29/10/2025
🇬🇪 ხუთი ქართველის მოლოდინში!
⚽️ დღეს საფეხბურთო დღეა და შესაძლოა, მწვანე საფარზე ხუთი ქართველი ვიხილოთ!
🇮🇹 21:30 საათზე, ტურინის „ იუვენტუსი “ „ უდინეზეს “ უმასპინძლებს, რომლის რიგებშიც, ქართველი, საბა გოგლიჩიძე ირიცხება. გოგლიჩიძე, სანაკრებო პაუზის შემდეგ, ძირითადი შემადგენლობის უცვლელი წევრი გახდა და დიდია ალბათობა, რომ ტურინელების წინააღმდეგ, ისევ სასტარტო შემადგენლობაში ვიხილოთ! ქართველს „ იუვენტუსის “ წინააღმდეგ ადრეც უთამაშია, კერძოდ, 2024 წლის 14 სექტემბერს, როდესაც გოგლიჩიძე „ ემპოლის “ რიგებში ირიცხებოდა! შეიძლება ითქვას, რომ ეს ქართველის კარიერაში ერთ - ერთი საუკეთესო მატჩი იყო!
🇫🇷 საფრანგეთში სამი ქართველის მატჩს უნდა ველოდოთ!
„ ლიგა 1 “ - ის თამაშები სტარტს 22:00 საათზე აიღებს. გიორგი წიტაიშვილისა და გიორგი აბუაშვილის „ მეცი “, სახლში, „ ლენსს “ მიიღებს! სანაკრებო პაუზის შემდეგ, როგორც გოგლიჩიძე, აბუაშვილიც თავისი კლუბის ძირითად შემადგენლობაში უცვლელად დგას! ხოლო წიტაიშვილმა ერთხელ ძირითადში დაიწყო, მეორედ კი თამაშში შეცვლიდან ჩაერთო! „ მეცი “, შეიძლება ითქვას, რომ საშინელ ფორმაშია! ცხრა ტურის შემდეგ, გუნდს ჯერ თამაში არ მოუგია და ორი ქულით ბოლო ადგილზეა. იქიდან გამომდინარე, რომ მათი მეტოქე მეორეადგილოსანი „ ლენსია “, უნდა ვივარაუდოთ, რომ გამარჯვების მოპოვება, დღესაც ძალიან რთული იქნება! რაც შეეხება ქართველებს, დიდი ალბათობით, ორივეს ძირითად შემადგენლობაში ვიხილავთ!
„ ლიგა 1 “ - ის კვირეულს, არც ხვიჩა კვარაცხელია გამოაკლდება. „ პსჟ “, „ ლიგა 2 “ - დან აღზევებულ „ ლორიენს “ დაუპირისპირდება. ქართველი მშვენიერ ფორმაშია და ეს სტატისტიკაშიც ისახება. კვარამ, ბოლო ორ მატჩში, გოლი და ორი საგოლე პასი მიითვალა! დიდი შანსია, რომ დღეს ფრანგულ გუნდს, ოქროს ბურთის მფლობელი, უსმან დემბელე დაუბრუნდეს, მაგრამ ჯერ გაურკვეველია მატჩს ძირითადი შემადგენლობიდან დაიწყებს თუ არა. კვარაცხელიას ძირითადში არ ყოფნა კი ნაკლებად სავარაუდოა, ამის საბაბს კი, ქართველის კარგი ფორმა გვაძლევს!
🏴 დღის ბოლოს კი ინგლისისკენ უნდა წავიდეთ, სადაც „ EFL თასის “ თამაშები გაიმართება, გიორგი მამარდაშვილის „ ლივერპული “ კი „ კრისტალ პალასს “ დაუპირისპირდება! თასის თამაშებზე როტაცია ხშირია და შესაძლოა „ ლივერპულის “ კარი არა გიორგი მამარდაშვილმა, არამედ „ პრესტონიდან “ გადმოსულმა ფრედი ვუდმენმა დაიცვას. ამას ის შედეგიც განაპირობებს, რომ, ქართველთან ერთად, გუნდმა ყველა მატჩში მინიმუმ ერთი გოლი გაუშვა, მაგრამ, რა თქმა უნდა, ეს მხოლოდ მამარდაშვილის ბრალი არ არის, ამიტომ მოვლენებს წინ ვერ გავუსწრებთ! თამაში, საქართველოს დროით, 23:30 საათზე დაიწყება!
