29/06/2025
HAWWII
Writer: Esayas Hordofa Mijena
Screenplay: Kaachuu YW
Director: Biyyaa Ulfinaa
Production Manager: Lalisa D Olika
Kitaaba Asoosama Afaan Oromoo warroota duraa keessaa, hanga har'aa laphee namoota hedduu keessa kan jiraate tokko Asoosama Hawwiidha. Seenaa Ogbarruu Oromoo keessattis kitaaba gara fiilmiitti deebi'e keessaa kan dursu natti fakkaata. Yoon dogoggore na qajeelchaa.
Barreessaadi Gaazexessaan hangafti Obbo Isaayyaas kitaabasaanii hedduu keessaa HAWWIIN rirriittaafi sukkuummaa guddaadhaan akka barreeffamte addeessu. Ammoo kitaabicha kan adda taasisu, seenaa dhugaa irratti kan barreeffame ta'uu isaati.
Yeroo tokko bilbilaan quunnamee waan gaaffii natti ta'e gaafannaan, seenichi maal akka tureefi, xiinsammuu hawwaasichaaf eeggannaa gochuuf jecha taatee dhumarratti kitaabni sun ittiin dhume haala amma jiru kanaan goolabuusaanii naaf ibsan. Isaan dhugumatti barreessaa jabaadha. Dhugaa lafa jiruuf, xiinsammuu hawwaasa isaanii wal madaalchisuu kan danda'a waan ta'aniif, anaaf fakkeenya ta'aniiru. Galgala kana turtii gabaabaa Gaazexessaa Tamirat Adamu Emana waliin Mako Bili Show irratti taasisaniiru. Galgala kana karaa foddaa OBN TV isin bira ga'a. Liinkii koomentii jala jiruun YouTube MakoBili Show irraa daawwachuus ni dandeessu.
HAWWIIN Fiilmii ajaa'ibaa ta'ee, torbee har'aa eebbifama. Hojii qulqullina qabu kana, waggaa tokko guutuu "production" isaa irra turaniiru. Karaa nam-jabaa manaajera pirodaakshinichaa kan ta'e, Lalisaa'tiin, anis hanga tokko quba nan qaba. Haalli itti "screenplay" isaa Kaachuun barreesse gaariifi, waan hedduus kan nama barsiisuuf fooyya'aa ta'edha. Qaqqabadhee barruu isaa dhamdhameera. Viidiyootiin ammoo ilaaluuf sardameera.
📆 Waxabajjii 29/2017 ALI tti
🚩 Galma Tiyaatira Biyyaleessaa
Hoofkalaa
Liinkii kanaan seenaa subscribe godhaa. Agarsiisa bakkeewwan garagaraa booda Fiilmii Hawwii achirratti argattu. 🖇️https://youtube.com/
