07/04/2026
سوشل میڈیا پر ایسی تصاویر اور ویڈیوز دیکھنے کو مل رہی ہیں جو مری میں لینڈ سلائیڈنگ کی ہولناک تباہی کی عکاسی کر رہی ہیں۔ میں نے اپنے دوستوں سے بھی بات کی تو معلوم ہوا کہ کافی لوگوں کا بھاری نقصان ہوا ہے۔
یہ مسئلہ مری جیسے پہاڑی علاقوں میں رہنے والوں کے لیے ایک عذاب بن چکا ہے۔ اس کی بنیادی وجہ ہماری اپنی کوتاہی، غفلت اور سب سے بڑھ کر غیر منصوبانہ تعمیرات ہیں۔ مری کی وہ خوبصورت وادیاں اور قدرتی علاقے جو کبھی سیاحت اور فطرت کی علامت ہوا کرتے تھے، آج کنکریٹ کے جنگل میں تبدیل ہو چکے ہیں۔
ایک طاقتور مافیا نے ندی نالوں اور قدرتی آبی گزرگاہوں پر قبضہ کر کے وہاں بڑی بڑی عمارتیں کھڑی کر دی ہیں۔ جہاں کبھی پانی کا قدرتی بہاؤ ہوتا تھا، وہاں اب پلازے اور عمارتیں ہیں۔ اس وجہ سے پانی کا رخ موڑ دیا گیا اور وہ غریب آبادیوں اور کمزور مٹی والے علاقوں کی طرف بھرنے لگا۔ جب مٹی کمزور ہو اور پانی کا دباؤ بڑھے تو لینڈ سلائیڈنگ کا خطرہ خود بخود بڑھ جاتا ہے، اور یہی وجہ ہے کہ آج مری میں یہ تباہی عام ہو گئی ہے۔
اس ساری صورتحال میں نہ صرف مقامی انتظامیہ نے رشوت لے کر آنکھیں بند رکھیں بلکہ سول سوسائٹی جیسے اداروں نے بھی اپنا فرض ادا نہیں کیا اور خاموشی اختیار کی۔ جب بات میڈیا کی آئے تو افسوس کے ساتھ کہنا پڑتا ہے کہ میڈیا کے لوگوں نے بھی ان مافیا اور بلڈرز کے خلاف آواز اٹھانے کے بجائے ہاتھ صاف کیئے۔ وہ اس بات پر زور دیتے رہے کہ یہ سب کچھ نارمل ہے، لیکن حقیقت میں ندی نالوں پر ہونے والی غیر قانونی تعمیرات کے خلاف انہوں نے کبھی بھی مؤثر اور آواز بلند نہیں کی۔بلڈرز اور کاروباری حضرات پیسے کی طاقت سے قوانین کو توڑتے ہیں اور جب کبھی ان کے خلاف کارروائی ہونے لگتی ہے تو کچھ لوگ ذات پات اور برادری کے نام پر احتجاج کر کے ان کا ساتھ دیتے ہیں۔ وہ یہ بھول جاتے ہیں کہ وقتی فائدے کے پیچھے وہ آنے والی نسلوں کا مستقبل داؤ پر لگا رہے ہیں۔جب آفت آتی ہے تو سب کچھ تباہ ہو جاتا ہے۔ گھر مٹی میں دب جاتے ہیں، لوگ بے سہارا ہو جاتے ہیں اور سب سے زیادہ نقصان غریب اور عام آدمی کا ہےآج مری کی لینڈ سلائیڈنگ میں جِن غریب لوگوں کا سب کچھ تباہ ہو گیا، اِن سے پوچھنے والا کوئی نہیں۔ وہ لوگ جنہوں نے اپنی پوری زندگی کی کمائی اپنے گھروں پر لگا دی تھی، آج وہ کھلے آسمان تلے بے سہارا زندگی گزارنے پر مجبور ہیں۔
اس ساری تباہی کا ذمہ دار وہ مافیا ہے جس نے ندی نالوں پر قبضہ کر کے کنکریٹ کے پہاڑ کھڑے کر دیے۔ جب تک سول سوسائٹی اور عام لوگ ان کے خلاف آواز اٹھا کر انہیں سزا نہیں دلائیں گے، تب تک غریب لوگ اسی طرح نقصان اٹھاتے رہیں گے۔
میری گزارش ہے کہ حکومت اور عوام مل کر اس لینڈ مافیا کے خلاف آواز اٹھائیں۔ ان لوگوں کے خلاف سخت کارروائی ہونی چاہیے جنہوں نے اپنے مفاد کے لیے مری جیسے قدرتی علاقے کا نظام خراب کر کے اسے کنکریٹ کا پہاڑ بنا دیا۔ ہمیں چاہیے کہ ہم ایسے لوگوں کی حوصلہ افزائی نہ کریں، کیونکہ آج جو نقصان ہو رہا ہے، اس کا بوجھ آنے والی نسلیں اٹھائیں گی۔
@top fansndsliding
