Quel est le site Web ?

Mission Tamil, Paris (2026)

10/09/2026

பிரான்ஸ் சாலைகளில் Tesla-வின் தானியங்கி ஓட்டுநர் தொழில்நுட்பம் சோதனை

பிரான்ஸ் அரசு, Tesla நிறுவனத்தின் Full Self-Driving (FSD) எனப்படும் மேம்பட்ட தானியங்கி ஓட்டுநர் தொழில்நுட்பத்தை பிரான்ஸ் சாலைகளில் சோதனை செய்யத் தொடங்கியுள்ளது. இந்தச் சோதனையின் முக்கிய நோக்கம், இந்தத் தொழில்நுட்பம் பிரான்ஸ் மற்றும் ஐரோப்பிய சாலை விதிகளுக்கு ஏற்ப பாதுகாப்பாக செயல்படுகிறதா என்பதை மதிப்பிடுவதாகும்.

FSD தொழில்நுட்பம் காரின் ஓட்டுநருக்கு பல்வேறு பணிகளில் உதவுகிறது. சாலையில் வாகனத்தை இயக்குதல், வேகத்தை கட்டுப்படுத்துதல், பிரேக் போடுதல், பாதையை மாற்றுதல் மற்றும் போக்குவரத்து சூழ்நிலைகளுக்கு ஏற்ப செயல்படுதல் போன்றவற்றை கார் தானாக மேற்கொள்ளும் திறன் கொண்டதாகும். இருப்பினும், இது முழுமையான ஓட்டுநர் இல்லா வாகனமாக கருதப்படுவதில்லை. ஓட்டுநர் தொடர்ந்து சாலையை கண்காணித்து, தேவையான நேரத்தில் காரின் கட்டுப்பாட்டை ஏற்கத் தயாராக இருக்க வேண்டும்.

இந்தச் சோதனை வெற்றிகரமாக முடிந்தால், Tesla-வின் FSD தொழில்நுட்பத்திற்கு ஐரோப்பாவில் எதிர்காலத்தில் பரவலான அனுமதி கிடைப்பதற்கான வாய்ப்பு அதிகரிக்கலாம். அதேவேளை, தொழில்நுட்பத்தின் செயல்திறனை விட சாலைப் பாதுகாப்பு, மனிதக் கண்காணிப்பு மற்றும் சட்ட விதிகளைப் பின்பற்றுதல் ஆகியவை முக்கியமாக மதிப்பிடப்படுகின்றன.

பிரான்ஸ் மேற்கொள்ளும் இந்தச் சோதனை, எதிர்காலத்தில் ஐரோப்பிய நாடுகளில் தானியங்கி ஓட்டுநர் தொழில்நுட்பங்களை எவ்வாறு பயன்படுத்தலாம் என்பதற்கான முக்கிய முன்னுதாரணமாக அமையக்கூடும்.

10/09/2026

பிரான்சில் சம்பள வெளிப்படைத்தன்மைக்கான புதிய சட்டம்

பெண்கள் மற்றும் ஆண்களுக்கு இடையிலான சம்பள வேறுபாட்டைக் குறைத்து, ஒரே வேலை அல்லது சம மதிப்புள்ள வேலைக்கு சம ஊதியம் வழங்குவதை உறுதி செய்யும் ஐரோப்பிய ஒன்றிய விதிமுறைகளை பிரான்ஸ் தனது சட்டத்தில் இணைக்கும் நடவடிக்கையைத் தொடங்கியுள்ளது. இதற்கான சட்டமூலம் செப்டம்பர் 10 அன்று அமைச்சரவையில் முன்வைக்கப்படுகிறது.

இதன்படி, எதிர்காலத்தில் நிறுவனங்கள் வேலைவாய்ப்பு அறிவிப்பிலேயே சம்பளத் தொகை அல்லது சம்பள வரம்பை குறிப்பிட வேண்டிய நிலை ஏற்படும். வேலைக்கு விண்ணப்பிப்பவர்களிடம் அவர்கள் முந்தைய பணியில் பெற்ற சம்பளத்தை கேட்பதற்கும் கட்டுப்பாடு விதிக்கப்படும். பணியில் சேர்ந்த பின்னர், ஊழியர்களுக்கு சம்பளம் நிர்ணயிக்கப்படும் விதிமுறைகள் மற்றும் சம்பள உயர்வுக்கான அளவுகோல்கள் குறித்து கூடுதல் தகவல் வழங்கப்பட வேண்டும்.

