27/12/2025
Waa dhacdo naxdin leh oo ka dhacday dalka Faransiiska, taas oo ku saabsan dhakhtar suuxiye ah oo lagu magacaabo Frédéric Péchier, kaas oo si qarsoodi ah u waxyeeleyn jiray bukaannada isagoo sumayn jiray bacaha suuxinta (anesthesia bags). Ujeeddadiisu waxay ahayd in bukaanku qarka u fuulo dhimasho xilliga qaliinka, ka dibna uu isagu soo dhex galo sidii qof badbaadiye ah oo nolosha ku soo celinaya, si uu dadka agtooda uga noqdo halyey aan laga maarmi karin.
Dhakhtarkan dembiilaha ah oo jira 53 sano, wuxuu xeeladdan u isticmaalayay inuu ku gaaro labo hadaf: inuu u muuqdo geesi dadka badbaadiya iyo tan kale, inuu meel uga dhaco sumcadda asxaabtiisa kale ee dhakhaatiirta ah isagoo dadka u tusaya inay yihiin kuwo aan shaqadooda aqoon oo dila bukaannada, si uu u helo dalacsiin dhan ka shaqada ah.
Waxyeeleynta uu gaystay bukaannada ayaa gaartay ilaa 30 bukaan, kuwaas oo 12 ka mid ah ay geeriyoodeen, halka 18 kale ay la dhibtoon doonaan dhibaatooyin caafimaad inta noloshooda ka dhiman.
Xafiiska baaritaanka ee booliska magaalada ayaa ka shakiyay tirada dhimashada ee isbitaalkaas ku soo badatay, waxayna bilaabeen baaritaan aad u qarsoodi ah. Baaritaankaas ayaa fashiliyey in Frédéric Péchier uu mas'uul ka ahaa dembiyadaas oo dhan, isagoo raaxo ka heli jiray inuu xukumo nolosha iyo dhimashada aadanaha.
