11/10/2025
Útgáva 5 av Vinnublaðnum sníkti seg út, stutt áðrenn Vinnumessuna. Komandi dagarnar fara vit at deila brellbitar úr blaðnum, so tú fært innlit í innihaldi 👀
Góði lesari
Hetta er fimta eintakið av Vinnublaðnum. Blaðið verður givið út fýra ferðir árliga, so hetta merkir í grundini, at Vinnublaðið nú fyllir eitt ár. Til lukku til okkum! Endamálið við Vinnublaðnum er at geva lesaranum innlit í føroyska vinnulívið. Blaðið hevur eina fakliga og menniskjansliga dýpd, har ið vit vísa á, at tað ikki bert eru tølini og “tey hørðu virðini”, men eisini menniskju og samskifti, sum skapa vinnuna.
Vit byrja í heimatúnum niðri í miðbýnum í Havn. 𝐒𝐚𝐤𝐚𝐫𝐢𝐬 𝐙𝐚𝐜𝐡𝐚𝐫𝐢𝐚𝐬𝐬𝐞𝐧 segði farvæl til eitt gott starv, sum honum annars dámdi væl, og fór heldur egnar leiðir. Dreymurin var at tatovera. Í dag hevur hann sína egnu sjopp og ein fullan kalendara. Sakaris tekur bert ein k***a inn um dagin, tí so fær hann hugsavnað seg til fulnar. Hóast hetta er eitt fíggjarligt ‘sats’, so var hetta eitt tilvitað val, tí fyri tatovørar hevur umdømi alt at siga.
Ein annar, sum eisini ger akkurát, sum honum hóvar, er 𝐃𝐚𝐯𝐢𝐝 𝐆𝐞𝐲𝐭𝐢. Henda allahandamann kann mann ikki seta í nakran bás. Tá ið hann var 12 ára gamal bygdi hann ein heimagjørdan revolvara. David er uppfinnari, og hevur hann arbeitt í Eksperimentarium í Keypmannahavn, smíðað leikpallar fyri Tjóðpallin, gjørt trolristir saman við Vónini, ment dronur og undirvatnskamera, og við hús hevur hann eina originala hitaskipan, sum hvørki krevur hol í jørðina ella hitapumpu. Næsta verkætlanin? Eitt sjósavn fyri 113 milliónir krónur.
Og frá sjósavni til fiskivinnu: 𝐑𝐚𝐠𝐧𝐚𝐫 𝐉𝐨𝐞𝐧𝐬𝐞𝐧 royndi leingi at ala laks á landi í Føroyum. Men myndugleikarnir vóru trekir at fáast við og vildu ikki útflýggja neyðugu loyvini. At ala laks á landi – tað var ein býur í Kina, tóktist tað. Bókstaviliga. Tí nú er Ragnar stjóri í Nordic Aqua Partners, sum nettup alir laks á landi í einum býi sunnan fyri Shangai.
Og meðan hesin verðinsmaðurin ferðast til Kina fleiri ferðir um árið, so práta vit eisini við ein annan stjóra, sum gleðir seg til sína nýggju morgunrutu til til arbeiðis. 𝐁𝐨𝐠𝐢 𝐏𝐞𝐭𝐮𝐫𝐬𝐬𝐨𝐧 𝐍𝐢𝐞𝐥𝐬𝐞𝐧 sigur farvæl við Faroe Ship og góðan dag við Pelagos í Fuglafirði. Eitt, sum hann gleðir seg nógv til er sjálvan biltúrin inn í Eysturoynna.
Vit hitta eisini tveir stjórar, sum eru gamlir í garði. Hóast fyritøkurnar eru ymiskar, so koma hesir báðir til somu niðurstøðu, tá ið teir hugleiða um stjóralívið eftir so nógv ár: 𝐒𝐣ú𝐫ð𝐮𝐫 𝐎𝐥𝐬𝐞𝐧 er stjóri í Bygma Balslev og hevur havt sín gerandisdag har í meira enn 30 ár. Hann kennir hvønn krók í bygninginum, men eisini hvørt menniskja, sum arbeiðir har. Sjúrður leggur dent á starvsfólkini og sigur, at tað ikki bara er jólafrokosturin, sum skal vera góður – tað er gerandisdagurin, sum skal vera góður.
Og 𝐋𝐞𝐢𝐯𝐮𝐫 𝐇𝐨𝐥𝐦 hevur stjórnað Leif Mohr í hálvan mansaldur. Hann er stjóri hjá 100 starvsfólkum, og eisini hann sigur, at góð starvsfólk eru sjálvur bulurin í fyritøkuni.
Sum nakað nýtt frætta vit eisini frá tveimum royndum samskiftisfólkum, tó úr hvør sínum yrki – ein úr miðlaheiminum og hin frá lýsingavinnuni: 𝐇𝐞𝐧𝐫𝐲 á 𝐅𝐫íð𝐫𝐢𝐤𝐬𝐦ø𝐫𝐤 er teksthøvundur og livir av at skriva lýsingatekstir. Í Vinnublaðnum hugleiðir hann um støðið á føroyskum lýsingum. Hann hevur skrivað MA-ritgerð á Føroyamálsdeildini um evnið, har ið hann m.a. bar fram spurningarnar: Ávirka lýsingar føroyska málið? Og øvut: Ávirkar føroyska málið lýsingarnar?
𝐃𝐮𝐫𝐢𝐭𝐚 𝐀𝐝𝐞𝐥𝐚 er í fremstu røð í føroyska miðlaheiminum: Hon hevur arbeitt í Miðlahúsinum; hon hevur myndað leiðsluna í Dimmalætting; og í dag er hon stjóri í FM1. Leiðin upp á stjóratindin hevur verið bronglut, men sanniliga eisini fjølbroytt og spennandi, sigur hon.
Nú Vinnublaðið fyllir eitt ár, er tað upp á sítt pláss at koma við nøkrum takkarorðum: Vinnublaðið hevði ikki borið til uttan øll tey dugnaliga fólkini, sum hvør í sínum lag kýta seg langt út á kvøldið fyri at náa evstu deadline: greinaskrivarar og rættlesarar, myndafólk og grafiskir sniðgevar, prentsmiðjur og samstarvspartar. Og ikki minst – takk til samrøðufólkini: føroysk vinnulívsfólk, sum lata síni sjónarmið upp fyri okkum, greiða frá royndum og deila gullkorn. Takk fyri, øll somul!
𝐆óð𝐚𝐧 𝐥𝐞𝐬𝐢𝐡𝐮𝐠!
Adam Andreasen
Ábyrgdarblaðstjóri