மேலும், நிறுவனங்கள் பெண்கள்–ஆண்கள் இடையிலான சம்பள வேறுபாடுகளை முறையாகப் பதிவு செய்து அறிக்கையிட வேண்டிய கட்டுப்பாடுகளும் கொண்டுவரப்பட உள்ளன. விதிகளை மீறும் நிறுவனங்களுக்கு சம்பளச் செலவின் அடிப்படையில் நிர்வாக அபராதங்கள் விதிக்கப்படலாம். சம்பளப் பாகுபாடு தொடர்பான விவகாரங்களில், சில சூழ்நிலைகளில் குற்றச்சாட்டை நிரூபிக்கும் பொறுப்பும் நிறுவனத்தின் மீது அதிகமாகும்.

இந்த நடவடிக்கையின் முக்கிய நோக்கம், “ஒரே வேலைக்கு சம சம்பளம்” என்ற கொள்கையை நடைமுறையில் வலுப்படுத்துவதும், சம்பள நிர்ணயத்தில் வெளிப்படைத்தன்மையை அதிகரிப்பதும் ஆகும். எனினும், இந்தச் சட்டம் நாடாளுமன்றத்தில் நிறைவேற்றப்பட்டு நடைமுறைக்கு வரும் காலம் இன்னும் உறுதியாகவில்லை.

10/09/2026

புலம்பெயர் தொழிலாளர்களுக்கு ரூ.10 மில்லியன் வரை வீடமைப்புக் கடன்

புலம்பெயர் தொழிலாளர்கள் வீடுகளை நிர்மாணிக்கவும், கொள்வனவு செய்யவும் ரூ.5 இலட்சம் முதல் ரூ.10 மில்லியன் வரை கடன் வழங்கும் ‘Ethera Diriya’ வீடமைப்புக் கடன் திட்டம் இன்று ஆரம்பிக்கப்பட்டுள்ளது. இலங்கை வெளிநாட்டு வேலைவாய்ப்புப் பணியகம் (SLBFE) முன்னெடுக்கும் இத்திட்டத்தின் கீழ், ஆரம்பத்தில் DFCC Bank மற்றும் Union Bank ஆகிய வங்கிகள் இணைந்துள்ளதுடன், மேலும் ஒன்பது வங்கிகள் பின்னர் இணைக்கப்படவுள்ளன. கடனை அதிகபட்சம் 10 ஆண்டுகளில் திருப்பிச் செலுத்த முடியும். கடனுக்கான வட்டியின் தகுதியான ஒரு பகுதியை SLBFE வட்டி நிவாரணமாக வங்கிகளுக்கு வழங்கும். 2027ஆம் ஆண்டுக்காக இத்திட்டத்தின் வட்டி நிவாரணத்துக்கு ரூ.126 மில்லியன் ஒதுக்கப்பட்டுள்ளது. திட்டத்தில் கருத்தில் கொள்ளப்படும் அதிகபட்ச வட்டி விகிதம் ஆண்டுக்கு 15% ஆகும். கடன் பெற விரும்புவோர் பங்கேற்கும் வங்கிகளில் விண்ணப்பிக்க வேண்டும்; விண்ணப்பதாரரின் தகுதி, வருமானம், கடனைத் திருப்பிச் செலுத்தும் திறன், கடன் வரலாறு உள்ளிட்ட விடயங்களை வங்கி மதிப்பீடு செய்த பின்னரே கடன் அனுமதிக்கப்படும். வங்கி முன்அனுமதி வழங்கிய விண்ணப்பம் SLBFE-க்கு அனுப்பப்பட்டு, விண்ணப்பதாரர் பணியகத்தில் பதிவு செய்துள்ளாரா, வெளிநாட்டில் பணிபுரிகிறாரா, பணம் அனுப்பியுள்ளாரா உள்ளிட்ட தகுதிகள் சரிபார்க்கப்படும்.

