17/03/2025
Wafti Heer Caalami Ah oo Somaliland u Baxaya si ay Uga Wada Hadlaan Ictiraafka iyo Heshiiska Saldhigga Milatari ee Maraykanka
Warar soo baxaya ayaa sheegaya in wafti sare oo heer caalami ah uu u ambabaxayo dalka Maraykanka, iyaga oo matalaya Somaliland, si ay u xoojiyaan dadaallada ictiraaf raadinta iyo wada-hadallo la xiriira heshiis milatari oo ay la galayaan dowladda Maraykanka.
Sida xoguhu tilmaamayaan, waftigan ayaa la filayaa inay kulamo la yeeshaan saraakiil sare oo ka tirsan dowladda Maraykanka, aqalka Congress-ka, iyo hay’adaha amniga, si ay uga wada hadlaan iskaashi dhanka difaaca ah iyo muhiimadda ay Somaliland u leedahay istiraatiijiyadda Maraykanka ee Geeska Afrika.
Heshiiskan milatari ee laga wada hadlayo ayaa la rumeysan yahay inuu qeyb ka yahay qorshe lagu xoojinayo amniga Badda Cas iyo marin-biyoodka caalamiga ah ee muhiimka ah, iyada oo Somaliland ay muhiimad gaar ah u leedahay xasilloonida gobolka.
Dowladda Somaliland ayaa muddo dheer dadaal ugu jirtay inay hesho aqoonsi caalami ah, waxaana socda dadaallo ballaaran oo ay ku dooneyso inay ku hesho taageero dhanka diblomaasiyadda iyo iskaashiga milatari ee ay la yeelanayso dalalka waaweyn sida Maraykanka.
Wixii warar dheeraad ah ee ku saabsan safarkan iyo natiijooyinka ka soo baxa, waan idinla socodsiin doonnaa.
