01/07/2025
Pirezidaantiin Mootummaa Naannoo Oromiyaa Obbo Shimallis Abdiisaa hawaasa dhaabbii biqiltuu Ashaaraa Magariisaa guyyaa har'aarratti hirmaate galateeffatan.
OMS Waxabajjii 24,2017- Ergaafi galateeffannaan Pirezidaanti Shimallis Abdiisaa dabarsan kunooti.
Hirmaannaa Keessan Humnaafi Kutannoo Ummata Keenyaa Yoomiyyuu Caalaa Agarsiisetti Daran Boone!
Galataafi Dinqisiifannaan Onneerraa Madde Isin Haaga’u!
Hirmaannaafi raawwiin ummanni keenya sirna baniinsa Ashaaraa Magariisaa guyyaa har’aa irratti agarsiise, jaalalli biyyaafi naannawa (environment) isaatiif qabu, bu’aa waamicha sagantaa Ashaaraa Magariisaa akka hintaane irra deebiin kan mirkaneessedha.
Waamicha “Gaaddisa Dhalootaa” kiyyaafi Mootummaa Naannoo Oromiyaa hordofee, deebiin ummanni naannoo keenyaa kallattii maraan laate, biyyaafi naannawa jaalachuun, aadaafi duudhaa abbootiifi haadholii isaa har’a iddootti deebi’aa jiru kanarraa kan dhaale ta’uu kan mirkaneessedha.
Kutannoon ummanni keenya waamicha keenyaaf ittiin owwaate, hirmaannaa qofa osoo hintaane, agarsiiftuu jaalala biyyaafi naannawaa, seenaan barabaraan hindaganneedha.
Baddaa, badda daree hanga gammoojjiitti, magaalaa hanga baadiyyaatti, dargaggoo hanga maanguddootti, haadha hanga abbaatti tokkummaan bahee raawwiin galmeesse, tilmaamaafi karoora keenya hunda kan caaleedha. Dabalataanis, humni ummataa hoogganamnaan, kallattii kamiinuu raajii hojjechuuf dhihoo ta’uu keenya kan hubachiisedha.
Har’a waliin taanee kan dhaabne biqiltuu qofa osoo hintaane, egeree ifaa, badhaadhinaafi tokkummaa cimaadha.
Dhaadannoo keenya “Dhaabuun Bayyanachuu” jedhu hirmaannaa qabatamaan utubuun, gandoota hunda keessatti bosona “Gaaddisa Dhalootaa” keenyaaf bu’uura cimaa keenyeerra.
Gaaddisni kun, dhaloota dhufuuf qabbana, nuuf siidaa hojii boonsaa har’a raawwannee ta’ee kan jiraatudha.
Hojii seena-qabeessa guyyaa har’aa raawwattan kanaaf, maqaa kiyyaafi maqaa Mootummaa Naannoo Oromiyaatiin galata olaanaa isiniif dhiyeessuun barbaada.
Akkuma ummanni keenya ifaan ifatti beeku, sochiin guyyaa har’aa jalqabne, hirmaannaa hoo’aa guyyaa har’a taasisneen qofa kan dhaabatuu miti.
Gama tokkoon, biqiltuun bara kana dhaabuuf qophaa’e hundi guutumatti hanga dhaabatutti kan ittifufuudha.
Gama birootiin, biqiltuu dhaabuun, daandii keenya keessaa walakkaa qofa ta’uufi walakkaa murteessaafi hafu ammoo, kunuunsuu ta’uu yaadatamuu qaba.
Ummanni keenya, armaan dura biqiltuuwwan sagantaa kanaan dhaabaa ture, hanga ofdanda’aniifi dawoo ta’anitti guyyuun hordofee akka ijoollee isaa jaalalaan kunuunsaa turuu isaa carraa kanaan dinqisiifachuun barbaada.
Aadaa gaariin kun armaan boodas cimee ittifufuu qaba; bu’uuruma kanaan, akkuma guyyaa har’a kutannoo olaanaan baanee dhaabne, dagannaa tokko malee eeguu, kunuunsuufi jabeessuun dirqama jaalala umamaa, safuufi dhalootaa keenya bahachuu cimsinee akka ittifufnu imaanaa jechuun barbaada.
Hooggansiifi caasaaleen mootummaa sadarkaan jirtanis, hirmaannaan guyyaa har’aa muldhate, biqiltuun dhaabbii bara kanaaf qophaa’e guutumaan guututti hanga dhaabbatutti, ummata qindoomina olaanaan sochoosuu akka ittifuftan hubachiisuun barbaada.
Akkasumas karaa aadaa kunuunsa umamaa fullaa’aa jajjabeessuu danda’uun, karoora waggaa kunuunsa biqiltuu naannawa keessan yaada keessa galche baafachuun akka sochootan kallattii kanan isiniif kaa’u ta’a.
Walumaagalatti, gamtaan tammitanii humnaafi kutannoo ummata keenyaa yoomiyyuu caalaa ifatti agarsiisuu keessaniif irra deebiin maqaa kiyyaafi maqaa Mootummaa Naannoo Oromiyaatiin isin galateeffachaa, irree keenya gamteessinee, Oromiyaa magariituu, lalistuufi badhaatuu gaaddisa dhaloota har’aafi egeree taatu kan dhugoomsinu ta’uu kanan isiniif mirkaneessu ta’a.
Lalisaa! Deebanaa! Obn
