http://opnnetwork0.wordpress.com/

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤, Oromia, Robe (2025)

23/06/2025

Paarlaamaan Iraan ulaan Hormuuz akka cufamu yaada dhihaate raggaasise.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 23/2025) Finfinnee

• Ameerikaan ammoo Chaayinaan Iraan irratti dhiibbaa akka gootu gaafatteetti

Boba’aan hin calalamiin addunyaa kanaa dhibbeentaan 20 ulaa ‘Strait of Hormuz’ Iraan fi Omaan gidduu argamu kanaan daddabarfama.

Paarlaamaan Iraan ammoo haleellaa US Ameerikaan Israa’eliin tumsuudhaan biyyattii irratti raawwatte haaloo bahuuf ulaan ‘Strait of Hormuz’ kun akka cufamu yaada murtee dhihaateef raggaaseera.

Murteen Paarlaamaa kun hojiirra kan oolu, ajajni dhumaa hogganaa ol’aanaa Iraan Ayaatolaah Alii Khaamiiniidhaan erga kennamee booda akka ta’e eerameera.

Ulaan ‘Strait of Hormuz’ kiiloo meetira 40 bal’atu kun yoo cufame, dhiheesii boba’aa addunyaa irratti dhiibbaa guddaan uummamuu akka danda’u Niwiis Wiik Televizhiinii Iraan waabeffachuun gabaasera.

US Ameerikaan ammoo ulaan ‘Strait of Hormuz’ akka hin cufamne Chaayinaan Iraan irratti dhiibbaa akka gootu gaaffatteetti.

Ministirri Dhimma Alaa US Ameerikaa Maarkoo Ruubiyoo, ulaan kun akka hin cufamne Chaayinaan Iraan irratti dhiibbaa akka gootu waamicha dhiheessaniiru.

Embaasiin Chaayinaa Waashingitan jiru garuu hanga ammaatti dhimma kana irratti yaada kan hin kennine ta’uun eerameera. (ETV, Reuters)

16/06/2025

Ameerikaan Itoophiyaa dabalatee biyyoota 36 irra uggura imala kaa'uufi jedhame.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 16/2025) Finfinnee

Bulchiinsi Traamp Itoophiyaa, Masrii fi Naayijeeriyaa dabalatee lammiileen biyyoota 36 Ameerikaa akka hin seenne dhorkuuf yaadaa akka jiru sanadni keessoo Ministeera Dhimma Alaa Rooyitars( Reuters) fi Waashingitan Poost( Washington post ) argan ni mul’isa.

Sanadni Ministira Dhimma Alaa Maarkoo Ruubiyoon mallattaa’ee fi dippilomaatotaaf kan qophaa’e kana irratti biyyoota 36 lammiileen isaanii ugguruuf yaadame kan tarreefaman yoo ta’u akkasumas sirreeffama biyyoonni kunneen uggura kana keessaa ba’uuf godhuun irraa eegamu tarreesse of keessatti hammateera.

Sanadni kun biyyoota lammiileen isaanii uggura imala guutuu ykn gartokkee ta’e adda baasuun rakkoo isaan mudatu kaa’uun biyyoonni kunneen uggurri kun hojiirra ooluu isaa dura Ulaagaa fi sirreeffama barbaachisaa ta’e akka godhan ji’a lama akka kennamu hubachiiseera.

Sanadni dhuma torban darbee dippilomaatotaa dhimmi ilaalatuuf kan kenname yoo ta’u, “[Ministeerri Dhimma Alaa] biyyoota yaaddoo qaban 36 kanneen ulaagaalee fi dirqama kaa’aman guyyoota 60 keessatti yoo hin guunne uggura imala guutuu ykn gartokkoon isaaniif saaxilamuu danda’an adda baaseera,” jechuun Rooyitars gabaaseera.

Ji’a Caamsaa darbe Pirezidaanti Tiraamp ajaja hojii raawwachiiftuu nageenya biyyoota isaanii fi ummata isaanii eeguuf tattaaffii gochuuf jechuudhaan Ertiraa, Sudaan, fi Somaaliyaa dabalatee biyyoota Afrikaa torba dabalatee biyyoota 12 irratti xiyyeeffate mallatteessun isaanii ni yaadatama.

