12/01/2026
GO’AAN CULUS OO TAARIIKHI AH: DIB-U-XAQIJIINTA MADAXBANNAANIDA QARANKA 🇸🇴
Go’aanka Golaha Wasiirrada Jamhuuriyadda Federaalka Soomaaliya ee lagu buriyay dhammaan heshiisyadii amni iyo difaac ee lala galay Dowladda Isutagga Imaaraadka Carabta waa tallaabo culus oo xambaarsan fariin siyaasadeed, qaranimo iyo sharciyeed oo aad u weyn.
Marka h**e, go’aankan waxa uu muujinayaa in Dowladda Federaalka ay si cad u qaadatay mowqif ah ilaalinta midnimada, gobonnimada iyo madaxbannaanida siyaasadeed ee dalka, gaar ahaan arrimaha la xiriira dekadaha istaraatiijiga ah ee Berbera, Boosaaso iyo Kismaayo—kuwaas oo ah halbowlayaasha dhaqaale iyo amni ee dalka.
Marka labaad, burinta heshiisyadan waxay diraysaa fariin cad oo ku socota beesha caalamka: arrimaha amniga, difaaca iyo dekadaha Soomaaliya waa kuwo ay go’aan ka gaarto oo keliya Dowladda Federaalka, mana jiri karto faragelin ama heshiisyo dhinac saddexaad ah oo wax u dhimaya qaranimada.
Sidoo kale, ansixinta Hindise-sharciyeedka Ilaalinta Madax-bannaanida iyo Midnimada Dhuleed waa tallaabo sharciyeed oo xoojinaysa dowladnimada, isla markaana xiraysa albaabkii fawdo sharciyeed ee ay maamul-hoosaadyo ama hay’ado gaar ah heshiisyo shisheeye ugu geli jireen dalka iyaga oo aan oggolaansho ka haysan Dowladda Federaalka.
Si kastaba ha ahaatee, guusha dhabta ahi waxay ku xirnaan doontaa hirgelinta iyo adkeynta sharcigan, iyo in la helo istaraatiijiyad diblomaasiyadeed oo caqli ku dhisan, si xiriirka caalamiga ah loo ilaaliyo iyada oo aan lagu tanaasulin madax-bannaanida Qaranka.
Ugu dambayn, go’aankani waa fursad dib loogu dhiso kalsoonida shacabka, looguna muujiyo in Soomaaliya ay ka gudubtay marxalad lagu ciyaaro danaha shisheeye, una gudubtay Qaran go’aan leh, sharci leh, oo masiirkiisa gacanta ku haya.
