17/06/2026
پریس ریلیز
مورخہ 17جون 2026
تھانہ پیر بابا پولیس کی کامیاب کارروائی، قتل و اقدامِ قتل میں ملوث مرکزی ملزم چند گھنٹوں کے اندر گرفتار
تفصیلات کے مطابق کل مورخہ 16 جون 2026 کو تھانہ پیر بابا کی حدود میں ایک افسوسناک واقعہ پیش آیا، جس میں سابقہ دلبدی کی بنا پر ایک شخص نے فٹ بال گراؤنڈ میں مسمی تجمل شاہ پر اسلحہ آتشیں سے فائرنگ کر دی، جس کے نتیجے میں وہ موقع پر جاں بحق ہوگیا۔ واقعہ کے بعد ملزم اپنے ایک امدادی ساتھی کے ہمراہ جائے وقوعہ سے فرار ہونے میں کامیاب ہوگیا۔
واقعہ کی اطلاع ملتے ہی تھانہ پیر بابا پولیس موقع پر پہنچ گئی اور ضروری قانونی کارروائی عمل میں لائی گئی۔ مقتول کے بھائی کی مدعیت میں نامزد ملزمان کے خلاف قتل اور اقدامِ قتل کی دفعات کے تحت مقدمہ درج کر لیا گیا۔
ڈسٹرکٹ پولیس آفیسر بونیر محمد عتیق شاہ نے واقعہ کا فوری نوٹس لیتے ہوئے مقامی پولیس کو ملزمان کی جلد از جلد گرفتاری کا ٹاسک سونپا۔ ایس ایچ او تھانہ پیر بابا صراط خان نے اپنی ٹیم کے ہمراہ دن رات محنت، جدید تفتیشی خطوط اور پیشہ ورانہ مہارت کو بروئے کار لاتے ہوئے قلیل مدت میں اہم کامیابی حاصل کی۔
پولیس نے کارروائی کرتے ہوئے وقوعہ میں نامزد مرکزی ملزم یحییٰ ولد نور باچا سکنہ پاچہ کلے کو چند گھنٹوں کے اندر گرفتار کر لیا، جسے مزید تفتیش کے لیے شعبۂ تفتیش کے حوالے کر دیا گیا ہے۔ ملزم سے مزید تفتیش جاری ہے، جبکہ مقدمہ میں نامزد دوسرے ملزم کی گرفتاری کے لیے چھاپہ مار کارروائیاں اور تلاش جاری ہے۔
ڈسٹرکٹ پولیس آفیسر بونیر محمد عتیق شاہ نے کامیاب کارروائی پر پولیس ٹیم کی کارکردگی کو سراہتے ہوئے انہیں شاباش دی اور ہدایت جاری کی کہ مقدمہ کی تفتیش مکمل میرٹ، شفافیت اور قانون کے تقاضوں کے مطابق مکمل کی جائے، بروقت چالان عدالت میں جمع کرایا جائے اور ملزمان کو قرار واقعی سزا دلوانے کے لیے تمام قانونی اقدامات یقینی بنائے جائیں۔
ترجمان بونیر پولیس
