CNI URDU

06/12/2025

04/12/2025

حسینیہ مسجد میں حضرت اُمّ البنینؑ کی شہادت کی مناسبت سے پرنور مجلسِ عزا—علامہ ہاشم رضا غدری کا ایمان افروز خطاب

برمنگھم(سی این آئی نیوز) ــ حسینیہ مسجد میں حضرت اُمّ البنین سلامُ اللہ علیہا کی شہادت کی مناسبت سے ایک پرنور اور روح پرور مجلسِ عزا کا انعقاد کیا گیا، جس سے معروف عالمِ دین علامہ ہاشم رضا غدری نے خطاب کیا۔

مجلس کے دوران علامہ ہاشم رضا غدری نے نہایت دلنشین اور مؤثر انداز میں اہلِ بیتِ اطہارؑ کے فضائل، حضرت اُمّ البنینؑ کے عظیم کردار اور مصائبِ کربلا پر تفصیلی روشنی ڈالی۔ انہوں نے حضرت اُمّ البنینؑ کی وفاداری، ایثار اور امام حسینؑ سے والہانہ محبت کو خراجِ عقیدت پیش کرتے ہوئے شرکاء کے دلوں میں روحانی کیفیت پیدا کر دی۔

اس روحانی اجتماع میں مؤمنین کی بڑی تعداد نے شرکت کی اور عقیدت و احترام کے ساتھ حضرت اُمّ البنینؑ کی شہادت کی یاد منائی۔

مجلس کے اختتام پر دعائے خیر کی گئی اور شرکاء کی پرتکلف ڈنر سے تواضع کی گئی، جس کا اہتمام مسجد انتظامیہ کی جانب سے کیا گیا تھا۔

یہ پرنور محفل شرکاء کے دلوں پر گہرے روحانی نقوش چھوڑتے ہوئے اپنے اختتام کو پہنچی۔اس دوران سی این آئی اردو کی جانب سے لی گئیں تصاویر۔

04/12/2025

انا للہ و انا الیہ راجعون

لندن (سی این آئی نیوز)لندن سے موصول ہونے والی افسوسناک اطلاع کے مطابق اے پی ایم ایل (All Pakistan Muslim League) کے صدر شیخ سلیم انتقال کر گئے ہیں۔ مرحوم ایک باوقار، ملنسار اور سیاسی و سماجی حلقوں میں عزت و احترام کی حامل شخصیت تھے۔ ان کی اچانک وفات کی خبر نے نہ صرف سیاسی برادری بلکہ بیرونِ ملک مقیم پاکستانیوں کو بھی شدید غمگین کر دیا ہے۔

اللہ عزوجل کے حکم کے مطابق ہر جان کو موت کا ذائقہ چکھنا ہے، مگر شیخ سلیم کی رخصت نے ان کے چاہنے والوں کو گہرے صدمے سے دوچار کر دیا ہے۔ ان کے انتقال پر مختلف سیاسی و سماجی رہنماؤں نے افسوس کا اظہار کرتے ہوئے ان کی خدمات کو خراجِ تحسین پیش کیا۔

ادارہ سی این آئی نیوز اور پوری ٹیم کی جانب سے مرحوم کے اہلِ خانہ، دوستوں، اور پارٹی کارکنان سے دلی تعزیت کا اظہار کیا گیا ہے۔ ٹیم نے بیان میں کہا کہ:
ہم اس مشکل گھڑی میں لواحقین کے غم میں برابر کے شریک ہیں۔ اللہ تعالیٰ مرحوم کو جنت الفردوس میں اعلیٰ مقام عطا فرمائے اور اہلِ خانہ کو صبرِ جمیل عطا کرے۔ آمین۔

مرحوم کی نمازِ جنازہ اور تدفین کے شیڈول کے بارے میں معلومات جلد جاری کی جائیں گی۔

02/12/2025

برمنگھم میں پاکستان پیپلز پارٹی کا 58 واں یومِ تاسیس بھرپور جوش و جذبے سے منایا گیا۔

برمنگھم (سی این آئی نیوز)پاکستان پیپلز پارٹی یوکے برمنگھم کے زیرِ اہتمام پارٹی کا 58 واں یومِ تاسیس نہایت جوش و جذبے، ولولے اور پارٹی وابستگی کے اظہار کے ساتھ منایا گیا۔ اس پر وقار تقریب کی صدارت پارٹی کے سینئر رہنماء راجہ قیوم نے کی، جبکہ خواتین وِنگ کی راہنما انجم جرال تقریب کی مہمانِ خصوصی تھیں۔

