TM MEDIA

12/10/2025

တပ်နဲ့ပြည်သူဆက်ဆံရေး၊ လက်ပံလှဖြစ်စဉ်အကြံပြုချက်

ပြည်သူလူထုရဲ့ထောက်ခံမှုဟာ တော်လှန်ရေးရဲ့ အသက်သွေးကြောဖြစ်ပါတယ်။

တော်လှန်ရေးသမားကောင်းပီသဖို့ဆိုရင် လက်နက်ပါတဲ့သူ အဖွဲ့အစည်းဘက်ကလူက ပိုပြီးသဘောထားကြီးဖို့လိုပါတယ်။ ပြည်သူက ရိုင်းရိုင်းစိုင်းစိုင်းပြောလာရင်တောင် ငါတို့ကလက်နက်ကိုင်ထားတဲ့အတွက် ငါတို့ကသေနတ်ကိုင်ထားတဲ့အတွက် သည်းခံလိုက်မယ်၊ အနစ်နာခံလိုက်မယ်ဆိုတဲ့ စိတ်ထားမျိုးထားဖို့လိုပါတယ်။

တပ်နဲ့ပြည်သူဆက်ဆံရေး၊ စဉ့်ကူးလက်ပံလှဖြစ်စဉ်အကြံပြုချက်ပြည်သူလူထုရဲ့ထောက်ခံမှုဟာ တော်လှန်ရေးရဲ့ အသက်သွေ...

12/10/2025

ကြံ့ခိုင်ရေးပါတီ ၊ အာဏာရှင်ရဲ့ဖွားဖက်တော် ၊ တကောင်တည်းပြိုင်တောင် မနိုင်မဲ့မြင်း

ကြံ့ခိုင်ရေးပါတီဟာ အာဏာရှင်ရဲ့ ဖွားဖက်တော်ဖြစ်ပါတယ်။ ဖွားဖက်တော်ဆိုတဲ့ ဗမာစကားမှာ အဓိပ္ပာယ်နှစ်မျိုးရှိပါတယ်။ ကြံ့ခိုင်ရေးပါတီဟာ အဲဒီနှစ်မျိုးစလုံးနဲ့အကျုံးဝင်ပါတယ်။

အဲဒီကြံ့ခိုင်ရေးပါတီဟာ ဘယ်လိုသန္ဓေနဲ့ပေါက်ဖွားလာပါသလဲ။ ဘာတွေလုပ်ခဲ့ပါသလဲ။ ဘာတွေလုပ်နေပါသလဲ။ ဘာတွေလုပ်ဖို့ ကြံစည်နေပါသလဲ။

ကြံ့ခိုင်ရေးပါတီ ၊ အာဏာရှင်ရဲ့ဖွားဖက်တော် ၊ တကောင်တည်းပြိုင်တောင် မနိုင်မဲ့မြင်းကြံ့ခိုင်ရေးပါတီဟာ အာဏာရ...

11/10/2025

မူဆိုးမှာစစ်တပ်ကမီးရှို့သတ်တာခံရသူတဦးရဲ့မိသားစုတွေအခုဘယ်လိုနေထိုင်ကြသလဲ

ကရင်နီမှာပြည်သူအများအပြားဟာ စစ်တပ်ဘေးရှောင်ဒုက္ခသည်တွေဖြစ်နေကြပါတယ်။ ပြည်သူတရပ်လုံးလိုလို စစ်ဘေးဒုက္ခသည်တွေဖြစ်နေကြပါတယ်။

တချို့လူတွေဟာ အကြိမ်ပေါင်းများစွာနေရာရွှေ့ပြောင်းတိမ်းရှောင်ကြရပါတယ်။

လူ့အခွင့်အရေးမှန်သမျှ အားလုံးဆုံးရှုံးနေကြရတဲ့ဒုက္ခသည်တွေထဲမှာ စစ်တပ်ကမီးရှို့သတ်တာခံရသူတယောက်ရဲ့ မိသားစုလည်းပါဝင်ပါတယ်။

မူဆိုးမှာစစ်တပ်ကမီးရှို့သတ်တာခံရသူတဦးရဲ့မိသားစုတွေအခုဘယ်လိုနေထိုင်ကြသလဲကရင်နီမှာပြည်သူအများအပြားဟာ စ.....

10/10/2025

ဘူးလက်လှဆွေကိုဘယ်လိုလုပ်မယ်ထင်သလဲ

ဘူးလက်လှဆွေက မဲစာရင်းတွေ ဝက်ဝက်ကွဲမှားနေတာကိုထောက်ပြပြီးနောက် ပျောက်နေပါတယ်။

သူ့ကိုဖမ်းထားသလား၊ စစ်နေပါသလား။ ဘူးလက်လှဆွေဆိုတာ ဘယ်လိုလူပါလဲ။ ဘူးလက်လှဆွေကို တကယ်ပဲစစ်အုပ်စုက လက်စားချေထောင်ချမှာပါလား။

ဘူးလက်လှဆွေကိုဘယ်လိုလုပ်မယ်ထင်သလဲဘူးလက်လှဆွေက မဲစာရင်းတွေ ဝက်ဝက်ကွဲမှားနေတာကိုထောက်ပြပြီးနောက် ပျောက်န...

09/10/2025

NUG ကိုဗျူရိုကရေစီအစိုးရမှ တော်လှန်ရေးအစိုးရအသွင်ပြောင်းလဲသင့်
_____________________________________

(NUG ပြုပြင်ပြောင်းလဲရေးအပိုင်း ၂ နိဂုံးပိုင်း)

NUG ပြုပြင်ပြောင်းလဲရေးကို အတွေးအခေါ်ပြောင်းလဲရေးနဲ့ စသင့်ပါတယ်။

စစ်ကောင်စီပုံစံတူ ဗျူရိုကရေစီအစိုးရယန္တရားကိုဖျက်ပြီး တော်လှန်ရေးအစိုးရနဲ့ အစားထိုးတည်ဆောက်ဖို့သင့်ပါတယ်။

လူအင်အား၊ ငွေအင်အား အားလုံးနီးပါးကို စစ်အနိုင်တိုက်ရေးမှာပုံအောအသုံးပြုသင့်ပါတယ်။

NUG ကိုဗျူရိုကရေစီအစိုးရမှ တော်လှန်ရေးအစိုးရအသွင်ပြောင်းလဲသင့် (NUG ပြုပြင်ပြောင်းလဲရေးအပိုင်း ၂ နိဂုံး)________________...

08/10/2025

ပြည်သူကိုပစ်မှတ်ထားတိုက်ခိုက်နေတဲ့ စစ်အုပ်စုရဲ့လတ်တလောအစုလိုက်အပြုံလိုက်သတ်ဖြတ်မှုများ
__________________________________________

၈၈ မှာပြတ်အောင်မလုပ်နိုင်ခဲ့လို့ သမိုင်းတာဝန်မကျေပြွန်ခဲ့ကြလို့ ၂၀၂၁ မှာလူငယ်တွေဆက်တော်လှန်နေရတယ်လို့လူငယ်တွေက ဆိုခဲ့ကြပါတယ်။ နောက်မျိုးဆက်လူငယ်တွေက ၂၀၂၁ လူငယ်တွေကို အဲသလိုထပ်ပြီး အပြစ်တင်ရတဲ့ အဖြစ်မျိုးကြုံရဦးမှာပါလား။

ပြည်သူတွေကသားသမီးတွေမွေးဖွားပျိုးထောင်ပေးနေတာဟာ စစ်အုပ်စုကခိုင်းစားဖို့၊ စစ်အုပ်စုကညှဉ်းပန်းဖို့ပါလား။

ပြည်သူနဲ့တိုက်တဲ့စစ်ပွဲ၈၈ မှာပြတ်အောင်မလုပ်နိုင်ခဲ့လို့ သမိုင်းတာဝန်မကျေပြွန်ခဲ့ကြလို့ ၂၀၂၁ မှာလူငယ်တွ.....

08/10/2025

NUG ပြုပြင်ပြောင်းလဲရေးအပိုင်း ၁

NUG အတွက် အရေးကြီးဆုံး ပြုပြင်ပြောင်းလဲရေးဟာ တပ်တည်ဆောက်ရေး ၊ တပ်ပြုပြင်ရေးဖြစ်ပါတယ်။

တော်လှန်ရေးကာလအတွက် အရေးကြီးဆုံးတပ်တည်ဆောက်ရေးဟာ တော်လှန်ရေးရဲဘော်တွေကို မှန်ကန်တဲ့နိုင်ငံရေးလက်နက်တပ်ဆင်ပေးဖို့ပါ။

တပ်တည်ဆောက်ရေးမကောင်းရင် ကျန်တဲ့ပြုပြင်ပြောင်းလဲရေးတွေဟာ သိပ်ထိရောက်မှာ မဟုတ်ပါဘူး။

NUG ပြုပြင်ပြောင်းလဲရေးအပိုင်း ၁NUG အတွက် အရေးကြီးဆုံး ပြုပြင်ပြောင်းလဲရေးဟာ တပ်တည်ဆောက်ရေး ၊ တပ်ပြုပြင်ရေးဖြ....