15/06/2025

Imbasiin US Jerusaalam jiru hojjettoonni fi maatiin akka of eeggatan, yoo fedhan akka gadhiisanii ba'an dhaame.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 15/2025) Finfinnee

Imbasiin Ameerikaa magaalaa Jerusaalamitti argamu hojjettoonni maatiisaanii waliin akka dawoo keessa dhokatan itti hime.

Kunis sodaa haleellaa Iraan fi Israa'el gidduutti adeemaa jirurraa kan ka'e ta'uu ibseera.

Hojjettoonni kunneen yoo barbaadan Israa'el gadhiisanii ba'uu danda'u jedhe imbasichi.

Yeroo ammaa buufata xiyyaaraa idiladdunyaa ollaa magaalaa Teel Aviiv guutummaatti cufameera.

Kana jechuun karaa ba'an imala lafoo qofaan ta'uusaati.

Gara biyyoota ollaa akka Jordaanfaa seenuuf lafa imaluu qabu jechuudha.

US imbasii ishee Israa'el magaalaa Jerusaalam keessa akka ta'u filatte, magaalaa Israa'el Teel Aviiv ta'uu qaba ture.

Haalli kun biyyoota kaan keessatti baratamaa miti.

Imbasiin Jerusaalam jiruu fi wajjirri Teel Aviiv jiru lamaanuu banaadha. Garuu akka duraanii miti.

14/06/2025

Balaa xiyyaaraa Hinditti mudateen baay'inni namoota du’anii 270 ga’e.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 14/2025) Finfinnee

Balaa xiyyaaraa Hinditti erga mudatee guyyoota sadii ga’e kanaan namni tokko ammoo lubbuun hafuun kan yaadatamuu dha.

Namoota balaa kanaan lubbuun isaanii darbe keessaa 29 bakka balaa sanaa kan turanii ta’uu ‘’Gulf Today’’ gabaaseera.

Hospiitaala Siivili Ahimadaabaad jiru irraa Dooktar Daavaal Gaameetii ‘Associated Press’’tti akka himanitti, reeffi namoota du’anii hanga ammaatti argame 270 ga'eera.

Namichi tokkichi lubbuun hafes wal’aanamaa jira.

Maatiiwwan namoota du’anii Hospiitaalichatti saamuda ‘DNA’ kan kennan yoo ta'ellee, bu’aan qorannichaa saa’atii 72 akka fudhatu hoggantoonni dubbataniiru.

Kamisa darbe xiyyaarri Booyingi 787-8 jedhamuun waamamtu kaaba dhihaa Hinditti kan argamu buufata xiyyaaraa Ahimadaabaad irraa imaltoota 242 fe’ee ka’uun gara Londonitti balali’aa ture, seekoondota muraasa keessatti kufee caccabuun ni yaadatama.

14/06/2025

Hogganaan poolisii Keeniyaa ajjeechaa rogeessaan to'annoo jala oole.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤 waajjira poolisii magaalaa guddoo Keeniyaa Naayiroobii, ajjeechaa dargaggeessa biloogar ta'eefi to'annoo Poolisii jala osoo jiruu ajjeefameen walqabatee to'annoo jala ooluu qorattoonni walabaa himan.

Qondaala kanaan alattis ajajaan buufatichaa Saamson Tallam, poolisii kan biraan Jeems Mukwaan fi teeknishaanni kaameeraa nageenyaa buufata poolisii sanii haquun shakkame to'annoo jala oolaniiru.

Poolisiin biloogar Albart Ojiwaang mataa isaa dallaa irratti erga rukutee booda of miidhuun du'e jedhamus, hakiimoonni garuu kun dhugaa akka hin taane ibsuu booda biyyattii keessatti uummatni dheekkamsa kaaseera.

Doktooronni Albart sababa miidhaa irratti raawwatameen lubbuun akka darbe jala muraniiru.

Qorannoo walabaa dhimmicha irratti gaggeeffame hordofuun yoo xiqqaate namoota 23 qoratamuun namoota shan ammoo hojii idilee isaanii irraa ari'amuu ibsameera.

Ojiwaang namni ganna 31, dhuma torbee darbee osoo to'annoo poolisiin jala jiruu du'e.

Bloogarri kun waa'ee Itti aanaa Inispeektaraa Eluud Lagaat fuula X isaa irratti barreeffama qeeqaa erga barreessee booda poolisiin to'annoo jala oolche.

