Balochistan Updates

15/09/2025

تربت: ناصر آباد میں ایل پی جی بوزر گاڑی کو آگ لگا دی گئی

تربت کے قریب ناصر آباد میں زبیدہ جلال روڈ پر نامعلوم موٹر سائیکل سواروں نے ایل پی جی گیس لے جانے والی ایک بوزر گاڑی کو روک کر آگ لگا دی۔ واقعہ تربت شہر سے تقریباً 40 کلومیٹر مغرب میں پیش آیا۔

سرکاری ذرائع کے مطابق گاڑی اپنے ترسیلی راستے پر روانہ تھی کہ مسلح افراد نے زبردستی اسے روکا اور آگ لگادی۔ شعلوں نے دیکھتے ہی دیکھتے گاڑی کو اپنی لپیٹ میں لے لیا جس سے بھاری نقصان ہوا، تاہم کسی جانی نقصان کی اطلاع نہیں ملی۔ حملہ آور کارروائی کے بعد فرار ہونے میں کامیاب ہوگئے۔

پولیس نے واقعے کی تصدیق کرتے ہوئے نامعلوم افراد کے خلاف مقدمہ درج کر کے تحقیقات شروع کر دی ہیں۔ حکام کے مطابق یہ پہلا واقعہ نہیں ہے، اس سے قبل بھی اسی روڈ پر ایل پی جی گاڑیوں کو نشانہ بنایا جا چکا ہے۔ تازہ واقعے کی ذمہ داری اب تک کسی گروہ یا تنظیم نے قبول نہیں کی۔

15/09/2025

مند کا واقعہ انتہائی بزدلانہ عمل ہے شہداء کو خراج عقیدت پیش کرتے ہیں :میر ظہور بلیدی

15/09/2025

تربت، بلیدہ کے علاقے پُناپ سے تشدد زدہ نعش برآمد

ضلع کیچ کے علاقے بلیدہ کے بُناپ ایریا سے ایک نامعلوم شخص کی نعش برآمد ہوئی ہے۔ مقامی ذرائع کے مطابق نعش کے ہاتھ پیچھے بندھے ہوئے تھے اور آنکھوں پر بھی چادر باندھی گئی تھی۔
مقامی لوگوں نے بدھ کی رات تقریباً 10 بجے نعش کو دیکھا اور مقامی انتظامیہ کو اطلاع دی۔ تاحال مقتول کی شناخت نہیں ہو سکی ہے۔

14/09/2025

تربت۔ کیچ کلچرل فیسٹیول کی آرگنائزنگ کمیٹی کے ارکان نے فیسٹیول منیجر التاز سخی کی قیادت میں بلوچی میوزک پروموٹر سوسائٹی کے واجہ بجار بلوچ اوربزرگ ادیب ودانشور یوسف عزیز گچکی سے بلوچستان اکیڈمی تربت میں ملاقات کی۔

اس موقع پر بلوچستان اکیڈمی کے چیئرمین پروفیسر ڈاکٹر غفور شاد، عبید شاد، احمد عمر، عابد علیم، یلان زامرانی ودیگر موجودتھے جبکہ وفد میں قدیرلقمان، غلام اعظم دشتی، عومر ہوت، حافظ صلاح الدین سلفی، ماجد صمد، پھلان خان، اسدبلوچ ودیگر شامل تھے۔

فیسٹیول منیجر التاز سخی نے انہیں کیچ کلچرل فیسٹیول کے مختلف سگمنٹس کے حوالے سے تفصیل سے آگاہ کیا اوربتایا کہ ڈپٹی کمشنرکیچ بشیر احمد بڑیچ کی جانب سے منعقدہونے والا یہ فیسٹیول رنگارنگ پروگرامات پرمشتمل ہوگا جس میں علمی، ادبی اور انٹرپرینیورشپ کے حوالے سے مباحثے، شعروشاعری، غزل گوئی، قصہ گوئی، میوزک کے مقابلے سمیت دیگر تفریحی وثقافتی سرگرمیاں شامل ہوں گی۔

اس موقع پر واجہ بجار بلوچ اوریوسف عزیز گچکی نے فیسٹیول کومزید بہتر اور کامیاب بنانے کے حوالے سے کئی ایک تجاویز اورمشورے دئیے اورکہاکہ کیچ کلچرل فیسٹیول کے انعقاد کافیصلہ نہایت خوش آئند اور مثبت صحت مندانہ سرگرمی ہے، فیسٹیول میں جن جن پروگرامات اور سرگرمیوں کو شامل کیاگیا ہے اس سے مقامی لوگ بالخصوص نوجوان طبقہ مستفید اورایمپاور ہوں گے۔