تقریب میں پیپلز پارٹی یوکے اور برمنگھم کے مختلف شعبہ جات سے تعلق رکھنے والی شخصیات نے بھرپورشرکت کی۔ شرکاء میں سینئر رہنما چوہدری شبیر، نائب حسین مغل (چیئرمین نور کیئر فاؤنڈیشن اور کشمیر کمیٹی پی پی پی برطانیہ)، چوہدری امین (فیڈرل ممبر پی پی پی برطانیہ) سمیت دیگر تنظیمی ذمہ داران و کارکنان شامل تھے، جنہوں نے اپنی شرکت سے پارٹی سے نظریاتی وابستگی کا اظہار کیا۔

تقریب کے شرکاء نے قائد عوام ذوالفقار علی بھٹو شہید اور محترمہ بے نظیر بھٹو شہید کی جمہوری جدوجہد، فکر اور لازوال قربانیوں کو خراجِ عقیدت پیش کیا۔ مقررین نے کہا کہ پیپلز پارٹی پاکستان کی سیاسی تاریخ میں ایک عوامی قوت ہے، اور اس کی جدوجہد عوام کے حقوق کے تحفظ اور جمہوریت کے استحکام کے لیے جاری رہے گی۔

شرکاء نے اپنی تقاریر میں اس عزم کا اعادہ بھی کیا کہ وہ پارٹی کی مضبوطی، اتحاد اور عوامی سیاست کے تسلسل کے لیے چیئرمین بلاول بھٹو زرداری کی قیادت پر مکمل اعتماد رکھتے ہیں، اور ان کے ہاتھ مضبوط کرنے کے لیے اپنا بھرپور کردار ادا کرتے رہیں گے۔

تقریب کے اختتام پر 58 ویں یومِ تاسیس کا کیک پارٹی نعرے اور جوشیلے ترانوں کی گونج میں کاٹا گیا، جبکہ پارٹی کی کامیابی، ترقی اور استحکام کے لیے اجتماعی دعا بھی کی گئی۔

آخر میں شرکاء نے تقریب کے یادگار لمحات کو تصاویر اور ویڈیوز کی صورت میں محفوظ کیا۔

01/12/2025

یوکے پی این پی کا برمنگھم میں اہم اجلاس — شوکت علی کشمیری کی خصوصی شرکت، امریکی دورے کی تفصیلات اور قومی جدوجہد کے نئے اہداف پیش

برمنگھم (سی این آئی نیوز) یونائٹڈ کشمیر پیپلز نیشنل پارٹی (یوکے پی این پی) کے زیرِ اہتمام برمنگھم کے ایک مقامی ریسٹورنٹ میں تنظیمی و سیاسی نوعیت کا ایک اہم اجلاس منعقد ہوا، جس میں پارٹی کے مرکزی قائد اور چیئرمین شوکت علی کشمیری نے بطور مہمانِ خصوصی شرکت کی۔

تقریب میں برطانیہ اور یورپ سے آئے ہوئے پارٹی رہنماؤں اور کارکنان نے بھرپور شرکت کی۔ شرکاء نے مرکزی چیئرمین کا امریکی دورہ مکمل کرنے کے بعد والہانہ استقبال کیا اور ان کے اعزاز میں خصوصی تقریب بھی ترتیب دی گئی۔

اس موقع پر خطاب کرتے ہوئے شوکت علی کشمیری نے تنظیمی رفقاء کو اپنے دورہ امریکہ کی کامیاب ملاقاتوں اور وہاں مختلف فورمز پر مسئلہ کشمیر سے متعلق پیش کی گئی پالیسی پر تفصیلی بریفنگ دی۔
انہوں نے کہا کہ مسئلہ کشمیر کی موجودہ صورتحال تیزی سے بدل رہی ہے اور اس تناظر میں نوجوان نسل—خصوصاً جنریشن زی—کو پارٹی کے پیغام، نظریے اور جدوجہد سے جوڑنے کی ضرورت پہلے سے کہیں زیادہ بڑھ گئی ہے۔

شوکت علی کشمیری نے آزاد کشمیر میں عوامی حقوق کے لیے سرگرم سیاسی کارکنوں کے ساتھ یکجہتی کا اظہار کیا اور اعلان کیا کہ پارٹی ہر اس جدوجہد کی بھرپور حمایت جاری رکھے گی جو عوامی حقوق، انسانی آزادی اور ترقی کے لیے کی جا رہی ہے۔

انہوں نے گزشتہ مدت میں شہید ہونے والے نوجوانوں کے لیے دعائے مغفرت بھی کی اور کشمیری صحافی سراب برکت کی گرفتاری کی شدید الفاظ میں مذمت کی۔