Ibsa jalqabaa poolisiin kenneen Ojiwaang kutaa isaa keessatti of wallaalee argamee gara hospitaala magaalattii geeffamee mataa isaa dallaa irratti rukutee du'uu isaa ibseera.

Haa ta'u malee, bu'aan qorannoo Poolisii Walabaa (IPOA) kan poolisii to'atu, yaada poolisiin Ojiwaang of ajjeesuu mala jedhu mormeera.

Inispeektar Daaglaas Kaanjam ibsa kanaan dura kennan fudhatama dhabsiisuun dhiifama gaafachuun ''odeeffannoo dogoggoraa'' hojjettoota isaaniitiin uumame ta'uu dubbataniiru.

Jimaata darbe mana murtii kan dhiyaatan yoo ta'u hanga dhaddacha mirga wabii isaaniitti torban tokkoof to'annoo jala oolu.

Kamisa darbe mormitoonni dhibbaan lakkaa'aman ajjeechaa biloogarichaatiin aaranii, itti aanaa Inispeektar Lagaat aangoo akka gadhiisan gaafachuuf daandii irratti ba'aniiru.

Jeneraal Lagaat uummata, hoggantoota paartii mormitootaa, fi gareewwan hawaasa siivikii irraa aangoo akka gadhiisaniif ykn hojii irraa akka ugguraman dhiibbaan cimaan irra gahaa jira.

Prezidaant Wiliyaam Ruutoo qorannoon hatattamaa akka gaggeeffamu gaafachuun bulchiinsi isaanii lammiilee poolisii seera hin qabne irraa akka eegu Jimaata darbe waadaa galaniiru.

Waggoota sadii dura yeroo pirezidaantichi gara aangootti dhufan seenaa gara jabummaa poolisii fi ajjeechaa seeraan ala Keeniyaa xumuruuf waadaa galaniiru.

Haa ta'u malee, bara darbe qofa Keeniyaatti ajjeechaan seeraan ala fi dirqiin dhabamsisuu gara 160 ta'u Komishiniin Mirga Namoomaa biyyattiin galmaaheera.

Dhaabbanni poolisii walaba ta'e ji'oota afran darban qofa poolisiin erga qabamanii booda yoo xiqqaate namoonni 20 ajjeeffamuu ibseera.

14/06/2025

Biyyoonni Baha giddugaleessaa Iraani fi Israa'el haleellaa qilleensaa fi misaa'elaatiin wal unkuraa jiru.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤n Netaaniyaahuu Israa'el waxabajjii 13 bara 2025 ganama haleellaa biyya Ayaatolaa Alii Komeenii Iraan irratti raawwatte hordofee halkan edaa magaalaan guddoon Israa'el Teel Aviv ibiddi itti roobaa buluu miidiyaaleen idil-addunyaa gabaasaa jiru.

Israa'el fi Iraan, Tehraan fi Teel Aviv, Beeniyaamin Netaaniyaahuu fi Ayaatolaa Alii Komeenii, Mosaadi fi Ministeerri basaasaa Iraan wal haleellaa jiru.

Israa'el wiirtuuwwan niwukilaraafi buufatawwan waraanaa Iraan irratti haleellaa raawwachuun hoogganaa Eegdota Warraaqsaa Iraan Huseen Salaamii aangawoota waraanaa olaanoo dabalatee saayintistoota gabbisa niwukilaraa Iraan ajjeefte.

Tarkaanfii Haloo bahiinsa fudhadhee Israa'elitti Azaaba bana kan jedhe hoogganaan Iraan Ayaatolaa Alii Komeenii halkan edaa misaa’eloota Bilaastikaa Teel Aviv irratti dhukaasaa bule.

Teel Aviv misaa'eloota Tehraan irraa itti dhukaafamaa bule humna Ittisa qilleensa Iron Dom jedhamuun qolachuuf yaala bultuus haleellaan hedduun raawwatamuu miidiyaaleen gabaasaa jiru.

Gabbisni Nikulaaraa fi jiraachuun Iraan Israa'eliif sodaa guddaadha kan jedhan dureen Israa'el Beeniyaamin Netaaniyaahuu haleellaa Jimaata kaleessaa ganama raawwataniin miidhaa guddaa wiirtuu gabbisa Niwukilaraa Iraan irraan gahuu dubbatani jiru.