08/10/2025

အာဏာခွဲတမ်းအရင်ညှိမလား၊ စစ်ကိုအရင်အနိုင်တိုက်မလား

ကိုသိမ်းမြတ်
Think Media သင့်မီဒီယာ
၈ အောက်တိုဘာ ၂၀၂၅

(Video တင်ပြီးသားပါ။ စာနဲ့ဖတ်ချင်သူတွေအတွက် ထပ်တင်ပေးတာပါ။ video link ကိုမန့်မှာပေးထားပါမယ်။)

တပ်ပေါင်းစုဖြစ်လာဖို့အတွက် ပထမဆုံးလိုအပ်ချက်ကတော့ ပေါင်းတိုက်ကြမှနိုင်မယ်။ ပေါင်းကြမှ ဖြစ်တော့မယ်။ မပေါင်းရင် တော်လှန်ရေးအဖွဲ့အားလုံးရှုံးနိမ့်ကြတော့မယ်ဆိုတာကို အရင်လက်ခံကြဖို့ပါ။ အဲဒါကို ရှင်းရှင်းလင်းလင်း မြင်ကြမှ တပ်ပေါင်းစုပေါ်လာမှာပါ။ မညီညွတ်ရင်ဒုက္ခရောက်မယ်ဆိုတာကို ရှင်းရှင်းလင်းလင်းမမြင်သေးသမျှ ညီညွတ်ဖို့ရာဝန်လေးတဲ့သူက ဝန်လေးနေကြဦးမှာပါပဲ။

တော်လှန်ရေးရဲ့ရှေ့ပိုင်းကာလတလျှောက်မှာ ဗြောင်ထုတ်မငြင်းကြပေမဲ့ တပ်ပေါင်းစုကို လက်မခံကြတဲ့ အဖွဲ့အစည်းတွေ တချို့ရှိကြပါတယ်။ NUG အပေါင်း K3C ကဆိုရင် တပ်ပေါင်းစုဆိုတဲ့စကားလုံးမသုံးဘူးလို့တောင် သဘောတူထားတာရှိပါတယ်။ ဒါက အားလုံးသိပြီးသားပါ။ အတိတ်သမိုင်းမှာဖွဲ့ခဲ့ကြတဲ့ မအောင်မြင်တဲ့တပ်ပေါင်းစုတွေကြောင့် တပ်ပေါင်းစုအပေါ်အမြင်မကောင်းကြတာတွေလည်းရှိခဲ့ပါတယ်။ အဲဒါကလည်း တပ်ပေါင်းစုကို ငြင်းဆန်ကြတဲ့ အကြောင်းတွေထဲက တကြောင်းပါ။ တပ်ပေါင်းစုဖွဲ့တိုင်း KNU ကဥက္ကဋ္ဌ၊ KIA ကဒုဥက္ကဋ္ဌဆိုတာမျိုးအပေါ်မှာတောင် အမြင်မကြည်ကြသူတချို့လည်း ရှိကြပါတယ်။ UNFC ကအမေရိကန်ရဲ့လူတွေ FPNCC ကတရုတ်ရဲ့လူမို့ ပေါင်းလို့မရဘူးဆိုတာမျိုးတွေလည်းပြောကြတာရှိပါတယ်။ အမေရိကန်ရဲ့လူတွေနဲ့ မပေါင်းရဘူးလို့ တရုတ်ကိုယ်တိုင်က ဖိအားပေးတာမျိုးလည်းရှိပါတယ်။

အခက်အခဲတွေ အဲသလိုရှိပါတယ်။ မတူတာတွေ အများကြီးရှိပါတယ်။ ငါတို့ကတူမှမတူတာဘယ်လိုလုပ်ပေါင်းလို့ရမှာလဲလို့ တချို့ကပြောကြပါတယ်။ မတူလို့တပ်ပေါင်းစုဖွဲ့တာပါ။ တူရင် တပါတီတည်းအဖြစ်ပေါင်းလိုက်ကြမှာပေါ့။ တူတာကိုအရင်ဆုံးရှာပြီး တဖြည်းဖြည်းချဲ့ထွင်တည်ဆောက်ကြရမှာပါ။ ညှိယူရမှာပါ။ ညှိနှိုင်းဆွေးနွေးမှုနဲ့ အပေးအယူတွေ မဖြစ်မနေလိုအပ်ပါတယ်။ မတူတာကိုခဏဘေးဖယ်ထား၊ တူတာချဲ့ထွင်ပြီး တွဲလုပ်ကြရမှာပါ။ တူတာတွဲလုပ်၊ မတူတာခွဲလုပ်၊ မတူတာထပ်ညှိနှိုင်းဆိုတာ တပ်ပေါင်းစုဖွဲ့စည်းရေးအတွက် အရေးကြီးတဲ့အခြေခံပါပဲ။

ဒီနေ့တော်လှန်ရေးအဖွဲ့တွေအားလုံးမှာ သေချာပေါက်တူညီတဲ့အချက်ကတော့ ဘုံရန်သူတူညီတဲ့အချက်ပါ။ ဒါပေမဲ့ ဘုံရန်သူတူရုံနဲ့ အလုပ်တွဲလုပ်လို့မရသေးပါဘူး။ တူညီတဲ့လမ်းစဉ်ရှိဖို့လိုပါတယ်။ ဘက်တဖက်က စစ်အာဏာရှင်စနစ်ကို အမြစ်ဖြတ်သုတ်သင်ရေးလမ်းစဉ်ဖြစ်ပြီး တခြားတဖက်က စစ်အာဏာရှင်စနစ်ကို လက်နက်နဲ့ဖိအားပေးပြီး အထက်စီးကနေ စျေးဆစ်ဆွေးနွေးရေးဖြစ်နေရင် လမ်းစဉ်မတူတဲ့အတွက်ပေါင်းဖို့ အခက်အခဲပိုရှိပါလိမ့်မယ်။ ဒီနေရာမှာ ကျနော့်အနေနဲ့ နောက်ထပ်ဆွေးနွေးရမဲ့ ခေါင်းစဉ်တခုထွက်လာပါတယ်။ အဲဒါကတော့ စစ်အာဏာရှင်စနစ်ကို အပြုတ်တိုက်ရေးမဟုတ်ဘဲ စစ်ရေးနဲ့ဖိအားပေးဆွေးနွေးရေးဆိုတဲ့ အယူအဆနဲ့ပတ်သက်တဲ့ခေါင်းစဉ်ပါ။ သီးခြားထပ်ဆွေးနွေးပါမယ်။ ဘုံလမ်းစဉ်ပေါ်ထွက်လာရုံနဲ့ မလုံလောက်သေးဘဲ ဘုံလုပ်ငန်းစဉ်တခုရေးဆွဲသဘောတူညီဖို့လည်း လိုအပ်ပါတယ်။ ဘုံလုပ်ငန်းစဉ်ကိုသဘောတူချမှတ်နိုင်ပြီးမှ တပ်ပေါင်းစုဟာ အားကောင်းမောင်းသန်လည်ပတ်နိုင်မှာပါ။ အဲဒီအပိုင်းက ထင်သလောက်တော့မရိုးရှင်းပါဘူး။ အချိန်ယူညှိနှိုင်းဖို့လိုအပ်ပါလိမ့်မယ်။ အကြိမ်ကြိမ်ညှိနှိုင်းဖို့လိုကောင်းလိုပါလိမ့်မယ်။

သမိုင်းမှာဖဆပလဆိုတဲ့တပ်ပေါင်းစုကို ကွန်မြူနစ်ပါတီ၊ ဆိုရှယ်လစ်ပါတီ၊ ရခိုင်အမျိုးသားအစည်းအရုံး၊ ကရင်ဗဟိုအဖွဲ့ချုပ်၊ အာရှလူငယ်အစည်းအရုံး၊ မျိုးချစ်အဖွဲ့၊ မဟာဗမာအဖွဲ့တို့နဲ့ ဖွဲ့စည်းခဲ့ကြတုန်းကဆိုရင် ဖက်ဆစ်ဆန့်ကျင်ရေး၊ အင်္ဂလိပ်လက်အောက်က လုံးဝလွတ်မြောက်ရေးစတဲ့ ဘုံလမ်းစဉ်တွေရှိခဲ့ကြပါတယ်။ အဲဒီလမ်းစဉ်အပေါ်အခြေခံတဲ့ ဘုံလုပ်ငန်းစဉ်တွေလည်း ရေးဆွဲအလုပ်လုပ်ခဲ့ကြပါတယ်။ တချိန်မှာတော့ ပြိုကွဲခဲ့ပါတယ်။ လွတ်လပ်ရေးအရယူပုံယူနည်းနဲ့ ပတ်သက်တဲ့ ဘုံလုပ်ငန်းစဉ်မတူညီတော့တာဟာ ဖဆပလကွဲရတဲ့ အကြောင်းတွေထဲမှာ အဓိကအကြောင်းကြီးတရပ်အနေနဲ့ ပါဝင်ပေမဲ့ အာဏာမရသေးခင်မှာ အာဏာလုတာ အချင်းချင်းအသာစီးယူဖို့ကြိုးစားတာဟာလည်း ကွဲရတဲ့အကြောင်းထဲမှာ အဓိက အကြောင်းကြီးတရပ်လို့ထင်ပါတယ်။ အဲဒီအကွဲကို ပြန်စေ့စပ်ဖို့ကြိုးစားတဲ့အခါမှာ ဗိုလ်ချုပ်အောင်ဆန်းကိုယ်တိုင် အလုပ်ကြံခံရတဲ့အထိဖြစ်ခဲ့ပါတယ်။