اس دوران دیگر جن پارٹی رہنماؤں نے تقاریر کیں ان میں شامل ہیں
محمد عدنان خان (صدر برمنگھم یونٹ)،
قمر خلیل (ترجمان برطانیہ زون و سٹیج سیکریٹری)،
ٹکا خان طاہر (مرکزی نشر و اشاعت)،
امجد یوسف (صدر یورپ زون)،
سردار طارق خان (صدر یوکے زون)،
محمود کشمیری (سینئر لیڈر)،
یاسر عرفات (سیکرٹری فنانس یورپ زون)،
محسن علی (نائب صدر برمنگھم)،
محمد حسیب طارق (ڈپٹی جنرل سیکریٹری)،
ہمایوں خورشید (سیکرٹری فنانس برمنگھم)،
ارسلان شوکت (سیکرٹری میڈیا)،
منیب اشفاق (رابطہ سیکرٹری)،
آفتاب خان (سینئر وائس پریذیڈنٹ برطانیہ)،
سعید خان،
عیان خان (آرگنائزر)،
عدنان سجاد (ڈپٹی آرگنائزر)،
کاشف محمود (ڈپٹی میڈیا سیکریٹری)،
راجہ حبیب (سینئر وائس پریزیڈنٹ برمنگھم)،
سندس شوکت (سیکرٹری خواتین برمنگھم)۔

اورسید وسیم عباس(صدر لوٹن برانچ )

تمام رہنماؤں نے مرکزی قیادت کی جدوجہد، تنظیمی ڈھانچے کی مضبوطی اور نوجوانوں کی شمولیت کو وقت کی اہم ضرورت قرار دیا۔

تقریب کے دوران شوکت علی کشمیری کے دیرینہ ساتھی اور پارٹی کے مرکزی ڈپٹی آرگنائزر کی وفات پر گہرے دکھ کا اظہار کیا گیا اور ان کی خدمات کو زبردست خراج عقیدت پیش کیا گیا۔

مزید برآں جبران نسیم اور زرنوش نسیم کے بہیمانہ قتل کی شدید مذمت کرتے ہوئے واقعے کی شفاف تحقیقات کے لیے جوڈیشل کمیشن کے قیام کا مطالبہ کیا گیا۔

اس دوران میڈیا سے گفتگو کرتے ہوئے شوکت علی کشمیری، محمود کشمیری، قمر خلیل اور سندس شوکت نے کہا کہ اس تقریب کا مقصد عالمی و علاقائی حالات میں تیزی سے آنے والی تبدیلیوں کے تناظر میں پارٹی نوجوانوں کو حقائق سے آگاہ کرنا اور مستقبل کی سیاسی حکمتِ عملی واضح کرنا تھا۔۔۔۔ساٹس

پروگرام کے اختتام پر تمام شرکاء نے یادگار تصاویر بنوائیں اور تنظیمی یکجہتی کے عزم کا اعادہ کیا۔اس دوران سی این آئی اردو کی جانب سے لی گئیں تصاویر۔

30/11/2025

روشنی برمنگھم کا سالانہ گالا ایوارڈ شو—برطانیہ بھر کی اہم شخصیات کی بھرپور شرکت، خدمات انجام دینے والوں کو ایوارڈز سے نوازا گیا۔

برمنگھم (سی این آئی نیوز)برطانیہ کی معروف فلاحی تنظیم روشنی برمنگھم کے زیرِ اہتمام مقامی ہال میں سالانہ گالا ایوارڈز سرمنی اینڈ چیریٹی ایونٹ نہایت شاندار انداز میں منعقد ہوا، جس میں برطانیہ بھر سے سیاسی، سماجی اور کمیونٹی رہنماؤں سمیت خواتین و حضرات نے بھرپور شرکت کی۔ شرکاء نے اس خوبصورت اور منظم تقریب کو زبردست خراجِ تحسین پیش کیا۔

تقریب کے دوران مقامی گلوکاروں نے لائیو پرفارمنس سے محفل کو چار چاند لگا دیے اور شرکاء کو محظوظ کیا۔ مختلف شعبۂ زندگی سے تعلق رکھنے والی ممتاز شخصیات کو ان کی خدمات کے اعتراف میں ایوارڈز بھی پیش کیے گئے، جنہیں حاضرین نے خوب سراہا۔

اس موقع پر روشنی برمنگھم کی چیئرپرسن ڈاکٹر سرمت سہیل نے خطاب کرتے ہوئے کہا کہ روشنی سیاہ فام اور اقلیتی پس منظر رکھنے والی اُن کمیونٹیز کی مدد کرتی ہے جو گھریلو تشدد، جبری شادی اور ناموس کے نام پر ہونے والے ظلم و ستم کا شکار ہوتی ہیں۔ انہوں نے کہا کہ 1979 میں قائم ہونے والی روشنی برمنگھم ایک مضبوط اور فعال تنظیم ہے جو متاثرین کو تشدد، خوف اور جبر سے آزاد، بااعتماد اور خودمختار زندگی کی طرف سفر میں مکمل مدد فراہم کرتی ہے۔

تقریب کے دوران سی این آئی نیوز سے گفتگو کرتے ہوئے ویسٹ مڈلینڈز کے پولیس اینڈ کرائم کمشنر سائمن فوسٹر، سرمت سہیل، رفعت مغل اور دیگر مقررین نے کہا کہ روشنی ایک تجربہ کار اور مستند چیریٹی ہے جو ہمیشہ سے سیاہ فام اور اقلیتی برادریوں کو درپیش مسائل کے حل میں صفِ اوّل میں رہتی ہے۔ ان کے مطابق آج کا ایونٹ روشنی کی سماجی خدمات اور کمیونٹی سے وابستگی کی روشن مثال ہے۔

شرکاء کا کہنا تھا کہ روشنی برمنگھم نے اپنے قیام سے اب تک بے شمار متاثرین کی ان کے مشکل ترین لمحات میں مدد کی ہے، جس پر یہ ادارہ لائقِ تحسین ہے۔

پروگرام کے اختتام پر مہمانوں نے یادگار تصاویر بنوا کر اس خوبصورت تقریب کو ہمیشہ کے لیے محفوظ کر لیا۔

30/11/2025

برمنگھم ڈگبٹھ ہال میں شہادتِ حضرت سیدہ فاطمہ الزہراؑ کی مناسبت سے مجلسِ عزا کا انعقاد

برمنگھم (سی این آئی نیوز)برمنگھم سٹی سینٹر کے ڈگبٹھ ہال میں حضرت سیدہ فاطمہ الزہرا سلام اللہ علیھا کے یومِ شہادت کے سلسلے میں ایک پرنور اور باوقار مجلسِ عزا منعقد ہوئی۔ اس پروگرام کا اہتمام سابق آئی ایس او اراکین اور ممبران نے مشترکہ طور پر کیا، جس میں برطانیہ بھر سے آئی ایس او پاکستان کے سابق ممبران، جو مختلف شہروں میں آباد ہیں، نے بھرپورشرکت کی۔

مجلس سے لندن سے تشریف لانے والے معروف اسکالر اور گیسٹ اسپیکر پروفیسر ڈاکٹر سید حماد نقوی نے خطاب کیا۔ اپنے خطاب میں انہوں نے حضرت سیدہ فاطمہ الزہراؑ کے فضائل، سیرت اور مصائب کے اہم پہلوؤں پر روشنی ڈالی۔ ۔۔۔۔۔انہوں نے والدین اور بچوں کی تربیت کے حوالے سے قرآن و سنت کی روشنی میں نہایت اہم اور جامع بیان پیش کیا، جسے شرکاء نے بے حد سراہا۔۔۔۔۔

پروگرام کے دوران سوال و جواب کا خصوصی سیشن بھی رکھا گیا جس میں نوجوانوں اور والدین نے بھرپور حصہ لیا۔ گفتگو کے اہم موضوعات میں دینِ محمدی ﷺ کی روشنی میں شادی کی اہمیت، بچوں کی تربیت کے اسلامی تقاضے، والدین کا احترام اور ملٹی کلچرل سوسائٹی میں دینی اصولوں کے مطابق زندگی گزارنے کے عملی طریقے شامل تھے۔

مجلس کے اختتام پر سوز و سلام پیش کیا گیا، جس کے بعد نوحہ خوانی اور ماتم داری کے ساتھ ایصالِ ثواب کی مجلس مکمل ہوئی۔ شرکاء نے ایسے روحانی اجتماعات کے مسلسل انعقاد کی ضرورت پر زور دیتے ہوئے منتظمین کی کاوشوں کو سراہا۔

28/11/2025

برمنگھم میں حسن افضل رانا کی لنگر بیٹھک — کمیونٹی رہنماؤں کی موجودہ سیاسی صورتحال پر کھل کر گفتگو

