02/06/2025
დედოფლისწყაროში, ე.წ. „შავ მთაზე“ სამონასტრო კომპლექსის აღდგენა იწყება. დედოფლისწყაროს საზღვრისპირა სოფლების მაცხოვრებლების ინიციატივით და შემოწირულობებით საძირკვლის ნანგრევებზე მონასტრის აშენება იგეგმება. 1 ივნისს ადგილობრივი მოსახლეობა და ხორნაბუჯისა და ჰერეთის ეპარქიის სასულიერო პირები შავ მთაზე შეიკრიბნენ და პარაკლისი გადაიხადეს, შემდეგ კი ადგილი აკურთხეს.
რამდენიმე წლის წინ ადგილობრივების ინიციატივით აქ ჯვარი აღმართეს, ეკლესიის მშენებლობის იდეაც მრავალი წელია არსებობს.
ვაშლოვანის დაცულ ტერიტორიებზე, მიჯნისყურესთან მდებარე შავ მთაზე ძველად მონასტერი მოქმედებდა. წყაროების მიხედვით ესაა IV-V საუკუნის ტაძარი, რომლის იატაკის და საძირკვლის მხოლოდ ნაშთებია შემორჩენილი.
ესაა ადგილი, სადაც სამშობლოში უკანასკნელი ღამე გაათენა, კახეთის დედოფალმა წმინდა დიდმოწამე ქეთევანმა. შავი მთა დედათა მონასტერის ნანგრევების ჩათვლით ვაშლოვანის ეროვნული პარკის ტერიტორიას წარმოადგენს. არქეოლოგიური კვლევის შედეგად მოძიებული ამ მონასტრის ფრაგმენტები (ქვა ჯვრის ფრაგმენტი) დედოფლისწყაროს მხარეთმცოდნეობის მუზეუმში ინახება.