ထောက်ပြချင်တဲ့အချက်က အာဏာမရခင်မှာ အချင်းချင်းအသာစီးယူဖို့ကြိုးစားတာ အာဏာခွဲတမ်းချဖို့ကြိုးစားတာဟာ တပ်ပေါင်းစုဖွဲ့စည်းရေးအတွက် အဟန့်အတားဖြစ်စေနိုင်သလို ဖွဲ့ပြီးသားတပ်ပေါင်းစုကိုတောင် ပြိုကွဲအောင်လည်း ထိုးခွဲသွားတတ်တယ်ဆိုတဲ့အချက်ပါ။ ကျနော်တို့နိုင်ငံမှာ ထူးခြားတဲ့အခြေအနေရှိပါတယ်။ အဲဒါကတော့ လူမျိုးပေါင်းစုံနေထိုင်တဲ့တိုင်းပြည်ဆိုတဲ့အချက်ပါ။ လူမျိုးပေါင်းစုံ စုဝေးတည်ရှိနေတာနဲ့အမျှ အာဏာခွဲတမ်းချတဲ့ပြဿနာဟာလည်း ခက်ခဲရှုပ်ထွေးပါတယ်။ အခုလက်ရှိအခြေအနေမှာကိုပဲ ပလက်ဝကို ဘယ်သူပိုင်သင့်သလဲဆိုတဲ့ ပြဿနာမျိုး ကချင် sub-state ပြဿနာမျိုးရှိသလို ရှမ်းပြည်မှာ ဝ၊ ကိုးကန့်၊ ပလောင်၊ ရှမ်းတို့ရဲ့ အာဏာဝေစုပြဿနာမျိုးတွေရှိနေပြီး ဖြေရှင်းဖို့လည်း ခက်ခဲပါတယ်။ အဲသလိုခက်ခဲတဲ့ အခြေအနေအောက်မှာ နောက်ထပ် ပြဿနာ တရပ်ရှိလာပါတယ်။ အဲဒါကတော့ အာဏာခွဲတမ်းနဲ့ပတ်သက်ပြီး သဘောတူညီချက်အရင်ရအောင်လုပ်ပြီးတော့မှ တပ်ပေါင်းစု ဖွဲ့မှာလား၊ တပ်ပေါင်းစုဖွဲ့စစ်အာဏာရှင်စနစ်ပြုတ်အောင်တိုက်ပြီးမှ ကိုယ့်အချင်းချင်းပြဿနာကို နောက်မှ ရှင်းမှာလားဆိုတဲ့ ပြဿနာပါ။

ဗမာလူမျိုးတွေဆီက ကတိကဝတ်ကို အရင်ရမှဖြစ်မယ်ဆိုတဲ့အတွေးအခေါ်အပေါ်အခြေခံပြီး အခြေခံဥပဒေအရင်ရေးဆွဲရေး၊ ကတိကဝတ်ရရှိရေးကို အရင်ကြိုးစားနေကြသူတွေလည်း ရှိကြပါတယ်။ ဒါပေမဲ့အခုအချိန်အထိအားလုံးလက်ခံတဲ့ အခြေခံဥပဒေတရပ်ပေါ်ထွက်မလာပါဘူး။ ရေးဆွဲထားတဲ့အခြေခံဥပဒေကို လက်မခံနိုင်ကြဘူးဆိုတာမျိုးရှိသလို၊ ရေးဆွဲပြီးမှ ပြဿနာတက်မှာစိုးလို့ ချမပြရဲသေးဘူးဆိုတာမျိုးတွေလည်းရှိပါတယ်။

ဒါအမွေခွဲနေတာမှမဟုတ်တာ။ ဘာလို့များသူများဆီက ကတိကဝတ်ကိုဒီလောက်လိုချင်နေတာလဲ။ အဲဒီကတိကဝတ်ပေးမဲ့သူတွေမှာရော ပေးပိုင်ခွင့်အာဏာအပြည့်အဝရှိတယ်ဆိုတာ သေချာရဲ့လား။ အဲဒီကတိကဝတ်ပေးမဲ့သူတွေ သို့မဟုတ် ပေးထားတဲ့သူတွေဟာ စစ်နိုင်မဲ့သူတွေ အစိုးရဖြစ်မဲ့သူတွေလို့ရော သေချာရဲ့လား။

သေချာတာတခုကတော့ ရေးဆွဲပြီးသည်ဖြစ်စေ၊ မပြီးသည်ဖြစ်စေ၊ ကတိကဝတ်တရပ်ပေါ်ထွက်လာသည်ဖြစ်စေ၊ မပေါ်ထွက်လာသေးသည်ဖြစ်စေ အဲဒီကြိုးစားချက်အားလုံးဟာ စစ်ရှုံးခဲ့ရင် စက္ကူစုတ်ပဲဖြစ်သွားမယ်ဆိုတဲ့ အချက်ပါ။ နောက်တချက်ကတော့ အခုရေးဆွဲနေသမျှဟာ စစ်အာဏာရှင်စနစ်တည်ရှိနေသေးတဲ့အခြေအနေ အတွေးအခေါ်အောက်မှာ ရေးဆွဲထားတဲ့ ရေးသားချက်တွေချည်းပဲဖြစ်နေသေးတယ်ဆိုတဲ့အချက်ပါ။

ဒီလိုကြိုးစားချက်တွေအားလုံးဟာ အချိန်ကုန်၊ ငွေကုန်၊ လူပန်းရုံသာမက ညီညွတ်ရေးကိုပိုပြီးပြိုကွဲရုံပဲရှိလိမ့်မယ်လို့ပဲ ကျနော့်အနေနဲ့ မြင်ပါတယ်။ စစ်အာဏာရှင်စနစ်ပြိုအောင် ညီညီညွတ်ညွတ်နဲ့တိုက်ပြီး အောင်ပွဲရမှ လွတ်လွတ်လပ်လပ်ဆွေးနွေးငြင်းခုံကြတာက ပိုပြီး အကျိုးရှိမယ်လို့မြင်ပါတယ်။ စစ်မအောင်ရင် အခုလုပ်ထားတာတွေ အကုန်အလကားပါပဲ။ ပေးထားတဲ့ကတိ၊ ရထားတဲ့ကတိတွေ အကုန်လုံးလည်း အလကားပါပဲ။ အခုကတိပေးထားတဲ့သူတွေ သဘောတူထားတဲ့သူတွေဟာ ဘယ်လောက်ကိုယ်စားပြုနိုင်တဲ့လူတွေလဲဆိုတာကအစ အငြင်းပွားစရာတွေရှိပါတယ်။ ကျနော်တို့နိုင်ငံမှာ လူမျိုးပေါင်းစုံရဲ့ လွတ်လပ်ရေး၊ တန်းတူညီမျှမှုနဲ့ ကိုယ်ပိုင်ပြဋ္ဌာန်းခွင့်တွေကို အဓိကအဟန့်အတားပြုနေတဲ့ ဗဟိုချက်မဟာ စစ်အာဏာရှင်စနစ်ပါ။ စစ်အာဏာရှင်စနစ်ရှိနေသေးသမျှ အဲဒါတွေ တခုမှ အာမခံချက်မရှိပါဘူး။ စစ်အာဏာရှင်စနစ်အောက်က မလွတ်မြောက်သေးခင်မှာ လုပ်ထားတဲ့ ကတိကဝတ်တွေအာမခံချက်တွေဆိုတာကလည်း ဘာမှမရေရာပါဘူး။ အဲသလိုမရေရာတဲ့ အကြောင်းတွေအတွက် အငြင်းအခုံလုပ်ပြီး သဘောထားကွဲလွဲနေကြမဲ့အစား ညီညွတ်ရေးကို အရင်ကြိုးစားတာက လက်တွေ့ပိုကျပါလိမ့်မယ်။

အဲသလိုမဟုတ်ရင် မုန့်ဆီကြော်က ဘယ်နေမှန်းမသိသေးဘူး။ မုန့်ဆီကြော်ကိုဝေစုခွဲတမ်းချနေတာနဲ့ ဒယ်အိုးကြီးကွဲမဲ့အဖြစ်မျိုး တိုးနေကြပါဦးမယ်။

စစ်အာဏာရှင်စနစ်ကိုဖြိုချပြီးရင် စစ်အောင်နိုင်ပြီးရင် အဲဒီအငြင်းပွားမှုတွေကို လက်နက်မကိုင်ဘဲ ညှိနှိုင်းအဖြေရှာလို့ရနိုင်ပါတယ်။ လက်နက်ကိုင်ပဋိပက္ခရဲ့ အဓိကလက်သည်ဟာ စစ်အာဏာရှင်စနစ်ပါ။ စစ်အာဏာရှင်စနစ်မရှိတော့တဲ့တချိန်မှာ နိုင်ငံလုံးဆိုင်ရာညီလာခံကြီးတွေခေါ်ယူပြီး နိုင်ငံရေးနည်းနဲ့ဆွေးနွေးတာတွေ မဲခွဲဆုံးဖြတ်တာတွေကို ငြိမ်းငြိမ်းချမ်းချမ်းနဲ့ လုပ်ယူလို့ရနိုင်ပါတယ်။

ကျနော်တို့နိုင်ငံမှာရှိတဲ့ပြဿနာအားလုံးရဲ့ အခေါင်အချုပ်ပြဿနာဟာ စစ်အာဏာရှင်စနစ်ပြဿနာပဲဆိုတဲ့ အချက်ကိုလေးလေးနက်နက် ယုံကြည်ကြတယ်ဆိုရင် စစ်အာဏာရှင်စနစ်ကို အရင်ရှင်းရမယ်ဆိုတဲ့အချက်အပေါ်မှာ အမြင်ရှင်းလာကြပါလိမ့်မယ်။