10/09/2026

பாரிஸில் சர்வதேச விண்வெளி மாநாடு: ஐரோப்பாவின் Ariane 6 ராக்கெட்டுக்கு Amazon ஆதரவு

பாரிஸில் நடைபெறும் சர்வதேச விண்வெளி மாநாட்டில், ஐரோப்பாவின் விண்வெளி திறனை வலுப்படுத்தும் முக்கிய ஒப்பந்தம் அறிவிக்கப்பட்டுள்ளது. Amazon Leo நிறுவனம் ஐரோப்பாவின் Ariane 6 ராக்கெட் மூலம் மேலும் 6 செயற்கைக்கோள் ஏவுதல்களுக்கு ஒப்பந்தம் செய்துள்ளது. இதன் மூலம் 2031ஆம் ஆண்டு வரை Amazon சார்பில் Ariane 6 மூலம் மேற்கொள்ளப்படவுள்ள ஏவுதல்களின் எண்ணிக்கை 24 ஆக உயர்ந்துள்ளது.

இந்த ஒப்பந்தம், சமீபத்திய வளர்ச்சி தாமதங்களுக்குப் பின்னர் Ariane 6 திட்டத்திற்கு முக்கிய ஊக்கமாகக் கருதப்படுகிறது. ஐரோப்பா விண்வெளித் துறையில் அமெரிக்காவின் SpaceX போன்ற நிறுவனங்களைச் சார்ந்திருப்பதைக் குறைத்து, சொந்த ராக்கெட்டுகள் மற்றும் செயற்கைக்கோள் அமைப்புகளை வலுப்படுத்த முயற்சித்து வருகிறது. இதற்காக பிரான்ஸ் குறிப்பாக ஐரோப்பிய நாடுகள் தங்களது அரசு செயற்கைக்கோள்களை ஐரோப்பிய ராக்கெட்டுகள் மூலம் ஏவ வேண்டும் என வலியுறுத்தி வருகிறது.

இரண்டு நாட்கள் நடைபெறும் இந்த மாநாட்டில் சுமார் 120 நாடுகளின் பிரதிநிதிகள் கலந்துகொள்கின்றனர். விண்வெளி ஆய்வு மட்டுமன்றி, செயற்கைக்கோள் தொடர்பாடல், பாதுகாப்பு, விண்வெளி பொருளாதாரம் மற்றும் தொழில்நுட்ப சுயாதீனம் போன்ற முக்கிய விடயங்களும் விவாதிக்கப்படுகின்றன.

இதனிடையே, பிரான்ஸ் மற்றும் ஜெர்மனி இடையே ஐரோப்பாவின் விண்வெளிக் கொள்கை தொடர்பாக கருத்து வேறுபாடுகள் தொடர்கின்றன. எனினும் Amazon-ன் புதிய ஒப்பந்தம் Ariane 6-க்கு கிடைத்துள்ள முக்கிய வணிக ஆதரவாகவும், ஐரோப்பா விண்வெளித் துறையில் அமெரிக்கா மற்றும் சீனாவுக்கு இணையாக முன்னேறுவதற்கான முயற்சிக்கு ஒரு முக்கிய முன்னேற்றமாகவும் பார்க்கப்படுகிறது.

10/09/2026

ஐரோப்பாவுக்கு முதலாவது உயர்தொழில்நுட்ப நீர்நிலையிலும் தரையிலும் இயங்கும் கப்பலை இலங்கை ஏற்றுமதி

இலங்கை, நீரிலும் தரையிலும் இயங்கக்கூடிய தனது முதலாவது உயர்தொழில்நுட்ப Amphibious Vessel எனப்படும் நீர்நிலையிலும் தரையிலும் இயக்கக்கூடிய கப்பலை ஐரோப்பாவுக்கு ஏற்றுமதி செய்துள்ளது. இது நாட்டின் கடல்சார் உற்பத்தித் துறையில் புதிய மைல்கல்லாக அமைந்துள்ளது.
இந்தக் கப்பலின் உற்பத்தி மற்றும் ஏற்றுமதிக்கான ஆரம்ப நிகழ்வு இன்று (10) கொக்கலா சுதந்திர வர்த்தக வலயத்தில், தொழில் மற்றும் தொழில்முனைவோர் அபிவிருத்தி அமைச்சர் சுனில் ஹந்துன்நெத்தி தலைமையில் நடைபெற்றது.
அரசாங்கத்தின் உள்நாட்டு உற்பத்தியை ஊக்குவிக்கும் மற்றும் ஏற்றுமதி நோக்கிய தொழில்களை விரிவுபடுத்தும் முயற்சியின் ஒரு பகுதியாக, Ocean Voyager International நிறுவனத்தினால் இந்தக் கப்பல் தயாரிக்கப்பட்டுள்ளது.
நிகழ்வில் உரையாற்றிய அமைச்சர் சுனில் ஹந்துன்நெத்தி, உள்நாட்டு உற்பத்தியை வெறுமனே கொள்கை நோக்கமாக வைத்திருக்காமல், அதனை நடைமுறைப் பொருளாதார யதார்த்தமாக மாற்றுவதே அரசாங்கத்தின் முன்னுரிமை எனத் தெரிவித்தார்.
இலங்கையின் படகு மற்றும் கப்பல் கட்டுமானத் தொழில், குறுகிய காலத்திலேயே குறிப்பிடத்தக்க அந்நியச் செலாவணியை ஈட்டக்கூடிய முக்கிய துறையாக அடையாளம் காணப்பட்டுள்ளதாகவும் அமைச்சர் கூறினார். சர்வதேச கடல் போக்குவரத்து வழித்தடங்களின் மத்தியில் இலங்கை அமைந்துள்ளமை இதற்கு சாதகமான காரணியாக இருப்பதாகவும் அவர் சுட்டிக்காட்டினார்.