Israa'el haati dhaabbata basaasaa guddaa addunyaa Mosaad fi Iraan haati diroonii Mohaajar 6 baha giddugaleessaa keessatti wal haleellaa jiru.

Haleellaa Israa'el Jimaata Iraan irratti banteen saayintistoota nikuleeraa jaha fi aanga'oota waraanaa dabalatee namoonni 78 ajjeefamuu fi 320 miidhamuu Iraan dhaabbata mootummoota gamtoomanitti beeksifte jirti.

Haleellaa Haloo bahuu Iraan Jerusalemii fi Teel Aviv keessatti raawwatteen namoonni lama ajjeefamuu fi 21 miidhamuu Israa'el beekfsitee jirti.

Haleellaa eda Tehraan raawwataa turteen magaalaan akka Rishoon lezion faatii miidhamani jiru.

Haleellaa biyyoonni baha giddugaleessaa lamaan wal irratti taasisaa jiran kanaan biyyoonni garagaraa yaaddoo isaanii ibsataa jiru.

Chaayinaan Israa'el "walabummaa, nageenyaa fi birmadummaa daangaa Iraan sarbuu" balaaleffattee jirti.

Dhaabbata Biyyoota Gamtoomaniitti ergamaan Chaayinaa, Fuu Koong walgahii ariifachiisaa Mana Maree Nageenyaa Dhaabbata Biyyoota Gamtoomanii halkan darbe taa'ame irratti Chaaynaan haleellaa Israa'el raawwattee balaaleefattee jedhe.

Beejiing dhiibbaa hamaa haalli amma jiru marii nikulaaraa Iraan irraan geessisu irratti ''yaaddoo guddaa'' qabdi jechuun itti dabalanii, Israa'el muddama akka hin hammaanne gochuuf tarkaanfii waraanaa hunda hatattamaan akka dhaabdu gaafataniiru.

Akkasumas Iraan ''anniisaa niikulaara haala nagaatiif fayyadamuu akka biyya mallatteessituu Waliigaltee Meeshaa Nikulaarri Hin Babal'isneetti mirgishee guutummaatti kabajamuu qaba'' jedhan.

Kanas ta'ee sana biyyoonni lamaan ammas walitti dhaadachuu itti fufaniiru.

14/06/2025

Iraan buufataalee waraanaa US, UK fi Faransaayi akka haleeltu akeekkachiifte.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤haaloo bahuu Israa'eel irratti gaggeessituuf Israa'elirra yoo goran, buufataalee waraanaa US, UKfi Faransaayi Baha Giddu Galeessaa keessa jiran akka haleeltu akeekkachiifte.

Maddi oduu Rooyitars miidiyaalee Iraan waabeffachuun akka gabaasetti, biyyoonni kunneen sadan Israa'el kan ittisan yoo ta'e, buufatalee waraanafi dooniwwan waraanaa naannoo sana jiru haleeluf akeekkachiifte.

Gama biraan ammoo haleellaa misaa'elaa Iraan halkan edaa Israa'el irratti gaggeessite rukutanii kuffisaa keessatti humni waraanaashee akka hin hirmaanne UKn beeksifte.

Bara darbe Iraan yeroo diroonifi misaa'elaan Israa'el haleeltee turte, UKn xayyaarota waraanaa buufata Sayippiras jiran irraa kaasun misaa'elota rukuttee kuffisuun Israa'el gargaaruunshee ni yaadatama.

13/06/2025

Israa'el wiirtuuwwan niwukilaraa fi buufatawwan waraanaa irratti xiyyeeffachuun Iraan haleelte.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 13/2025) Finfinnee

Haleellaa Israa'el kanaan saayinitistoonni niwukilaraa Iraan fi hoggantoonni waraanaa olaanoon Iraan ajjeefamuun ibsamaa jira.

Hoogganaan Eegduu Warraaqsaa Iraan [Iran Revolutionary Guard] fi hooggantoonni biroon ajjeefamuun gabaafameera.

Israa’el haleellaa Iraan keessatti raawwatte kana wiirtuuwwan niwukilaraarratti xiyyeeffachuun akka ta’e Humni Ittsaa Israa’el (IDF) beeksiseera.

