Balochistan Updates

13/06/2026

13/06/2026

آج صبح گیارہ بجے ضلعی انتظامیہ کیچ کی جانب سے سرکٹ ہاؤس میں کھلی کچہری ہوگی۔

13/06/2026

کوئٹہ ،ڈپٹی ڈی او ہوشاب عبیداللہ بلیدی کی صوبائی وزیر میر ظہور بلیدی سے ملاقات دوران ملاقات ضلع کیچ بالخصوص حلقہ پی بی 25 میں تعلیم کی صورتحال، درپیش مسائل اور شعبۂ تعلیم کی بہتری کے حوالے سے تفصیلی گفتگو کی گئی اس موقع پر ڈی ڈی او نے تعلیمی معیار کی بہتری، اسکولوں میں بنیادی سہولیات کی فراہمی، اساتذہ کی کمی کے خاتمے اور تعلیمی اداروں کی فعالیت کو مزید مؤثر بنانے کے لیے مختلف تجاویز پیش کیں صوبائی وزیر نے تعلیمی شعبے کی ترقی کو حکومت کی اولین ترجیحات میں شامل قرار دیتے ہوئے پیش کی گئی تجاویز کا خیرمقدم کیا اور ضلع کیچ خصوصاً حلقہ پی بی 25 میں تعلیم کے فروغ اور مسائل کے حل کے لیے مکمل تعاون کی یقین دہانی کرائی اس موقع پر ایڈیشنل ڈائریکٹر ایجوکیشن مکران
صابر علی بلوچ اور محمد خان نوشیروانی بھی موجود تھے۔

12/06/2026

اسلام آباد: عبدالقدیر بلوچ کی سابق صوبائی وزیر نواب ایاز خان جوگیزئی سے ملاقات
اسلام آباد: پاکستان مسلم لیگ (ن) کی مرکزی کونسل کے رکن عبدالقدیر بلوچ نے پارلیمنٹ لاجز اسلام آباد میں ممتاز سیاسی رہنما اور سابق صوبائی وزیر نواب ایاز خان جوگیزئی سے ملاقات کی۔
ملاقات خوشگوار ماحول میں ہوئی جس میں ملک کی مجموعی سیاسی صورتحال، صوبہ بلوچستان کے موجودہ حالات، امن و امان اور صوبے کو درپیش مختلف چیلنجز پر تفصیلی تبادلہ خیال کیا گیا۔
اس موقع پر دونوں رہنماؤں نے بلوچستان میں بلوچ، پشتون، ہزارہ برادری اور دیگر آبادکار طبقات کے باہمی تعلقات، قبائلی روایات، بھائی چارے اور صوبے کی ترقی و استحکام کے حوالے سے گفتگو کی۔ انہوں نے اس امر پر زور دیا کہ بلوچستان کی تعمیر و ترقی اور قیام امن میں تمام قومیتوں، قبائل، ہزارہ برادری اور آبادکاروں کی خدمات اور قربانیاں قابل قدر ہیں جنہیں فراموش نہیں کیا جا سکتا۔
ملاقات میں بلوچستان کی سیاسی صورتحال اور امن و امان کے امور پر بھی تفصیلی بات چیت کی گئی۔ دونوں رہنماؤں نے اس بات پر اتفاق کیا کہ صوبے کے مسائل کے حل، پائیدار امن کے قیام اور ترقی کے عمل کو آگے بڑھانے کے لیے تمام سیاسی و سماجی قوتوں کو اپنا مثبت کردار ادا کرنا ہوگا۔
عبدالقدیر بلوچ اور نواب ایاز خان جوگیزئی نے بلوچستان کے سیاسی رہنماؤں، قبائلی عمائدین اور مختلف مکاتب فکر سے تعلق رکھنے والے افراد سے اپیل کی کہ وہ بھائی چارے، رواداری، باہمی احترام اور اتحاد کو اپنا شعار بنائیں اور صوبے کے روشن اور پرامن مستقبل کے لیے مشترکہ کوششیں جاری رکھیں۔

