09/09/2026
आफैंलाई जोखिममा राखेर अरूको जीवन बचाइन्-रसुवाको विनाशकारी बाढीमा क्याप्टेन प्रिया अधिकारी बनिन् सयौँ पीडितको ‘आशाको उडान’🫡
रसुवा -भदौ १० गते आएको विनाशकारी बाढीले भोटेकोशी र त्रिशूली नदी आसपासका बस्ती, सडक, पुल तथा महत्वपूर्ण पूर्वाधारमा ठूलो क्षति पुर्यायो। सडक र पुल बगेर अधिकांश जमिनी बाटो अवरुद्ध भएपछि प्रभावित नागरिकको उद्धारका लागि हेलिकप्टर नै प्रमुख माध्यम बन्न पुग्यो।यही कठिन परिस्थितिमा क्याप्टेन प्रिया अधिकारीले जोखिमपूर्ण मौसम र कठिन हिमाली भूगोलबीच निरन्तर उद्धार उडान भरिन्। बाक्लो कुहिरो, कालो बादल, तीव्र हावा र कमजोर दृश्यताबीच पनि उनले प्रभावित क्षेत्रमा पुगेर घा’इते, अलपत्र तथा जोखिममा रहेका नागरिकलाई सुरक्षित स्थानमा पुर्याउने काम गरिन्।
अधिकारीका अनुसार बाढीको दिन प्रभावित क्षेत्रमा पुग्दा चारैतिर आफन्त गुमाएका परिवारको रुवाबासी, घा’इतेको छटपटी र त्र’सित नागरिकको भीड थियो। यस्तो दृश्यले आफूलाई भावुक बनाए पनि उद्धारको जिम्मेवारीले थप हौसला दिएको उनले बताएकी छन्।उनी दिनमै १० पटकसम्म उडान भरेर प्रभावित क्षेत्रमा पुग्ने गरेको बताइएको छ। टिमुरे तथा नेपाल–तिब्बत सीमावर्ती क्षेत्रसहित विभिन्न स्थानमा फसेका नागरिक, घाइते तथा विस्थापितलाई सुरक्षित स्थानमा पुर्याउन उनको हेलिकप्टर निरन्तर परिचालन भएको थियो।
हेलिकप्टर अवतरण गरेपछि पनि प्रिया ककपिटमै सीमित भइनन्। उनी आफैं हिलोमा पुगेर वृद्धवृद्धालाई सुरक्षित स्थानमा लैजान सहयोग गर्ने, डराएका बालबालिकालाई सम्झाउने र उद्धार गरिएकालाई हेलिकप्टरभित्र सुरक्षित राख्नेसम्मका काममा प्रत्यक्ष खटिएको विवरण छ।बाढीपछि उनले १०० भन्दा बढी उद्धार तथा राहत उडान गरेको बताइएको छ। सडक र पुल बाढीले बगाएर जमिनबाट सम्पर्क कठिन बनेको अवस्थामा उनको हेलिकप्टर प्रभावित नागरिकका लागि आशाको माध्यम बनेको थियो।कठिन मौसम, साँघुरो हिमाली भूगोल र लगातारको उडानका बाबजुद उद्धारलाई प्राथमिकता दिँदै उनले देखाएको साहसले विपद्को समयमा मानवीय सेवाको उदाहरण प्रस्तुत गरेको छ। रसुवाको विनाशकारी बाढीबीच जोखिमपूर्ण आकाश चिर्दै जीवन बोकेर उडेको क्याप्टेन प्रियाको हेलिकप्टर धेरैका लागि ‘आशाको उडान’ बनेको थियो।