Haleellaan kun qaama Opireeshinii Raayizing Laayiwon [Operation Rising Lion] akka ta’e Ministirri Muummee Israa’el Beeniyaamin Netaaniyaahuu dubbataniiru.

Iraan “jiraachuu Israa’eliif” yaaddoodha jedhan Ministirri muummee Netaaniyaahuun itti dabaluun.

Ministirri Muummee Israa'el Beeniyaamin Netaaniyaahuun haleellaan Israa'el gaggeessite ''handhuura sagantaa gabbisa niwukilaraa Iraan rukute'' jedhan.

Israa’el bakka gabbisa guddaa [niwukilaraa] Iraan magaalaa Nataanz jedhamtu kan magaalaa guddoo Iraan Tehraan irraa gara kibbaatti 225km fagaattu rukutteetti jedhan.

Israa'el haleellaan deebii kennuu “yeroo dhiyootti” Iraan irraa dhufuu mala yaada jedhuun labsii yeroo muddamaa labsiteetti.

TVn mootummaa Iraan bakkeewwan jireenyaa Tehraan keessa jiran rukutamuufi daa'imman dabalatee namoonni nagaa kanneen ajjeefaman keessaa ta'uu gabaaseera.

Miidiyaaleen mootummaa Iraanis hogganaan Eegdota Warraaqsaa Hoseen Salamiin haleellaa raawwatameen ajjeefamuu isaanii gabaasaniiru.

Hogganaan olaanaa Iraan Ayaatolaa Alii Komeenii haleellaa kanaan Israa'el "hiree hadhaawaa argachuuf jirtu ofiif qopheessite” jedhan.

Iraan haleellaa deebii raawwachuu akka jalqabde ibsameera.

Diroonota heddu gara Israa'eelitti bobbaasuutu ibsame.

Ministirri Dhimma Alaa Yunaayitid Isteets Maarkoo Ruubiyoo haleellaa kana keessatti hirmaannaafi gargaarsi Ameerikaa hin turre jedhan.

Haleellaa kana hordofee yaadni idil-addunyaa irraa kennamaa jiru baayyee yoo ta’u, Awustiraaliyaan dubbiin kun hammachuun ''yaadda’uu'' himteetti.

Hogganaan Dhaabbata Biyyoota Gamtoomanii (UN) Baha Giddu Galeessaa keessatti ''of qusannaa olaanaan'' akka jiraatuuf gaafachuun, haleellaa Israa'el iddoowwan niwukilaraa Iraan irratti raawwattu balaaleffatan.

Barreessaa olaanaa Dhaabbata Biyyoota Gamtoomanii Antooniyoo Gutareez bakka bu'uun kan dubbatan Dubbi himaansaanii, Guutareez: "yeroo mariin Iraan fi Ameerikaa gidduutti geggeeffamaa jirutti haleellaan Israa'el dhaabbilee niwukilaraa Iraan irratti raawwatamuu yaaddoo addaa qabu" jedhan.

Barreessaan Olaanaan kun ''gama lachuunuu of qusannaa guddaa akka agarsiisan, haarsaa gara waldhabdee cimaa kamuuttuu geessuufi haala naannichi baay'ee rakkisaa ta'e kamuu irraa akka of qusataniif waamicha taasisaniiru," jedhan dubbi himaan kun.

12/06/2025

Ambaasaaddarri Ameerikaa dubbiin haleellaa diroonii ibsa imbaasichaa keessatti kaafame ‘dogoggora' ta'uu ibsan.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 12/2025) Finfinnee

Itoophiyaatti Ambaasaaddarri Yunaaytid Isteets Erviin Maasingaa ibsa Imbaasii Ameerikaa dhiheenya kana baase keessatti sararri mootummaan federaalaa “uummata ofii irratti haleellaa diroonii raawwatu hatattamaan akka dhaabu” jedhu dabalamuun isaa “dogoggora” ta’uu ibsan. Kunis “dogoggora bulchiinsaan kan uumame” ta’uu ibsaniiru.

"Dogoggora ture, malee waan biraa hin turre. Barreeffama adeemsa qophiitti jiru, kan ani hin arginee fi hin raggaasifne fudhanne. Sababii dogoggora bulchiinsaatiin barreeffamni kun maxxanfame," jechuun ibsa har'a gaazexeessitootaaf kennaniin dubbatan.