12/06/2026

مرحوم حاجی محمد رحیم دشتی کا رسمِ سوئم عقیدت و احترام کے ساتھ ادا کر دیا گیا

سیٹلائٹ ٹاؤن میں مرحوم حاجی محمد رحیم دشتی کا رسمِ سوئم نہایت عقیدت، احترام اور مذہبی جوش و خروش کے ساتھ ادا کر دیا گیا۔ مرحوم کی مغفرت اور درجاتِ بلندی کے لیے اجتماعی دعا اور فاتحہ خوانی کا اہتمام کیا گیا، جس میں مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔
مرحوم کے فرزند ڈی ایس پی ہیڈکوارٹر خالد دشتی اور ایس ایچ او حسین دشتی سمیت اہلِ خانہ، عزیز و اقارب، دوست احباب اور علاقہ مکین موجود تھے۔ رسمِ سوئم میں سرکاری افسران، سیاسی و سماجی شخصیات، انجمنِ تاجران کے نمائندگان، معززینِ علاقہ اور مختلف مکاتبِ فکر سے تعلق رکھنے والے افراد نے شرکت کرکے مرحوم کے اہلِ خانہ سے تعزیت اور ہمدردی کا اظہار کیا۔
شرکاء نے مرحوم حاجی محمد رحیم دشتی کی دینی، سماجی اور انسانی خدمات کو خراجِ عقیدت پیش کرتے ہوئے ان کے لیے دعائے مغفرت کی۔ علماء کرام نے مرحوم کے ایصالِ ثواب کے لیے قرآن خوانی اور فاتحہ خوانی کی، جبکہ اجتماعی دعا میں اللہ تعالیٰ سے مرحوم کو جنت الفردوس میں اعلیٰ مقام عطا کرنے اور لواحقین کو صبرِ جمیل نصیب فرمانے کی دعا کی گئی۔
رسمِ سوئم کے اختتام پر شرکاء نے مرحوم کے بلند اخلاق، خوش مزاجی اور سماجی خدمات کو یاد کرتے ہوئے کہا کہ ان کی کمی ہمیشہ محسوس کی جائے گی۔ اللہ تعالیٰ مرحوم کو اپنی جوارِ رحمت میں جگہ عطا فرمائے اور پسماندگان کو یہ صدمہ برداشت کرنے کی توفیق دے۔ آمین۔

12/06/2026

بلور اور جت کے عوام کا کرپشن کے خلاف احتجاج، ترقیاتی منصوبوں میں شفاف تحقیقات کا مطالبہ

یونین کونسل بلور اور یونین کونسل جت کے عوام نے ترقیاتی منصوبوں میں مبینہ کرپشن، بدعنوانی اور ناقص کارکردگی کے خلاف احتجاجی مظاہرہ کیا۔ مظاہرین کا کہنا تھا کہ علاقے کے لیے منظور کیے گئے 16 کروڑ 40 لاکھ روپے مالیت کے چار واٹر اسٹوریج منصوبے کرپشن کی نذر ہوگئے ہیں اور عوام ان سے تاحال مستفید نہیں ہوسکے۔

مظاہرین نے الزام عائد کیا کہ مختلف ترقیاتی اسکیموں میں بے ضابطگیاں کی گئی ہیں جبکہ مراستان بیلٹ کے بیشتر علاقوں میں آج بھی پینے کے صاف پانی کا شدید بحران برقرار ہے۔ ان کا کہنا تھا کہ پانی جیسا بنیادی مسئلہ حل کرنے کے بجائے منصوبوں کے فنڈز ضائع کیے گئے، جس کی وجہ سے عوام مشکلات کا شکار ہیں۔

