07/10/2025
Hay’adda Tuulada Carruurta ee SOS Somaliland ayaa soo qabanqaabisay booqasho aqoon korodhsi iyo aragti-qaadasho (Exposure Visit) oo lagu tagey Golaha Wakiillada Jamhuuriyadda Somaliland, taas oo loogu talagalay in kor loogu qaado aqoonta iyo ka qaybgalka carruurta iyo dhalinyarada ee arrimaha dawladnimada iyo hannaanka dimuqraadiyadda.
Booqashada waxaa ka qayb galay 20 xubnood oo isugu jiray Golaha Carruurta (Child Parliament) iyo U Doodayaasha Xuquuqda Carruurta (Child Rights Groups), kuwaas oo h**e u soo dhammaystay tababaro ku saabsan u doodista, hogaaminta, ka qaybgalka miisaaniyadaha iyo qorshayaasha, iyo fahamka Xeerka Xuquuqda Carruurta Somaliland (Xeer Lr. 102/2022).
Markii ay tageen Golaha Wakiillada, xubnaha carruurta waxaa si diirran ugu soo dhaweeyay Xoghayaha Golaha Wakiillada Mudane Abdirizak Siciid Ayaanle, Agaasimaha Waaxda Qorshaynta Mudane Abdinasir, Agaasimaha Xidhiidhka Bulshada iyo Warbaahinta Mudane Abdillahi, iyo Xoghayaha Guddi-hoosaadka Arrimaha Gudaha Mudane Mohamed Aynaashe.
Intii ay joogeen Golaha, xubnaha carruurta iyo u doodayaasha xuquuqda carruurta waxay barteen habraaca dejinta iyo ansixinta sharciyada, qaabka fadhiyada golaha loo maamulo, nidaamka codbixinta mudanayaasha, iyo xeer-hoosaadka iyo anshaxa Golaha Wakiillada. Waxa kale oo ay booqdeen Maktabadda Golaha Wakiillada, halkaas oo ay ku barteen sida loo kaydiyo, loo habeeyo, loona ilaaliyo xogta sharciyada iyo taariikhda golaha.
Booqashadan waxaa hoggaaminayay masuuliyiin ka tirsan SOS Children’s Villages Somaliland, oo uu horkacayay Ali Mohamoud (Ali-Qaran), iyadoo ay weheliyeen Muna Ahmed iyo Ayan Esse.
Ugu dambayn, booqashadani waxay xubnaha Golaha Carruurta iyo U Doodayaasha Xuquuqda Carruurta siisay fursad qiimo leh oo ay ku fahmaan hannaanka dimuqraadiyadeed ee dalka, isla markaana kaalin muuqata ka qaadanaysaa kobcinta hogaamiyeyaasha mustaqbalka iyo xoojinta doorka carruurta ee ka qaybgalka bulshada iyo difaaca xuquuqdooda.