உள்ளூர் பொறியியலாளர்கள் மற்றும் தொழிலாளர்களின் பங்களிப்புடன் இலங்கையை பிராந்திய ரீதியிலான கடல்சார் உற்பத்தி மையமாக அபிவிருத்தி செய்வதற்கு தேவையான வசதிகளையும் ஆதரவையும் அரசாங்கம் வழங்கும் எனவும் அமைச்சர் தெரிவித்தார்.
நிகழ்வில் SLYG Group of Companies நிறுவனத்தின் தலைவர் Pierre Pringiers, தேசிய தொழில் முயற்சி அபிவிருத்தி அதிகாரசபையின் தலைவர் லக்ஷ்மன் ஒபேசேகர உள்ளிட்ட நிறுவன அதிகாரிகள் மற்றும் முதலீட்டு சபையின் பிரதிநிதிகளும் கலந்துகொண்டனர்.

10/09/2026

அதிக விலைக்கு குடிநீர் போத்தல் விற்பனை – உணவகத்திற்கு ரூ.7.5 இலட்சம் அபராதம்

மட்டக்களப்பு மாவட்டத்தின் வாழைச்சேனை பகுதியில் உள்ள அமிர்தம் உணவகத்திற்கு, நிர்ணயிக்கப்பட்ட அதிகபட்ச சில்லறை விலையை (MRP) விட அதிக விலைக்கு போத்தலில் அடைக்கப்பட்ட குடிநீரை விற்பனை செய்த குற்றத்திற்காக ரூ.750,000 அபராதம் விதிக்கப்பட்டுள்ளது.

நுகர்வோர் விவகார அதிகாரசபையின் (CAA) மட்டக்களப்பு மாவட்ட விசாரணை அதிகாரிகள், வாழைச்சேனை நீதவான் நீதிமன்றத்தில் இந்த வழக்கைத் தாக்கல் செய்திருந்தனர்.

கடந்த ஜூன் 4, 2026 அன்று மேற்கொள்ளப்பட்ட சோதனையின்போது, ஒரு லிட்டர் குடிநீர் போத்தலின் நிர்ணயிக்கப்பட்ட அதிகபட்ச சில்லறை விலை ரூ.100 ஆக இருந்தபோதிலும், அந்த உணவகத்தில் அது ரூ.130க்கு விற்பனை செய்யப்பட்டமை கண்டறியப்பட்டது.

இந்த வழக்கு செப்டம்பர் 10ஆம் திகதி வாழைச்சேனை நீதவான் நீதிமன்றத்தில் விசாரணைக்கு எடுத்துக்கொள்ளப்பட்டபோது, குற்றஞ்சாட்டப்பட்ட நிறுவனம் குற்றத்தை ஒப்புக்கொண்டது. இதையடுத்து நீதவான் ரூ.750,000 அபராதம் விதித்தார்.

நிர்ணயிக்கப்பட்ட விலையை விட அதிக விலைக்கு பொருட்களை விற்பனை செய்யும் வர்த்தக நிலையங்கள் தொடர்பாக நுகர்வோர் 1977 என்ற தொலைபேசி இலக்கத்தின் ஊடாக, அலுவலக நேரங்களில் முறைப்பாடு செய்யுமாறு நுகர்வோர் விவகார அதிகாரசபை அறிவுறுத்தியுள்ளது.

10/09/2026

கருத்தடை மாத்திரையால் அபாயம்! ஒரு காலம் சரி எனும் மருத்துவம் பின்னர் பக்கவிளைவுகளை கூறுகிறது!!

