsi godhamuu beekee kaasee waggaa tokko(1) keessatti mormiin dhihaachuu akka qabu,haala biraatiin erga dhaalchisaan du'ee waggaa 10 keessatti yoo hin dhihaatin darbiinsa yerootiin hafaa ta'a,shh keewwata 1080(3).
Federaalaa Jildii 10ffaa Lakk.Galmee 40418 ilaaluun ni danda'ama.

. mormii dhaamoo irratti dhihaatu:-shh keewwattoota 973,974.

👉Darbiinsi yeroo dhaaltota gaafa dhaamoon dubbifamu jiran ilaallatu shh keewwata 973,himannaa dhiheessuuf yaada akka qaban guyyaa dhimmichi dubbifamee kaasee guyyoota 15 keessatti Qulqulleessituu dhaalaatiif barreeffamaan ibsuu qaba.Himannaan kunis guyyaa ibsi barreeffamaan dhihaatee kaasee hanga ji'a 3 tti Mana Murtiitti dhihaachuu qaba shh keewwata 973(3).
Namoota gaafa dhaamoon dubbifamu hin jirreef lakkaa'amuu kan eegalu gaafa Qulqulleessituun haala raawwii dhaalaa yaada qabu itti himeedha shh keewwata 974(1).Dhaamoon yoo jiraate erga dubbifamee,yoo hin jiraatin dhaalchisaan erga du'ee waggaa 5 booda mormiin gonkumaa hin dhihaatu,shh keewwata 974(2).
Federaalaa Jildii 11ffaa Lakkoofsa Galmee 53223 ilaaluun ni danda'ama.
yeroo dubbifamu ykn bakka bu'aan isaanii kan jiran yoo ta'e guyyaa dubbifamee eegalee bultii 15 keessatti iyyannoo isaan qaama ilaallatutti Baatii sadi keessatti ibsuu baannaan dhiheessuu hin danda'u.Namni dhaaltuu hin taane bu'uura shh keewwata 974 tiin mormii dhiheessuu hin danda'u.

. Sirna dhaaltummaa qulqulleessuu:-

♂️Sirna kana keessatti gaaffiiwwan qulqulleessituun dhaalaa naaf haa muudamu,qulqulleessituun dhaalaa naaf haa bu'u,dhaaltummaan naaf haa qulqullaa'u fi kan kana fakkaataniin dhihaataniidha.Darbiinsa yeroo isa qubee 'E' jalatti ibsame kana ilaalchisee ejjannoo 4tu jira:Isaanis:-
.Ejjannoo 1ffaa darbiinsi yeroo waliigaltee keessatti tumame waggaa 10 shh keewwata 1845 jalatti tumame raawwatiinsa qaba jedhu.
.Ejjannoo 2ffaaa shh keewwata 1052 raawwatiinsa qaba jedhu.
.Ejjannoo 3ffaa darbiinsa yeroo shh keewwata 874(2) jalatti tumame raawwatiinsa qaba jedhu.
.Ejjannoo 4ffaa shh keewwata 1000 raawwatiinsa qaba,sababni isaas bu'aan iyyata dhaaltummaan naaf haa qulqullaa'uu fi himata dhaaltummaa tokkuma waan ta'eef keewwatni kun Qulqulleessituu dhaalaa irratti raawwatiinsa qaba jedhu.Anis ejjannoo isa 4ffaa darbiinsi yeroo sirna Qulqulleessituu dhaalaa waggaa 3 kan jedhu kana deeggara.Dh.Ij.MMWF Jildii 11ffaa L.G.52407.

. iyyata waraqaa ragaa dhaaltummaa:

Waraqaan ragaa dhaaltummaa akka Murtiitti hin lakkaa'amu.Akka ragaatti kan lakkaa'amuu fi mormiin irratti yoo ka'e kan haqamuu,fi waraqaa ragichaa kennuun immoo yeroo dhumaatiif iyyata mirgaa kan gonfachiisuu fi nama biraa immoo kan dhabsiisu osoo hin taane mirga mirkaneeffachuuf adeemsa raawwatamuudha waan ta'eef,iyyata amala akkanaa qabu irratti seerichi darbiinsa yerootiin hin daangeessu.

Addatti hiikoon Dhaddacha Ijibbaataa MMW Federaalaa Jildii 26ffaa Lakkoofsi Galmee 236246 fi 191393 haa dubbifamu.