واجہ بجار بلوچ نے کہاکہ وہ خود کو کیچ کلچرل فیسٹیول کا حصہ سمجھتے ہوئے فیسٹیول کے سلسلے میں ہرممکن حدتک تعاون کیلئے تیارہیں۔

14/09/2025

کیچ: شاہد گچکی کی قیادت میں "مکران عوامی کاروان" کے قیام کا اعلان

کیچ (نامہ نگار) میں ایک پُروقار تقریب کے دوران معزز سیاسی رہنما شاہد گچکی نے باضابطہ طور پر مکران عوامی کاروان کے قیام کا اعلان کیا۔ اس موقع پر عوام کی بڑی تعداد شریک ہوئی اور کاروان کی قیادت پر بھرپور اعتماد کا اظہار کیا۔

اپنے خطاب میں شاہد گچکی نے کہا کہ حلقہ برسوں سے بنیادی مسائل کا شکار ہے۔ نوجوان بے روزگار ہیں، صحت کا نظام مفلوج ہے، زراعت زوال پذیر ہے اور انفراسٹرکچر تباہ حالی کا شکار ہے۔ ان کا کہنا تھا کہ مکران عوامی کاروان عوام کو ایک مضبوط پلیٹ فارم فراہم کرے گا تاکہ ان مسائل کا دیرپا حل نکالا جا سکے۔

انہوں نے اعلان کیا کہ جدید سہولیات سے آراستہ "ماڈرن دیہات" قائم کیے جائیں گے جہاں صاف پانی، بجلی، معیاری تعلیم اور بہتر صحت کی سہولیات دستیاب ہوں گی۔ نوجوانوں کے لیے ٹیکنیکل اور ہنرمندی مراکز بنائے جائیں گے تاکہ وہ جدید ٹیکنالوجی خصوصاً آرٹیفیشل انٹیلیجنس اور آئی ٹی کی تعلیم حاصل کر کے باوقار روزگار حاصل کر سکیں۔

زرعی ترقی کے حوالے سے شاہد گچکی نے کہا کہ جدید ایگرو ٹیکنالوجی، ڈرپ اریگیشن اور گرین ہاؤس فارمنگ کو فروغ دیا جائے گا تاکہ کسانوں کی آمدنی بڑھے اور فوڈ سیکیورٹی یقینی ہو سکے۔

انہوں نے واضح کیا کہ مکران عوامی کاروان کا مقصد صرف سیاست نہیں بلکہ فلاح و بہبود، معیاری تعلیم، بنیادی صحت، جدید انفراسٹرکچر اور معاشی خوشحالی ہے۔

تقریب کے اختتام پر درجنوں افراد نے مکران عوامی کاروان میں شمولیت کا اعلان کیا جن میں ایوب ملنگ، اسد ملنگ، عظیم پیری، گہرام پیری، مہلوک پیری، بالاچ پیری، علی جان پیری، امیر بخش، اکمل غلام، غلام جان، الطاف مہلوک، حنیف پھلان، عبداللطیف، شکیل احمد، جمیل احمد، شریف احمد، شمیم پھلان، عبد الحمید، عبداللہ، ساجد علی، شیر جان، محمد بخش، اعجاز بشام، شاہ نواز، علی نواز، الطاف پسند، پسند بلوچ، شاہ نواز پسند، پیری خداداد، فضل کریم، انور بارام، ماسٹر اسلام، اکبر بشیر، نادل بشیر، الطاف بشیر، عطیق بشیر، ضمیر انور، اشرف شاپک، دل مراد، حسن سید، میران سید، سید مراد، شبیر اور بارام انور شامل ہیں۔

شاہد گچکی نے کہا کہ مکران کے مزید سیاسی رہنما بھی جلد اس کاروان میں شامل ہوں گے، جس سے خطے کا سیاسی منظرنامہ تبدیل ہو گا اور ایک بہتر، کامیاب مستقبل کی راہ ہموار ہو گی۔

14/09/2025

قلات: منگچر کے قریب سڑک کنارے دھماکہ، کوئی جانی و مالی نقصان نہیں ہوا

قلات کے علاقے منگچر میں محمود گہرام روڈ کے قریب آئی ای ڈی کا دھماکہ ہوا۔ لیویز ذرائع کے مطابق دھماکہ سڑک کے کنارے ایک ویران جگہ پر کیا گیا۔

ابتدائی اطلاعات کے مطابق واقعے میں کسی قسم کا جانی یا مالی نقصان نہیں ہوا ہے۔ دھماکے کے بعد سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں۔