பிரான்சில் désogestrel 75 மைக்ரோகிராம் கொண்ட சில கருத்தடை மாத்திரைகளைப் பயன்படுத்தும் பெண்களுக்கு, மெனிஞ்சியோமா (méningiome) எனப்படும் மூளையைச் சுற்றியுள்ள உறையில் உருவாகும் கட்டி ஏற்படும் அபாயம் தொடர்பாக தேசிய மருந்துப் பாதுகாப்பு நிறுவனம் (ANSM) புதிய தகவலை வழங்கவுள்ளது.
இந்த மருந்துகளைப் பயன்படுத்தும் சுமார் 16 இலட்சம் பெண்களுக்கு செப்டம்பர் 14ஆம் தேதி முதல் தனிப்பட்ட தகவல் அனுப்பப்படவுள்ளதாக தெரிவிக்கப்பட்டுள்ளது. மருந்தைப் பயன்படுத்துவோருக்கு சாத்தியமான அபாயம் குறித்து தெளிவாகத் தெரிவிப்பதே இதன் நோக்கமாகும்.

மெனிஞ்சியோமா என்பது மூளை அல்லது தண்டுவடத்தைச் சுற்றியுள்ள பாதுகாப்பு உறைகளில் உருவாகும் கட்டியாகும். பெரும்பாலானவை மெதுவாக வளரக்கூடியவையாகவும் தீங்கற்றவையாகவும் இருந்தாலும், அதன் அளவு மற்றும் அமைந்துள்ள இடத்தைப் பொறுத்து தலைவலி, பார்வைக் கோளாறு, வலிப்பு உள்ளிட்ட பாதிப்புகளை ஏற்படுத்தக்கூடும்.
désogestrel பயன்படுத்துவதற்கும் மெனிஞ்சியோமா ஏற்படுவதற்கும் இடையே தொடர்பு இருப்பதாக பாதுகாப்புத் தரவுகள் சுட்டிக்காட்டுகின்றன. குறிப்பாக நீண்டகாலப் பயன்பாட்டில் இந்த அபாயம் அதிகரிக்கக்கூடும் என தெரிவிக்கப்படுகிறது. இருப்பினும், மருந்தைப் பயன்படுத்தும் ஒவ்வொரு பெண்ணுக்கும் இந்தக் கட்டி ஏற்படும் என்று அர்த்தமல்ல; ஒட்டுமொத்த அபாயம் குறைவாகவே உள்ளது.

முக்கியமாக, இந்தத் தகவலைப் பெற்ற பெண்கள் தாங்களாகவே கருத்தடை மாத்திரையை நிறுத்தவோ, மாற்றவோ கூடாது. மருந்தைத் தொடர்ந்து பயன்படுத்துவது குறித்து சந்தேகம் அல்லது கவலை இருந்தால், மருத்துவர் அல்லது மருந்தாளரிடம் ஆலோசனை பெற்று மட்டுமே முடிவு எடுக்க வேண்டும். நீண்டகாலமாக இந்த மருந்தைப் பயன்படுத்துபவர்கள், தங்களது மருத்துவ வரலாற்றை கருத்தில் கொண்டு மருத்துவரிடம் பரிசீலனை செய்வது மிகவும் அவசியம். புதிய அல்லது தொடர்ந்து நீடிக்கும் தலைவலி, பார்வையில் மாற்றம், வலிப்பு போன்ற அசாதாரண அறிகுறிகள் ஏற்பட்டால் தாமதிக்காமல் மருத்துவ ஆலோசனையைப் பெற வேண்டும்.
#கருத்தடை #மருந்து

10/09/2026

உள்ளத்தை நொருக்கும் ஒரு செய்தியாக செய்தி ஊடகங்களில் பகிரப்படும் தமிழ் நாட்டுச் செய்தி ஒன்று.
20 ஆயிரம் ரூபாய் கடனுக்காக நிறைமாத கர்ப்பிணிப் பெண்ணை மருத்துவமனைக்கு அனுப்ப விறகு வியாபாரி மறுப்பு - வேலை செய்யும் இடத்திலேயே பிரசவத்தின் போது பழங்குடி இருளர் பெண் பரிதாபப் பலி.
காஞ்சிபுரம் மாவட்டம், சிங்காடிவாக்கம் ஊராட்சியைச் சேர்ந்த இருளர் சமூகத்தைச் சேர்ந்தவர் ஆனந்தன் (40). இவரது மனைவி தேன்மொழி (35). 9 மாதக் கர்ப்பிணியான இவர்,
தன் கணவருடன் ஆறுமுகம் என்ற விறகு வியாபாரியிடம், அரக்கோணம் சாலையில் உள்ள வெள்ளை கேட்டில், கடந்த 6 மாதங்களாக அங்கேயே வியாபாரி போட்டுக் கொடுத்த தார்ப்பாய் கூடாரத்தில் தங்கி வேலை செய்து வந்துள்ளனர்.

