24/04/2025
BAYAAN AY SOO SAARTAY JAALIYADDA BEESHA SADE EE BIRMINGHAM
Taariikh: 20/04/2025
Jaaliyadda Beesha Sade ee Birmingham, waxaan si dhow ula soconnaa xaaladda cakiran ee ka jirta gobolka Gedo, gaar ahaan degmooyinka Baladxaawo, Luuq, iyo guud ahaan gobolka. Waxaan ka damqanaynaa dhibaatooyinka isa soo taraya, waxaanan halkan ka soo saarnay bayaabkaan rasmiga ah oo ku wajahan arrimahaasi:
1. Colaadda ka taagan degmada Baladxaawo
• Waxaan ugu baaqeynaa dhammaan dhinacyada ku lugta leh in si deg deg ah loo joojiyo colaadda ka socota degmada Baladxaawo.
• Waxaan taageereynaa baaqyada nabadeed ee ay soo jeediyeen waxgaradka gobolka, gaar ahaan kuwa degmada Baladxaawo.
• Ciddii diidda baaqyada nabadeedna waxaa dusha ka saaran mas’uuliyadda wixii ka dhasha oo dhib, waxaana lagula xisaabtami doonaa si buuxda.
2. Xirnaanshaha garoomada diyaaradaha
• Waxaan ugu baaqeynaa dowladda in ay si shuruud la’aan ah u furto dhammaan duulimaadyada ka baxa kuna soo dagaya gobolka Gedo.
• Dhibaatada ka dhalatay xirnaanshahooda waxaa mas’uuliyadeeda leh cid kasta oo ka dambeysay, waxaana loo baahan yahay in lagula xisaabtamo.
3. Buundooyinka go’an
• Waxaan aad ooga walaacsanahay siada masuuliyad daridda ah ee ay dawladda faderaalka iyo dawlad goboleedkaba ay uga gaabiyeen dayactirka halbowlayaasha isku xira degmooyinka gobolka, kuwaas oo go’naa muddo ka badan hal sano.
• Waxaan u mahadcelineynaa dhammaan dadkii iyo hay’adihii ka qaybqaatay, dhaqaale ahaan iyo moral ahaanba, dib u dhiska buundooyinka.
• Si gaar ah waxaan ugu mahadcelineynaa shirkadda Dahabshiil kaalinta hoggaamineed ee ay ka qaadatay hawshan, iyo sida ay codsigii bulshada uga soo jawaabtay, iyadoo bixisay $300,000.
• Waxaan ku boorrineynaa cid kasta oo kharash ku ururisay magaca buundooyinka in ay sii labo jobaaraan dadaalkoodii, islamarkaana ay u istaagaan sidii ay u mideyn lahaayeen waxqabadkooda, sifo ay u hirgasho ujeedkii laga lahaa.
4. Xaaladda dagaal ee degmada Luuq Waxaan ku baaqeynaa in dagaalka ka socda degmada Luuq lagu dhammeeyo wadahadal nabadeed, si loo badbaadiyo shacabka iyo deegaanka.
5. Doorka Jaaliyadda UK
Jaaliyadda Beesha Sade ee UK waxay diyaar u tahay in ay door muuqda ka qaadato nabadeynta gobolka, dhex-dhexaadinta beelaha walaalaha ah iyo horumarinta deegaanka. Waxaa la isku raacay in la xoojiyo wada-shaqeynta iyo mideynta dadaallada jaaliyadaha.
6. Taageerada Odayaasha Dhaqanka Waxaan si buuxda u taageeraynaa baaqyada nabadeed ee kasoo baxay wax garadka kala duwan ee ay ka kooban tahay Bulshada ku nool magaalada Baladxaawo. Jaaliyaddu waxay garab taagan tahay dadaallada lagu xasilinayo nabadda gobolka guud ahaan, waxayna dhiirrigelinaysaa in beelaha kale ee deegaanka la degan ay ku wada noolaadaan si nabad iyo deris wanaag ah leh.
7. Dowladda Federaalka iyo Jubbaland
Labada dhinac — Dowladda Federaalka iyo Jubbaland — midna wax muuqda uma qaban gobolka Gedo. Khilaafkooda siyaasadeed ayaa si toos ah loogu xawilay gudaha gobolka, taasoo sababtay colaado, burbur maamul iyo xirnaansho adeegyo muhiim ah.
Waxaan si cad u leenahay: haddii aadan wax tarayn, dhibna ha sii kordhinin!
Gunaanad
Shacabka gobolka Gedo wuxuu mudan yahay nabad, adeegyo iyo horumar. Waxaan ugu baaqaynaa dhammaan dadka kasoo jeeda gobolka in ay gacmaha is qabsadaan, khilaafka iska daayaan, una jeestaan dib u dhiska iyo midnimada bulshada.
Waa waajib qaran iyo mid qoys.
�Wabillaahi Towfiiq.��Jaaliyadda Beesha Sade ee Birmingham
