11/05/2026
Murtee ‘VAR’ tapha Weestihaam VS Arsenaal irratti maaltu jedhame?
*******************************
Murteen ‘VAR’ (Video Assisted Referee) tapha Weestihaamii fi Arsenaal gidduutti Istaadiyeemii Landanitti taphatamee ture irratti, goolii daqiiqaa dhumaarratti Weestihaam galche akka haqamu taasifte, Piriimiyer Liigii keessatti murtee yeroo kamiyyu caalaa hiika guddaa qabudha jedhameera.
Arsenaal goolii Tiroosaard galcheen dursaa otoo jiruu saatiin dhumuuf otoo jedhuu gooliin falmsiistuu kun galte.
Daqiiqaan afurii fi Sekoondiin 11 ciniinsuu turte.
Daqiiqattiin afran sun seenaa Arsenaal, akkasumas kan Weestihaam jijjiiruuf humna qabdi turte.
Arsenaal waggaa 22 booda waancaa argachuuf tarkaanfiin tokko gara isa hafutti ceehuuf, Weestihaam ammoo sadarkaa Liigicha keessaa bahuu keessaa xiqqoo morma ol baafachuuf moo'achuuf ijibbaata keessa turan.
Kanaaf, murteen ‘VAR’ kun morkii Piriimiyer Liigii bara kanaa murteessuuf gahee waan qabuuf hunduu qalbiin rarra'ee eegaa ture.
Warri Weestihaam gammachuun lafa dhiituu jalqabanii ture, leenjisaan Arsenaal Mikeel Arteettaa mataa qabatee Sekoondii muraasa hafte keessatti qaanofnee jechuun yeroof waan dubbachuu qabu kan wallaale fakkaate.
Garuu dhimmee ilaalaa waan tureef, Arteettaan karra eegaan Arsenaal Daavid Raayaa mormi hudhamee, harki qabamee kubbaa galte oolchuu otoo danda'uu yakki waan irratti hojjetameef jechuun mallattoon murteessitootatti agarsiisaa ture.
Karra Tiroosaard Arsenaaliif daqiiqaa 83ffaa irratti galche dursa akka qabatu qofa otoo hin taane, Liigicha dursummaa isaa qabatee imala waancaa isaa tarkaanfiin tokko isa hafetti siqaa jira ture.
Haata'u malee, daqiiqaa dabalataa dhumaarratti taphataan Weestihaam jijjiiramee seene Kaalum Wilsan kubbaa 'Koornaa' irraa dhufte manii Arsenaal keessa buusee ture.
Yeroo kana ture murteessaan 'VAR' gargaarumuun akka murteessuuf kan yaanni dhihaateef.
Murteessaan kun Karra eegaa Arsenaal irratti yakki raawwatameera jechuunis goolii kana haqe.
