17/01/2026
Somaliland Waa Qaran Awood leh oo Difaacaya Dhul-kiisa, Baddiisa iyo Karaamadiisa
Jamhuuriyadda Somaliland waa qaran dimuqraadi ah oo jecel nabadda, xasiloonida, iyo wada-noolaanshaha bulshada caalamka, kuwaas oo ah tiirarka aasaasiga ah ee lagu dhisay jiritaankeeda qaranimo. Tan iyo markii ay dib ula soo noqotay madax-bannaanideeda, Somaliland waxay mudnaan gaar ah siisay dhismaha nidaam dawladnimo oo hufan, hannaan siyaasadeed oo dimuqraadi ah, iyo ciidamo qaran oo u taagan difaaca dalka iyo sugidda amniga qaranka.
Jacaylka nabadda iyo Somaliland macnihiisu maaha in la cabudhin karo jiritaankeeda qaranimo ama lagu xadgudbi karo madax-bannaanideeda. Xukuumadda Somaliland, ciidamada qaranka, iyo shacabkeedu waxay si buuxda diyaar ugu yihiin difaaca dhulkooda, dalkooda, iyo karaamadooda.
Ma jirto awood taariikheed ama mid siyaasadeed oo baabi’in karta xaqiiqada Somaliland ee ka hanaqaadday Geeska Afrika. In ka badan soddon sano, Somaliland waxay si madax-bannaan u dhisaysay dowladnimo ku salaysan nabad, xasillooni, iyo hannaan dimuqraadi ah oo shaqeynaya. Hay’adaha dawliga ah, doorashooyinka nabdoon, iyo ku-dhaqanka sharciga ayaa markhaati u ah bisaylka siyaasadeed iyo horumarka ay gaadhay.
Somaliland waxay si joogto ah u horumarisaa kaabeyaasha dhaqaalaha iyo adeegyada bulshada, iyadoo xoojinaysa wada-noolaanshaha bulshada isla markaana si masuuliyad leh u ilaalinaysa amniga dhulkeeda iyo marin-biyoodka istiraatiijiga ah ee Gacanka Cadmeed. Sidoo kale, waxay door muuqda ka qaadataa xasilinta gobolka iyo iskaashiga deriska, taasoo ka dhigaysa tiir nabadeed oo lagu kalsoonaan karo.
Jamhuuriyadda Somaliland waxay leedahay ciidamo qaran oo awood badan, kuwaas oo goor kasta u diyaarsan difaaca qarannimada dalka, ilaalinta amniga gudaha, iyo sugidda xuduudaha qaranka. Ciidamadani maaha kuwo duullaan ku ah cid kale, balse waa cudud difaac oo si buuxda ugu diyaarsan sugida xasilloonida, ka hortagga khataraha amni, iyo xaqiijinta badbaadada muwaadiniinta, taas oo ka dhigaysa tiir muhiim u ah jiritaanka dawladnimada Somaliland.
Arrintani waxay muujinaysaa in Somaliland ay tahay qaran masuul ah oo isku dheelli-tiraya nabad-jacayl, deris-wanaag, iyo difaac adag oo ka dhan ah xadgudub kasta oo lagu sameeyo madaxbannaanideeda iyo danaha qaranka. Somaliland waxay si cad oo aan mugdi ku jirin u u iftiiminaysaa in ay diyaar u tahay inay si masuuliyad leh u fuliso waajibaadkeeda qaran ee sugudida xuduudaheeda dhuleed iyo badeed.
Ugu dambayn, Somaliland waxay mar walba u taagan tahay nabad, xasilooni, deris-wanaag, iyo horumar, iyadoo si buuxda u gudanaysa waajibaadkeeda dastuuriga ah ee ilaalinta midnimada dhulka, amniga qaranka, iyo danaha shacabka.