احتجاجی مظاہرے کے شرکاء نے کہا کہ پی ایس ڈی پی کے تحت منظور ہونے والی تمام ترقیاتی اسکیموں، خصوصاً واٹر اسٹوریج اور بور منصوبوں کی شفاف اور غیرجانبدار تحقیقات کرائی جائیں۔ ان کے مطابق متعدد بور ذاتی مفادات کی بنیاد پر منظور کیے گئے جبکہ اجتماعی اور عوامی ضرورتوں کو نظرانداز کیا گیا۔

مظاہرین نے حکومت بلوچستان، متعلقہ محکموں اور احتسابی اداروں سے مطالبہ کیا کہ ترقیاتی فنڈز کے استعمال کا مکمل آڈٹ کیا جائے، ذمہ دار عناصر کے خلاف قانونی کارروائی عمل میں لائی جائے اور علاقے میں پینے کے پانی سمیت دیگر بنیادی مسائل کے حل کے لیے ہنگامی بنیادوں پر اقدامات کیے جائیں۔ انہوں نے خبردار کیا کہ مطالبات تسلیم نہ کیے گئے تو احتجاج کا دائرہ وسیع کیا جائے گا۔
انہوں نے کہاکہ ہمارا یوسی بجٹ سالانہ جتنا ہے عوام کو نہیں معلوم وہ کہاں خرچ ہوئے،انکی بھی تحقیقات ہونی چاہئیے ۔

12/06/2026

بلور،جت کے مکینوں کی سہولیات کی عدم فراہمی پر احتجاج

12/06/2026

تربت۔ بلوچستان اپڈیٹس کی خبر پر ڈپٹی کمشنر کیچ یاسر اقبال دشتی کا فوری ایکشن، بے نظیر انکم سپورٹ پروگرام آفس کا دورہ، خواتین کے مسائل کے حل کے لیے احکامات جاری

ڈپٹی کمشنر کیچ یاسر اقبال دشتی نے بلوچستانن اپڈیٹس کی خبر پر اورعوامی شکایات کا نوٹس لیتے ہوئے جمعہ کے روز بے نظیر انکم سپورٹ پروگرام کے ریجنل آفس کا اچانک دورہ کیا جہاں انہوں نے ڈپٹی ڈائریکٹر جورک بلوچ سے ملاقات کی اور آفس میں موجود خواتین سے براہ راست بات چیت کرکے ان کے مسائل معلوم کیے۔

دورے کے دوران خواتین نے آفس میں سایہ، پینے کے ٹھنڈے پانی اور دیگر بنیادی سہولیات کی عدم دستیابی سے متعلق شکایات پیش کیں جس پر ڈپٹی کمشنر کیچ نے فوری ہدایات جاری کرتے ہوئے سائبان اور واٹر کولر کی فراہمی کا حکم دیا جس پر پی ڈی ایم اے کی جانب سے فوری عمل درآمد کرتے ہوئے ٹینٹ اور واٹر کولر فراہم کر دیے گئے۔

ڈپٹی کمشنر کیچ یاسر اقبال دشتی نے خواتین کی مشکلات کو مدنظر رکھتے ہوئے تمپ اور مند کے مستحقین کے لیے تمپ میں جبکہ دشت کے عوام کے لیے کھڈان یا میرانی ڈیم کے مقام پر سب آفس قائم کرنے کے احکامات بھی جاری کیے جہاں سم رجسٹریشن اور دیگر متعلقہ سہولیات فراہم کی جائیں گی۔

انہوں نے متعلقہ حکام کو ہدایت کی کہ خواتین کو کسی قسم کی تکلیف یا شکایت کا موقع نہ دیا جائے اور عوامی سہولیات کی فراہمی کو یقینی بنایا جائے۔

اس موقع پر ڈپٹی ڈائریکٹر جورک بلوچ نے ڈپٹی کمشنر کیچ کا خیرمقدم کرتے ہوئے انہیں درپیش مسائل اور شکایات کے جلد ازالے کی یقین دہانی کرائی۔

