23/06/2026
Kulan hal maalin ah oo lagu soo bandhigay laguna falanqeeyey warbixinta iyo natiijooyinka ka soo baxay daraasad dib-u-eegis ah oo lagu sameeyay kharashaadka ku baxa Wadaagaha Daryeelka Bulshada (Social Protection Sector) ayaa maanta lagu qabtay Hotel Jees ee magaalada Hargeysa.
Daraasaddan waxaa si wadajir ah u hirgeliyay Wasaaraddaha Maaliyadda iyo Horumarinta Dhaqaalaha, Wasaaradda Shaqada, Arrimaha Bulshada iyo Qoyska, iyo Hay’adda UNICEF. Kulanka waxaa ka qaybgalay masuuliyiin iyo wakiillo ka socday hay’adaha dawladda, ururrada bulshada rayidka ah iyo hay’addaha kale ee ka shaqeeya arrimaha daryeelka bulshada.
Ujeeddada kulanka ayaa ahayd in si qoto dheer loo lafo-guro natiijooyinka daraasadda, loona helo xog iyo caddeymo lagu qiimeeyo heerka kharashaadka ku baxa Wadaagaha Daryeelka Bulshada, xaaladda uu ku sugan yahay wadaagahani, iyo sidii xogtaas loogu salayn lahaa qorshaynta iyo qoondaynta miisaaniyadda sannadaha soo socda.
Agaasimaha Guud ee Wasaaradda Maaliyadda iyo Horumarinta Dhaqaalaha Md. Maxamed Xasan Saleebaan, oo si rasmi ah u furay kulanka, ayaa tilmaamay in daraasaddani qayb ka tahay dib-u-eegis lagu sameeyay kharashaadka ku baxa afar wadaage oo muhiim u ah adeegyada bulshada, kuwaas oo kala ah:
● Wadaagaha Biyaha iyo Fayadhowrka;
● Wadaagaha Waxbarashada;
● Wadaagaha Caafimaadka;
● Wadaagaha Daryeelka Bulshada.
Waxa uu xusay in warbixinahani ay dowladda ka caawinayaan inay qiimeyso heerka waafaqsanaanta kharashaadka la geliyo wadaagyadan iyo natiijooyinka laga gaadhayo, isku-xidhnaanta u dhexaysa qorshayaasha horumarineed iyo maalgelinta la bixiyo, iyo sidoo kale sida ugu habboon ee loo isticmaalo qoondaymaha miisaaniyadeed si loo gaadho adeegyo tayo leh iyo go’aanno ku salaysan xog sugan.
Sidoo kale, Agaasimaha Guud ee Wasaaradda Shaqada, Arrimaha Bulshada iyo Qoyska, Md. Maxamed Xaashi, oo ugu horreyn hadal ka jeediyay kulanka, ayaa soo dhaweeyay ka-qaybgalayaasha, isaga oo adkeeyay muhiimadda ay daraasaddani u leedahay horumarinta adeegyada la gaadhsiiyo bulshada nugul. Waxa uu sidoo kale ku boorriyay ka-qaybgalayaasha inay si qoto dheer u lafaguraan warbixinta si looga soo saaro talooyin iyo go’aanno wax-ku-ool ah.
Kulankan ayaa qayb ka ah dadaallada ay dowladda Somaliland ku xoojinayso maamulka maaliyadda guud iyo hubinta in khayraadka qaranka loo isticmaalo si hufan, wax-ku-ool ah, isla markaana waafaqsan mudnaanta horumarineed ee dalka.
=𝑾𝒂𝒃𝒊𝒍𝒍𝒂𝒂𝒉𝒊 𝑻𝒂𝒘𝒇𝒊𝒊𝒒=
𝐖𝐚𝐚𝐱𝐝𝐚 𝐗𝐢𝐝𝐡𝐢𝐢𝐝𝐡𝐤𝐚 𝐃𝐚𝐝𝐰𝐞𝐲𝐧𝐚𝐡𝐚 𝐢𝐲𝐨 𝐗𝐨𝐠𝐭𝐚
🌐 𝐬𝐥𝐦𝐨𝐟.𝐨𝐫𝐠
📧 𝐢𝐧𝐟𝐨@𝐬𝐥𝐦𝐨𝐟.𝐨𝐫𝐠
☎️ 𝟗𝟒𝟗𝟒
📱 𝐖𝐡𝐚𝐭𝐬𝐀𝐩𝐩: +𝟐𝟓𝟐 𝟔𝟓 𝟕𝟕𝟐 𝟗𝟗𝟗𝟗