ذرائع کا کہنا ہے کہ مزید تحقیقات جاری ہیں۔

14/09/2025

13/09/2025

تربت۔تربت شہرمیں ڈی جے سوئیٹس اینڈ بیکرز کا شاندار افتتاح، افتتاحی تقریب میں علاقائی سیاسی، سماجی اور صحافتی شخصیات سمیت زندگی کے مختلف شعبوں سے تعلق رکھنے والے افراد نے بڑی تعداد میں شرکت کی۔

افتتاح پاکستان میڈیکل ایسوسی ایشن کیچ کے صدر ڈاکٹر عبدالغنی بلوچ نے کیا۔

تربت شہرمیں بلوچ ہسپتال سے متصل کیچ ہسپتال کے سامنے ڈی جے سوئیٹس اینڈ بیکرز کی شاندار افتتاحی تقریب ہفتہ کی شام منعقد ہوئی۔

افتتاح کافیتہ پی ایم اے کیچ کے صدر ڈاکٹر عبدالغنی بلوچ نے کاٹا، اس موقع پر معروف سیاسی وسماجی شخصیات نیشنل پارٹی کے مرکزی جوائنٹ سیکرٹری میر حمل بلوچ، بجاربلوچ،چاکر خان بلوچ، نیشنل پارٹی تحصیل تربت کے صدر طارق بابل، پی سی بی کے سابق ممبر اسکروٹنی عبدالرحیم بلوچ، محکمہ خزانہ تربت کے شوکت بلوچ، تربت پریس کلب کے صدر حافظ صلاح الدین سلفی، جنرل سیکرٹری نورشاہ نور، مقبول ناصر، طارق مسعود، ماجد صمد، پھلان خان، اسدبلوچ، یلان زامرانی، سرفراز شاہ، مبارک بلوچ، معروف شخصیت چاکر خان گچکی، عابد علیم، نزیر گاجی زئی،دلاور بشیر، بیکرز کے مالکان اصغرمحرم اور جنید مراد سمیت دیگر سیاسی وسماجی شخصیات کثیرتعدادمیں موجودتھے۔

اس موقع پر مہمانوں نے ڈی جے سوئیٹس اینڈ بیکرز کے قیام کو تربت شہر کے لیے خوش آئند قرار دیتے ہوئے کہا کہ اس ادارے کے قیام سے شہریوں کو مٹھائی اوربیکری کی معیاری اشیاء کی فراہمی یقینی ہوگی، شرکاء نے کہا کہ تربت جیسے ابھرتے ہوئے شہر میں ایسے معیاری کاروباری اداروں کا قیام ترقی اور خوشحالی کی جانب مثبت قدم ہے، شہریوں اور کاروباری حلقوں نے بھی اس اقدام کا خیرمقدم کرتے ہوئے توقع ظاہر کی کہ ڈی جے سوئیٹس اینڈ بیکرز معیار اور اعتماد کو برقرار رکھتے ہوئے شہر کی ضروریات کو پورا کرے گا۔

اصغرمحرم اور جنید مراد نے عزت افزائی اور تقریب میں شرکت پر معزز شخصیات کا تہہ دل سے شکریہ اداکیا۔

13/09/2025

تربت۔ کیچ کلچرل فیسٹیول کی آرگنائزنگ کمیٹی کے وفد نے فیسٹیول منیجر التاز سخی کی قیادت میں ڈسٹرکٹ ایجوکیشن افیسر کیچ منظور احمد بلوچ اور ڈپٹی ڈی او (فیمیل)تربت میڈم جنت عزیز سے ان کے دفاتر میں الگ الگ ملاقاتیں کیں۔

وفد میں فیسٹیول رابطہ کمیٹی کے ارکان مقبول ناصر، قدیرلقمان، غلام اعظم دشتی، عومر ہوت، حافظ صلاح الدین سلفی، ماجد صمد، پھلان خان، اسدبلوچ، مبارک بلوچ ودیگر شامل تھے۔

وفد نے ڈی ای او کیچ منظور احمد بلوچ سے ملاقات کے دوران انہیں ڈپٹی کمشنر کیچ بشیر احمد بڑیچ کی جانب سے منعقد ہونے والے کیچ کلچرل فیسٹیول کے حوالے سے تفصیل سے بریف کیا اور کہاکہ فیسٹیول کے حوالے محکمہ ایجوکیشن ایک اہم اسٹیک ہولڈر ہے، کسی بھی صحت مندانہ سرگرمی میں محکمہ تعلیم کا انتہائی اہم اور قائدانہ رول ہوتا ہے، کلچرل فیسٹیول میں ٹیچرز، اسٹوڈنٹس کی شرکت سے نہ صرف فیسٹیول کامیابی سے ہمکنار ہوگا بلکہ تفریحی مواقع کے ساتھ ساتھ طلباء وطالبات کو بہت کچھ سیکھنے کوملے گا۔