برمنگھم (سی این آئی نیوز) — برمنگھم کنگز ہیتھ ایف سی کارپٹ کے آنر اور معروف سماجی و سیاسی رہنماء حسن افضل رانا کی جانب سے جمعہ کے روز منعقد کی گئی لنگر بیٹھک میں ممتاز شخصیات نے شرکت کی۔ اس دوستانہ نشست میں پاکستان پریس کلب مڈلینڈز کے صدر راجہ ناصرمحمود، سابق صدر و ایگزیکٹو ممبر سید عابد کاظمی، میڈیا انڈسٹری سے وابستہ ایم ای بی محمد ایوب، لوٹن سے آئے ہوئے کاروباری شخصیت احسن خواجہ اور کمیونٹی کے دیگر معزز افراد موجود تھے۔

محفل کا ماحول دوستانہ، روایتی مہمان نوازی اور باہمی احترام سے بھرپور رہا۔ شرکاء نے پاکستان کی موجودہ سیاسی صورتحال، کمیونٹی امور اور برطانیہ میں پاکستانیوں کو درپیش چیلنجز پر کھل کر تبادلہ خیال کیا۔

اس موقع پر میزبان حسن افضل رانا نے گفتگو کرتے ہوئے کہا کہ جمعہ کے بعد یہ کھانا ایک ملاقات کا بہانہ ہوتا ہے، اسی وجہ سے دوست احباب جمع ہو جاتے ہیں، ملاقات ہو جاتی ہے، اور برطانیہ اور پاکستان کے معاملات پر کھل کر گفتگو بھی ہو جاتی ہے۔

انہوں نے مزید کہا کہ ایسی نشستوں سے نہ صرف کمیونٹی کے درمیان روابط مضبوط ہوتے ہیں بلکہ مثبت سوچ اور اجتماعی شعور کو فروغ بھی ملتا ہے۔

تقریب کے دوران سی این آئی اردو کی جانب سے یادگار تصاویر بھی لی گئیں جنہوں نے اس خوبصورت نشست کو مزید خوبصورت بنا دیا۔

28/11/2025

عمران خان کے صاحبزادے قاسم خان کا عالمی برادری سے ہنگامی اپیل
سابق وزیراعظم کی غیر قانونی حراست کے 845 دن مکمل، 24 روز سے قیدِ تنہائی میں — خاندان و وکلاء سے مکمل رابطہ منقطع

لندن (سی این آئی نیوز) پاکستان کے سابق وزیراعظم عمران خان کی حراست کے 845 دن مکمل ہونے پر ان کے صاحبزادے قاسم خان نے عالمی برادری اور انسانی حقوق کی تنظیموں سے فوری مداخلت کی اپیل کرتے ہوئے ایک اہم بیان جاری کیا ہے۔ انہوں نے دعویٰ کیا ہے کہ عمران خان گزشتہ چھ ہفتوں سے مکمل بے خبری اور سخت ترین تنہائی میں “ڈیتھ سیل” میں رکھے گئے ہیں، جہاں نہ خاندان کو رسائی دی جا رہی ہے اور نہ ہی وکلاء کو ملاقات کی اجازت ہے—حالانکہ عدالت کی جانب سے واضح احکامات موجود ہیں۔

قاسم خان نے کہا کہ میرے والد کو گرفتار ہوئے 845 دن ہو چکے ہیں۔ پچھلے چھ ہفتوں سے انہیں مکمل اندھیرے میں، اکیلے ایک ڈیتھ سیل میں رکھا گیا ہے۔ عدالت کے احکامات کے باوجود ان کی بہنوں کو ملاقات سے منع کر دیا گیا ہے۔ کوئی فون کال نہیں، کوئی پیغام نہیں، نہ ہم ان کی حالت سے باخبر ہیں نہ زندگی کی کوئی ضمانت ہے۔

انہوں نے مزید کہا کہ یہ صورتحال کسی حفاظتی پروٹوکول کا حصہ نہیں بلکہ ایک سوچا سمجھا اقدام ہے جس کا مقصد عمران خان کی صحت، حالت اور سکیورٹی کے بارے میں معلومات کو مکمل طور پر چھپانا ہے۔ قاسم خان کے مطابق، خاندان کے لیے اپنے والد کی زندگی اور حفاظت سے متعلق شدید خدشات پیدا ہو چکے ہیں۔

انہوں نے سخت لہجے میں کہا کہ پاکستانی حکومت اور اس کے پشت پناہوں کو میرے والد کی صحت، تحفظ اور اس غیر انسانی تنہائی کے ہر ممکن نتیجے کی مکمل قانونی، اخلاقی اور بین الاقوامی ذمہ داری اٹھانا ہوگی۔

