12/10/2025
لغمان کې د کلبونو په کچه د کرکټ سیالیو ځلېدلو لوبغاړو ته د مهارتونو لوړول تمرینات پیل شول
یکشنبه/ د میزان ۲۰ مه
د لغمان د کرکټ ادارې مشر جمیل ستانکزي ختیځ مېډیا ته وویل چې د افغانستان کرکټ بورډ د ظرفیت لوړونې څانګې په لارښوونه دغه ولایت کې د کلبونو په کچه لوبو کې د ځلېدلو لوبغاړو لپاره د مهارت لوړلو او فزیکي تکړښت تمریناتي کمپ پیل شو.
نوموړی وایي دغه کمپ د سپین غر زون د مشر روزونکي تاج ملک عالم او د فزیکي تکړښت روزونکي اسدالله نظري له لوري ترسره کیږي، یوه اونۍ به دوام وکړي، چې ۳۴ لوبغاړي پکې ګډون لري.
د یاد روزنیز تمریناتي کمپ موخه د وزیر محمد اکبر خان دویمې درجې ولایتي سیالیو لپاره د لغمان لوبډله په مسلکي ډول چمتو کول دي.
په کمپ کې به لوبغاړو ته د فزیکي وړتیا، تخنیکي مهارتونو، ذهني پیاوړتیا او ستراتیژیک لوبو اړوند روزنه ورکول کېږي.
