23/08/2026
بەرێز ئاشتیاکۆ پوورکەریم، سکرتێری گشتیی پارتی سەربەخۆیی کوردستان لە وتارێک لە ژێر ناوی عەقڵیەتێکی سیاسیی کۆن و دۆڕاو بۆ بازسازیی ئێرانێکی داڕماو باس لەوە دەکات کە کورد «کێشە» نییە تا دەوڵەتێک لە تاران بڕیار بدا و بە چەند مافی کلتووری، بە چەند کورسییەکی سیاسی یان بە چ شێوەیەک لە خۆبەڕێوەبردن «چارەسەری» بکات.
ئەوەی هەیە پرسی سیاسی و نەتەوەیی، نەتەوەی کوردە؛ پرسی نەتەوەیەک کە خاک، مێژوو، زمان ، ناسنامەی نەتەوەیی، بیرەوەریی مێژوویی و ویستی سیاسیی خۆی هەیە و بۆ سەربەخۆیی، سەروەریی سیاسی و دیاریکردنی چارەنووسی خۆی سەدان ساڵە خەبات دەکات. لە درێژەی بابەتەکی باس لەوە دەکات کە: لە ڕوانگەی ناسیۆنالیزمی مۆدێرنی کوردی، پێویستە ئەم پێشگریمانەیە لە بنەڕەتەوە بخرێتە ژێر پرسیار:
بۆچی دەبێت چارەنووسی ڕۆژهەڵاتی کوردستان لە سەرەتاوە بە سنوور و دەسەڵاتی ئێرانەوە گرێ بدرێت؟
بۆچی دەبێت یەکپارچەیی ئێرانێکی دەستکرد و داگیرکەر وەک بنەمایەکی پیرۆز و نەتەوەی کورد وەک بابەتێکی ناوخۆیی لە ناو ئەو دەوڵەتە داگیرکەر و کوردکوژە دا سەیر بکرێت؟
هەر وەها دەلێت کە: لە هەمبەر کێشەی کورد سنووری دوو پڕۆژەی سیاسی بە ڕوونی دەردەکەوێت.
پڕۆژەیەک دەڵێت دەبێت ئێران دیموکراتیزە بکرێ، کوردستان فیدراڵ، خودموختار یا کۆنفیدراڵ بێ و لە چوارچێوەی برایەتیی گەلان دا کوردی خاک داگیرکراو ببێتە برای ئێرانییەکی داگیرکەر و ئەوان لە تاران بڕیار لە سەر چارەنووس و ویست و خواستی نەتەوەی کورد بدەن و لە چوارچیوەی دەسەڵاتی ئێرانیدا کورسیەک بە تام و بە ناوی مافی کورد بەڵام بۆ حیزبەکەی ئەوان دابین بکرێت.
بەڵام پڕۆژەکەی تر دەڵێت پرسەکە تەنیا لە شێوەی حکوومەت لە تاراندا کۆتایی نایەت؛ بەڵکوو پەیوەندیی حاکمییەت لە نێوان ئێران و کوردستان دەبێت بخرێتە ژێر پرسیار و پێداچوونەوە.
ئەم دوو پڕۆژەیە نابێت تێکەڵ بکرێن.
لە کۆتایی وتارەکەیدا بەرێز ئاشتیاکۆ پوورکەریم، سکرتێری گشتیی پارتی سەربەخۆیی کوردستان دەلێت: ڕێگای ڕزگاری، لە دیدی ناسیۆنالیزمی کوردی و سەربەخۆییخوازانەوە، لە چاوەڕوانی بۆ «ئێرانێکی باشتر»دا نییە؛ لە دامەزراندنی دەوڵەتی سەربەخۆ و توانای نەتەوەی کورد بۆ بڕیاردان بەسەر خاک و چارەنووس و گەیشتن بە سەروەریی سیاسیی خۆیدایە.
Ashtyako Poorkarim