قاسم خان نے عالمی انسانی حقوق کی تنظیموں، اقوام متحدہ، بین الاقوامی جمہوری فورمز اور عالمی قیادت سے اپیل کرتے ہوئے کہا کہ وہ فوری کردار ادا کریں اور عمران خان کی زندگی کی تصدیق، عدالتی احکامات کے مطابق رسائی، قیدِ تنہائی کے خاتمے اور ان کی رہائی کا مطالبہ کریں، کیونکہ انہیں صرف سیاسی وجوہات کی بنا پر قید رکھا گیا ہے۔

انسانی حقوق گروپس اور بین الاقوامی مبصرین پہلے ہی پاکستان میں سیاسی گرفتاریوں اور مبینہ بنیادی حقوق کی خلاف ورزیوں پر اپنی تشویش کا اظہار کر چکے ہیں، جبکہ عمران خان کی مسلسل حراست اور قیدِ تنہائی کا معاملہ بین الاقوامی سطح پر ایک بار پھر توجہ کا مرکز بنتا جا رہا ہے۔

سی این آئی نیوز صورتحال کا مسلسل جائزہ لے رہا ہے اور آنے والی پیش رفت پر اپنے ناظرین کو آگاہ کرتا رہے گا۔

27/11/2025

اسلام آباد ایئرپورٹ پر نوجوان صحافی سہراب برکت کی حراست — ہائی کورٹ احکامات کے باوجود ایف آئی اے کی کارروائی

اسلام آباد (سی این آئی اردو)اسلام آباد ہائی کورٹ کے واضح حکم کے باوجود نوجوان اور بے باک صحافی سہراب برکت کو اسلام آباد انٹرنیشنل ایئرپورٹ سے ایف آئی اے کے حکام نے اس وقت حراست میں لے لیا جب وہ برازیل میں ہونے والی ایک بین الاقوامی کانفرنس میں شرکت کے لیے روانہ ہو رہے تھے۔ عینی شاہدین کے مطابق ایف آئی اے اہلکاروں نے سہراب برکت کو امیگریشن کاؤنٹر پر ہی روک کر تفتیش کے لیے اپنے ساتھ منتقل کر دیا۔

سہراب برکت کا تعلق راولاکوٹ آزاد کشمیر سے ہے اور وہ سیاست ڈاٹ پی کے کے ساتھ بطور رپورٹر اینڈ اینکر وابستہ ہیں۔ صحافتی حلقوں میں وہ اپنی جرات مندانہ رپورٹنگ اور بے باک سوالات کے باعث خاص شہرت رکھتے ہیں۔ گزشتہ چند ہفتوں سے وہ مختلف اہم ایشوز پر اپنی خصوصی رپورٹس کی وجہ سے خبروں میں رہے۔

ذرائع کے مطابق اسلام آباد ہائی کورٹ نے چند روز قبل سہراب برکت کو بیرونِ ملک سفر کی اجازت دیتے ہوئے متعلقہ اداروں کو واضح ہدایات جاری کی تھیں کہ ان کا نام اسٹاپ لسٹ پر نہیں رکھا جائے گا۔ تاہم آج صبح ایئرپورٹ پر انہیں پرواز میں سوار ہونے سے روک دیا گیا، جس پر صحافی برادری نے شدید ردعمل ظاہر کیا ہے۔

صحافتی تنظیموں نے سہراب برکت کی گرفتاری کی مذمت کرتے ہوئے اسے آزادیٔ صحافت پر حملہ قرار دیا ہے اور مطالبہ کیا ہے کہ انہیں فوری طور پر رہا کرکے ہائی کورٹ کے احکامات پر عملدرآمد یقینی بنایا جائے۔ ملک کے مختلف شہروں میں صحافیوں نے اس واقعے کے خلاف احتجاجی مظاہروں کا اعلان بھی کیا ہے۔

ایف آئی اے ذرائع کا کہنا ہے کہ سہراب برکت کی حراست “تفتیش” کے سلسلے میں عمل میں لائی گئی ہے، تاہم اس کی مزید تفصیلات فراہم نہیں کی گئیں۔

معاملے پر قانونی ماہرین کا کہنا ہے کہ اگر واقعی عدالت کے احکامات موجود تھے اور اس کے باوجود حراست عمل میں آئی، تو یہ ایک سنگین قانونی خلاف ورزی ہے جس پر متعلقہ اداروں کے خلاف کارروائی کی جا سکتی ہے۔

مزید تفصیلات سامنے آنے تک صحافتی برادری کی نظریں اسلام آباد ہائی کورٹ کے ممکنہ ردعمل پر مرکوز ہیں۔

