18/10/2025
د عکس سرچینه،EPA
د طالبانو حکومت د بهرنیو چارو وزارت وايي، امیر خان متقي د ایران د بهرنیو چارو له وزیر سید عباس عراقچي سره په ټیلېفوني خبرو کې د پاکستان له خوا د افغانستان د حریم د نقض په ګډون پر ځینو سیمهییزو مسلو خبرې کړې دي.
ددغه وزارت ویاند عبدالقهار بلخي پر اېکس لیکلي، په دې خبرو کې ښاغلي متقي وویل، چې "افغانستان د جګړې پلوی نه دی، بلکې په په سر کې پاکستانی لوی د افغانستان د حریم په نقضولو د جګړې پیلوونکی و."
ښاغلي متقي دا هم ویلي چې نن د طالبانو د دفاع وزیر په مشرۍ په دوحه کې له پاکستاني لوري سره خبرې کېږي او پایلو ته یې منتظر دی.
بلخي دا هم لیکلي، ښاغلي سید عباس عراقچي د مذاکراتو او تفاهم له لارې د مسئلې پر حل د ټینګار ترڅنګ له خپله اړخه د مرستې تیاری وښوده.
د ایران د بهرنیو چارو وزارت په ټیلیګرام یوه پیغام کې د افغانستان او پاکستان وروستیو نښتو ته په اشاره د کابل او اسلام اباد ترمنځ د خبرو د پیل له امله خوښي وښوده او د دیپلوماسۍ له لارې يې د مسئلې پر حل ټینګار وکړ.
"د دوو مسلمانو هېوادونو تر منځ د ترینګلتیا دوام نه یوازې د بشري زیانونو لامل ګرځي، بلکې د ټولې سیمې ثبات هم له خطر سره مخ کوي."