2️⃣. 𝑺𝒆𝒆𝒓𝒂 𝑸𝒂𝒃𝒆𝒆𝒏𝒚𝒂𝒂

☞Namni Lafa qabiyyee mootummaa yookiin waliinii yookiin dhuunfaa karaa seeraan alaatiin qabate kamiyyuu darbiinsa yeroo akka mormiitti dhiheessuu hin danda’u.Nama mirga abbaa qabiyyummaa qabuun yookiin mootummaadhaan yeroo kamiyyuu akka gadi lakkisuuf gaafatamuu ni danda’a.Qabiyyee bittaaf gurgurtaan qabame yoo ta’e malee,qabiyyeen dhuunfaa Labsiin Lakk.248/2015 kun hojii irra ooluun dura waggaa
10’n oliif qabame ilaalchisee raawwatinsa hin qabaatu.Darbiinsi yeroo gaaffi mirgoota biroo hariiroo labsicha keessatti tumaman irraa maddaniin wal qabatee dhiyaatu akkaataa seeraa dhimmichaaf rogummaa qabuutiin kan raawwatamu akka ta'e Labsii Bulchiinsaa fi itti faayyadama lafa baadiyaa OROMIYAA Lakk.
248/2015 keewwata 53.Garuu,Labsii Bulchiinsa fi itti Fayyadama Lafaa Federaalaa lakk.1324/2016 keewwata 64(2) jalatti darbiinsi yeroo waggaa 15 tumame waliin akkamitti ilaaltu?

☞Namni qabiyyeen isaa jalaa qabame yookiin qabiyyee isaa irratti jeequmsi uumame qabeenyi jalaa qabame akka deebi’uuf ykn jeequmsi irratti uumame akka dhaabbatuuf himanni dhiyeessu yeroo waggaa lamaa keessatti yoo hin dhiyaanne darbiinsa yerootiin kan jalaa daangeffamu ta’uu SHH keewwata 1149 (2) jalatti tumameera.

3️⃣. 𝑫𝒂𝒓𝒃𝒊𝒊𝒏𝒔𝒂 𝒀𝒆𝒓𝒐𝒐 𝑺𝒆𝒆𝒓𝒂 𝑾𝒂𝒍𝒊𝒊𝒈𝒂𝒍𝒕𝒆𝒆 𝑲𝒆𝒆𝒔𝒔𝒂𝒕𝒕𝒊

➠Seera hariiroo hawaasa Itoophiyaa bara 1952 bahe (SHH) keewwata 1845 jalatti waliigalteen akka raawwatamu gaaffiin dhiyaatu ykn waliigalteen raawwatamuu dhabuu isaatiin miidhaa gaheef beenyaan gaafatamu yeroo waggaa 10 keessatti qofa gaafatamuu akka qabu tumameera.

➠ Waliigalteen akka raawwatamu yookiin waliigalteen waan hin raawwatamneef miidhaa qaqqabeef namni Beenyaa gaafatu waggaa 10 keessatti himannaa Mana Murtii idileetti yoo hin dhiheessine darbiinsa yerootiin waan daangeeffamuuf waggaa 10 booda gaafii Beenyaa akka kanfalamuuf gaafachuu hin danda'u,shh keewwata 1845.

➠ Darbiinsi yeroo waggaa lamaa seera hariiroo hawaasaa keewwata 1810(2) jalatti tumame raawwatiinsa kan qabu"waliigaltee hanqina eeyyamaa yookiin dandeettii dhabuutiin raawwatame diigsisuuf dhihaatu qofa irrattiidha.

➠Dhimma waliigaltee ilaalchisee darbiinsi yeroo ifa ta'ee seeraan yoo hin tumamne,darbiinsi yeroo waliigaltee waliigalaa keessatti tumame waggaa 10(kudhan) raawwatiinsa qaba.

4️⃣. 𝑺𝒆𝒆𝒓𝒂 𝑰𝒕𝒕𝒊 𝑮𝒂𝒂𝒇𝒂𝒕𝒂𝒎𝒖𝒎𝒎𝒂𝒂 𝑾𝒂𝒍𝒊𝒊𝒈𝒂𝒍𝒕𝒆𝒆𝒏 𝑨𝒍𝒂𝒂 (𝑻𝒐𝒓𝒕 𝑳𝒂𝒘)

➠Waliigalteen osoo hin jiraatin itti gaafatamummaa hariiroo hawaasaa hordofu ilaalchisee himanni dhiyaatu yeroo waggaa lamaa (2) keessatti yoo hin dhiyaanne darbiinsa yerootiin akka daangeffamu SHH keewwata 2143 jalatti tumameera.

