13/09/2026
ဒီနေ့မနက် မိုးလင်းလို့ ဖုန်းဖွင့်လိုက်တာနဲ့ New York မြေပြင်ပွဲခင်းထဲကပရိသတ်၊ ကမ္ဘာအရပ်ရပ်က အွန်လိုင်းပရိသတ်တွေရဲ့ တခဲနက် အားပေးသံလေးတွေ ကြားရလို့ အင်မတန်မှ ဝမ်းနည်း ဝမ်းသာ ကြည်နူးရပါတယ်ရှင့်😇။
ဖြူဖြူတို့တွေ Duet show လေးစီစဉ်ခဲ့ပေမယ့် ထင်သလို ဖြစ်မလာတဲ့အခါ၊ တခဲနက် လက်မှတ်ဝယ်အားပေးထားတဲ့ ပရိသတ်ကို အားနာရပါတယ်။
ဖြူတို့အခက်အခဲကိုနားလည်ပေးပြီး၊ ရုံပြည့်လာရောက်အားပေးကြတဲ့ ရွှေပွဲလာပရိသတ် ကြီးကို အားနာနာနဲ့ပဲ အထူးကျေးဇူးတင်ရပါတယ် 🙏။
ပိတ်ကားပေါ်က ဖြူဖြူလေး ဆိုသမျှ၊ ပြောသမျှ အားရပါးရ လိုက်ဆိုကြ၊ စကားတွေ အပြန်အလှန် ပြောပေးကြနဲ့ ကြည်နူးလွန်းလို့ မျက်ရည်ကျရပါတယ်။
New York နဲ့ အနီးတဝိုက်တင်မက Florida, Washington State, San Francisco, Michigan, California(ကျောင်းပြေးပြီးလာအားပေးတဲ့ ၂ ယောက်😁), Maryland, Boston ကနေပါ တကူးတက၊ အချိန်တွေ၊ စားရိတ်တွေ အများကြီးအကုန်ခံပြီး လာပေးကြတဲ့ ချစ်ပရိသတ်တွေကိုလည်း ပိတ်ကားပေါ်ကနေ နှုတ်ဆက်ခွင့်ရလို့ အားလည်းနာ၊ ကျေးဇူးလည်းတင်ရပါတယ်။
အခြေအနေအပြောင်းအလဲမှာ လုံးဝလက်လျော့မသွားပဲ၊ technical solutions တွေ ဝိုင်းကူရှာကြပြီး လိုအပ်တာတွေ အကုန်အကျခံ ထပ်မံ ဖြည့်ဆည်းပေးပြီး၊ professional organizer ပီပီသသနဲ့ ရွှေပွဲလာ ပရိသတ်ကို တလေးတစား အလေးထားပေးတဲ့ NYCBC အဖွဲ့သားများ အားလုံးကိုလည်း အထူးကျေးဇူးတင်ရပါတယ်။
ပြင်သစ်က vocal ကို New York က စင်ပေါ်ကနေ timing အမိအရ တီးစွမ်းနိုင်တဲ့ Old Skool Band ရဲ့ musicians အကိုကြီး၊မောင်လေး၊ ညီမလေး တွေရဲ့ တီထွင်ကြံဆနိုင်မှုနဲ့ စကေးကြီးကတော့ တကယ့်ကို လက်ဖျားခါပါတယ်နော်။
ဝမ်းပမ်းတသာ လာရောက်အားဖြည့် သီဆိုပေးတဲ့ မောင်လေး M သီဟ နဲ့ ညီမလေး ခင်စုစုနိုင်ကိုလည်း ကျေးဇူးအထူးပါ။
Bravo my brothers and sisters !🥰💪
Last but not least, ချစ်ကိုကြီး R Zarni ရဲ့ ကဝေသံကတော့ အားလုံးသိပြီးသားမို့ ထူးပြောစရာမရှိ ပေမယ့်… ခုလို အခြေအနေအပြောင်းအလဲမှာ သူ့ရဲ့ စီနီယာပီသမှု၊ professional ပီသမှု၊ crisis management တွေကိုတော့ ဖြူဖြူတို့ တလေးတစား ထပ်သင်ယူရပါတယ်။
“ကျွန်တော်တို့မောင်နှမ ဘယ်လိုအခက်အခဲရှိရှိ၊ စထားတဲ့အလုပ်တစ်ခုကို ပြီးအောင် အကောင်းဆုံး လုပ်ကြမယ်ဆိုတဲ့စိတ်နဲ့ ဒီနေ့ ပရိသတ်ကို ဖျော်ဖြေကြတာပါ” တဲ့။ အရမ်းကျေးဇူးတင်ပါတယ်…ငါ့အစ်ကိုရေ🙏🥰။
ပြည်တွင်း ပြည်ပ၊ မြေပေါ် မြေအောက်၊ မြေပြင် ဝေဟင်တခွင်က ဖြူဖြူတို့ရဲ့ ချစ်ပရိသတ်များအားလုံးလည်း ကျေနပ်နှစ်သက်ကြမယ်လို့ မျှော်လင့်ပါတယ်ရှင့်🩷။