Ibsi Imbaasiin Ameerikaa Finfinnee argamu torban sadi dura baase kun, mootummaan Itoophiyaa fi qaamoleen hidhatan ''nagaa fi tasgabbii buusuu irratti cimsanii akka hojjetan'' waamicha dhiyeesseera. Addatti, "kaayyoo qabatamaa fi nagaa qabeessa ta’e qabatee akka dhiyaatuu" fi ammoo “waldhabdee Oromiyaa keessa deemaa jiru furuuf marii kanaan dura eegalame akka itti fufsiisu” dhaameera.

Maxxansa jalqabaa irratti sarara mootummaan federaalaa “uummata ofii irratti haleellaa diroonii raawwachuu hatattamaan akka dhaabu” kan jedhu of keessaa qabu ta'us, boodarra sararri sun haqameera.

Ambaasaaddarri Ameerikaa deebii “murnoota WBO tokko tokko, murnoota Faannoo tokko tokko” irraa argatan abdii kan horu ta'uu ibsaniiru.

''Tarreewwan haal-duree dheeraa dhiyeessaniiru," kan jedhan ambaasaaddarichi, “akkaataa ani kana ilaalu garuu Itoophiyaan bakka biraa caalaa gara xumuraatti dhihoo jiraachuu isheeti” jedhan.

Itti dabaluudhaanis, "yeroo kanatti isaanis ta’e mootummaan federaalaa karaa sana [marii nagaa] caalatti qabatamaa taasisuuf karaa barbaaduun dirqama isaanii” ta’uu eeruun, “kana hawwiidhaan eegganna” jedhan.

12/06/2025

Badhaasni Haacaaluu_Hundeessaa bara kanaa Waxabajjii 22 akka gaggeeffamu ibsame.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 12/2025) Finfinnee

Badhaasa Haacaaluu Hundeessa marsaa arfaffaa fi yaadannoo wareegama isaa waggaa shanaffaa Waxabajjii 22, 2017 ALI bakka kaadhimamtoonni badhaasaa fi keessummoonni argamanitti akka gaggeeffamu Boordiin Faawundeeshinii Haacaaluu beeksise.

Kaayyoon Badhaasa Haacaaluu Hundeessaa artistootaa fi namoota ogummaa aartii keessa jiran badhaasuun artistoota lafaa dhufan jajjabeessuu fi beekamtii kennuu ta’uu boordichi ibseera.

Faawundeeshinichi gosoota aartii 11 oliin badhaasa kan kennu yoo ta’u, sirboonni 300 ol badhaasichaaf walitti qabamuu haati warraa Haacaaluu Hundeeessaa Aadde Faantuu Damissoo dabalatee miseensonni boordichaa ibsa kana laatan ibsaniiru.

Hojiileen kunneen ogeeyyii fi abbootii murtee kan calalaman ta’uu eerame. Adeemsi filannoos % 90 ogeeyyiin, % 10 ammoo ummataan ta’uu boordichi ibsa kenneen himeera.

Badhaasni umurii guutuu fi addaas ni jiraata kan jedhe boordichi, sirboonni badhaasaaf dhiyaatan Bitootessa 22, 2016 hanga hanga Bitooteessa 21, 2017tti kan hojjetaman ta’u beeksiseera.

Har’a eegalee kaadhimamtoonni miidiyaalee hawaasummaa faawundeeshinichaa irratti waan dhiyaataniif ummanni sagalee akka kennu faawundeeshinichi waamicha dhiyeesseera.

11/06/2025

Uzbeekistaan Taphattootashee badhaaste.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 11/2025) Finfinnee

'Pirezidaantiin Uzbeekistaan Sharvkat Mirziyoyev gareen kubbaa miilaa biyyatti waancaa Addunyaa bara 2026' f darbuusaan taphattootaafi leenjistoota garichaa hunda Konkolaataa Elektirikiin hojjetu badhaasan.

Uzbeekistaan seenaashee keessatti yeroo jalqabaaf waancaa Addunyaaf dabarte.

Gulaallii waancaa Addunyaa biyyoota Eeshiyaan ramaddii A jala kan jirtu Uzbeekistaan Iraan qabxii 23'n sadarkaa 1ffaan xumurtetti aanuun qabxii 21'n waancaa Addunyaa bara 2026 Ameerikaa, Kanaadaafi Meeksikoo waliin ta'uun qopheessaniif darbuu mirkaneeffatte.

