27/09/2025
Një pronar lokali në Pogradec ka marrë një vendim të pazakontë për një biznes, duke ndaluar hyrjen e personave nën 18 vjeç. Armand Hoxha, pronari i kafenesë që ndodhet ngjitur me gjimnazin e qytetit, thotë se kjo është një formë sensibilizimi për të mbrojtur nxënësit dhe për t’i mbajtur ata në shkollë.
“Çdo klient përkthehet në të ardhura, por për ne është më mirë të kemi një lokal bosh sesa një shkollë bosh. Po japim një mesazh edhe për pronarët e tjerë të cilët janë vetë prindër”, shprehet Hoxha.
Nisma, e cila sjell humbje ekonomike për biznesin, është vlerësuar nga psikologët, të cilët theksojnë se interesi më i lartë i fëmijëve duhet të mbetet shkolla. Ata kërkojnë që kjo nismë të shtrihet edhe në qytete të tjera të vendit.
Edhe menaxheri i lokalit thekson se ky është një hap i vogël, por i domosdoshëm: “Kjo duhet të shërbejë si shembull edhe për të tjerë, sepse mesazhet e qarta vlejnë më shumë se çdo fitim.”
