08/10/2025
लेस्टर (युके) — एनआरएनए (गैरआवासीय नेपाली संघ) का योरोप पूर्व उप–संयोजक तथा हाल एकताका पक्षधर दयानिधि सापकोटाले नेपाललाई विश्व समुदायमा सम्मानित र समृद्ध देशको रूपमा देख्ने इच्छा व्यक्त गर्नुभएको छ।
शृजनशील लेस्टर समाज द्वारा आयोजित दशैं–तिहार विशेष शुभकामना कार्यक्रममा बोल्दै सापकोटाले देशमा शान्ति, सु–व्यवस्था र आपसी एकताको आवश्यकता औंल्याउनुभयो।
“हाम्रो मुटुको ढुकढुकीमा नेपाल बस्छ। हामी नेपालको माटो बोकेर आएका नेपाली हौं,” उहाँले भावुक हुँदै भन्नुभयो।
सापकोटाले जेन्जी आन्दोलन र हालैका बाढी–पहिरोबाट ज्यान गुमाउनेप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गर्नुभयो। साथै, वर्तमान विपद्मा मातृभूमिको सहयोगार्थ लेस्टर समाजले पहल गर्दै सहयोगको हात अगाडि बढाउन अध्यक्ष शिव पराजुलीलाई सुझाव दिनुभएको बताइएको छ।
त्यसक्रममा उहाँले जेन्जीको नाममा चन्द्र–सूर्य अंकित राष्ट्रिय झन्डा बोकेर विध्वंस मचाउने र चोरीजस्ता आपराधिक गतिविधिमा संलग्न व्यक्तिहरूलाई पहिचान गरी सरकारले कारबाही गर्नुपर्नेमा जोड दिनुभयो।
“भविष्यमा यस्ता घटनाहरू दोहोरिन नदिन राज्य जिम्मेवार हुनुपर्छ,” उहाँको भनाइ थियो।