Uzbeekistaan dabalatee Jaappaan, Iraan, Kooriyaa Kibbaa, Joordaaniifi Awustiraaliyaan biyyoota ardichaa waancaa Addunyaaf darbuu mirkaneeffatani.

11/06/2025

Du’a Qananii Addunyaan shakkamee hidhaarra kan ture Artist Adu’aalam Gosaa ji’a sadii booda gadhiifame.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤
(Waxabajjii 11/2025) 𝐅𝐢𝐧𝐟𝐢𝐧𝐧𝐞𝐞

Du’a jaalallee isaa kan turte shamarree Qananii Addunyaan shakkamee ji’a Bitootessa darbe poolisii magaalaa Finfinneen kan to’atame Artist Andu’aalam Gosaa Kibxata, Waxabajjii 10, 2025 waaree booda wabiidhaan hidhaarraa gadhiifamuu abukaatoon isaa Addis Standard’tti himan.

Abukaatoon isaa Obbo Liiban Abdii, Andu’aalam hidhaarraa kan gadhiifame qorannoon poolisii gaggeessaa ture erga xumurameen booda Abbaan Alangaa guyyaa kennameef keessatti himata waan hin banneef ta’uu himan.

“Poolisiin ji’oota darban keessa qorannoo gaggeessaa ture xumuree bu’aa argate abbaan alangaaf dabarseera. Abbaan Alangaan ammoo galmee himannaa akka banuuf guyyaa 15 mana murtiidhaan kennameef keessatti hin banne,” jedhan.

Akka abukaatoon kun jedhanitti himata banuuf guyyaan xumuraa Jimaata Waxabajjii 06, 2025 darbeera. “Nutis guyyaan himata akka itti banamuuf kenname waan xumurameef Sanbata darbe Waxabajjii 07 ol’iyyannoo qaama bilisa baasuu (habeas corpus) galfanne,” jedhan.

Haaluma kanaan Mana Murtii Federaalaa Dhaddacha Ramaddii Araadaa kaleessa Waxabajjii 10 ganama ol’iyyannoo dhiyaate erga ilaale booda Artist Andu’aalam Gosaa wabii birrii 50,000n akka gadhiifamu murteesse.

Haata’u malee, galmeen guutummatti cufamuu isaa akka hin mirkanoofne abukaatoon artistichaa himaniiru. “Abbaan Alangaa guyyaa kennameef keessatti himata hin bannee, yookaan bu’aan qorannoo poolisiis himata banuuf gahaa mitii jedhee galmee hin cufne. Kanaaf murtiin abbaa alangaatu eegamaa jira” jedhan.

Artist Andu’aalam Gosaa du’a jaalallee isaa shamarree Qananii Addunyaan shakkamee Bitootessa 11, 2025 to’annoo jala ooluu ni yaadatama. Ergasii poolisiin qorannoo irratti gaggeessaa ture hanga xumuramutti ji’oota sadan darban hidhaatti dabarse.

Abukaatoon isaa maamila isaaniif mirga wabii akka eegamuuf irra deddeebiin gaafachaa kan turan ta’us, poolisiin shakkamaan kun yoo bahe ragaalee miliqsuu ykn balleessuu danda’a jedhee waan iyyateef mirgi wabii dhorkamee ture.

Shamarree Qananii Addunyaa Bitootessa 11, 2025 ganama barii magaalaa Finfinnee kutaa magaalaa Lammii Kuraatti mana jireenya waliin keessa jiraachaa turan darbii shanaffaa irraa ”sababa ammaaf hin beekamneen [kufuun]” lubbuun ishee darbuu ni yaadatama.

𝐎𝐝𝐚 𝐏𝐨𝐝𝐜𝐚𝐬𝐭 𝐍𝐞𝐭𝐰𝐨𝐫𝐤

23/06/2025

16/06/2025

15/06/2025

14/06/2025

14/06/2025

14/06/2025

14/06/2025

13/06/2025

12/06/2025

12/06/2025

11/06/2025

11/06/2025

Address

Telephone

Website

Alerts

Contact The Business

Shortcuts

Share

Category