Haa ta’u malee,dhimmichi yakkaan kan adabsiisu yoo ta’ee fi darbiinsi yeroo dhimma yakkichaa waggaa lama kan caalu yoo ta’e, kan dhimma yakkaa raawwatiinsa akka qabaatu keewwatuma kana jalatti tumameera.

5️⃣. 𝑺𝒆𝒆𝒓𝒂 𝑯𝒐𝒋𝒋𝒂𝒕𝒂𝒂 𝒇𝒊 𝑯𝒐𝒋𝒋𝒂𝒄𝒉𝒊𝒊𝒔𝒂𝒂

Labsii hojjataa fi hojjachiisaa lakk. 1156/2011 keessatti tumaaleen adda addaa darbiinsa yerootiin wal qabatan tumamaniiru.Badiin labsichaan hammatame kamuu gochichi erga raawwatee yeroo waggaa 1 keessatti yoo hin dhiyaanne darbiinsa yerootiin akka daangeffamu haala waliigalaatiin keewwata 189 jalatti tumameera.
☞Hojjataan hojiirraa gaggeeffame gaaffii hojiitti deebi'uu dhiffachuu kan danda'u waliigalteen guyyaa addaan citeerraa eegalee yeroo ji'a sadii keessatti dhiyeeffachuu qaba (keewwata 163 (2)).
☞Kanfaltiin mindaa, kan hojii yeroo dabalataa, ykn kanfaltii kamuu hojjataan gaafatamu guyyaa waliigalteen hojii addaan citee kaasee yeroo ji'a jahaa keessatti qofa gaafatamuu danda'a (keewwata 163 (3) (4).
Falmii hojii irratti murtiin erga kennameen booda ol'iyyanni ijibbaataatti guyyoota 90 keessatti dhihaachuu qaba,ji'a sadi booda immoo ol'iyyanni ijibbaataatti gaafachuu hin danda'amu.

6️⃣. 𝑺𝒆𝒆𝒓𝒂 𝑫𝐄𝐄M𝐒𝐀 𝐇𝐀𝐑𝐈𝐈𝐑𝐎𝐎 𝐇𝐀𝐖𝐀𝐀𝐒𝐀𝐀

➠Abbaan mirgaa qabeenya irratti erga murtiin kennameen booda waggaa 10 keessatti akkaataa murtiitiin akka raawwatamuuf yoo hin gaafanne yookiin iyyata raawwii yoo hin dhiheeffanne waggaa 10 booda akkaataa murtiitiin akka raawwatamuuf gaafachuu hin danda'u,sdfhh keewwata 384.

➠Sirna ariirii irratti ol'iyyannichi murtiin erga kennamee kaasee guyyaa 10 keessatti dhihaachuu/gaafatamuu qaba.Yeroo seerri kaa'e keessatti ol'iyyanni yoo hin gaafatamne yeroon darbinaan ol'iyyannisaa fudhatama hin qabu.

➠Murtiin yookiin ajajni bakka ani hin jirretti kenname akka naaf ka'u jedhamee gaafatamu,erga murticha yookiin ajajicha beekee kaasee guyyoota 30 keessatti yoo iyyata hin dhiheessine Baatii tokko booda dhiheessuu hin danda'u,sdfhh keewwata 78(1).

➠Dhimma hariiroo hawaasaa irratti murtiin erga kennameen booda ol'iyyanni guyyoota 60 keessatti yoo hin dhihaanne(hin gaafatamne) ji'a lama(2) booda ol'iyyannoo dhiyeeffachuu hin danda'u,sdfhh keewwata 323(1).Yoo hayyamsiisni kennameef malee.

Asumaan Abbootii Seeraa hundaan baga hojii idilee keessanii nagaan deebitan jechuu barbaanna.

Waan dubbistaniif galatoomaa!!📃📄📑

✍✍ /teyib nuure law office

Dabbaal Show Fuula Hubannoo Seeraa

21/05/2026

19/05/2026

17/05/2026

17/05/2026

17/05/2026

12/05/2026

Address

Website

Alerts

Shortcuts

Share

Category