23/07/2025
[DHACDO LAYAAB LEH]
Taariikhdu markay ahayd 3/7/2025, habeen Jimce soo galayo, waxaa nin hubaysan oo aan la aqoonsan rasaas ku furay walaalkay, Abubakar Abdillahi Habbane, iyo laba wiil oo dhalinyaro ah oo ay wada taagnaayeen meel u dhow gurigayaga magaalada Hargeysa. Ka dibna wuu baxsaday.
Dambiiluhu wuxuu toosh indhaha kaga qabtay dhalinyarada, markay ku yidhaahdeen: “Tooshka naga daa!” Rasaas ayuu ku furay. Walaalkay dhaawac culus ayaa ka soo gaadhay caloosha iyo gacanta midig. Labadii dhalinyaro ee kale waxba ma soo gaadhin, laakiin sida warar na soo gaadhay sheegayaan, qofka hubaysani wuxuu ku talo galay inuu dhammaantood dilo. Balse Alle wuu ka badbaadiyay.
Inkasta oo ay maalin jimce ahi soo gashay, taasoo adkaysay in adeeg caafimaad oo degdeg ah la helo, haddana dhakhtarka weyn ee Hargeysa iyo dhakhaatiirtii ka hawlgalaysay waxay walaalkay ku sameeyeen qalliin naf-hur ah oo qaatay in ka badan 5 saacadood. Waxaa qallinkaasi lagaga soo saaray xabbaddii caloosha fadhiisatay ee mindhicirrada waxyeeleysay. Alle wuu ku guuleeyay, xaaladdiisa caafimaadna hadda way roon tahay.
Labadii wiil ee walaalkay la taagnaa waxay sheegeen sifooyinka uu leeyahay qofka dhibka geystay, waxayna ku adkaysteen inuu yahay qof aan ka fogayn xaafadda, muuqiisana ay dhawr jeer horay u arkeen. Halkaa markay marayso arrintu, waxaanu sugaynay in hay’adaha ammaanku si xirfadaysan u baadi-goobaan oo ay soo qabtaan qofka laga shakisan yahay, maadaama ay iyagu u xil-saaran yihiin, markhaatiyaalna hayaan.
Muddo saddex ilaa afar cisho ah markii ay ka soo wareegtay dhacdadii, hay’adihii ammaanka wax jawaab ah k**a iman. Sidaas darteed, annaga ayaa si isakayaga ah u raadinay eedaysanihii aanu tuhmaynay. Nasiib darro, wuu naga il horreeyay, waana baxsaday. Markii uu ogaaday in lagu raad joogo – inkasta oo xaggayaga ay arrintu ahayd shaki oo kaliya – wuxuu la hadlay odayaashii reerkiisa, waxaanu qirasho ka sameeyay dambigii uu galay. Si kastaba ha ahaatee, isma soo dhiibin, ilaa haddana haayadaha ammaanku ma soo qaban.
Haddaba intii arrintu socotay, waxaa noo soo baxay firfircooni la’aan ka jirta hay’adaha ammaanka dhaxdiisa gaar ahaa booliska. Saraakiil sare oo aanu waraysanay waxay noo sheegeen inay jirto isku-xidhnaan la’aan u dhexeysa hay’adaha ammaanka. Waxay noo raaciyeen in ay macquul tahay in arrintan culus ee amniga la xidhiidha, ee ka dhacday caasimadda, aanay gaadhin xafiiska taliyaha booliska — ama aanay noqoninba “issue” weyn oo ammaanka khuseeya oo gaadha xafiisyada sare ee amniga.
F.G: Sawirka hoos ka muuqda waa dambiilaha toogashada gaystay. Waxaa la sheegay inuu Ceerigaabo aaday, mar kalena in uu Hargeysa ku dhex dhuumanayo ayay wararku sheegayaan. Fadlan, ciddii aragta ha la soo socodsiiso hay’adaha ammaanka, ama annagaba nala soo xidhiidha.
Xigasho: khaalid Habane
![[DHACDO LAYAAB LEH]Taariikhdu markay ahayd 3/7/2025, habeen Jimce soo galayo, waxaa nin hubaysan oo aan la aqoonsan rasa...](https://img3.medioq.com/039/834/754665340398349.jpg)
