16/09/2026
Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa maalintii labaad ee kulamadiisa Capitol Hill ee Washington, D.C., kulanno gaar gaar ah la yeeshay Xildhibaan (Congressman) Brian Mast (R–Florida) oo ah Guddoomiyaha (Chairman) Guddiga Arrimaha Dibadda ee Golaha Wakiillada ee Maraykanka iyo Senator Mike Rounds (R–SD).
Waxa xusid mudan in labadan mudane ay curiyeen xeerar u adeegaya danaha Somaliland, xeerarkaasi oo kala ahaa: Somaliland Partnership Act (S. 3861)March 17, 2022 oo uu hindisay Senator Mike Rounds iyo Department of State Policy Provisions Act, on September 11, 2025; H.R. 5300 oo uu curiyey Congressman Brian Mast (R–Florida).
Kulannadan ayaa diiradda lagu saaray xoojinta wada-shaqaynta iyo iskaashiga istiraatiijiga ah ee Somaliland iyo Maraykanka, gaar ahaan dhinacyada amniga iyo xasilloonida gobolka, amniga badda, Gacanka Cadmeed iyo Badda Cas, iyo sida oo kale ganacsiga, maalgashiga iyo fursadaha iskaashi dhaqaale ee labada dhinac.
Madaxweyne Cabdiraxmaan Cirro ayaa Xildhibaannada ka tirsan Congress-ka Maraykanka si gaar ah ugu baraarujiyey
muhiimadda juqraafiyeed, istiraatiijiyadeed iyo dhaqaale ee ay leedahay Somaliland, iyada oo ku taalla marin-biyoodka muhiimka ah ee Gacanka Cadmeed iyo Badda Cas. Madaxweynuhu waxa uu tilmaamay in iskaashi qoto-dheer oo ay yeeshaan Somaliland iyo Maraykanku uu wax weyn ka tari karo xoojinta amniga gobolka, ilaalinta isu-socodka ganacsiga caalamiga ah iyo horumarinta danaha dhaqaale ee labada dhinac.
Dhinaca kale, Madaxweynaha Jamhuuriyadda Somaliland
waxa uu hoosta ka xarriiqay in Somaliland ay aaminsan tahay isla markaana ay ku dhaqanto qiyamka iyo mabaadi’da (values) uu Maraykanku ku dhisan yahay; sida xorriyadda, hannaanka dimuqraadiyadda, amniga iyo xasilloonida, horumarka, iyo dhawrista xuquuqda aadamaha.
Waxa uu xusay in qiyamkan la wadaago ay yihiin saldhig muhiim ah oo lagu dhisi karo iskaashi istiraatiiji ah oo waara, ku dhisan kalsooni, dano wadaag iyo aragti fog.
Booqashada Madaxweynaha JSL ee Capitol Hill, waxa ay sida oo kale fursad muhiim ah u tahay in si toos ah loola wadaago dhinacyada siyaasadda iyo sharci-dejinta Maraykanka aragtiyaha, danaha iyo fursadaha istiraatiijiyadeed ee Somaliland, iyada oo la dhisayo xidhiidho cusub iyo is-faham ku salaysan iskaashi amni, ganacsi, maalgashi, horumar iyo xasilloonida gobolka.
𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇
𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫),
𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝
