25/09/2024
Maxaadan ogeyn oo ka jira Degmada Doolow Ado ee gobolka Liibaan?
Degmada Doolo Ado ee gobolka Liibaan ee Dowlad Degaanka Soomaalida (DDS) waxaa maalintii Sabtida (21/09/2024) ka dhacay isku dhac dad shacab labo reer oo degmada wada deggan (Xawaadle iyo Masarre).
Rabshada degmada ka dhacday waxaa ku dhintay hal qof halka ay dad badan oo labada dhinac ah na ku dhaawacmeen, waxaa se la yaab ku noqotay shacabka degmada in maamulka gobolku ay soo xireen 48 qof oo shacab hal reer kaliya ah!
Xalay na waxaa dhacday arrin kale oo walaac iyo dareen ku abuurtay dadka degaanka taas oo ah in xalay habeennimo xabsiga lagala baxay 7 Oday oo ka mid ah shacabka xirnaa, ilaa haddana aan la garaneyn halka loo qaaday ayada oo aan ehelkooda loo sheegin halka la geeyay!
Odayaasha xalay xabsiga lagala baxay ayaa ah halbeel kaliya, aaway caddaladii iyo usinaantii dadka deegaanka mise waa waxkle oo aanan ogeyn ayaa jira.
Haddaba arrinka is weydiinta mudan ayaa ah DDS weli caadi miyay ka tahay in dad gaar ah la beegsado iyo habeen madow dad xabsiga lagala baxo oo aan masiirkooda la aqoon?
Dhanka kale, masuuliyiinta dadka xiran ku matala maamulka gobolka Liibaan iyo midka degmada Doolow Ado ma ka hadleen halka la geeyay odayaasha xabsiga lagala baxay?
Hadii aan xal loo helin arintaas caqabado horleh ayey abuuri doontaa oo indhaha laga fiirsado.
W/Q Cilmi Faradheere