இவர்களின் திருமணமான மகள் காவியா - மருமகன் முத்து குடும்பமும் இவர்களோடு வேலை செய்து வந்தது.
வேலைக்கு முன் தொகையாக விறகு வியாபாரி ஆறுமுகத்திடம் ஆனந்தன் தம்பதியினர் ரூ.20,000 கடன் வாங்கியுள்ளனர். இந்நிலையில் நேற்று (9-9-26) கர்ப்பிணியாக இருந்த தேன்மொழிக்கு திடீரெனக் கடுமையான பிரசவ வலி ஏற்பட்டுள்ளது.
ஆனால், "வாங்கிய கடனைக் கொடுக்காமல் மரம் வெட்டும் இடத்தில் இருந்து செல்லக் கூடாது" எனக் கூறி, அவர்களை மருத்துவமனைக்கு செல்ல விடாமல் ஆறுமுகம் தடுத்து நிறுத்தியுள்ளார்.

வேறு வழியின்றி ஆனந்தன், வயிற்று வலியில் துடித்த தனது மனைவிக்கு விளக்கெண்ணெய் தடவிவிட்டு வேலைக்குச் சென்றுள்ளார்.
மருத்துவ உதவி கிடைக்காமல் தன்னந்தனியே தங்கியிருந்த தேன்மொழிக்கு, தார்ப்பாய் கூடாரத்திலேயே பிரசவம் ஆகத் தொடங்கியது.

அப்போது, குழந்தையின் உடல் பாதி வெளியே வந்த நிலையில், தீவிர வலி மற்றும் ரத்தப்போக்கால் துடித்த தேன்மொழியும், அவரது பச்சிளம் குழந்தையும் சம்பவ இடத்திலேயே துடிதுடித்துப் பரிதாபமாக உயிரிழந்தனர்.
மாலை 4.00 மணியளவில் அங்கு வந்த உரிமையாளர் ஆறுமுகம், இது இயற்கை மரணம் என்று கூறி, படிப்பறிவில்லாத ஆனந்தனிடம் வெறும் ரூ.2,000 பணத்தைக் கொடுத்து, உடலை சிங்காடிவாக்கம் இருளர் குடியிருப்புக்கு அனுப்பி வைத்துள்ளார் என அச்செய்தி கூறுகிறது.
இவ்வளவு கொடூர மனிதர்களாகவும் முட்டள்தனமான போக்கிலும் இன்னுமே கிராமங்களில் மக்கள் வாழ்வது ஏன் என்று சிந்திப்பாரும் முன்னேற்குவாரும் இல்லை என்பது வருத்தத்துக்குரியது.

10/09/2026

இந்திய பாதுகாப்பு அமைச்சர் ராஜ்நாத் சிங் – பிரதமர் ஹரிணி அமரசூரிய சந்திப்பு

இந்திய பாதுகாப்பு அமைச்சர் ராஜ்நாத் சிங், இலங்கைக்கான தனது விஜயத்தின் போது இன்று (செப்டெம்பர் 9) நாடாளுமன்றத்தில் இலங்கைப் பிரதமர் ஹரிணி அமரசூரியவை சந்தித்து கலந்துரையாடினார். இந்தச் சந்திப்பில், நெருக்கடியான காலங்களில் இலங்கைக்கு இந்தியா தொடர்ந்து வழங்கி வரும் ஆதரவுக்கு பிரதமர் நன்றி தெரிவித்ததுடன், குறிப்பாக Cyclone Ditwah ஏற்படுத்திய பேரழிவுக்குப் பின்னர் இந்தியா வழங்கிய உதவியையும், மனிதாபிமான மற்றும் அனர்த்த நிவாரண நடவடிக்கைகளுக்காக இந்திய அரசாங்கம் ஆரம்பித்த Operation Sagar Bandhu நடவடிக்கையையும் வரவேற்றார்.