လူတော်တော်များများ အထင်မှားနေတဲ့ အကြောင်းအရာတခုကိုလည်းပြောချင်ပါတယ်။ ကျနော်တို့နိုင်ငံမှာရှိတဲ့နိုင်ငံရေးပြဿနာဟာ ဗမာလူမျိုးကြီးနဲ့ ကျန်လူမျိုးစုတွေရဲ့ပြဿနာမဟုတ်ပါဘူး။ စစ်အာဏာရှင်နဲ့ ဗမာအပါအဝင်လူမျိုးပေါင်းစုံပြည်သူလူထုကြီးတရပ်လုံးရဲ့ပြဿနာပါ။ ဗမာလူမျိုး အလုပ်သမား၊ လယ်သမား၊ လူလတ်တန်းစားနဲ့ ကုန်သည်ပွဲစား၊ စက်ပိုင်၊ ကားပိုင်၊ လုပ်ငန်းရှင်တွေအားလုံးဟာ စစ်အာဏာရှင်ရဲ့ ဖိနှိပ်မှုကိုခံနေကြရတဲ့သူတွေချည်းပါပဲ။ တိုင်းရင်းသား လယ်သမား၊ အလုပ်သမား၊ စီးပွားရေးသမားတွေကို စစ်အာဏာရှင်က နှိပ်စက်သတ်ဖြတ်တဲ့နည်းတူ ဗမာတွေကိုလည်း နှိပ်စက်သတ်ဖြတ်နေတာပါပဲ။ လူမျိုးချင်းမတူကြပေမဲ့ အဖိနှိပ်ခံလူတန်းစားတွေဆိုတဲ့ လူတန်းစားအခြေခံချင်း အတူတူပါပဲ။

လူပြောများတဲ့ ဗမာလူမျိုးကြီးဝါဒပြဿနာအကြောင်းပြောပါဦးမယ်။

ကျနော်တို့နိုင်ငံမှာ ဗမာလူမျိုးကြီးဝါဒကို တစိုက်မတ်မတ် ကျင့်သုံးနေတာဟာ စစ်အာဏာရှင်စနစ်ပါ။ ဗမာလူမျိုးကြီးဝါဒကို ဗမာပြည်သူတွေက ကျင့်သုံးနေတာမဟုတ်ပါဘူး။ ဗမာလူမျိုးစစ်အာဏာရှင်တွေက ကျင့်သုံးနေတာပါ။ ဗမာလူမျိုးကြီးဝါဒကိုသုံးပြီး လူနည်းစုပြည်သူတွေကို ဖိနှိပ်ခြင်းအတွက် တာဝန်ရှိသူဟာ သာမန်ဗမာပြည်သူတွေ မဟုတ်ပါဘူး။ စစ်အာဏာရှင်တွေပါပဲ။ ဗမာလူမျိုးတွေနဲ့ ဖွဲ့စည်းထားတဲ့ အဖွဲ့အစည်းမှန်သမျှက ဗမာလူမျိုးကြီးဝါဒကျင့်သုံးလိမ့်မယ်လို့ တချို့ကထင်နေမြင်နေကြတာဟာ ဗမာလူမျိုးကြီးဝါဒရဲ့ တကဲ့ဇာစ်မြစ်ကို ရှင်းရှင်းလင်းလင်းမမြင်နိုင်လို့ ယူဆနေတဲ့ အယူအဆပါ။

ဗမာလူမျိုးကြီးဝါဒဆိုတာဘာလဲဆိုတာ နည်းနည်းပြောဖို့လိုမယ်ထင်ပါတယ်။ ဗမာလူမျိုးကြီးဝါဒဆိုတာ ဗမာမဟုတ်သူတွေကို အစိုးရအုပ်ချုပ်ရေးနေရာတွေမပေးချင်တာ၊ စစ်တပ်မှာနေရာမပေးချင်တာ၊ သယံဇာတစီမံခန့်ခွဲခွင့်မပေးချင်တာ၊ တိုင်းရင်းသားဘာသာစကားသင်ကြားခွင့်မပေးတာ၊ ဗမာမဟုတ်တဲ့ လူမျိုးတွေကို သတ်ဖြတ်တာ၊ ရွာမီးရှို့တာ၊ မုဒိမ်းကျင့်တာတွေပါဝင်ပါတယ်။ အဲဒီအချက်အပြင် ဗမာမဟုတ်တဲ့သူတွေကို အထင်သေးတာမျိုးလည်း ပါဝင်ပါတယ်။ အဲဒီလုပ်ရပ်တွေရဲ့ ၉၀ ရာနှုန်းကို စစ်အာဏာရှင်က တိုက်ရိုက်ပြုလုပ်ကျူးလွန်ပါတယ်။ အုပ်ချုပ်ရေးနေရာမပေးတာ၊ စစ်တပ်မှာနေရာမပေးတာ၊ သယံဇာတစီမံခန့်ခွဲခွင့်မပေးတာ၊ တိုင်းရင်းသားဘာသာစကားသင်ကြားခွင့်မပေးတာ၊ တိုင်းရင်းသားတွေကို သတ်ဖြတ်၊ မီးရှို့၊ မုဒိမ်းကျင့်တာတွေအားလုံးကို စစ်အာဏာရှင်ကပဲ တိုက်ရိုက်လုပ်ပါတယ်။ ဘယ်ဗမာပြည်သူကမှ မလုပ်ပါဘူး။ ထောက်ခံတဲ့ဗမာပြည်သူဆိုတာကလည်း မရှိသလောက်ပါပဲ။ ကြံ့ခိုင်ရေးပါတီဝင်လောက်ကပဲ ဗမာလူမျိုးကြီးဝါဒကိုထောက်ခံပါလိမ့်မယ်။ ဒါပေမဲ့ ဗမာမဟုတ်တဲ့တိုင်းရင်းသားတွေကို အထင်အမြင်သေးတယ်ဆိုတာမျိုးကိုတော့ သာမန်ဗမာပြည်သူတချို့ထဲမှာ နည်းနည်းပါးပါး တွေ့နိုင်ပါတယ်။ ဒါကလည်း စစ်အာဏာရှင်စနစ်ရဲ့လက်ချက်ပါ။ စစ်အာဏာရှင်တွေသင်ကြားနေတဲ့ ကျောင်းပညာရေး၊ စစ်အာဏာရှင်တွေလုပ်ထားတဲ့ သမိုင်းအလိမ်အညာတွေရဲ့လက်ချက်ကြောင့် ဖြစ်ရတာတွေပါ။ ဒါ့အပြင် စီးပွားရေး၊ ပညာရေး၊ ယဉ်ကျေးမှု မဖွံ့ဖြိုးအောင် စစ်အာဏာရှင်တွေက စနစ်တကျလုပ်ထားတာတွေကြောင့် ဖြစ်ရတာပါ။ လူ့သဘာဝက ဆင်းရဲတဲ့ နိမ့်ကျတဲ့သူတွေကို အထင်သေးတတ်ကြပါတယ်။ ရန်ကုန်သားတွေ မန္တလေးသားတွေက တောသားတွေကို အထင်သေးတာ သနားစရာလေးတွေလို့ မြင်တတ်ကြတာဟာ စီးပွားရေးနိမ့်ကျလို့ဖြစ်ကြတာပါ။ အဲဒီသဘောနဲ့အတူတူပါပဲ။

ပြောချင်တာက ဗမာလူမျိုးကြီးဝါဒဆိုတာဟာ လူမျိုးရေးပြဿနာမဟုတ်ဘူး၊ သွေးမတူ၊ DNA မတူလို့ဖြစ်တဲ့ပြဿနာမဟုတ်ဘူး။ စစ်အာဏာရှင်စနစ်ကြောင့်ဖြစ်တဲ့ပြဿနာပါ။

အမျိုးသားဒီမိုကရေစီအဖွဲ့ချုပ်က ဗမာလူမျိုးကြီးဝါဒကျင့်သုံးတယ်လို့မြင်ကြတဲ့သူတချို့ရှိပါတယ်။ ထောက်ပြစရာအချက်တချို့လည်း ရှိပါလိမ့်မယ်။ ဥပမာ ဗိုလ်ချုပ်ရုပ်တုလုပ်တာ၊ ဗိုလ်ချုပ်တံတားလုပ်ချင်တာမျိုး၊ အဲဒါတွေထက်ပိုအရေးကြီးတာက ကချင်နဲ့ ရခိုင်ကို စစ်တိုက်ခွင့်ပေးတာမျိုးပါ။ အဲဒါတွေထဲမှာ ဗိုလ်ချုပ်ရုပ်တုနဲ့ ဗိုလ်ချုပ်တံတားလုပ်ချင်တာက အမျိုးသားဒီမိုကရေစီအဖွဲ့ချုပ်ရဲ့ ဗမာလူမျိုးကြီးပြဿနာလို့ဆိုနိုင်ပေမဲ့ ပိုအရေးကြီးတဲ့ KIA နဲ့ AA ကိုစစ်တိုက်ခွင့်ပေးတဲ့ကိစ္စက အမျိုးသားဒီမိုကရေစီအဖွဲ့ချုပ်မှာ ဗမာလူမျိုးအများစုပါဝင်နေလို့ဖြစ်တဲ့ ပြဿနာမဟုတ်ပါဘူး။ ၂၀၀၈ အခြေခံဥပဒေဘောင်အောက် ဝင်သွားလို့ဖြစ်ရတဲ့ပြဿနာပါ။ စစ်အာဏာရှင်စနစ်ကနေ ဆင်းသက်လာတဲ့ ပြဿနာဖြစ်ပါတယ်။ ဒါတွေကိုခြုံငုံကြည့်ရင် ဗမာလူမျိုးကြီးဝါဒအသုံးပြုပြီး လူနည်းစုလူမျိုးတွေကို ဖိနှိပ်ညှဉ်းပန်းမှုအားလုံးနီးပါးရဲ့ အဓိကရင်းမြစ်ဟာ စစ်အာဏာရှင်စနစ်ပဲဆိုတာ ထင်ရှားပါတယ်။ ဗမာလူမျိုးကြီးဝါဒကိုတိုက်ဖျက်ချင်ရင် စစ်အာဏာရှင်စနစ်ကိုတိုက်ဖျက်ရပါလိမ့်မယ်။ ဗမာလူမျိုးတွေနဲ့ဖွဲ့စည်းထားတာဖြစ်ပေမဲ့ ဗမာလူမျိုးကြီးဝါဒကို ပွင့်ပွင့်လင်းလင်းကန့်ကွက်ဆန့်ကျင်တဲ့အဖွဲ့အစည်းတွေလည်းရှိတယ်ဆိုတာ သတိပြုဖို့လိုပါတယ်။ ဥပမာ မြေပေါ်နိုင်ငံရေးအဖွဲ့အစည်းထဲမှာဆိုရင် ဗမာနိုင်ငံလုံးဆိုင်ရာကျောင်းသားသမဂ္ဂနဲ့ လူ့ဘောင်သစ်ဒီမိုကရက်တစ်ပါတီတို့ဟာ ဗမာလူမျိုးကြီးဝါဒကိုဆန့်ကျင်တဲ့သဘောထားတွေ အကြိမ်ကြိမ်ပြသခဲ့ကြဖူးပါတယ်။