دورے کے دوران موجود خواتین نے فوری طور پر سائبان اور سرد پانی کی سہولیات کی فراہمی پر ڈپٹی کمشنر کیچ یاسر اقبال دشتی کا شکریہ ادا کیا اور امید ظاہر کی کہ وہ آئندہ بھی عوامی مسائل کے حل کے لیے اسی طرح عملی اقدامات جاری رکھیں گے اور عوام تک سہولیات کی فراہمی کے لیے ذاتی دلچسپی لیتے رہیں گے۔

12/06/2026

ایکسائز، ٹیکسیشن و انسدادِ منشیات بلوچستان (ساؤتھ زون) کی ایک اور بڑی کامیابی
گڈانی میں شراب اسمگلنگ کی بڑی کوشش ناکام

کوئٹہ: وزیراعلیٰ بلوچستان میر سرفراز احمد بگٹی اور چیف سیکرٹری بلوچستان کی ہدایات، صوبائی حکومت کی انسدادِ منشیات پالیسی، اور ڈائریکٹر جنرل ایکسائز، ٹیکسیشن و انسدادِ منشیات بلوچستان (ساؤتھ زون) محمد زمان کی مؤثر نگرانی اور پیشہ ورانہ حکمتِ عملی کے تحت محکمہ ایکسائز اینٹی نارکوٹکس فورس نے پاک بحریہ کے تعاون سے ضلع حب کے ساحلی علاقے گڈانی میں ایک کامیاب مشترکہ انٹیلی جنس بنیاد کارروائی کرتے ہوئے شراب اسمگلنگ کی ایک بڑی کوشش ناکام بنا دی۔

10 جون 2026 کو ہونے والی اس کارروائی کے دوران 3,717 غیر ملکی شراب کی بوتلیں برآمد کر لی گئیں جن کی مالیت کروڑوں روپے بتائی جاتی ہے۔ ضبط شدہ سامان کے حوالے سے قانونی و تادیبی کارروائی کا آغاز کر دیا گیا ہے۔

ڈائریکٹر جنرل محمد زمان نے کہا کہ یہ کامیابی محکمہ ایکسائز ساؤتھ زون کی حالیہ مسلسل، مؤثر اور نتیجہ خیز کارروائیوں کا تسلسل ہے۔ انہوں نے مزید بتایا کہ گزشتہ دنوں بھی محکمہ ایکسائز نے پاک بحریہ کے تعاون سے 425 کلوگرام آئس، 20 کلوگرام چرس اور 5,076 بوتلیں غیر ملکی شراب و بیئر برآمد کر کے تقریباً 31 ارب روپے مالیت کی منشیات اور ممنوعہ اشیاء ضبط کی تھیں۔

انہوں نے کہا کہ اس سے قبل بھی محکمہ ایکسائز نے تین ماہ کے دوران 25 ارب روپے مالیت کی منشیات ضبط کیں اور 10 ہزار سے زائد شراب و بیئر کی بوتلیں قبضے میں لے کر بین الاقوامی اسمگلنگ نیٹ ورکس کو شدید مالی نقصان پہنچایا۔

ڈی جی ایکسائز نے مزید کہا کہ محکمہ ایکسائز بلوچستان نہ صرف منشیات اور شراب اسمگلنگ کے خلاف بھرپور کارروائیاں جاری رکھے ہوئے ہے بلکہ پوست (Poppy) کی کاشت کے خاتمے، نان کسٹم پیڈ گاڑیوں کے خلاف کریک ڈاؤن، ٹیکس نیٹ کے فروغ اور حکومتی محصولات میں اضافے کے لیے بھی مؤثر اقدامات کر رہا ہے۔