இந்தியா–இலங்கை உறவு இராஜதந்திர மற்றும் பொருளாதார ஒத்துழைப்பைத் தாண்டி, நீண்டகால கலாசார, வரலாற்று மற்றும் மதத் தொடர்புகளையும் உள்ளடக்கியதாக பிரதமர் குறிப்பிட்டார். வர்த்தகம், அபிவிருத்தி, பாதுகாப்பு, கல்வி உள்ளிட்ட பல்வேறு துறைகளில் இந்தியா இலங்கையின் முக்கிய பங்காளியாக இருப்பதாகவும், பாதுகாப்புத் துறையில் இரு நாடுகளுக்கும் இடையிலான நீண்டகால ஒத்துழைப்பை மேலும் வலுப்படுத்த வேண்டியதன் அவசியம் குறித்தும் அவர் வலியுறுத்தினார்.

மேலும், ராஜ்நாத் சிங்கின் இந்த விஜயத்தின்போது பல்வேறு புரிந்துணர்வு ஒப்பந்தங்கள் (MoUs) கையெழுத்திடுவது தொடர்பிலும் கலந்துரையாடப்பட்டது. சுற்றுலா மற்றும் கல்வித் துறைகளில் பிராந்திய ஒத்துழைப்பை விரிவுபடுத்துவதற்கும் முக்கியத்துவம் வழங்கப்பட்டது. குறிப்பாக இலங்கை மற்றும் இந்தியப் பல்கலைக்கழகங்களுக்கு இடையிலான ஒத்துழைப்பை, இந்திய தொழில்நுட்பக் கழகங்கள் (IITs) போன்ற சிறப்பு கல்வி நிறுவனங்கள் மற்றும் திட்டங்கள் மூலம் அதிகரித்து, அறிவுப் பரிமாற்றம், புத்தாக்கம் மற்றும் திறன் மேம்பாட்டை ஊக்குவிக்க முடியும் என பிரதமர் தெரிவித்தார்.

10/09/2026

32 ஆண்டுகள்… ஒரே கடை… ஒரே சிரிப்பு! ❤️

சிட்னியின் Northmead பகுதியில் உள்ள McDonald’s உணவகத்தில் 32 ஆண்டுகள் பணியாற்றி, அப்பகுதி மக்களின் மனதில் நீங்காத இடம்பிடித்தவர் ரஸ்ஸல் ஓ’கிரேடி.
அறிவுசார் குறைபாடு கொண்டவர்களுக்கு வேலைவாய்ப்பு வழங்கும் Jobsupport அமைப்பின் உதவியுடன் இளம் வயதில் பணியில் சேர்ந்த அவர், வாடிக்கையாளர்களை அன்புடன் வரவேற்பது, தட்டுகளை அகற்றுவது, உணவகத்தைச் சுத்தமாக வைத்திருப்பது போன்ற பணிகளை அர்ப்பணிப்புடன் செய்தார். நாளடைவில் அவர் அங்கு பணியாற்றும் ஊழியராக மட்டுமல்லாமல், அந்தப் பகுதியின் பரிச்சயமான முகமாக மாறினார்.

2018ஆம் ஆண்டு, 50 வயதில் அவர் ஓய்வு பெற்றபோது, அவரை வாழ்த்தவும் கடைசியாகப் பார்க்கவும் பல வாடிக்கையாளர்கள் நேரில் வந்தனர். அவரது மேலாளரும் ரஸ்ஸலை அந்தப் பகுதியின் அடையாளமாகக் குறிப்பிட்டார்.
பெரிய பதவியோ செல்வமோ இல்லாவிட்டாலும், அன்புடனும் பொறுப்புடனும் செய்யும் ஒரு சாதாரண பணியும் ஒருவரை ஆயிரக்கணக்கான இதயங்களில் நிலைத்திருக்கச் செய்யும் என்பதை ரஸ்ஸலின் வாழ்க்கை உணர்த்துகிறது.
ஒரு வேலை… 32 ஆண்டுகள்…
ஒரு புன்னகை… பல ஆயிரம் நினைவுகள்!

Mission Tamil

10/09/2026

10/09/2026

10/09/2026

10/09/2026

10/09/2026

10/09/2026

10/09/2026

10/09/2026

10/09/2026

10/09/2026

Adresse

Site Web

Notifications

Raccourcis

Partager

Type

Demande de retrait de la fiche