အခုလက်ရှိ အမျိုးသားဒီမိုကရေစီအဖွဲ့ချုပ် NLD ထဲက အင်အားစုတချို့ဟာ တော်လှန်ရေးကို စစ်အာဏာရှင်စနစ်နဲ့ ပြည်သူလူထုကြီး တရပ်လုံးရဲ့တော်လှန်ရေးလို့မမြင်ကြဘဲ စစ်အာဏာရှင်လက်ထဲကနေ သူတို့အာဏာပြန်ရအောင်တိုက်တဲ့တော်လှန်ရေးလို့ မြင်နေကြတာရှိပါတယ်။ NLD တဖွဲ့လုံးလို့ မဆိုလိုပါဘူး။ တချို့ပါ။ NUG ထဲမှာလည်း အဲသလိုအမြင်ရှိသူတချို့တလေရှိပါတယ်။ ဒါပေမဲ့ အဲဒီရောဂါလက္ခဏာမျိုးကို NLD ထဲမှာပိုတွေ့ရပါတယ်။ အခုအချိန်မှာ NLD နဲ့ NUG ကိုထပ်တူပြုပြောဆိုလို့မရတော့ပါဘူး။ ကွဲလွဲချက်တွေရှိနေပါပြီ။

တော်လှန်ရေးအောင်မြင်ရင် ငါတို့နေရာရဖို့ ဒါမှမဟုတ် တော်လှန်ရေးအောင်မြင်ရင် ငါတို့ခေါင်းဆောင်ဖြစ်ဖို့ဆိုတဲ့ အမြော်အမြင်နဲ့ နိုင်ငံရေးလုပ်နေကြတဲ့သူတွေလည်း အများအပြားရှိနေကြပါတယ်။ အဲသလိုအမြော်အမြင်ရှိသူတွေဟာ NLD NUG ထဲမှာသာမက တိုင်းရင်းသားအဖွဲ့အစည်းတွေထဲမှာလည်း ရှိပါတယ်။ အားလုံးကို မဆိုလိုပါဘူး။ ဒါပေမဲ့ တချို့ အဲသလိုရှိနေတယ်ဆိုတာကိုလည်း ငြင်းလို့မရပါဘူး။ ဒါတွေဟာအန္တရာယ်ရှိပါတယ်။

ဒီနေ့တော်လှန်ရေးမှာလိုအပ်နေတာက တော်လှန်ရေးပြီးရင်လည်း ငါတို့ အာဏာမယူဘူး၊ ရာထူးမယူဘူး၊ တော်လှန်ရေးအောင်မြင်ဖို့အဓိကပဲလို့စိတ်ပိုင်းဖြတ်ထားတဲ့ခေါင်းဆောင်တွေလိုအပ်နေတာပါ။ တကယ်တော့ တော်လှန်ရေးကသူတို့မသေခင်တောင် အောင်မြင်ချင်မှအောင်မြင်မှာပါ။ အဆင်မသင့်ရင် အဲသလောက်ကြာသွားနိုင်ပါတယ်။ အဲဒီတော့ အာဏာရဖို့ဆိုတဲ့မျှော်လင့်ချက်ကိုစွန့်လွှတ်ပြီး တော်လှန်ရေးအောင်ဖို့အဓိက လူမျိုးပေါင်းစုံ ပြည်သူလူထုကြီးလွတ်မြောက်ဖို့ အဓိကဆိုတဲ့ စိတ်ထားနဲ့လုပ်ကြဖို့လိုပါတယ်။ ဒီနေ့ခေတ်မှာ ကြီးပွားချင်ရင် တော်လှန်ရေးမလုပ်ပါနဲ့။ စီးပွားရေးလုပ်ပါ။ လက်နက်ပွဲစားလုပ်ပါ။ တော်လှန်ရေးအကြောင်းပြလိမ်ညာစားတဲ့အလုပ်လုပ်ပါ။ အဲဒါကပိုပြီး တွက်ချေကိုက်ပါလိမ့်မယ်။ စွန့်လွှတ်နိုင်မှ၊ အနစ်နာခံနိုင်မှ တိုင်းပြည်ကောင်းစားရေးကိုလိုလားမှသာ တော်လှန်ရေးလုပ်ကြပါလို့တိုက်တွန်းချင်ပါတယ်။

အာဏာကိုရာထူးကိုမြော်မြင်နေသမျှ အာဏာရဖို့ဝေးပါလိမ့်မယ်။ စစ်အာဏာရှင်စနစ်ရှိနေသေးတဲ့အချိန်မှာ အာဏာခွဲတမ်းချတာ၊ အာဏာမျှော်လင့်ချက်ထားတာတွေကို ယာယီဘေးဖယ်ထားပြီး တပ်ပေါင်းစုအရင်ဖွဲ့ဖို့ အကြံပြုချင်ပါတယ်။ ကိုယ်ကျိုးစွန့်ကြဖို့ အကြံပြုချင်ပါတယ်။ စစ်မနိုင်ရင် အဲဒီအာဏာခွဲတမ်းတွေကတိကဝတ်တွေအားလုံးဟာ မရယ်ရတဲ့ပြက်လုံးတွေအဖြစ်နဲ့သာ အဆုံးသတ်သွားလိမ့်မယ်လို့မြင်ပါတယ်။

07/10/2025

ပြည်တွင်းစစ်ကို တော်လှန်ရေးသမားတွေက စပြီးရပ်လို့ရသလား

စစ်ကိုရပ်ချင်တိုင်းရပ်လို့မရဘူး။ ကိုယ်စထားတာမဟုတ်တဲ့စစ်ပွဲကို ကိုယ်ကစရပ်ချင်လို့မရနိုင်ဘူး။

၂၀၀၈ အခြေခံဥပဒေကိုဖျက်သိမ်းပြီး လက်နက်ကိုင်ဝန်ကြီးဌာန ၃ ခုကိုအရပ်သားအစိုးရလက်အောက်ပို့လိုက်ရင် စစ်အာဏာရှင်စနစ် ဖျက်သိမ်းနိုင်ပြီလို့ ပြောလို့ရပါသလား။

စစ်အာဏာရှင်တွေရဲ့လက်ထဲမှာသေနတ်ရှိနေသေးသမျှ စစ်အာဏာရှင်စနစ်ရှိနေသေးတယ်။

ပြည်တွင်းစစ်ကို တော်လှန်ရေးသမားတွေက စပြီးရပ်လို့ရသလားစစ်ကိုရပ်ချင်တိုင်းရပ်လို့မရဘူး။ ကိုယ်စထားတာမဟုတ်...

06/10/2025

ဒီမနက်စောစောတင်လိုက်တဲ့အတွက် ဒုတိယဗီဒီယိုဟာ ပရိသတ်တွေဆီကို ပျံ့နှံ့မှုနည်းသွားပါတယ်။ YouTube ကမတင်ဘဲထားတာ ၂ လလောက်ကြာပြီး reach ချလိုက်လို့ ပိုနည်းသွားပါတယ်။

အဲဒါကြောင့် အခုည ၈ နာရီမှာ ထပ်ပြီးကြော်ငြာပါရစေ။ ထပ်ပြီးပန်ကြားပါရစေ။ ဒီနေ့လုပ်ထားတဲ့ video ကိုထပ် share ပေးကြပါဦး။

အာဏာခွဲတမ်းအရင်ညှိမလား၊ စစ်ကိုအရင်အနိုင်တိုက်မလားဒီနေ့တော်လှန်ရေးမှာလိုအပ်နေတာက တော်လှန်ရေးပြီးရင်လည်....