26/11/2025

آزاد کشمیر کے سابق ایڈیشنل چیف سیکرٹری فرحت علی میر کی پاکستان پریس کلب UK Midlands میں اہم گفتگو
سیاسی قیادت کی ناکامی، انتظامی کمزوریاں اور مستقبل کے امکانات پر کھل کر اظہار خیال

برمنگھم (سی این آئی نیوز)پاکستان پریس کلب یوکے مڈلینڈز کے زیر اہتمام میٹ دی پریس پروگرام میں آزاد جموں و کشمیر 1974ء کے آئین کی 13ویں آئینی ترمیم کے معمار تصور کیے جانے والے سابق ایڈیشنل چیف سیکرٹری آزاد کشمیر فرحت علی میر نے آزاد کشمیر کی موجودہ سیاسی، آئینی اور انتظامی صورتحال پر تفصیلی گفتگو کی اور متعدد اہم نکات اجاگر کیے۔

فرحت علی میر نے کہا کہ انہوں نے بطور سول سرونٹ جو خدمات انجام دیں، وہ تاریخ میں لکھی جائیں گی۔ انہوں نے افسوس کا اظہار کیا کہ آزاد کشمیر کی سیاسی قیادت اپنی بنیادی ذمہ داریاں ادا کرنے میں ناکام رہی۔
ان کے مطابق اپوزیشن کے مؤثر کردار کے نہ ہونے کی وجہ سے “جوائنٹ ایکشن کمیٹی” جیسے پلیٹ فارمز وجود میں آئے جنہوں نے اپنے تمام مطالبات جائز انداز میں پیش کیے، جس کے نتیجے میں حکومت نے یہ مطالبات تسلیم کیے۔ تاہم انہوں نے واضح کیا کہ:
“ابھی تک ایک بھی مطالبے پر عمل درآمد نہیں ہوسکا، اور اگر مطالبات نہ مانے گئے تو دوبارہ عوامی احتجاج سامنے آسکتا ہے۔

انہوں نے کہا کہ آزاد کشمیر کا انتظامی و سیاسی ڈھانچہ بنیادی طور پر بیس کیمپ کے طور پر قائم کیا گیا تھا، لیکن بدقسمتی سے سیاسی قیادت نے اس سمت میں کوئی کردار ادا نہیں کیا۔
انہوں نے اس بات پر افسوس کیا کہ اوورسیز کشمیریوں کی صلاحیتوں اور وسائل سے کوئی فائدہ نہیں اٹھایا گیا نہ انہیں گائیڈ کیا گیااور نہ ہی کسی نمایاں اوورسیز کشمیری نمائندے کو خصوصی نشست دی گئی۔

فرحت علی میر نے کہا کہ آزاد کشمیر حکومت کی بنیادی ذمہ داری سیاحت، تعلیم اور صحت کے شعبوں کی بہتری تھی، مگر سفارشی تقرریوں اور غیر سنجیدہ فیصلوں کی وجہ سے ان شعبوں میں کوئی قابلِ ذکر پیش رفت نہیں ہوسکی۔

میٹ دی پریس کے دوران ایک سوال کے جواب میں انہوں نے کہا کہ اگر مستقبل میں انہیں کوئی بھی ذمہ داری دی گئی تو وہ اسے پوری ایمانداری اور بہترین کارکردگی کے ساتھ نبھائیں گے۔

میڈیا نمائندگان کے مختلف سوالات کے جواب دیتے ہوئے فرحت علی میر نے آزاد کشمیر کے آئینی سٹرکچر، سیاسی کمزوریوں اور انتظامی ناکامیوں پر کھل کر بات کی۔
پروگرام کے اختتام پر پاکستان پریس کلب یوکے مڈلینڈز کی جانب سے انہیں خراجِ تحسین پیش کیا گیا۔اور یاد گار تصاویر بھی بنوائیں گئیں۔

23/11/2025

شہید ارشد شریف کی تیسری برسی — معروف صحافیوں اور ہیومین رائٹس ایکٹویسٹ کا شاندار خراجِ عقیدت

برمنگھم (سی این آئی نیوز )برمنگھم میں پاکستانی نڈر اور بہادر صحافی شہید ارشد شریف کی تیسری برسی کے موقع پر ایک پروقار تقریب منعقد ہوئی جس میں ممتاز صحافیوں عمران ریاض خان، صابر شاکر، سبی کاظمی، نجم الحسن باجوا، سید عابد کاظمی، نقیب راجہ، زاہد پرویز، انعام الحق نامی، آسیہ حسین اور متعدد ہیومین رائٹس ایکٹویسٹ نے خطابات کئے۔ شرکاء نے شہید ارشد شریف کی جرات، سچائی اور اصولی صحافت کو زبردست خراجِ عقیدت پیش کرتے ہوئے کہا کہ ان کا مشن اور قربانی ہمیشہ زندہ رہے گی۔