انہوں نے اس عزم کا اعادہ کیا کہ وزیراعلیٰ بلوچستان، چیف سیکریٹری بلوچستان اور سیکریٹری ایکسائز، ٹیکسیشن و انسدادِ منشیات بلوچستان، جناب ظفر علی بخاری کی انتھک کاوشوں، خصوصی ہدایات اور مؤثر حکمتِ عملی کی روشنی میں بلوچستان کو منشیات سے پاک بنانے، قومی سرحدوں کے تحفظ، نوجوان نسل کو منشیات کے ناسور سے بچانے اور قانون کی عملداری کو یقینی بنانے کے لیے پاک بحریہ، قانون نافذ کرنے والے اداروں اور دیگر قومی اداروں کے ساتھ مل کر بلاامتیاز، بھرپور اور مؤثر کارروائیاں جاری رکھی جائیں گی۔
ایکسائز، ٹیکسیشن و انسدادِ منشیات بلوچستان
منشیات سے پاک بلوچستان، محفوظ پاکستان

12/06/2026

ضلع کیچ میں BISP مستحق خواتین کو سم کے حصول میں شدید مشکلات، انتظامیہ سے فوری نوٹس لینے کا مطالبہ

تربت(بلوچستان اپڈیٹس)ضلع کیچ کے دور دراز علاقوں مند، تمپ، دشت، نگور، بلیدہ، ہوشاب،اور دیگر علاقوں سے تعلق رکھنے والی بے نظیر انکم سپورٹ پروگرام (BISP) کی مستحق خواتین سم کے حصول کے لیے شدید مشکلات اور اضافی مالی بوجھ کا سامنا کر رہی ہیں۔

متاثرہ خواتین کے مطابق انہیں سم وصول کرنے کے لیے سینکڑوں کلومیٹر کا سفر طے کرکے تربت آنا پڑتا ہے، جہاں شدید گرمی میں گھنٹوں طویل قطاروں میں انتظار کرنا پڑتا ہے۔ متعدد خواتین کا کہنا ہے کہ اوقات کار ختم ہونے کی وجہ سے ان کا کام مکمل نہیں ہو پاتا، جس کے باعث انہیں مزید ایک یا کئی روز قیام کرنا پڑتا ہے۔

ذرائع کے مطابق دور دراز علاقوں سے تربت آنے جانے پر تقریباً 4 ہزار روپے سفری اخراجات آتے ہیں، جبکہ رہائش اور کھانے پینے کی مد میں مزید 3 سے 4 ہزار روپے خرچ ہو جاتے ہیں۔ اس طرح ایک مستحق خاتون کو مجموعی طور پر 7 سے 8 ہزار روپے تک خرچ کرنا پڑتے ہیں، جبکہ BISP کی امدادی رقم 10 سے 11 ہزار روپے کے درمیان ہے۔

عوامی حلقوں نے اس صورتحال کو غریب خواتین کے ساتھ ناانصافی اور ان کی عزتِ نفس کے منافی قرار دیتے ہوئے کہا ہے کہ امدادی رقم کا بڑا حصہ انتظامی مسائل اور سفری اخراجات کی نذر ہو جاتا ہے، جس سے پروگرام کے بنیادی مقاصد متاثر ہو رہے ہیں۔

متاثرین اور سماجی حلقوں نے ڈپٹی کمشنر کیچ سے مطالبہ کیا ہے کہ سم کی تقسیم کے عمل کو (Decentralize) کرتے ہوئے ضلع کے مختلف علاقوں، خصوصاً دشت، نگور، تمپ، مند، بلیدہ اور دیگر دور افتادہ مقامات پر سم کی فراہمی یقینی بنائی جائے۔

انہوں نے یہ مطالبہ بھی کیا کہ سم کے حصول کی مقررہ تاریخ میں مزید توسیع کی جائے تاکہ تمام مستحق خواتین بغیر کسی اضافی مالی بوجھ کے اپنی رجسٹریشن مکمل کرکے امدادی رقم حاصل کر سکیں۔

عوامی حلقوں نے انتظامیہ سے اس انسانی مسئلے کا فوری نوٹس لینے اور متاثرہ خواتین کو درپیش مشکلات کے حل کے لیے ہنگامی اقدامات کرنے کی اپیل کی ہے۔