06/10/2025

ပေါင်းမလား သေမလား ဘာရွေးမလဲ
ကိုသိမ်းမြတ်
Think Media
၅ အောက်တိုဘာ ၂၀၂၅

(ဗီဒီယိုတင်ပြီးသားပါ။ စာနဲ့ဖတ်ချင်သူတွေအတွက်ထပ်တင်ပေးတာပါ။)

မြန်မာ့နိုင်ငံရေးသုံးသပ်ချက်တွေကို ကျနော်မတင်ပြနိုင်တာ ၂ လကြာသွားပါပြီ။ အဲဒီပျက်ကွက်မှုအတွက် ပရိသတ်များအားလုံး မြန်မာပြည်သူပြည်သားအားလုံးကို တောင်းပန်ပါတယ်။ ဒီလိုအချိန်ဒီလိုကာလဒီလိုနိုင်ငံရေးခေတ်ဆိုးကြီးထဲမှာ ကျနော်ဟာ ဒီလိုလူ တယောက်အဖြစ်ရှိနေတာကိုက ကျနော်ဟာ ဒီအလုပ်လုပ်ကိုလုပ်ရမဲ့သူပါ။ အဲဒါဟာ ကျနော့်ကံကြမ္မာပါ။ ကျနော့်အပေါ်အခြေအနေ အရပ်ရပ်က ပေးအပ်လိုက်တဲ့တာဝန်တခုပါ။ အဲဒါကြောင့်လည်း ကျန်းမာရေးအပါအဝင်အခက်အခဲအမျိုးမျိုးတွေရှိနေတဲ့ကြားက ကျနော်ရောက်အောင်ပြန်လာတာဖြစ်ပါတယ်။ ပျက်ကွက်ခဲ့တာတွေအတွက်လည်း တောင်းပန်ပါတယ်။ နောင်မှာမှန်မှန်တင်ပြပေးပါမယ်လို့ ကတိအကုန်မပေးနိုင်ပေမဲ့ တတ်နိုင်သလောက်အကောင်းဆုံးဖြစ်အောင် ကြိုးစားအလုပ်လုပ်ပါမယ်။

အခုလက်ရှိမြန်မာ့နိုင်ငံရေးအခြေအနေနဲ့ပတ်သက်တဲ့သုံးသပ်ချက်တခုကိုစတင်ရအောင်ပါ။

သမိုင်းဖြစ်စဉ်တွေမှာ ဧကန်သဘောနဲ့ အနေကန်သဘောဆိုတာရှိပါတယ်။ ဆိုလိုတာက ကျွန်ပိုင်ရှင်တွေကို ကျွန်တွေကတိုက်ခိုက်အောင်နိုင်တာဟာ ဧကန်သဘောမုချသဘောပါပဲ။ ရှောင်လွှဲလို့မရပါဘူး။ ဒါပေမဲ့ ကျေးကျွန်တွေက ငုတ်တုတ်ထိုင်လက်ပိုက်ကြည့်နေပြီး အောင်နိုင်ကြတာမဟုတ်ပါဘူး။ အသက်သွေးချွေးအများအပြားပေးဆပ်တော်လှန်ပြီးမှ ခက်ခက်ခဲခဲအောင်နိုင်ကြရတာပါ။

ကျနော်တို့မျက်မှောက်ခေတ် စစ်အာဏာရှင်ဆန့်ကျင်ရေး၊ တော်လှန်ရေးဖြစ်စဉ်မှာလည်း တခြားသမိုင်းဖြစ်စဉ်တွေလိုပဲ ဧကန်သဘောနဲ့ အနေကန်သဘောဆိုတာရှိပါတယ်။ တော်လှန်ရေးမုချအောင်ရမယ်လို့ ပြောတာဟာ ဧကန်သဘောကိုကျနော်တို့ပြောနေတာပါ။ မတရားအုပ်ချုပ်မင်းမူနေတဲ့ စစ်အာဏာရှင်စနစ်ကို အဖိနှိပ်ခံပြည်သူတွေကတော်လှန်တဲ့ တော်လှန်ရေးဟာ တနေ့မှာ မုချအောင်ကိုအောင်မြင်ရမှာပါ။ ပြည်သူတွေကခေါင်းငုံ့လက်ပိုက်ပြီး ငြိမ်ခံနေကြမှာ မဟုတ်တဲ့အတွက် အောင်ကိုအောင်ရမှာပါ။ ဒီနေ့အချိန်မှာ လူငယ်တွေပြောနေကြတဲ့ “နိုင်မှာလား၊ မနိုင်ဘူးလားမမေးနဲ့ မနိုင်မချင်းတိုက်မှာ” ဆိုတဲ့ စိတ်ဓာတ်ဟာ အဲဒီသဘောတရားကို သူတို့နည်းသူတို့ဟန်နဲ့ဖော်ပြနေတာပါ။ ဒါပေမဲ့ တော်လှန်ရေးမုချအောင်မြင်မယ်ဆိုတာဟာ ဘာမှမလုပ်ဘဲ ခေါင်းငုံ့ခံ လက်ပိုက်ကြည့်နေရင်လည်း အလိုလို အောင်မြင်သွားလိမ့်မယ် ဆိုတဲ့ အဓိပ္ပာယ်မဟုတ်ပါဘူး။ တိုက်ယူမှအောင်နိုင်မှာပါ။ ဒီတကြိမ်မှာခေါင်းငုံ့လက်ပိုက်ကြည့်နေရင် ဒီတကြိမ်မှာ အလျှော့ပေး အညံ့ခံလိုက်ရင် ဒီတကြိမ်ရှုံးသွားတယ်ဆိုတာမျိုး ဖြစ်သွားနိုင်ပါတယ်။ ဒါပေမဲ့ ပြည်သူလူထုက တသက်လုံးငုံ့ခံနေမှာ မဟုတ်ပါဘူး။ ဘယ်ပြည်သူမှ ငုံ့ခံပြီး သားစဉ်မြေးဆက်လူညွန့်အတုံးမခံပါဘူး။ အဲဒါကြောင့် တော်လှန်ရေးဟာ တနေ့နေ့မှာ မုချအောင်ကိုအောင်မြင်ရမယ်လို့ပြောနေတာပါ။

မုချအောင်မြင်ရမယ်ဆိုပေမဲ့ ဒီခေတ်ဒီသမိုင်းကိုရေးနေတဲ့ လူငယ်တွေရဲ့ဇွဲသတ္တိ၊ လူငယ်တွေရဲ့နိုင်ငံရေးအမြင် ၊ နိုင်ငံရေးစိတ်ဓာတ်အပေါ်မူတည်ပြီး အချိန်အနှေးအမြန်ကွာခြားနိုင်ပါတယ်။ ရုပ်ပိုင်းဆိုင်ရာအခြေအနေ၊ ခေါင်းဆောင်တဲ့လူတွေရဲ့ နိုင်ငံရေးအမြင်ကျယ်မှုနဲ့ နိုင်ငံရေးသတ္တိအပေါ်မှာလည်း မူတည်ပါသေးတယ်။ နိုင်ငံတကာအခြေအနေတွေနဲ့ အဲဒီအခြေအနေတွေကို နိုင်ငံရေးခေါင်းဆောင်တွေက မှန်မှန်ကန်ကန် သုံးသပ်ကိုင်တွယ်နိုင်စွမ်းရှိမရှိဆိုတာတွေအပေါ်မှာလည်း မူတည်ပါသေးတယ်။ ဒါကအနေကန်သဘောပါ။ အနေကန်ဆိုတာ ဧကန်ရဲ့ဆန့်ကျင့်ဘက် နဧကံ၊ အနေကန်လို့ပြောတာပါ။ အလကားနေရင်းမုချသူ့အလိုလိုဖြစ်နေမှာမဟုတ်ဘူးလို့ပြောတာပါ။

အဲသလိုမဟုတ်ဘဲ လုပ်လုပ်မလုပ်လုပ် တော်လှန်ရေးမုချအောင်မြင်ရမယ်ဆိုရင် ကျနော်တို့က ဘာလို့ အပင်ပန်းခံနေကြဖို့လိုမှာလဲ။ ကော်ဖီလေး တစိမ့်စိမ့်သောက်ပြီး ထိုင်ကြည့်နေရုံပဲပေါ့။ “ဒီစစ်အာဏာရှင်တွေ ဘယ်လောက်မိုက်လုံးကြီးနိုင်ဦးမလဲ။ မိုက်ကြစမ်းကွာ။ တနေ့မင်းတို့အလိုလိုပျက်စီးမှာပဲ” ဆိုပြီး ကျနော်တို့က လက်ပိုက်ကြည့်နေမှာပေါ့။ အဲသလိုလက်ပိုက်ကြည့်နေလို့မရပါဘူး။ ကိုယ်တိုင်လုပ်ကြမှအောင်မြင်မှာပါ။

အဲဒါကြောင့် “တော်လှန်ရေးမုချအောင်မြင်ရမယ်။ ဒါပေမဲ့ အောင်မြင်အောင်လုပ်ကြမှ အောင်မြင်မယ်” လို့ဆိုရပါလိမ့်မယ်။ အောင်မြင်အောင် မလုပ်နိုင်ရင် ၁၀ နှစ်လည်း ကြာသွားနိုင်ပါတယ်။ နှစ် ၅၀ လည်း ကြာသွားနိုင်ပါသေးတယ်။ မုချအောင်မြင်မှာ ဖြစ်ပေမဲ့ အချိန်တွေအများကြီးကြာသွားနိုင်ပါတယ်။

