22/05/2025
#رسائلكم
حكايتي ما لقيتلهاش تفسير،عندها خمسة سنين كان عمري 13 سنة و انا نسكن في منطقة ريفية اقرب بلاصة فيها حياة و شعب يدورو هيا بلاصة تبعد علا وين نسكن ب4 كلم ، فيها قهاوي و بلايص تبدل فيهم الجو، و كنت كل ليلة في الصيف نخرج انا و صحابي نمشولها و نروحو في الليل روطار جوايه مرة 2 تاع الليل و احنا مروحين في الطريق كنا 4, زوج سبقونا باش يخلعونا و واحد بقا معايا نمشو و نحكو حتى وحد شجرة تاع زيتون تبعد علينا حكاية 50 ميترا و على ضوء القمر شفنا تحتها حاجة تمشي على 4 رجلين بقينا نتعاندو هو يقلي كلب كبير و انا نضحك و نقلو معزة و من بعد فتنا الحكايا بصح بقيت سقسيت روحي إذا كانت معزة وش جابها فالوقت المتأخر هذا في بلاصة خالية و قلت للطفل هيا نرجعو نزيدو نثبتو و اصحابنا الزوج الاخرين كانو شاعلين ضوء التلفون تسما كنت نشوف في كل الظلمة غير ضو التلفون تاعهم بعيد علينا يستنو فينا، المهم رجعنا باش نتأكدو و المشكلة لقيناها في نفس البلاصة و الغريبة كانت تبع فينا براسها و مركزة معانا و عينيها كانو يلمعو و يعكسو في ضوء التلفون، كنا بعاد 10 ميترات عليها و كي قربنا نوصلولها خفنا خاطر منضرها يخوف و ماهيش معزة كي المعيز لي نعرفوهم، قعدنا حابسين و نحكو بالشوية باش ما تسمعناش حتى نشوفوا فيها وقفت على رجليها زوج التوالا و بدات تمشي كي العبد من الخلعة صاحبي هرب و انا ما قدرتش نتحرك طحت على ظهري و بقيت نخزر مانيش مصدق شكلها يخوف و ملامحها كانت كيما تاع الإنسان حسيتها تحولت و عينيها قرابو لنص وجها و فمها قرب لنيفها و بدات تحكي كلام مهوش مفهوم كأنو تمتمات، من بعد و انا مزالني طايح على ظهري و مانيش قادر نتحرك و سروالي ديجا ولا ماء، قربتلي شوية و حبست، يعني قبل ما توصل لعندي توقفت كأنها صنم حتى رجعو صحابنا لي سبقونا و شافوني في ذيك الحالة و هي كي شافتهم هربت تجري كيما الانسان و بقاو هوما يزقو و مصدومين و من بعد صحابي قالولي شفنا في يدها قلة و كي هربت طيشتها بعيد، و من بعد حوسنا على صاحبي الي كان معايا و هرب للقهوة المهم حتى لقيناها جاي و جاب معاه بزاف رجالا و المشكلة مش مصدقينو بصح حسيتهم مصدومين، و انا من ذاك النهار بقيت حكاية شهرين ما خرجتش من الدار، بعد مدة فهمت بلي البلاصة لي لقيناها فيها بلاصة في التسعينات كانو يذبحو فيها العباد باش يخرجو الكنوز و زيد صارت فيها ياسر جرائم قتل و قت لي رجعنا بعد مدة للبلاصة بجنب الزيتونة الي شفناها تحتها كاين بير حكولي بلي البير هذاك كان مرا واحد بطونوبيلتو حد البير جاو ناس قتلو الراجل و سرقولو الطونوبيل و حرقوه و قاسوه فالبير.