ڈی ای اوکیچ منظور احمد بلوچ نے کیچ کلچرل فیسٹیول کے انعقاد کو سراہتے ہوئے کہاکہ ڈپٹی کمشنر کیچ بشیر احمد بڑیچ کی جانب سے منعقد ہونے والا فیسٹیول انتہائی اہمیت کا حامل ہے، فیسٹیول کے حوالے سے محکمہ تعلیم ہرممکن تعاون کرے گی اورکہاکہ ہمیں جوبھی ذمہ داری سونپی جائے گی اسے کماحقہ پوراکیا جائے گا، فیسٹیول کے دوران بوائز اسکاؤٹس، گرلز گائیڈ اور والنٹیئرز کی فراہمی کے ساتھ ساتھ مختلف ایونٹس میں ٹیچرز اور اسٹوڈنٹس شریک ہوں گے، انہوں نے کہاکہ اس طرح کے ایونٹس نہ صرف عام لوگوں بلکہ اسٹوڈنٹس اور ٹیچرز کیلئے اہمیت کے حامل ہوتے ہیں۔

بعدازاں ڈی ای اوکیچ منظور احمد بلوچ کی سربراہی میں فیسٹیول آرگنائزنگ کمیٹی ٹیم نے ڈپٹی ڈی او (فیمیل) میڈم جنت عزیز سے ان کے دفترمیں ملاقات کی اورانہیں کلچرل فیسٹیول کے حوالے سے بریف کیا۔

میڈم جنت عزیز نے کیچ کلچرل فیسٹیول کے حوالے سے محکمہ تعلیم (فیمیل)کی جانب سے ہرممکن تعاون کا یقین دلایا اور ڈی سی کیچ بشیر احمد بڑیچ کی جانب سے کیچ کلچرل فیسٹیول کے انعقاد کا خیرمقدم کیا۔

13/09/2025

تربت (نمائندہ خصوصی)بوائز ماڈل ہائی اسکول تربت میں پانی کی فراہمی کے لئے عملی اقدامات شروع کر دیے گئے ہیں۔ سٹی پروجیکٹ کے ٹھیکیدار فیصل بلوچ نے اسکول میں واٹر بور کے پائپ وال نصب کر دیے ہیں اور عنقریب پانی کی سپلائی باقاعدہ طور پر شروع کر دی جائے گی۔

اس موقع پر پرنسپل بوائز ماڈل ہائی اسکول تربت نے کہا کہ میری بھرپور کوشش ہوگی کہ اسکول کے کام یکے بعد دیگرے ترجیحی بنیادوں پر مکمل کروا کر طلباء کو زیادہ سے زیادہ سہولیات فراہم کی جائیں۔

13/09/2025

تربت: کیچ کی کمسن بیٹی زارہ التاز سخی کا شعری مجموعہ جلد منظرِ عام پر

تربت سٹی سے تعلق رکھنے والی کمسن طالبہ اور نوخیز شاعرہ زارہ التاز سخی کا پہلا انگریزی شعری مجموعہ عنقریب شائع ہورہا ہے۔ زارہ، معروف نوجوان سماجی رہنماء التاز سخی کی صاحبزادی ہیں اور کم عمری کے باوجود انگریزی زبان پر شاندار دسترس رکھتی ہیں۔

ان کی شعری کتاب "ECHOQS" انسٹیٹیوٹ آف بلوچستان کے زیراہتمام شائع کی جارہی ہے، جس میں مختلف موضوعات پر کہی گئی پراثر اور فکرانگیز نظمیں شامل ہیں ۔

اہلِ کیچ اور بلوچستان کے ادبی حلقوں نے زارہ سخی کی اس کاوش کو سراہتے ہوئے کہا ہے کہ یہ نوجوان نسل کے اندر چھپے ہوئے تخلیقی جوہر کو سامنے لانے کی روشن مثال ہے۔

13/09/2025

تربت: فائرنگ کا نشانہ بننے والا عبدالغفار شیردل جانبر نہ ہو سکے۔

تربت نیشنل بینک کے قریب فرنیچر مارکیٹ میں فائرنگ کا نشانہ بننے والے عبدالغفار ولد شیردل زخموں کی تاب نہ لاتے ہوئے انتقال کر گئے۔

مرحوم حال سکنہ کلگ تربت جبکہ ان کا بنیادی تعلق بلیدہ بناپ سے تھا۔ نامعلوم مسلح افراد نے انہیں ہفتے کی دوپہر کو انکے دکان میں نشانہ بنایا تھا، جس کے بعد انہیں زخمی حالت میں اسپتال منتقل کیا گیا، تاہم وہ جانبر نہ ہو سکے۔