၁၀၂၇ စစ်ဆင်ရေးကာလမှာ တော်လှန်ရေးအင်အားစုတွေဘက်က ပြောင်မြောက်တဲ့လုပ်ဆောင်ချက်တွေကိုပြသနိုင်ခဲ့တယ်။ စစ်အုပ်စုဟာ မျက်ပြူးဆန်ပြာဖြစ်သွားရလောက်အောင် ကသောင်းကနင်းဖြစ်သွားခဲ့ပါတယ်။ ဒါပေမဲ့ စစ်အုပ်စုဟာ သူတို့ရဲ့ စစ်ရေးအားနည်းချက်ကို ဖာထေးပြုပြင်နိုင်ခဲ့တယ်။ ပထမအချက်က စစ်မှုထမ်းဥပဒေကိုအသုံးပြုပြီး စစ်သားအများအပြားကို အဓမ္မစုဆောင်းနိုင်လိုက်တယ်။ စစ်မှုထမ်းဥပဒေကို သူတို့အကောင်အထည်ဖော်နေတာမြင်နေပါလျက်နဲ့ တော်လှန်ရေးဘက်က ရအောင်မတားလိုက်နိုင်တာဟာ တော်လှန်ရေးအတွက် သိပ်နစ်နာသွားပါတယ်။ ဒုတိယတချက်ကတော့ စစ်အုပ်စုဟာ ဒရုန်းနဲ့နည်းပညာကို တဆင့်မြှင့်တင်လိုက်နိုင်ပါတယ်။ အဲဒါဟာ ၁၀၂၇ မှာ သူတို့ခံစားခဲ့ရတဲ့ အားနည်းချက်ကြီးကို ပြင်ဆင်လိုက်တာပါ။ အဲဒီနှစ်ချက်ဟာ ဘုန်းဘုန်း လဲပြိုကာနီးဖြစ်နေတဲ့ စစ်အုပ်စုကို နာလန်ထစေတဲ့အချက်ဖြစ်ပါတယ်။ တရုတ်ကို နိုင်ငံရေးအရချဉ်းကပ်လိုက်နိုင်တာ၊ တရုတ်ရဲ့နည်းပညာအထောက်အပံ့တချို့ကို ရလိုက်တာကလည်း စစ်အုပ်စုအတွက် အသက်ရှူပေါက်ချောင်သွားစေတဲ့ အချက်ပါ။ ဒါပေမဲ့ဒါက တကယ်ပဲ အဓိကအားသာချက်ကြီးဟုတ်မဟုတ်ဆိုတာ စဉ်းစားချင့်ချိန်စရာအချက်တွေအများကြီးရှိပါသေးတယ်။ တရုတ်ဟာ စစ်အုပ်စုဘက်ခြေစုံပစ်ရပ်လိုက်ပြီလို့ အခုထိပြောလို့မရသေးပါဘူး။

တော်လှန်ရေးအောင်မြင်ချင်ရင် သူများကို အပြစ်တင်နေမဲ့အစားကိုယ်လုပ်စရာရှိတာတွေကို လုပ်ကြရမှာပါ။

စစ်အုပ်စုဘက်က ပြန်ဖိလာတာ ပြန်တိုက်လာတာကိုကြည့်ပြီး စိတ်ဓာတ်ကျသူတွေ အများအပြားရှိကြပါတယ်။ ဒါပေမဲ့ စစ်အုပ်စုရဲ့ တန်ပြန်ထိုးစစ်တွေထဲကနေ တော်လှန်ရေးအတွက် သင်ခန်းယူစရာအချက်ကိုမြင်ရပါတယ်။ တော်လှန်ရေးအတွက် အဖိုးတန်တဲ့ အချက်ပေးခေါင်းလောင်းသံကိုလည်း ကြားလိုက်ရပါတယ်။ အဲဒါကတော့ တော်လှန်ရေးကို တယောက်တပေါက်လုပ်နေလို့ကတော့ အောင်ပွဲရဖို့လွယ်မှာမဟုတ်ဘူးဆိုတဲ့ အချက်ပေးခေါင်းလောင်းသံပါပဲ။ ညီညွတ်ကြဖို့ တပ်ပေါင်းစုဖွဲ့ဖို့ မဖြစ်မနေလိုအပ်လာပြီဆိုတဲ့ သတိပေးခေါင်းလောင်းသံပါပဲ။

အရင်ကဆိုရင် တော်လှန်ရေးက မကြာခင်အောင်တော့မှာပဲဆိုပြီး စိတ်ကြီးဝင်ခဲ့သူဘဝင်မြင့်ခဲ့သူတချို့ရှိခဲ့ပါတယ်။ တချို့ကဆိုရင် ကေအိုင်အေနဲ့ NUG ပေါင်းတိုက်ရုံနဲ့ တော်လှန်ရေးအောင်မြင်တော့မယ်လို့ထင်ကြတာတောင်ရှိပါတယ်။ ဒါမျိုးတွေက အောက်ခြေမှာရှိကြသလို အထက်ပိုင်းမှာလည်း ထင်သူတွေက ထင်ကြပါတယ်။ အဲသလိုထင်နေကြတော့ ဘယ်သူနဲ့မှတပ်ပေါင်းစုဖွဲ့နေစရာမလိုဘူး။ ငါတို့ဘာသာတိုက်မယ်လို့တွေးကြပါတယ်။ ငါတို့တိုက်လို့နိုင်ရင် ငါတို့က ဝေစုများများရလိမ့်မယ်လို့တွေးကြပါတယ်။ ငါတို့တိုက်လို့ငါတို့နိုင်ရင် မတိုက်တဲ့သူတွေက ငါတို့စီမံရာနာခံကြရမယ်လို့ တွေးကြပါတယ်။ အဲဒီအတွေးအဲဒီအမြင်ဟာ တပ်ပေါင်းစုဖွဲ့ရေးကို အကြီးအကျယ်အဟန့်အတားဖြစ်စေခဲ့ပါတယ်။

စစ်အာဏာရှင်ကို အဖွဲ့တိုင်းကဖြုတ်ချချင်ကြပါတယ်။ အနိုင်တိုက်ချင်ကြပါတယ်။ ဒါပေမဲ့ ငါတို့အဖွဲ့ကခေါင်းဆောင်ပြီး နိုင်လိုက်တယ်ဆိုတာမျိုးကိုပဲ ဖြစ်ချင်နေကြပါတယ်။ တော်လှန်ရေးအောင်မြင်ရင် ငါတို့ကခေါင်းဆောင်ဆိုတာမျိုးဖြစ်ချင်နေကြပါတယ်။ ရှေ့ရေးကိုအများကြီးကြိုတွေးပြီး နေရာကြိုမှန်းနေကြပါတယ်။ ကြိုပြီးဗိုလ်လုနေကြပါတယ်။ အဲဒီတော့အားကောင်းတဲ့လူနည်းနည်းလောက်နဲ့ပဲပေါင်းပြီး အားသိပ်မကြီးသေးတဲ့အသေးတွေက တပ်ပေါင်းစုစကားလာပြောရင်ခါချသူက ခါချခဲ့ကြပါတယ်။ တပ်ပေါင်းစုစကားလာပြောရင်ကိုပဲ သူတို့ဆီကဝေစုလာတောင်းသလိုလို သံသယမျက်လုံးနဲ့ကြည့်ခဲ့ကြပါတယ်။ ဟိုကောင်တွေက အဖွဲ့သေးတယ် အရေးမလုပ်နဲ့ သူတို့မပါလည်းဖြစ်တယ်လို့ သဘောထားသူတချို့ရှိသလို ဟိုကောင်တွေက ငါတို့စကားနားမထောင်ဘူး၊ နောင်မှာပြဿနာရှိနိုင်တယ်၊ ကြီးထွားခွင့်မပေးနဲ့ အခုကတည်းက နှိမ်ထားဆိုတဲ့ သဘောထားမျိုးတွေကိုလည်း မြင်တွေ့ခဲ့ကြရပါတယ်။ ဟိုကောင်တွေကတော့ ငါတို့နဲ့ အယူဝါဒမတူဘူး၊ သူတို့ကို ကြီးထွားခွင့်မပေးနဲ့ ဆိုတဲ့ သဘောထားမျိုးကိုလည်း မြင်ခဲ့ကြားခဲ့ရပါတယ်။ ဒါတွေဟာ တော်လှန်ရေးသူတလူငါတမင်းအတွေးအခေါ်တွေပါ။

အခုတော့ အဲသလိုဘဝင်မြင့်လို့မရတော့ပါဘူး။ ဂျီးများ (ကြေးများ)နေလို့လည်း မရတော့ပါဘူး။ ပေါင်းမလား၊ သေမလား တခုခုကိုရွေးရမဲ့အချိန်ရောက်လာပါပြီ။ ပေါင်းချင်ရင်တပ်ပေါင်းစုဖွဲ့ကြရပါမယ်။ တပ်ပေါင်းစုဖွဲ့ဖို့လုပ်ငန်းစဉ်ကို စကြရပါမယ်။ ဒါမှမဟုတ် မပေါင်းချင်ဘူး၊ ကိုယ့်အဖွဲ့နဲ့ကိုယ် ၊ ကိုယ့်မာနနဲ့ကိုယ် ကိုယ့်အကျိုးစီးပွားနဲ့ကိုယ်ရပ်ကြမယ်ဆိုရင်လည်း ရပါတယ်။ အဲဒါဆိုရင်တော့ တဖွဲ့စီကိုယ့်အဖွဲ့နဲ့ကိုယ်နေပြီး တဖွဲ့ပြီး တဖွဲ့အသေခံကြရုံပဲရှိပါတယ်။