مقررین نے کہا کہ ارشد شریف ایک نڈر، بہادر اور سچ کے راستے پر ثابت قدم صحافی تھے۔ ان کی سچائی اور جرأت کو خاموش کرانے کیلئے انہیں شہید کر دیا گیا، لیکن ان کی شہادت ایک ایسی مشعل ہے جو ہمیشہ حق کی راہ دکھاتی رہے گی۔ شرکاء نے اس عزم کا اظہار کیا کہ ارشد شریف کی آواز اور مشن کو زندہ رکھنا ہم سب کی ذمہ داری ہے تاکہ ان کے قاتل ہمیشہ رسوائی میں رہیں۔

صحافی عمران ریاض نے کہا کہ رجیم چینج کے بعد پاکستان میں انسانی حقوق کی بدترین خلاف ورزیاں ہوئیں، خواتین پر گولیاں چلائی گئیں، انہیں جبری اغوا کیا گیا اور رول آف لاء کا جنازہ نکال دیا گیا۔ انہوں نے کہا کہ ظلم کے خلاف آواز اٹھانا ہر جمہوری معاشرے کی بنیاد ہے اور ہم اس جدوجہد کو جاری رکھیں گے۔

معروف اینکر صابر شاکر نے کہا کہ ’’زندگی بھر کا استثنیٰ یا شیطان نے لیا تھا یا پھر عاصم منیر نے۔ جس طرح شیطان پر قیامت تک لعنتیں پڑتی رہیں گی، اسی طرح تاریخ ظالموں کو کبھی معاف نہیں کرے گی‘‘۔

سینئر صحافی سبی کاظمی نے کہا کہ ’’حق پر کھڑے رہنے والوں کے نام ہمیشہ زندہ رہتے ہیں، جبکہ ظالم مٹ جاتے ہیں اور تاریخ انہیں فراموش کر دیتی ہے‘‘۔

مڈلینڈز برمنگھم کے صحافیوں کی ترجمانی کرتے ہوئے سید عابد کاظمی نے کہا کہ ظلم کے خلاف خاموش رہنا ظالم کا ساتھ دینے کے مترادف ہے۔ انہوں نے کہا کہ ہمیں حق کے ساتھ کھڑے ہو کر آواز اٹھانا ہوگی تاکہ قیامت کے دن ظالموں کے گناہ ہمارے حصے میں نہ آئیں۔

تقریب کے میزبان نقیب راجہ نے کہا کہ ’’نبی کریم ﷺ نے جنگوں میں حصہ لے کر یہ ثابت کیا کہ جہدوجہد کے بغیر آزادی نہیں ملتی‘‘۔

تقریب کا آغاز لالہ قدیر نے تلاوتِ قرآن پاک سے کیا، جس کے بعد پاکستان کا قومی ترانہ بجایا گیا اور شرکاء احتراماً کھڑے ہوگئے۔ ہال میں ’’پاکستان زندہ باد‘‘ کے نعرے گونجتے رہے۔

معروف صحافی جب ہال میں داخل ہوئے تو شرکاء نے پرجوش انداز میں ان کا استقبال کیا۔
زاہد پرویز نے ابتدائی خطاب کرتے ہوئے مہمانوں کو خوش آمدید کہا جبکہ نقیب راجہ نے نظامت کے فرائض سرانجام دیے۔

پروجیکٹر پر ارشد شریف کی ویڈیو اور ان کی اہلیہ کا پیغام سنایا گیا، جس نے شرکاء کو جذباتی کر دیا۔
نیا ترانہ “سوال ہوگا، جواب ہوگا” چلایا گیا جس نے ماحول میں جوش و جذبہ بھر دیا۔

پروگرام کے اختتام پر مولانا الطاف حسین نے شہید ارشد شریف اور ان کی والدہ کی مغفرت، پاکستان میں آئین و قانون کی بحالی اور امن و استحکام کیلئے دعاء کروائی۔

اس کے بعد شرکاء نے عمران ریاض، صابر شاکر، سبی کاظمی اور دیگر شخصیات کے ساتھ یادگار تصاویر بنوائیں۔اس دوران سی این اائی اردو کی جانب سے لی گئیں تصاویر۔