29/08/2026
د طالبانو ویاند ذبیحالله مجاهد له «رشیا ټوډې» سره په مرکه کې ویلي، چې طالبان له واشنګټن سره د عادي ډیپلوماتیکو اړیکو غوښتونکي دي او غواړي په کابل کې د امریکا سفارت او په واشنګټن کې د افغانستان ډیپلوماتیک ماموریت بېرته فعال شي.
مجاهد ادعا کړې چې د بهرنیو ځواکونو له وتلو وروسته په افغانستان کې جګړه پای ته رسېدلې او له همدې امله باید د طالبانو په اړه د لوېدیځ سیاسي او رسنیز چلند هم بدل شي. هغه له نړیوالې ټولنې غوښتي چې له طالبانو سره مستقیم تعامل وکړي.
نوموړي د نړیوالو بندیزونو د لرې کولو او د افغانستان د کنګل شویو شتمنیو د بېرته خوشې کولو غوښتنه هم کړې او ویلي یې دي چې دا اقدامات کولی شي له امریکا سره د اړیکو په ښه کېدو کې مرسته وکړي.
مجاهد افغانستان د بهرنیو ځواکونو له وتلو وروسته «بې له شکه ښه شوی» بللی او ویلي یې دي چې طالبان له چین، روسیې، هند، ترکمنستان او یو شمېر نورو هېوادونو سره ښې اړیکې لري.
هغه د ښځو او نجونو د حقونو په اړه نړیوالې نیوکې رد کړې او ټینګار یې کړی چې طالبان خپل قوانین لري او نه غواړي د نورو هېوادونو پالیسۍ په افغانستان کې پلې شي.
د پاکستان په اړه مجاهد ویلي چې طالبان له هېڅ هېواد سره جګړه نه غواړي او اجازه به ورنه کړي چې د افغانستان خاوره د بل هېواد پر ضد وکارول شي.
د مجاهد څرګندونې په داسې حال کې دي چې طالبان لا هم د امریکا او د ډېرو لوېدیځو هېوادونو له خوا په رسمیت نه دي پېژندل شوي.
