09/06/2025
Xaqiiq wa masiibo/Ciidanka Israa’iil ayaa la wareegay Doonta Madeleine oo ku sii jeeday Qasa, taasoo siday samafalayaal safar ay ka soo billaabeen Talyaaniga ku doonayay inay go’doominta ka qaadaan marinka Qasa oo ay geeyaan gargaar, xaaladda halkaa ka jirtana usoo bandhigaan dunidda, balse horraantii saakay ciidanka Israa’iil ayaa doonta fuulay oo gacanta ku dhigay shaqsiyaadkii la socday oo isugu jiray , kuwa caan ah iyo xildhibaan ka tirsan Baarlamaanka Midowga Yurub.
Raadiyaha ciidanka Israa’iil, wuxuu sheegay inay ciidanka badda Israa’iil, doonta u jiideen deked ku taal magaalada Ashdood, halkaa oo su’aallo lagu waydiinayo mutadawiciin la socday doonta Madeleine. Waa iskudaygii u dambeeyay ee lagu raadinayay in gargaar lagu gaarsiiyo dadka Qasa oo 19 bilood u dambeysay go’doomintii ugu adkayday kala kulmaya Israa’iil , taa oo dhalisay inay carruur u dhintaan gaajada ka dhalanaysa cuno la’aanta ka jirta marinka Qasa, mar kalena adduunyada ayaa ku fashilantay inay taageertay iskudayga jabinta go’doominta Qasa.