တပ်ပေါင်းစုဖွဲ့ပါ၊ ဖွဲ့ပါလို့မင်းတို့ကပြောတာကလွယ်တယ်။ တကယ်တန်းလုပ်ရတာကခက်တယ်လို့ တချို့ကပြောကြပါတယ်။ မှန်ပါတယ်။ တပ်ပေါင်းစုဖွဲ့ရတာမလွယ်ပါဘူး။ အခက်အခဲအများကြီးရှိပါတယ်။ တဖွဲ့နဲ့ တဖွဲ့အကျိုးစီးပွားမတူကြဘူး။ ရပ်တည်ချက်မတူကြဘူး။ လက်ဝဲလက်ယာနိုင်ငံရေးအမြင်မတူကြဘူး။ အဲဒါကြောင့် ပေါင်းရေးဟာ ခက်ပါတယ်။ ခက်တယ်ဆိုပေမဲ့ လုပ်လို့မရနိုင်တဲ့အရာမဟုတ်ပါဘူး။ လုပ်ကိုလုပ်ရမဲ့အရာပါ။ မလုပ်ချင်ဘူးလား။ ဖြစ်ပါတယ်။ မလုပ်ချင်ရင် တဖွဲ့ချင်းစီအသေခံကြရပါမယ်။ တဖွဲ့ချင်းစီကို စစ်အုပ်စုကကောက်စားပါလိမ့်မယ်။ တဖွဲ့ပြီး တဖွဲ့ကောက်စားပါလိမ့်မယ်။ အဲသလို တဖွဲ့ပြီး တဖွဲ့ကောက်စားမဲ့ ဘေးအန္တရာယ်ကို ဘယ်အဖွဲ့မှ တဖွဲ့ကောင်းရုန်းထွက်လို့မရနိုင်ပါဘူး။ စစ်အုပ်စု အားပြန်ကြီးလာရင် အကုန်အစားခံရမှာပါ။ ဘယ်အဖွဲ့ကိုမှချမ်းသာမပေးပါဘူး။ ကုန်ကုန်ပြောရရင် စစ်အုပ်စုခေါင်းပြန်ထူနိုင်လာရင် စစ်နိုင်နေပါတယ်ဆိုတဲ့ အေအေလည်း တဖွဲ့တည်းတောင့်မခံနိုင်ပါဘူး။ အဲဒီထက်ပိုပြီး ထိထိရောက်ရောက်ပြောရရင် UWSA လည်း တောင့်ခံပြီး ကျန်မနေနိုင်ပါဘူး။ ကျန်တဲ့သူတွေကိုရှင်းပြီးရင် ဝကိုလည်းရှင်းမှာပါ။ စစ်မတိုက်ဘဲထိုင်ကြည့်နေတာပါကြားနေတွေပါဆိုတဲ့ ရှမ်းတောင်ရှမ်းမြောက်ကိုလည်း ချမ်းသာပေးမှာမဟုတ်ပါဘူး။ စစ်အုပ်စုရဲ့ပြည်တွင်းစစ်ရပ်စဲရေးဆိုတာ အဲဒါပါ။ အရင်တုန်းကလို ငြိမ်းချမ်းရေးယူ၊ အပစ်ရပ်ရင် စီးပွားရေးလုပ်ခွင့်လေးပေးလိမ့်မယ်၊ ငါတို့ကတော့ အေးအေးဆေးဆေး ချမ်းချမ်းသာသာနေခွင့်ရလိမ့်ဦးမယ်ဆိုတဲ့ စိတ်ကူးယဉ်အိပ်မက်တွေဟာ ဒီနေ့ခေတ်မှာ အလုပ်ဖြစ်ဖို့သိပ်မရှိတော့ပါဘူး။ အချောင်သမားဝါဒအတွက် စစ်အုပ်စုက အရင်လို တံခါးဖွင့်ပေးမှာမဟုတ်တော့ပါဘူး။ စစ်အုပ်စုက သူတို့ကိုယ်တိုင်ရေးထားတဲ့ ၂၀၀၈ အခြေခံဥပဒေအောက်က စစ်တပိုင်းအရပ်သား တပိုင်းအစိုးရကိုတောင်ဖျက်ပြီး အာဏာသိမ်းလိုက်ကတည်းက လက်နက်ကိုင်တပ်ဖွဲ့အားလုံးကို ဒီတကြိမ်မှာ အပြတ်ချေမှုန်းဖို့ ရည်မှန်းချက်ရှိပြီးသားပါ။

ကျနော်တို့တိုင်းပြည်မှာ လက်နက်ကိုင်တော်လှန်ရေးအဖွဲ့တွေ အများကြီးရှိပါတယ်။ အဲဒီအဖွဲ့တွေအားလုံးတညီတညွတ်တည်းဝိုင်းတိုက်ရင် စစ်အာဏာရှင်စနစ်ကိုဖြိုချနိုင်မဲ့ အခွင့်ကောင်းအခြေအနေကောင်းတွေ အများကြီးရှိခဲ့ပါတယ်။ ဒီနေ့အချိန်မှာလည်းရှိနေပါသေးတယ်။ ဒါပေမဲ့ အကုန်လုံးပေါင်းမှဖြစ်နိုင်ပါလိမ့်မယ်။ ငယ်တဲ့လူကြီးတဲ့လူ ခွဲခြားနေရင် အလုပ်ဖြစ်မှာမဟုတ်ပါဘူး။ အမေရိကန်လူနဲ့ တရုတ်လူမပေါင်းဘူးလုပ်နေရင် အောင်မြင်မှာ မဟုတ်ပါဘူး။ လက်ဝဲသမားနဲ့ လက်ယာသမားခွဲခြားနေရင်ရှေ့ဆက်တိုးနိုင်မှာ မဟုတ်ပါဘူး။ ဒီနေ့အချိန်ဟာ ဂျီးများ (ကြေးများ) နေရမဲ့ အချိန်မဟုတ်ပါဘူး။ စစ်အာဏာရှင်ကို ဆန့်ကျင်သူမှန်သမျှ ပေါင်းစည်းညီညွတ်ကြရမဲ့အချိန်ပါ။ တော်လှန်ရေးအဖွဲ့အချင်းချင်းကြားမှာကိုပဲ တချို့လူတွေမှာ ရန်ငြိုးရန်စတွေရှိကြပါတယ်။ တချို့လူတွေမှာ မတူညီတဲ့အကျိုးစီးပွားတွေရှိကြပါတယ်။ တချို့လူတွေမှာ နယ်မြေ အငြင်းပွားမှုတွေရှိကြပါတယ်။ တချို့လူတွေမှာ သယံဇာတပဋိပက္ခတွေရှိကြပါတယ်။ အဲဒါတွေအားလုံးကို ယာယီဘေးချထားပြီး မပေါင်းမဖြစ်ပေါင်းကြရမှာပါ။ ပြည်သူလူထုရဲ့မျက်နှာကိုထောက်ထားပြီး ကိုယ့်အချင်းချင်းကြားက မတူကွဲပြားမှုတွေ ပဋိပက္ခတွေကို မေ့ထားကြရမှာပါ။ ကိုယ့်မာနတွေလျှော့ချပြီး လူမျိုးပေါင်းစုံပြည်သူလူထုကြီးရဲ့မျက်နှာကို ကြည့်ကြရမဲ့အချိန်ပါ။ ရှေ့တန်းမှာ အသက်ပေးတိုက်နေကြတဲ့ လူငယ်တော်လှန်ရေးသမားတွေရဲ့မျက်နှာကိုထောက်ထားပြီး မရရတဲ့နည်းနဲ့ပေါင်းကြရမှာပါ။ ကျဆုံးသွားတဲ့လူငယ်တော်လှန်ရေးသမားတွေရဲ့မျက်နှာကိုထောက်ထားပြီး ခေါင်းဆောင်ကြီးများက ကိုယ်ကျိုးစွန့်အနစ်နာခံပူးပေါင်းကြရမှာပါ။

ပေါင်းဖို့ကို ဘာလို့အတင်းအဓမ္မနှိုးဆော်တိုက်တွန်းနေရသလဲဆိုတော့ ရှင်းရှင်းလေးပါ။ မပေါင်းရင် အားလုံးသေကြတော့မှာမို့ပါ။

ရွေးစရာလမ်းက ၂ လမ်းပဲရှိပါတယ်။ ပေါင်းကြမလား၊ အသေခံကြမလား။ ဒါပါပဲ။

(Video link ကိုမန့်မှာပေးထားပါတယ်။)

06/10/2025

အာဏာခွဲတမ်းအရင်ညှိမလား၊ စစ်ကိုအရင်အနိုင်တိုက်မလား

ဒီနေ့တော်လှန်ရေးမှာလိုအပ်နေတာက တော်လှန်ရေးပြီးရင်လည်း ငါတို့ အာဏာမယူဘူး၊ ရာထူးမယူဘူး၊ တော်လှန်ရေးအောင်မြင်ဖို့အဓိကပဲလို့စိတ်ပိုင်းဖြတ်ထားတဲ့ခေါင်းဆောင်တွေလိုအပ်နေပါတယ်။

တော်လှန်ရေးမအောင်မြင်ခင်မှာ အာဏာခွဲတမ်းအရင်ညှိနေရင် မုန့်ဆီကြော်ကဘယ်နေမှန်းမသိသေးဘဲနဲ့ မုန့်ဆီကြော်ကိုဝေစုခွဲနေတာနဲ့ ဒယ်အိုးကြီးကွဲမဲ့အဖြစ်မျိုးတိုးပါလိမ့်မယ်။

၂ လကြာရပ်နားထားတော့ reach ကျနေလို့ share ပေးကြပါဦး။

အာဏာခွဲတမ်းအရင်ညှိမလား၊ စစ်ကိုအရင်အနိုင်တိုက်မလားဒီနေ့တော်လှန်ရေးမှာလိုအပ်နေတာက တော်လှန်ရေးပြီးရင်လည်....