اردو شاعری

09/09/2025

ہم تو اب ہیں ہی مگر کاش ہمارے جیسے
در بدر ہونے سے پہلے ہی سنبھالے جائیں

انفال رفیق

18/08/2025

ہم نے جانا اسے
اس نے جانا ہمیں
جان پہچان کر اجنبی ہو گئے
آنکھ کی بند مٹھی میں جو خواب تھے
بند مٹھی کے اندر سسکتے رہے
خواہشوں کی رگوں میں لہو رک گیا
دھڑکنیں اپنے سر تال سب بھول کر
بے ہنر نغمہ خواں کی صدا بن گئیں
جم گئیں
بانسری کے لب خشک پر
پپڑیاں جم گئیں
گیت کے بول ہونٹوں سے گرنے لگے
خامشی چھا گئی
پاؤں بوجھل ہوئے
جو بھی زاد سفر تھا وہ لُٹتا رہا
اپنی آنکھوں سے برسات ہوتی رہی
درد بڑھتا رہا
درد سہتے رہے
ہم بھی کیا لوگ تھے
کیا سے کیا ہو گئے
جان پہچان کر اجنبی ہو گئے
یوسف خالد

16/08/2025

بس اتنی بات تھی, کہتے تو ہم ترمیم کر لیتے
سفر کو بانٹ لیتے ہم, تھکن تقسیم کر لیتے

اگر ہم سے شکایت تھی تو پھر اظہار کرنا تھا
معافی مانگ لیتے ہم, خطا تسلیم کر لیتے

ندیم ماہر

09/08/2025

20/07/2025

ایران سیستان سے لے کر پڑوس کے افغان عرب امارات سے ہوتے بلوچستان سندھ تک میں پانچ کروڑ سے زیادہ بلوچ آباد ہیں.

ان میں ہی شیتل اور اسکا شوہر ثناء اللہ بھی تھے. وہ جنہوں نے موت کے سامنے نہ سر جھکایا نہ زندگی کی بھیک مانگی. بہت بہادری سے یہ فانی زندگی چھوڑ کر چلے گئے. پیچھے مارنے والے رے گئے. یا اس واقعہ پر گواہ بنتی دنیا رے گئی.

ہمارے معاشرے میں یہ کوئی پہلا واقعہ نہیں جو کسی ایک قوم کو گالی دے کر یا ان کو معتوب کر کے دل کی بھڑاس نکال لی جائے. آپ نے بلوچ غیرت و بہادری دیکھنی ہے تو شیتل کو موت کے سامنے وقار سے چلتے دیکھ لیں. یہی غیرت کہلاتی ہے. نہتے لوگوں کو مارنے والے جاہلوں کی وجہ سے پانچ کروڑ بلوچوں کی نسلی توہین نہ کریں.

ہمارا معاشرہ بڑی بڑی باتوں کا دعویدار ہے. مثلاً ہم کہتے ہیں یہ ملک اسلام کا قلعہ ہے. افسوس یہاں اسلام ہماری زندگی میں نظر نہیں آتا. ہم کہتے ہیں ہم سب بہت غیرت مند ہیں لیکن ظالم کے سامنے ہر مظلوم کو ہمیشہ اپنا آپ تنہا ہی نظر آتا ہے. یہاں بیچ بازار لوٹ مار ہو رہی ہوتی ہے ظلم ہو رہا ہوتا ہے دیکھنے والے نظریں چرا کر نکل جاتے ہیں.

یہی سچ ہے. اور اسی سچائی کا تماشہ ہم سب بنے ہوئے ہیں. شیتل اور اس کے شوہر نے تو ہمیں بلوچ غیرت اور وفا دکھا دی اب ان جاہلوں کا حساب معاشرہ کب کرے گا.؟ کیونکہ معاشرے کی غیرت یہاں ہی نظر آئے گی.

ریاض علی خٹک

19/06/2025

😔

17/06/2025

عشق کے کشف و کرامات سمجھ لیتے ہیں
لوگ سادہ ہیں مگر بات سمجھ لیتے ہیں

زندگی چین سے جنگل میں گزر جاتی ہے
جب درختوں کے خیالات سمجھ لیتے ہیں

جس کو احکام شریعت سے گھٹن ہوتی ہے
ہم اُسے پیرِ کرامات سمجھ لیتے ہیں

وادیاں اپنی جگہ دکھ بھی الگ رکھتی ہیں
لوگ جنگل کو مضافات سمجھ لیتے ہیں

عام جوگی ہیں ، مگر ایک ہنر آتا ہے
ہم محبت کی علامات سمجھ لیتے ہیں

کتنا سادہ ہے فقیروں کا عقیدہ ساجد
دیکھ لینے کو ملاقات سمجھ لیتے ہیں

لطیف ساجد
کتاب !! دعا زاد !! سے انتخاب

15/06/2025

اپنی صورت لگی پرائی سی
جب کبھی ہم نے آئینہ دیکھا

ہائے انداز تیرے رکنے کا
وقت کو بھی رکا رکا دیکھا

تیرے جانے میں اور آنے میں
ہم نے صدیوں کا فاصلہ دیکھا

۔۔۔۔۔۔۔۔۔۔۔
سدرشن فاکر