06/12/2023
Guyyaan Saboota, Sablammootaafi Uummattoota Itoophiyaa Marsaa 18ffaan, sadarkaa Naannoo Oromiyaatti magaalaa Maayaatti kabajame
-----------
Guyyaan Saboota, Sablammootaafi Uummattoota Itoophiyaa 18ffaan, sadarkaa Naannoo Oromiyaatti Bulchiinsa Magaalaa Maayaatti sirnoota garaa garaan kabajameera.
Kantiibaan Magaalaa Maayaa Dr.Ifrahaa Waziir Ayyaanni Saboota fi Sablamoota agarsiiftu Itoophiyaanotaati fi Mallattoo agarsiisa waloomaati ja'an.
Sagantaa kanarrattis Af-yaa'ii Caffee Oromiyaa Aadde Sa’aadaa Abdurahmaan, Itti Gaafatamaa Waajira Paartii Badhaadhinaa Damee Oromiyaa Obbo Fiqaaduu Tasammaa dabalatee, hooggantoonni olaanoo Naannoo Oromiyaa, Abbootii Gadaafi Haadholiin Siinqee argamaniiru.
Af-Yaa’iin Caffee Oromiyaa Aadde Sa’aadaa Abdurahmaan Guyyaan Sabootaa, Sablammootaafi Uummattootaa Itoophiyaa kabajamaa jiru guyyaa itti sirni qeenxee leellisu cabee gara sirna sabdaneessummaatti ce’ame itti mirkanaa’e waan ta’eef hundaafuu hiikaa guddaa qaba jedhan. Kabajni guyyaa sabootaa kun gama hundaan guyyaa wal-qixxummaafi obbolummaan uummata biyyattii itti mirkanaa’ee waan ta’eef seenessaafi sirna qeenxeerraa gara sirna waloomaa hunda qixa hirmaachiseetti ceene waan ta’eef guyyaa addaati jedhan. Bu’aalee sirna federaalizimiin dhufaa jiran cimsuun bu’aa caaluuf cichuu qabnas jedhaniiru.
Itti Gaafatamaan Waajira Paartii Badhaadhinaa Damee Oromiyaa Obbo Fiqaaduu Tasammaa gama isaaniitiin ammaan booda dhugaan qeenxeefi anatu siif beekaan, kan ofii namarratti fe’uun boqonnaan isaa cufameera; seenessi waloo dagaagaa deema jechuun dubbatan. Uummanni Itoophiyaa gaaffiiwwan lafaa, wal qixxummaafi ofiin of bulchuu isaa akka deebi’uuf sirnoota dhufanii darban keessatti kaasaa turuus eeraniiru. Kanaafis, qaaliiwwan ilmaan sabaa aarsaa itti ta’aniiru jedhan.
Kantiibaan Magaalaa Maayaa Dr.Ifrahaa Waziir Ayyaanni Saboota fi Sablamoota agarsiiftu Itoophiyaanotaati fi Mallattoo agarsiisa waloomaati ja'an.
Qabsoon ilmaan Oromoo adda durummaan gaggeessaa turanis aarsaa kitimaan booda adeemsaan fuuramaa dhufuu eeraniiru. Keessumattuu, sirni federaalizimii Itiyoophiyaa keessatti Sadaasa 29 bara 1987 irraa kaasee hojiirra ooluu eegale gaaffiiwwan ka’an hundaaf deebii kan kennudha jedhan. Hanga jijjiiramaatti garuu hedduun isaa waraqaarra turuus yaadachiisaniiru.
Yeroo ammaa garuu Naannolee arfan haaraa hundaa’an dabalatee, gaaffileen mirga dimokiraasii Sabootaa karaa ifaafi qajeeltoo isaa eeggateen deebii akka argataniif hojjetamaa jiraachuu ibsaniiru.
Dhugaa waloo hubachuu, seenessa badaarraa haaloof utuu hin taane irraa barachuu, barnootaafi saayinsiin cimuun; sirna cimaa ijaaraa deemuun haalaan akka barbaachisus Obbo Fiqaaduun yaadachiisaniiru.
