19/05/2024
Kopia: Facebook HA'U NIA TIMOR
Feira iha portu Dili: hatudu osan barak no la iha osan
Konsertu kuaz semana ida, iha portu Dili, tasi ibun ninian. Maiória joven feto no mane barak tebes mak ba asiste konsertu. Maun mo mana sira ho idade ne'ebé iha bei-oan mós ba hotu. Ida ne'e mak hanaran halo kontente an. Atividade ne'e atu selebra restaurasaun Independénsia ba dala-22, ka loron nasionál 20 fulan-Maiu tinan 2024.
Laos konsertu de'it mak akontese, maibé iha mós feira ba produtu lokál hanesan tais, kaebauk, imajen Na'in Jesus, livrinhu ba orasaun ninian, bebidas fresku, no mós beer inklui mós kafé. Folin ba sasan sira ne'e la karun liu, tanba nia presu hahú hosi dollar ida to'o dollar boboot. Laos faan de'it mak iha ne'ebá, maibé iha mós jogu BG, no iha mós labarik nia fatin halimar.
Entaun feira iha ponte kais, iha kualidade, no ema hotu bele haksolok, haklalak, no kontente hodi rona ema konsertu. Balun lao haree sasan hodi rona ema hakilar iha palku leten, balun fali tur hodi rona loos de'it lian boboot iha palku leten, no balun fali ba enjoy ka hemu, hodi halo diskusan no la preokupa ema kanta no halo aprezentasaun.
Hosi faktu sira ne'e, ha'u atu dehan katak, konsertu ne'ebé governu halo, ne'e hamosu klase sosiál entre vizitante sira. Primeiru rajaun tanba ai-han ho folin barratu maibé ninia kuantidade oituan, signifika tenke sosa barak. Kuandu sosa barak, konserteza-ke osan sai mós barak. Olha...prontu....Ha'u fila fali ba klase sosiál entre osan iha no la iha osan, durante feira no konsertu iha ponte kais.
Primeiru-Kuandu atu to'o ba ponte kais laran, bolsu tenke mahar; tanba ita tama hosi portaun to'o uma kakuluk at iha parte sorin, ema ida-idak ka na'in rua hamrik hamutuk, sempre hemu, han ka fuma. Ida ne'e osan iha mak bele ba. Vizitante sira loron-lorin standby iha ne'ebá. Ita halo kalkulasaun matemátika; osan hira mak sai ona ba stand sira ne'ebé iha. Keta haluhan; ema sira ne'ebé hari'i stand; ema sira ne'e maiória iha poder ka influênsia ba ekonómiku ka osan na'in sira (deskonfia balun emprezárii nia família, balun hosi grupu emprezárial, balun fali mak esforsu mesak. Entaun vizitante sira so par atu kontribui ba sira; sira nafatinheta previléjiu, ka benefísiu sempre iha hela de'it.
Segundu-povu bainbain ne'ebé ba nonton assiste de'it, dalaruma lori de'it osan dollar ida ka rua, la iha posibilidade atu sosa beer ruma ka ai-han nutritivu ruma, tanba jatamente osan la to'o. Hosi ne'e, nia rasik MINDER, entaun loron tuir mai dalaruma nia la ba assiste ona. Ida ne'e akontese tanba buat hotu-hotu la gratuita, katak, tama ba ho osan, iha laran mós osan, sai mós osan; buat hotu osan. Buat ne'e mós halo ita sai baruk tiha.
Hosi ne'e, iha tán faktus balun aprezenta katak, portaun tama ba ponte kais ida ka rua de'it, iha hotu tasi ibun, maibé iha laran loke kuartu pur kuartu. Fatin ida sorin liu besik Palásiu Governu nian; ida ne'e faan tikete mak bele tama ba laran; ida ne'e mak foin dehan Waoooooo. Fatin ne'e merese duni ba osan na'in sira ne'ebé servisu iha governu, ho osan povu nian, ba goja tán iha povu nia terus, no at liu tán mak faan tikete VIP no VVIP ho folin dollar 5 ka dollar 10 ba leten.
La iha mídia no sosiedade sivil, ativista sira ko'alia kona-ba ida ne'e, sem-rajaun.
Hakerek badak de'it hanesan ne'e, pois mak ida-ida halo análiza mesak.
